YOHANA 19 - Nouveau Testament Doyayo

YOHANA 19

¹ Pilatu wɛɛ raa dood hi loo Yeesu hi lɛmnig kpootyɔ hi yɛ̧ɛ̧n tusɛ.

² Laaya wɔ hi kat kal kobsya hi hegsig zulha, hi wɛɛ hi hegsig gbandil gbɔɔl hob muulɛ.

³ Hi sɔɔz gi dɔŋdi hi baanige a seko, Waar Yahuduya! Hi wɛɛ hi gig lɛk zulha.

⁴ Pilatu wɛɛ tuuza raa Yahuduya wɔ a be kamsinge gɛrɛ lakdi an nɛ mɛɛ a bé zɛm dɔgl za a̧a̧b yɔ gɔ gi matig gɛ.

⁵ Yeesu tuuz hi kal kobsya bɔ zulha hi gbandil gbɔɔl hob bɔ muulɛ. Pilatu wɛɛ raa a wal bɔ gɛrɛ.

⁶ Yɔ Bɛtmaak-wookya gbɔlɛ wɔ hi lɛl-ookya wɔ hi gbɛnige, hi ɓoolya̧a̧ hi raa a doomɔg dɔ̧ɔ̧r ha! Doomɔg dɔ̧ɔ̧r ha! Pilatu wɛɛ raahi a bee bé zɛ̄m ɗɔgl za a̧a̧b yɔ matig gɛ, nɛɛ, loonɛg nɛ re nɛ dooge.

⁷ Yahuduya wɔ hi ta̧a̧ hi raage a wi gin maak za dɔgl yɔ dɔg a gi an gi wɔrɔ. Gi wɛɛnik zulɔ an Bɛt waayɔ.

⁸ Yɔ Pilatu lag dɔgl bɔrɔ kol yɛ̧sig tuukɔ gɔ.

⁹ Wɛɛ gul a dɔgl-gbaak luk du ɛr Yeesu a mɔ fu̧u̧z ay? Yeesu gōō hinza fɛŋ mɔɔt gɛ.

¹⁰ Pilatu wɛɛ warige a mɔ taa hinza gook ya? Mɔ́ mɛ̄ɛ̄ a be gin tɛŋk an be bisumɔ, be wɛɛ be gin tɛŋk an be doom dɔ̧ɔ̧r ha gɛ ya?

¹¹ Yeesu goo a à Bɛt a wɛɛha gaazum tɛŋkɔ gɛ, yɔ mɔ taan nɛ tɛŋk a be zulha zaŋ. Yɔ anbɔ, za̧a̧nyɔ gaam bee naan du woo hinha̧a̧l daarɔ.

¹² Dɔgl bɔrɔ bɛɛ tuuk anbɔ Pilatu ɓɛɛ gbɔnɔ an gi bisig gi rekɔ. Hɔnɛ Yahuduya wɔ hi gbɛn anbɔ hi wɛɛ hi ɓooya̧a̧ hi raa a gid mɔ bisige, mɔ taa waar gbɔɔl bɔ Kaysara saamɔ ma.

¹³ Pilatu yɔ bɛɛ lak anbɔ tunz Yeesu wɛɛ ɗɔɔt a dɔglyɛ̧ɛ̧k ɗɔɔtillɛl bɔ ge, a lɛlyɔ gɔ hi elik a Hitaanbetlɛl ge. (Gɔ hi el a Ibraniŋko ya̧a̧boon du a Gabata. )

¹⁴ A ɔ̧tɔ ge hi gɛmsig Paska naab wɔdɛ, ɔ̧t gi lurk tees be. Pilatu raa Yahuduya wɔ a Waar nɛ bɔ gɛrɛ.

¹⁵ Hi wɛɛ hi ɓooya̧a̧ a gi wɔɔrɔ! Gi wɔɔrɔ! Doomɔg dɔ̧ɔ̧r ha. Pilatu wɛɛ warihi a nɛ raa a bé doo waar nɛ bɔ doo? Bɛtmaakwookya gbɔlɛ wɔ hi goo a wi taan waar za gɛ Kaysara.

¹⁶ Wɛɛ gaahige gɔ an hi kaŋg hi dooge.

¹⁷ Yeesu pɛɛ dɔ̧ɔ̧rɔ bɔ tuurin a lɛl za yɔ gɔ hi el a zullɛŋklɛlɛ, lɛlɔ nuŋgɔ a Ibraniŋko ya̧a̧boon du a ꞋꞋGolgotaꞋꞋ.

¹⁸ Hi doog lɛlɔge ro hi dood eerɛ a bɛrkɔya̧ wɔ hi. Yeesu gi tees du.

¹⁹ Pilatu bi̧i̧ hinmɛksingoya a tɛ̧ɛ̧fɛɛt ha hi doo a dɔ̧ɔ̧r bɔ zulɔ ya̧di a YEESU NAZARƐDYA, YAHUDUYA WAAR YƆ.

²⁰ Yahuduya kittɔnɔ hi zaŋg bi̧i̧sɔ. Lɛlyɔ hi doo Yeesu ge sɛ̧btin hi waal gbɔɔl bɔ. Bi̧i̧s bɔ hi bi̧i̧ a Ibraniŋko ya̧a̧boon du hi Roma ya̧a̧boon du hi Yonaniŋkoya ya̧a̧boon du.

²¹ Yahuduya wɔ Bɛtmaak wook-yaya̧ gbɔlɛ wɔ hi raa Pilatu a bɔmɔ bi̧i̧ a Yahuduya waar yɔ, bi̧i̧m a wal yɛrɛ dɔgɔ a be gi Yahuduya waar yɔ.

²² Pilatu goo a hinyɔ be bi̧i̧, be bi̧i̧bi̧ ma.

²³ Yɔ laaya wɔ hi doo Yeesu a dɔ̧ɔ̧r ha, hi loo gbandilɔ bɔ hi gɛ̧ɛ̧ du nasɔ, laaya gbunu gin taakil ɔnɛ gbun be. Hi wɛɛ hi loo gbandilɔ fɛɛt yɔ kunsig baak daa muulɔ gɛ, wɛɛha hi wɛɛdisɛ tɛɛkɔ gbunu.

²⁴ Hi wɛɛ hi watin hi teesdu a bɔwɛ taarɔ wɛ ɔɔ anbɔ wɛ len subudi, wɛ see za̧a̧nyɔ gɔ gi le. Hin bɔrɔ tuur an hinyɔ Bɛt ɗɛɛrwolɔ dɔgɔ gi wooyyɔ: a hi gɛ̧ɛ̧ gbandil be wɔ teesdu, hi len subud a be gbandil fɛɛt bɔ hage. Hinyɔ laaya wɔ hi woo giibɔ.

²⁵ Yeesu nɔɔtɔ gi erko a Yeesu dɔ̧ɔ̧r dɔŋdi hi yɛ̧ɛ̧tɔ hi Mariyama Kolopas nisɔ hi Mariyama a Magdala be.

²⁶ Yɔ Yeesu gbɛn nɔɔtɔ hi walɛsɛr ɔ̧ɔ̧ za gbun yɔ ha̧a̧g gi muulɛ hi erko, raa nɔɔtɔ a naadyɔ, waa mɔ gɛrɛ.

²⁷ Wɛɛ raa walsɛrɔ bɔ be a nàà mɔ gɛrɛ. A lɛlɔdi walsɛr bɔ loo Mariyama zaanig gi raa du.

²⁸ Yɔ hin wɔrɔ hi daa, Yeesu gi mɛɛ be a hin sɛw da̧a̧da̧, raa a mɛm gib ha̧a̧ko. Raa hin bɔ lab an hinyɔ Bɛt ɗɛɛrwol dɔg nɛ gi wooyyɔ .

²⁹ Dɔn za gi nɛ di mɛm haatil hi̧i̧s gedu. Laaya wɔ hi loo bɔɔmɛ hi tɔ̧ɔ̧ mɛm haatil bɔ hi̧i̧s gedu, hi sa̧a̧ kok mɛs ha hi dɔɔnsig ya̧a̧gbarɔ.

³⁰ Yɔ Yeesu yɔ̧ mɛm haatil bɔ raa a hin sɛw da̧a̧da̧! Tiis zulɔ, wɔr gɔ.

³¹ Yɔ gi a wɔd gɛbsig ɔ̧ti, wɛɛ gi hā̧ā̧ Yahuduya wɔ an wɔrk wɔ hi kɔm a dɔ̧ɔ̧r wɔ hage gi tuur a holum-ɔ̧t gɛ, yɔ holum-ɔ̧t bɔrɔ gi ɔ̧t gbɔɔl be, hi rek hi ɛr Pilatu an gi yaa laya wɔ hi ɓɛdil dood wɔ hi doohi a dɔ̧ɔ̧r ha dɔɔya̧, hi ha̧sihi.

³² Laaya wɔ hi zaa hi ɓɛdil doo biitir bɔ dɔɔɔ wɔ hi zaa bɔ hi doog hi Yeesu lɛl-gbunu.

³³ Hɔnɛyɔ hi tuurɔ hi zɛm Yeesu wɔr da̧a̧da̧ ma ɔnɛ, hí ɓɛdil dɔɔ ɔnɛ wɔ gɛ.

³⁴ Laaya wɔ zaaya̧ gbun zaa bàà Yeesu hi goo a yɛ̧br muulɛ ga̧a̧m tuuz hi mɛmɛ.

³⁵ Mii Yohana yɔ mi gbɛn hin bɔrɔ gii mi gi dɔglɔ dɔko, wɛɛ dɔgl mi bɔ gi rɔbo. Mi mɛɛ a mi dɔk rɔbo, mi wɛɛ mi gisin hinɔ gii dɔk an nɛɛ hɛw nɛ ɗɔbsɔ.

³⁶ Hin wɔrɔ hi tuur an hinyɔ Bɛt ɗɛɛrwol dɔgɔ gi wooyyɔ a lɛŋkɔ zaa gbun taa ɓɛdugo.

³⁷ Bɛt ɗɛɛrwol wɛɛ raa ɓɛ a lɛlza a hi sɔ̧ɔ̧ za̧a̧nyɔ hi baage.

³⁸ Doo za Yeesu fɔkya giro, nuŋgɔ a Yusufu, fu̧u̧z a Arimate. Yɔ hoobha̧a̧g Yahuduya wɔ, gi fɔk Yeesu a luurlɛlɛ. Yɔ kuudu anbɔ, rek zɔ̧b Pilatu gaag gbɔnɔ an gi re gi loo Yeesu wɔrkɔ bɔ. Yɔ dag gbɔnɔ anbɔ, zaa looge.

³⁹ Nikodɛm, za̧a̧nyɔ da zaa nɛ a Yeesu ge yɛms du, zaa hɛw, kamz yɛ̧ɛ̧s ki̧i̧lhɛmntya kilo dumbili taarɛ hi gɔn tɛ̧ɛ̧mɔto nuŋgɔ a ɗaasɛrɛyɔ hi ɔksin tɛ̧ɛ̧ ki̧i̧lhɛmntya zu̧u̧k nuŋgɔ a alowɛsyɔ.

⁴⁰ Yusufu hi Nikodɛm hi loo Yeesu wɔrkɔ bɔ, hi wɔbtin gbandil buu hi gub yɛ̧ɛ̧smɛk ki̧i̧lhɛmntya bɔ ha ge anyɔ Yahuduya wɔ hi rɔ̧ɔ̧s wook a wɔrkya̧ muulɛ.

⁴¹ A lɛl bɔ hi doog dɔ̧ɔ̧r hage bak gi lɛlɔ ge. Loor seg gi a bak bɔ gedu be, hi i̧i̧dir nɛ doo za gedu kɛn gɛ.

⁴² Anyɔ gi nɛ Yahuduya wɔ wɔdya̧ gɛbsig ɔ̧ti, hi i̧i̧ Yeesu wɔrkɔ bɔ hɔ ro. Yɔ loor bɔ sɛ̧ɛ̧b be samsihi ma du hɛw.