YOHANA 4 - Nouveau Testament Doyayo

YOHANA 4

¹ Farisaya wɔ hi lagɔ a Yeesu gi dak walɛsɛrɛ , gi hotingo dood kittɔnɔ Bɛtmɛmɛ, walɛsɛrɛ ɔ̧ɔ̧ hi kit hi daarik Yohana walɛsɛrɛ ɔ̧ɔ̧ wɔ daarɔ.

² Yɔ anbɔ Yeesu hi zulɔ gii taa hotingo dood Bɛtmɛm bɔ, walɛsɛrɛ ɔ̧ɔ̧ wɔ hii gihi hotingo Bɛtmɛmɛ.

³ Yɔ Waar Yeesu kɛm a Farisaya wɔ hi lag dɔglɔ anbɔ ɔɔ Yahuduya, rek a Galile.

⁴ Yɔ gi rek hɔ, mɛɛ a gi an gi daa a Samariya hɛbt du.

⁵ Tuur a Samariya waal za gbɔɔl du nuŋgɔ a Sikar, waalɔ sɛ̧ɛ̧b hi bak yɔ Yakuba da gaa nɛ waawal Yusufu.

⁶ Yakuba mɛmzɛɛl gi lɛlɔge. Yɔ Yeesu mɔɔ rɔ̀bsɔ bɔ reko, ɗɔɔt a mɛmzɛɛl bɔ dɔŋgɔdi, ɔ̧t sɛ̧ɛ̧b an gi er lurk be.

⁷ Nis za Samariyaya zaa mɛm kɔk be, Yeesu raage a gaabe mɛm be yɔ̧.

⁸ Walɛsɛrɛ ɔ̧ɔ̧ wɔ hi rek nɛ lees zebzig a waal gbɔɔl du be.

⁹ Nis Samariyaya bɔ raage a ri mɔɔ yɔ mɔ gi Yahuduya mɔ gib mɛmɔ ɛrk nɔ? Bee be nis Samariya-yayɔ! (Yahuduya wɔ gɔ hi ɔ̄ks hi Samariyaya wɔ gɛ be. )

¹⁰ Yeesu googe a à mɔ mɛɛ nɛ hinyɔ Bɛt ha̧a̧ge an gi gaamɔ, mɔ́ wɛɛ mɔ́ mɛɛ Za̧a̧nyɔ gi mɔ mɛm ɛrk a gaabe be yɔ̧, mɔɔ yɔ ɛr nɛ mɛm a ge, gii yɔ gaam nɛ mɛm za̧a̧tigya bɔ mɔ yɔ̧.

¹¹ Nis bɔ raage a Ɗɛntyɔ, wɔd mɛmkɔmnikya taa a mɔɔ be, mɛmzɛɛl bɔ dub be, mɔ dag mɛm za̧a̧tigya bɔ ay nɔ?

¹² Gbɔlums mɔ daar baa wɛ Yakuba yɔ gaaw mɛmkɔk yɛrɛ daar ya? Gii yɔ̧ mɛmɔ hi waatɔ hii hɛw hi hinza̧a̧til wɔ gihi kaŋkig sɛw.

¹³ Yeesu googe a za̧a̧nyɔ yɔ̧ mɛm yɛrɛ mɛm gi wɛɛ gi ha̧a̧g ɓɛ.

¹⁴ Yɛrɛ za̧a̧nyɔ gɔ gi yɔ̧ mɛm yɔ gɔ be gaage taag zaa ha̧a̧k nɛ zaŋ. Mɛm yɔ gɔ be gaage, gi mɛm yɔ gi gburk a gi kpoos du gi tuur a za̧a̧tig faa du giya.

¹⁵ Nis bɔ raage a ɗɛnti, gaabe mɛmɔ an bɔ mɛm gi ha̧a̧b zaa, wɛɛ an bɔbe wɛɛz zaa, be kɔb hɛdi.

¹⁶ Yeesu raage a rekumɔ mɔ elz wal mɔ mɔ wɛɛza.

¹⁷ Nis bɔ raage a wal be taaro. Yeesu wɛɛ raage a yɔ mɔ raa wal be taaro mɔ raa rɔbo.

¹⁸ Mɔ loo nɛ walɛ nɔɔnɛ, wɛɛ wal bɔ nɛ waatingo el ɓori taa wal mɔnɛ. Mɔ dɔg rɔbo.

¹⁹ Nis bɔ raage a ɗɛntyɔ, yɔ be gbɛn di mɔ gi Bɛtya̧a̧kɛŋkyayɔ.

²⁰ Ɗɛntɛ wi Samariyaya wɔ hi ɗɔbs Bɛt a ga̧a̧t yɛrɛ hage. Nɛɛ Yahuduya wɛ be, gɔ nɛ dɔko a lɛlyɔ gi an hi ɗɔbs Bɛt ge gi a Urusalima.

²¹ Yeesu raage a naadyɔ, ta̧a̧sibe, lɛlɔ gi riiko, a ɔ̧tɔ ge nɛ taa Baa Bɛt ɗɔbsig a ga̧a̧t yɛrɛ hage, zaabe a Urusalima.

²² Nɛɛ Samariyaya wɛ, nɛ́ mɛ̄ɛ̄ za̧a̧nyɔ nɛ gig ɗɔbsig gɛ. Wii Yahuduya wɔ wi mɛɛ za̧a̧nyɔ wi gig ɗɔbsig winɛ, anyɔ za̧a̧tig bɔ fu̧u̧z a wii ge.

²³ Yɛrɛ ɔ̧tyɔ ɗɔbsigya rɔ́bɛ wɔ gɔ hi ɗɔbs Baa bɔ hi rɔbo hi Mɔkili gi tuurɔ, tuur ma hɛw ɓɔryɔ. Baa bɔ gi ɓɛɛk ɗɔbsigya rɔbɛ wɔrɔ lab hiya.

²⁴ Yɔ Bɛt gi Mɔkili, gi an dood wɔ hi gig ɗɔbsugo hi ɗɔbsig hi mɔkili hi rɔbo.

²⁵ Nis bɔ raage a be mɛɛ a Masihu bɔ raakɔ a Kristu gi zaako; gɔ gi zaa gi wadsɛ hin sɛw.

²⁶ Yeesu raage a bee gi Masihu bɔ za̧a̧nɔ, bee yɔ be bookya̧a̧ hi mɔɔ yɔ.

²⁷ Ɓɔrbɔ walɛsɛrɛ ɔ̧ɔ̧ wɔ hi wɛɛzig be, yɔ hi gbɛn Yeesu gi bookya̧a̧ hi nisɛ, hinkɔmsihi gɛrsɛ. Yɔ anbɔ an za̧a̧n za gi warige a ha̧a̧m nɔ, zaabe a mɔ book nɔ hi gii nɔ, warig gɛ.

²⁸ Hɔnɛ nis bɔ ɔɔ mɛmruukɔ bɔ dihɔ wɛɛ wɛɛ a waal gbɔɔl du da raas doodɛ

²⁹ a zaan nɛ see wal zayɔ raasib hinyɔ be woo nɛ sɛw. Wɛɛ bee be fɔ̄ksig nɛ hinza gɛ be. Ger gii taa Masihu bɔ ya?

³⁰ Dood hi tuuz waal gbɔɔl bɔ gedu hi zaak a Yeesu ge.

³¹ A ɔ̧tɔ ge walɛsɛrɛ wɔ hi zɔ̧k Yeesu an gi lehin be; hi raage a Hingokya , zaam mɔ lehinɛ.

³² Gii ta̧a̧ a be gin lees yɔ nɛ mɛɛ gɛ.

³³ Walɛsɛrɛ wɔ hi watinu a za̧a̧n za kamsig lees kams ger ya?

³⁴ Yeesu goohi a lees be gɛ an be woo hinyɔ za̧a̧nyɔ yaazib ha̧a̧ge, be wɛɛ be da̧a̧s woos yɔ gaazib an be woo.

³⁵ Nɛ taa raak a wag sɛɛ nasɔ an totɓɛs gi rii ya? Yɛrɛ be gisin raako, nɛ see bak wɔ bɛttɔnɔ: tot wɔ hi ra̧a̧mɔ, ɓɛrkɔ riiri.

³⁶ Za̧a̧nyɔ gi ɓɛrk tot bɔ gi dag dɔɔrɔɔsɔ, gi wɛɛ gi mɔks tot gaat wɔ za̧a̧tig faa ɔnɛ. Yɔ anbɔ za̧a̧nyɔ lugɔ hi za̧a̧nyɔ ɓɛrɔ hi dag hat lɛlgbunu.

³⁷ Hinyɔ hi raa a dɔgl za du a ꞋꞋzaa lugɔ zaabe ɓɛrɔꞋꞋ gi rɔbo.

³⁸ Be yāānɛ an nɛ ɓɛr hinyɔ nɛ woo woosɔ gɛ; gɛ zaadɛ hi woo woosɔ nɛɛ nɛ ɓɛrk woosya̧ bɔ humlɔ.

³⁹ Anyɔ nis bɔ boos Samariyaya wɔ Yeesu dɔglɔ gi raa a walsib hinyɔ be woo nɛ sɛwi, Samariyaya kittɔnɔ hi ɗɔbs Yeesu gɔ a waal gbɔɔl bɔ gedu.

⁴⁰ Yɔ hi zaa hi zɛŋge hi zɔ̧g an gi waa hi hiya; Yeesu wɛɛ yɛ̧ɛ̧ra na̧̍a̧̍ hi hii ɔ̧t eerɛ.

⁴¹ Yɔ anbɔ, dood zaadɛ kittɔnɔ hi kɛm dɔglɔ bɔ hi ɗɔbsige.

⁴² Hi wɛɛ hi raa nis bɔ a wi yɛɛl wi ɗɔbsige a hinyɔ mɔ raasiwi gi dɔŋgo, yɛrɛ ɓɔri ma wi kɛmsig dɔglɔ hi zul winɛ wi ɗɔbsɔ, wi mɛɛmɛ ɔnɛ a gii gi waal za̧a̧sigya hi rɔbo.

⁴³ Yɔ ɔ̧t eerɛ wɔrɔ hi talɔ Yeesu ɗund rek a Galile.

⁴⁴ Yɔ anbɔ gii hi zulɔ hɛw raa a taa an hi ɗɔbs Bɛtya̧a̧-kɛŋkya a gi lɛlɛ.

⁴⁵ Hɔnɛyɔ tuur a Galile, Galileya wɔ hi dagig rɔbtɔnɔ anyɔ hi gbɛn nɛ hinyɔ woo sɛw a naab ɔ̧ti a Urusalima, hii hi rek nɛ rek a naab bɔ gedu be.

⁴⁶ Yeesu wɛɛ wɛɛ a Kana a Galile a lɛlyɔ da zɛmr nɛ mɛm gi wɛɛ bumhob ge. Waar gbɔɔl za woosɔya gbɔɔl gi a Kapɛrnayum waawal gi guŋko.

⁴⁷ Yɔ lag a Yeesu ɔɔ Yahuduya zaa a Galile, rek a ge zɔ̧ge an hi tiitin el a gi lɛlɛ gi re gi za̧tsig waawal bɔ gi a wɔrk durk du.

⁴⁸ Yeesu raage a à nɛ gbɛn gɛrs hintuusin-goya gbɔlɛ gɛ yɔ nɛ ɗɔbsib gɛ zaŋ.

⁴⁹ Waar gbɔɔl bɔ woosɔya bɔ raage a Ɗɛntyɔ, yɛwɛ tii an bɔ waa be gi wɔrɔ.

⁵⁰ Yeesu raage a rekumɔ, waa mɔ wal bɔ za̧a̧za̧ ma. Wal bɔ ɗɔbs Yeesu dɔglɔ bɔ raage rekɔ.

⁵¹ Yɔ gi tiik gi lɛlɛ gbaarɛ ɔ̧ɔ̧ wɔ hi dagig gbɔnɔ di hi raasig ramsɔ a waa bɔ za̧a̧za̧.

⁵² Gii wɛɛ ɛrihi a muulɔ bɔ gogsig lɛlli? Hi raasig a lelɔ, ɔ̧tyɔ yee kaasi, muulsa̧a̧kɔ bɔ da̧a̧ gɔ.

⁵³ Yɔ anbɔ waa gumtil bɔ baatɔ mɔk mɛɛ ɔ̧tyɔ Yeesu raag nɛ du a rekumɔ, waa mɔ bɔ za̧a̧za̧. Gii hi doodɔ sɛw hi wɛɛ hi ɗɔbs Yeesu gɔ.

⁵⁴ Gɛrs hintuusingoya eesim bɔ Yeesu woo yɔ wɛɛ gi tuu Yahuduya dɔɔ eesimɛ re a Galile hɛbt duge ma bɔ.