YOHANA 7 - Nouveau Testament Doyayo

YOHANA 7

¹ Yɔ kuudu anbɔ labɔ, Yahuduya wɔ hi ɓɛɛk Yeesu an hi gbɔŋge. Yɔ gbɛn anbɔ, hā̧a̧g waak a Yahuduya gɛ, ɛmb gbɛ̧ɛ̧ka ma Galile.

² Yahuduya luk gbandilya naab bɔ sɛ̧ɛ̧b be.

³ Yeesu yɛ̧ɛ̧dɛ ɔ̧ɔ̧ hi raage a ɔɔm lɛlyɔdi, mɔ rek a Yahuduya an fɔkya mɔ wɔ hi gbɛn gɛrs yɔ mɔ wooko.

⁴ Yɔ anbɔ doo za gi ha̧a̧g an dood hi mɛɛge, wōō hin a yaatillɛl gɛ. Mɔ́ gi wook hin wɔrɔ zuunum zul mɔ a waal du.

⁵ Yɛ̧ɛ̧dɛ ɔ̧ɔ̧ hi ɗɔbsig hɛw gɛ, ya̧a̧nɛ hi booya̧a̧ anbɔ.

⁶ Yeesu raahi a benɛ ɔ̧t be riid ket gɛ, nɛnɛ ɔ̧t nɛ waa riikyɔ.

⁷ Waal ɗɛ̄ɛ̄ an gi hɛ̧ɛ̧ninlɔl gɛ; yɛrɛ benɛ be book dɔglɔ a woosɔ wɔ bɛr gɛ, ya̧a̧nɛ gi gib lɔlhɛ̧ɛ̧nuko.

⁸ Nɛɛ dɔ̀ɔn naab bɔ, benɛ ɔ̧t be riid gɛ, be taa dɔɔk naab bɔ kete.

⁹ Yɔ raahi anbɔ kɔmz a Galile.

¹⁰ Yɔ Yeesu yɛ̧ɛ̧dɛ ɔ̧ɔ̧ hi dɔɔ naab bɔ, gii hi zulɔ zol dɔɔ hɛw.

¹¹ Yɔ anbɔ Yahuduya wɔ hi gig ɓɛɛk be hi gig wark a naab bɔ gedu a gi ma ay nɔ?

¹² Hi faltingo dɔglɔ gbɔɔltɔnɔ hi ya̧a̧tamsɛ a saal bɔ gedu. Dood zaadɛ hi raako a doo rɔbo, wɛɛ zaadɛ hi raak be a gi dood waksigyayɔ.

¹³ Anyɔ hoob gihi ha̧a̧k Yahuduya wɔ, doo za bōō dɔglɔ tuu ha gɛ.

¹⁴ A naab teesdu Yeesu dɔɔ a Bɛtluk du mɛɛ hingokyɔ.

¹⁵ Yɔ hin gokɔ bɔ kɔms Yahuduya wɔ gɛrsɛ hi warɔ a nɛ za̧a̧n yɛrɛ mɛɛhin ay, wɛɛ zaŋga gɛ be?

¹⁶ Yeesu goohi a hingok yɔ be goko, taa fu̧u̧zig a beege, gi fu̧u̧zig a Za̧a̧nyɔ yaazib ge.

¹⁷ Doo za gi ha̧a̧g an gi woo Bɛt ha̧a̧tigɔ, gi mɛɛ a hingok wɛrɛ be goko gid fu̧u̧z a Bɛt ge, zaabe, gid be book hin wɛrɛ hi zul beenɛ.

¹⁸ Za̧a̧nyɔ gi book hin hi zulɔ tɛŋkɔ, gi ɓɛɛsig zulɔ gbɔlumsɛ; yɛrɛ za̧a̧nyɔ gi ɓɛɛk za̧a̧nyɔ yaazig gbɔlumsɔ be, gii gi za̧a̧n rɔbo, wɛɛ hinza a̧a̧b taa a ge.

¹⁹ Muusa gāan Bɛtmaakdɔgl gɛ ya? Wɛɛ doo za gbun fɔ dɔglɔ bɔ gɛ be! Nɛ nɛ ɓɛɛk an nɛ gbɔ̧b a nɔ dɔŋgo?

²⁰ Dood saal wɔ hi gidi hi ta̧a̧ a mɔ gin loorɛha̧a̧lɛ, bɔ gim tɛk an gi gbɔm nɔ?

²¹ Yeesu goohi a be woowoos gbunu, wɛɛ, nɛɛ sɛw, yɔɔnyɔ.

²² Muusa gaan dɔmsdɔglɛ, hinɔ fu̧u̧z a Muusa ge gɛ, fu̧u̧z a ɗɛntɛ wɛ doos hi. Ya̧a̧nɛ nɛ nak waat nɛ a holum-ɔ̧t hɛw.

²³ Nɛ́ gi nak waat a holum-ɔ̧ti, an bɔnɛ ha̧tir Muusa maakɔ, yɛrɛ hin nɔɔnɛ nɔ hi bee ɔnɛ anyɔ bee be za̧a̧s doo a holum-ɔ̧ti?

²⁴ Bɔnɛ gbaa dɔgl a hinyɔ nɛ gbɛnik hi lɔl nɛ hage, yɛ̧ɛ̧n dɔgl hi gbɔnɔ.

²⁵ Dood zaadɛ wɔ hi waak a Urusalima hi warɔ a wali hi gig ɓɛɛk an hi gbɔŋge nɛ gii yɔ ma mi?

²⁶ Yɛrɛ gi bookya̧a̧ a dood muutdu be, wɛ̄ɛ̄ hi wa̧a̧g gɛ be, ri nɔ? Dood wɛ gbɔlɛ wɔ hi mɛɛmɛ ya̧nɛ a Masihu bɔ gii ya?

²⁷ Yɛrɛ wɛ mɛɛ lɛlyɔ wal yɛrɛ fu̧u̧z du, Masihu bɔ gɔ gi zaa, doo za taa mɛɛk lɛlyɔ fu̧u̧ du be.

²⁸ Yɔ Yeesu gi gokhin a Bɛtluk du, raa a nɛ mɛɛbe, nɛ wɛɛ nɛ mɛɛ lɛlyɔ be fu̧u̧z du be! Yɛrɛ bé mɔ̄k hi zul be an be zaa gɛ; Za̧a̧n rɔb yɔ yaazib giro, wɛɛ nɛ mɛɛg gɛ.

²⁹ Benɛ be mɛɛge, be fu̧u̧z a ge, gii yaazibe, ya̧a̧nɛ.

³⁰ Ha̧a̧hi an hi wa̧a̧ge, yɔ ɔ̧tɔ riid gɛ, doo za yaa naan gi muul gɛ.

³¹ Dood zaadɛ kittɔnɔ a saal bɔ gedu hi ɗɔbsig Yeesu hi raako a Masihu bɔ gɔ gi zaa gi gɔ gɛrs gi daar wal yɛrɛ ɔnɛ bɔ daar ya?

³² Yɔ Farisaya wɔ hi lag dood hi faltingo hin a Yeesu zulha hi ya̧a̧tamsɛ, Bɛtmaakwookya wɔ hi yaaz lɛl-ook-yaadɛ an hi rek hi wa̧a̧ge.

³³ Yeesu dɔgɔ: a be gi hi nɛɛ ɔ̧t kaasi ket ɓɛ, kuudu bé wɛɛ be rek a Za̧a̧nyɔ yaazib ge.

³⁴ Gɔ nɛ ɓɛɛbe nɛ zɛ̧b gɛ, wɛɛ nɛ ɗɛɛ an nɛ zaa a lɛlyɔ gɔ be gi ge gɛ.

³⁵ Yahuduya wɔ hi ɛtin hi tees du: a gii gi rek lɛlɔ ay an wɛɛ wɛ zɛŋg gɛ nɔ? Gi rek a dood wɔ hi nɔɔ hi rek a Yonaniŋkoya wɔ hi teesdu hi an gi goksihi hin ya?

³⁶ Dɔglɔ yɔ raa a nɛ ɓɛɛbe nɛ zɛ̧b gɛ, wɛɛ ɗɛ̄ɛ̄ an nɛ zaa a lɛl yɔ be gi ge gɛ, nɔ hinɔ raakɔ anbɔ ɔnɛ?

³⁷ A naab-ɔ̧t yɔ̧ɔ̧sum bɔ yɔ daar ɔ̧t zaadɛ wɔ gedu Yeesu er ɓooya̧a̧ a za̧a̧nyɔ mɛm gig ha̧a̧ko, zaag a bee gi yɔ̧.

³⁸ Za̧a̧nyɔ ɗɔbsibe, zɛɛ gbɔɔl mɛm za̧a̧tigya gi zɔb a gi kpoos du, anyɔ Bɛt ɗɛɛrwol dɔgɔ .

³⁹ Yeesu dɔgn Bɛt Mɔkil yɔ za̧a̧nyɔ gɔ gi ɗɔbsig gi dagig giya. Yɔ anbɔ Bɛt Mɔkilɔ da zaad nɛ ket gɛ be, yɔ Yeesu dagd nɛ gbɔlumsɔ ket gɛ giya.

⁴⁰ Dood wɔ hi gi saal bɔ gedu hi bɛɛ dɔgl bɔrɔ kɛŋko hi dɔgɔ: a hi rɔbo wal yɛrɛ gi Bɛtya̧a̧kɛŋkya bɔ wɛ gig ook giya.

⁴¹ Zaadɛ be hi raak a Masihu bɔ giya. Wɛɛ dood zaadɛ ɓɛ: a Masihu bɔ gii fu̧u̧z a Galile ya?

⁴² Bɛt ɗɛɛrwol rāā a Masihu bɔ gi fu̧u̧z a Dawda dɔ̧ɔ̧t du a Baytilaama, a lɛlyɔ Dawda gi ge gɛ ya?

⁴³ Dood saal wɔ hi gɛ̧ytin ma gɔ a Yeesu dɔŋgo.

⁴⁴ Dood zaadɛ hi teesdu ha̧a̧hi an hi wa̧a̧ge, wɛɛ doo za yaa naan gi muul gɛ be.

⁴⁵ Yɔ anbɔ lɛl-ookya wɔ hi wɛɛ a Bɛtmaakwookya gbɔlɛ wɔ hi a Farisaya wɔ hi. Yɔ hi tuurɔ, wɔrɔ hi warihi: a ri nɛ kāmzig gɛ nɔ?

⁴⁶ Lɛl-ookya wɔ hi goo: a doo za bood nɛ ya̧a̧ an wal bɔrɔ zaŋ gɛ.

⁴⁷ Wɛɛ Farisaya wɔ hi warihi: a nɛɛ hɛw hi maatinmaat ya?

⁴⁸ Waar ɛ wɔ zaaya̧ hi ɗɔbsigɗɔbs ya? Zaabe Farisaya wɔ zaaya̧ hi ɗɔbsigɗɔbs ya ri?!

⁴⁹ Dood saal wɔrɔ hi mɛɛ Bɛtmaakdɔgl gɛ hi gi bootyaadɛyɔ!!

⁵⁰ Zaaya̧ gbun yɔ nuŋgɔ a Nikodɛm yɔ zaa nɛ a Yeesu ge yɛms du raahi

⁵¹ a maakdɔgl wɛ raa a mɔ kɛ̄m hinyɔ doo gi dɔk kɛn gɛ, mɔ gbɛ̄n hinyɔ gi wook kɛn gɛ, ɗɛ̄ɛ̄ an mɔ matinge dɔgl gɛ.

⁵² Wɔrɔ hi wɛɛ hi warige a mɔɔ mɔ gi Galileya hɛw ya? Zaŋgum ɗɛɛrwol mɔ rɔbtɔnɔ, mɔ gbɛn a Bɛtya̧a̧kɛŋkya za taa fu̧u̧zig a Galile hɛbt du gɛ! [

⁵³ Bɛɛ anbɔ, bɔbe wɛɛ gi raa du be.