YOHANA 8 - Nouveau Testament Doyayo

YOHANA 8

¹ Yeesu tuu dɔ̀ɔ̀ a Kɔ̧ɔ̧b Ga̧a̧t ha.

² Lɛlyɔ bɛɛ gaako, wɛɛ tiiz a Bɛtluk du, dood sɛw hi zaa a ge, gii ɗɔɔt goksihi hinɛ.

³ Yɔ anbɔ Bɛtmaakdɔkya wɔ hi Farisaya wɔ hi kamz nis za yɔ hi wa̧a̧zig gi naak a mans du, hi esig a saal teesdu hi raa Yeesu

⁴ a Hingokya , nis yɛrɛ wi zɛmzig mans du wi wa̧a̧ wi kamzige.

^5-6 Muusa raaw a maakɔdɔgl bɔ gedu be, a hi zɛm nis gi mansgɔk anyɔ hi wa̧a̧ge hi duutinge bet gi wɔrɔ. (Yɔ ha̧a̧hi an hi ton Yeesu dɔglɛ an kuudu hi mɛɛg wa̧a̧ko) hi warige a yɛrɛ mɔya, mɔ dɔg a nɔ? Yeesu hu̧u̧r bi̧i̧ hin hi naanwalɔ a hɛbtdi.

⁷ Yɔ hi gig gbork warki, gii wɛɛ ɗundɔ raahi a za̧a̧nyɔ taan hinha̧a̧l a nɛ teesdu gɛ, loog beto gi yɛɛl nis yɛrɛ duuko.

⁸ Wɛɛ hu̧u̧r bi̧i̧ hin hi naanwalɔ a hɛbtdi.

⁹ Yɔ wɔrɔ hi lag dɔgl bɔrɔ anbɔ hi hɔms gbunu gbunu hi reekɔ, yɛɛl a ɗɛntɛ, tuur a walɛsɛrɛ wɔ hi sɛw, hi ɔɔ Yeesu gi gbunu hi nis bɔ hi esig nɛ a saal tees bɔ gedu.

¹⁰ Yɔ Yeesu wɛɛ gi ɗuks zulɔ ha gbɛn nis bɔ gi gbunu. Wɛɛ warige a nisyɔ, dood wɔ hi gɛ̧ɛ̧num nɛ dɔgl hi gaay nɔ? Doo za wa̧a̧num dɔgl gɛ ya?

¹¹ Nis bɔ ta̧a̧ a Ɗɛntyɔ, doo za taaro. Yeesu wɛɛ raage a bee hɛw be taam dɔgl wa̧a̧nuko, rekumɔ, bɔmɔ wɛɛ mɔ gɔ hinha̧a̧l za. ]

¹² Yeesu wɛɛ dɔgɔ: a bee gi lɛlgaal waal du, za̧a̧nyɔ fɔbe, taa ɛmbik lɛlwil du, gi dag lɛlgaal za̧a̧tigi.

¹³ Farisaya wɔ hi wɛɛ hi raage a mɔ boosig zul mɔɔn dɔglɛ, dɔgl mɔ bɔrɔ dɔglɔ taa dɔgl rɔbo.

¹⁴ Yeesu goohi a an be boosig zul been dɔgl si̧, dɔglɔ gi rɔbo. Be mɛɛ lɛlyɔ be fu̧u̧zɔ hi lɛlyɔ be reko. Yɛrɛ nɛya, nɛ mɛ̄ɛ̄ lɛl yɔ be fu̧u̧z du hi lɛlyɔ be rek du gɛ.

¹⁵ Nɛ yɛ̧ɛ̧k dɔgl an dood gɔ hi yɛ̧ɛ̧ko, benɛ bé gbaas doo za dɔgl hinɔ gɛ.

¹⁶ Wɛɛ an be gbaak dɔgl si̧, dɔgl be gbaak bɔ gi hi gbɔnɔ. Be taa be gbunu, Baa bɔ yaazibe gi hi beya.

¹⁷ Hi bi̧i̧ a nɛ maak ɗɛɛrwol du a dood eerɛ, ya̧a̧ya̧ gi ɔks gbunu, dɔglya̧ gi rɔbo.

¹⁸ Be boosig zul been dɔglɛ; wɛɛ Baa be yɔ yaazibe gi book dɔgl beenɛ.

¹⁹ Farisaya wɔ hi wɛɛ hi warige a Baa mɔ bɔ gi ay? Yeesu goohi a nɛ́ mɛ̄ɛ̄ bee gɛ, nɛ́ mɛ̄ɛ̄ Baa be hɛw gɛ. À nɛ mɛɛ nɛ Baa be, yɔ nɛ mɛɛ bee hɛw.

²⁰ Yeesu dɔg ɗɔgl wɔrɔ yɔ gi hingok a Bɛtluk du a gaaslɛl yɔ gɔ hi gaak ge; yɔ wa̧a̧k ɔ̧tɔ riid gɛ be, doo za wa̧a̧g gɛ.

²¹ Yeesu raahi ɓɛ a be gi rekrekɔ, nɛ ɓɛɛbe, nɛ wɛɛ nɛ wɔr a nɛ hinha̧a̧l du. Wɛɛ ɗɛɛ an nɛ tuur a lɛlyɔ be rek ge gɛ.

²² Yahuduya wɔ hi warɔ a yɔ raa a nɛ ɗɛɛ rek a lɛlyɔ be rek ge gɛ rɛ, gi rek zul ɔɔn gbɔŋk ger ya?

²³ Wɛɛ raahi a nɛya nɛ fu̧u̧z a wɛɛdisɛ, wɛɛ beya be fu̧u̧z a wɛɛha. Nɛɛ nɛ fu̧u̧ a waal yɛrɛ gedu; beya bé fu̧u̧ a waal yɛrɛ gedu gɛ.

²⁴ Be raanɛ a nɛ wɔr a nɛ hinha̧a̧l du. Yɔ anbɔ nɛ́ ɗɔ̄bs a be gi za̧a̧nɔ gii gɛ, nɛ wɔr a nɛ hinha̧a̧l du.

²⁵ Farisaya wɔ hi warige a mɔɔ bɔ an mɔ booya̧a̧ anbɔ? Yeesu goohi a be gisin hinɔ raak yɛɛl a biitirnaan du.

²⁶ Be gin hin kittɔnɔ an be dɔgɔ an be gbansin dɔglɛ. Yɛrɛ Za̧a̧nyɔ yaazib gi Doo rɔbo. Wɛɛ hinyɔ be kɛm a ge, be book gii a waal du.

²⁷ Hɔnɛ dood wɔ hí kɛ̄m a gi book Baa bɔ dɔglɔ gii gɛ.

²⁸ Yeesu raahi a gɔ nɛ pɛɛ Za̧a̧n Waa bɔ wɛɛha, nɛ mɛks a be giro. Nɛ́ wɛɛ nɛ mɛɛ a bé wōō hinza hi zul be gɛ, be book anyɔ Baa be goksibe.

²⁹ Za̧a̧nyɔ yaazibe gi hi beya, be waak wook hinyɔ bɛsige, ya̧a̧nɛ gi ɔ̄ɔb be gbun gɛ.

³⁰ Anyɔ Yeesu gi dɔk anbɔ, dood kittɔnɔ hi gig ɗɔbsugo.

³¹ Yeesu wɛɛ raa Yahuduya wɔ hi gig ɗɔbsugo a an nɛ waa a be dɔgl du, nɛ gi walɛsɛrɛ beenɛ hi rɔbo,

³² nɛ wɛɛ nɛ mɛɛ rɔbo, wɛɛ hinrɔb bɔ gi tuus zul nɛ a hinha̧a̧l du gi gbaan aakil du.

³³ Hi googe: a wɛya wɛ Abraham waato, wɛɛ wɛ wɛɛsir doo za gbaarɛ hinɔ gɛ be. Mɔ wɛɛ mɔ raak ri a nɛ dag zul nɛ aakil du nɔ?

³⁴ Yeesu goohi a be raasin rɔbo: za̧a̧nyɔ gi wook hin-ha̧a̧lɛ gi hinha̧a̧l gbaaryɔ.

³⁵ Gbaar taa waak raa du faa, waa mɔɔl ɔnɛ gi waak faa.

³⁶ Gid bee Bɛt waa bɔ be tuus zul nɛ a hinha̧a̧l du, hi rɔbo, zul nɛ gi gi aakil du be.

³⁷ Be mɛɛmɛ a nɛ Àbraham waato, yɛrɛ yɔ dɔgl be tal nɛ kpoos du gɛ, ha̧a̧nɛ an nɛ gbɔ̧be.

³⁸ Be raak hinyɔ be gbɛnz a Baa be ge giya. Wɛɛ nɛya nɛ wook hinyɔ nɛ lag a baa nɛ gbaŋ gii be.

³⁹ Hi gòòge a baa wi gɛ Abraham. Yeesu goohi a à nɛ gi nɛ Àbraham waato, yɔ nɛ woo hinyɔ Abraham woo giya.

⁴⁰ Yɛrɛ ɓɔryɔ nɛ tɛk an nɛ gbɔ̧be, bee yɔ be raasin rɔb yɔ be lag a Bɛt ge gii kpɔd! Abraham wōō hin anbɔ gɛ.

⁴¹ Nɛɛ nɛ wook baa nɛ woosɛ. Wɔrɔ hi googe: a wi taa manswaato; wi gin Baa wi gbun kpɔd, gɛ Bɛto.

⁴² Yeesu raahi a à Bɛt gi nɛ Baa nɛ giya, yɔ ha̧a̧n a be muulɛ, be fu̧u̧z a Bɛt ge ro be zaa waal du. Bé mɔ̄k hi zul benɛ an be zaa gɛ, gii yaazibe.

⁴³ Nɔ nɛ kɛ̄msib ya̧a̧boon be yɛrɛ gɛ? Yɔ ha̧a̧n dɔgl be kɛŋk gɛ giya.

⁴⁴ Loorɛha̧a̧l gii baa nɛ, wɛɛ ha̧a̧n baa nɛ ɗɔkumɔ ha̧a̧lɔ wɔ hii fɔko. Gii gi doogbɔŋkya yɛɛl a bii-tirnaan du. Yɔ rɔb taa a ge, gi doo-mɛlyayɔ, hā̧a̧g rɔb dɔgl gɛ. Yɔ gi doo ya̧a̧gɔ̧ɔ̧nya, gi ya̧a̧gɔ̧ɔ̧n baatɔ, gɔ gi book ya̧a̧gɔ̧ɔ̧nɛ, gi book ya̧a̧boon ɔ̧ɔ̧nɛ.

⁴⁵ Yɔ bee be gisin raak rɔb gii nɛ ta̧a̧sib dɔgl be gɛ.

⁴⁶ Bɔ za̧a̧nɔ gi zuun a nɛ teesdu a be wook hinha̧a̧l nɔ? Nɛ yɔ be raak rɔb be, nɔ nɛ ta̧a̧sib dɔgl be ma gɛ?

⁴⁷ Za̧a̧nyɔ fu̧u̧z a Bɛt ge gi kɛnk Bɛt dɔglɛ; yɔ nɛɛ nɛ fu̧u̧z a Bɛt ge gɛ be, nɛ kɛm gɛ.

⁴⁸ Yahuduya wɔ hi googe a nɛ wi raa rɔbo a mɔ Samariyayayɔ, nɛ mɔ gin loorɛha̧a̧l ma mi!

⁴⁹ Yeesu goohi a be taan loorɛha̧a̧lɛ. Yɛrɛ bee be gi ɗɔbsig Baa be giya, nɛɛ nɛ wɛɛ nɛ gib niiko.

⁵⁰ Be taa tɛk gbɔlums benɛ; doo gbun ro gi ɓɛɛk gbɔlums be bɔ, za̧a̧nɔ gii gi gbaas dood dɔglɛ.

⁵¹ Be raasin hi rɔbo, za̧a̧nyɔ wa̧a̧ dɔgl be a gi kpoos du, taa wɔrk gbɛnk faa.

⁵² Yahuduya wɔ hi raage a yɛrɛ wi mɛɛ ma gɔ a mɔ gin loorɛha̧a̧lɛ mɔ muul du. Abraham wɔɔrɔ, Bɛtya̧a̧kɛŋkya wɔ hi wɔɔr hɛw. Mɔɔ mɔ raak ri ma a za̧a̧nɔ gi wa̧a̧ dɔgl mɔ taa wɔrk gbɛnik faa nɔ?

⁵³ Mɔ tɔɔ mɔ daar baa wɛ wɔrki Abraham daar ya? Bɛtya̧a̧kɛŋkya wɔ hi wɔr be. Mɔɔ mɔ seek zul mɔ an bɔ?

⁵⁴ Yeesu goo a an be gi ɗɔbsig zul beenɛ, ɗɔbsig be yɔ wɛɛ hintɔsyɔ. Baa be gib ɗɔbsugo, gii gi Za̧a̧nyɔ nɛ gig raak a Bɛt nɛɛnɛ,

⁵⁵ nɛ́ wɛɛ nɛ mɛɛg gɛ. Benɛ be mɛɛge; wɛɛ à be raa nɛ a be mɛɛg gɛ, yɔ be riitin hi nɛya.

⁵⁶ Yɔ baa nɛ Abraham gi nɛ mɔkig amntɔnɔ an gi gbɛn ɔ̧t benɛ, gin nɛ hat gbɔɔltɔnɔ. Gbɛn ɔ̧tɔ gbɛn ma hɛw, wɛɛ dag hat a gedu hɛw.

⁵⁷ Yahuduya wɔ hi warige a mɔ taan wɛl dumbili nɔɔn hɛwi, mɔ gbɛn Abraham ri?

⁵⁸ Yeesu raahi a be dɔgsin rɔbo, anyɔ Abraham da mɔɔyd gɛ, bee be giiro.

⁵⁹ Yɔ anbɔ hi tuu bet an hi duunige, gii yɔ gbɛn anbɔ yaatɔ, tuu ɔɔ Bɛtluk bɔ.