1 Tesalonike 5 - Takarata pɛ Sɔ Mbombe Mbon

Ɔ adung nɛ zɔma hazu keri nɛ pea pɛ * Kongawan

¹ Hio ya ɔ, ɔ lɛm fin ngɛriki ma mɔ hazu osi ha ɛnɛ yala mana ngimɔ ka mɔ ndɔng behɔ nɛ, na.

² Hazu ɛnɛ nɛ pɛ ɛnɛ tɛ ingɔ nɛdedea nde, ma wi ndang ing swe ka Kongawan bepe nɛ na, hazu a behɔ tuka wanzu ka hɔ nɛ zɛ.

³ Ha ngimɔ ka hio wi betɔ nde, hoo, mɔ fɛt nɛ gaa, yeksamɔ bo na, yo nê ha ndangtɛ ngimɔ ɛngi ka gasa yeksamɔ bewang mbwa. Nɛ mbwa lɛm kpɔy ang na. Yo bedung tuka yimtɛ bio bhɛ ka kpa nazang.

⁴ Ma, pɛ ɛnɛ hio ya ɔ, ɛnɛ bo ha zang tutum na. Mɛgi, swe ɛngɛ lɛm wang ɛnɛ wang tuka wanzu na.

⁵ Hazu, ɛnɛ fɛt nê hio wi pɛ saamɔ, ɛnɛ nê hio wi mɔ gasa swe. Ɔ hinɛ ɛnɛ fɛt, ɔ bo nê pɛ zɛ mana pɛ tutum na.

⁶ Mɛgi, ka ɔ aɔla tuka hio mbing wi na. Ma, ɔ adung nɛ zɔma ngɛlɛlɛ.

⁷ Hazu hio wi dung mɛ ɔla nɛ zɛ. Nɛ mbwa dung fin mɛ fe dɔkɔ nɛ zɛ.

⁸ Ma, ka bo nê pɛ ɔ hinɛ ɛnɛ, ɔ nê hio wi mɔ gasa swe. Mɛgi, lɛma nde, ɔ adung ngɛlɛlɛ. Ɔ ayol mɛkaramɔ nɛ ngoy tuka koko mɔ bibulo ha mbanzi ɔ. Nɛ tuka ndutu bolo, ɔ ayol *mɔgdetazu ɔ nde, Sɔ bekpasisi ɔ.

⁹ Sɔ weka ɔ bo hazu de ngambi sungiri ɔ na, ma, a weka ɔ hazu kpasisi ɔ nɛ wal Kongawan pɛ ɔ, Jésus-Christ.

¹⁰ Hazu Christ fea gɔn zu ɔ tuka nde, ɔ adung nɛ zutunɔ hinɛ wɛnɛ gbesi, ngase ka ɔ fea, ngase ka ɔ bhɔna nɛ zutunɔ ha pea pɛa.

¹¹ Hazu ɛngi, ɛnɛ ayɔkili may nɛ ɛnɛ agbakiri may, gbesi tuka ka ɛnɛ ha dea nɛ sising.

Kpogio mbɔla nɛ fani

¹² Hio ya ɔ, ɔ ani ha ɛnɛ nde, ɛnɛ aba nɛ zioa hio wi ndɔng ka de ngatom ha soko ɛnɛ, ka *Kongawan gdea ha zu ɛnɛ, nɛ ka ha mbɔla ha ɛnɛ.

¹³ Ɛnɛ atusisi tɛ mbwa, nɛ ɛnɛ angoy mbwa nɛkpasa hazu tom pɛ mbwa. Ɛnɛ ade le nɛ gaamɔ ha soko may.

¹⁴ Hio ya ɔ, ɔ mbo ɛnɛ nde, ɛnɛ aha mbɔla ha hio pɔsa wi, ɛnɛ aha da ha hio wan-ke, ɛnɛ agbakiri hio mɔka wi, nɛ ɛnɛ aba sila ɛnɛ nɛ hio wi fɛt.

¹⁵ Ɛnɛ pangay nde, ka ɛnɛ akifiri gdangamɔ ha wi ka dea gdangamɔ ha tɛ ɛnɛ, na. Ma, swe fɛt, ɛnɛ aki wal mɛ de dedemɔ ha soko may nɛ ha tɛ wi fɛt.

¹⁶ Ɛnɛ adung nɛ totɛ swe fɛt.

¹⁷ Ɛnɛ abhɔn ha gɔa Sɔ kpoo.

¹⁸ Ɛnɛ aha oeba ha Sɔ ha zang mɔ fɛt. Hazu Sɔ ngoya nde, ɛnɛ ka de sɔy hinɛ Jésus-Christ, ɛnɛ ade mɛgi.

¹⁹ Ka ɛnɛ agdɔki wal ha *Nzɔy-Sɔtɛ na.

²⁰ Ka ɛnɛ abhɛsiri hio kuliwen na.

²¹ Ma, ɛnɛ ambari soko hio kuliwen fɛt, nɛ ɛnɛ apam ɛ ndɔng ka dung nɛ dedea.

²² Ɛnɛ alak tili gdangamɔ fɛt gde.

²³ Sɔ, wan-ha gaamɔ, alɛmsiri ɛnɛ nɛ nzɔya wɛɛ. Wɛnɛ apam sɔtɛ ɛnɛ, tunɔ pɛ ɛnɛ, nɛ kilitɛ ɛnɛ nɛdedea fɛt yu nde, ma wen betɛ dung ha zu ɛnɛ ha swe ka Kongawan pɛ ɔ, Jésus-Christ, bepe nɛ.

²⁴ Sɔ ka saa ɛnɛ, belɛmsiri mɔ ndɔng, hazu wɛnɛ nɛ mboazu.

²⁵ Hio ya ɔ, ɛnɛ agɔ Sɔ hazu ɔ fin.

²⁶ Ɛnɛ fan hio ya ha Christ fɛt nɛ nzɔy duyo mbuku.

²⁷ Mi alnu ha ɛnɛ nɛ ling Kongawan nde, ɛnɛ atɔl takarata ɛngɛ ha li hio ya ha Christ fɛt.

²⁸ Kongawan pɛ ɔ, Jésus-Christ, ade *dede sila ha tɛ ɛnɛ.