YOHANA 18 - Nouveau Testament Doyayo

YOHANA 18

¹ Yɔ Yeesu zɔ̧ Bɛt anbɔ rek hi walɛsɛrɛ ɔ̧ɔ̧ wɔ a zɛɛwaa za doosɛ a Kederɔŋ, a lɛlyɔ bak gi ge. Tal a bak bɔ gedu hi walɛsɛrɛ ɔ̧ɔ̧ wɔ.

² Anyɔ Yeesu gɔ gi waak mɔksig lɛlɔge hi walɛsɛrɛ ɔ̧ɔ̧, Yahuda, za̧a̧nyɔ gɔ gi rɛ̧ɛ̧sig ya̧a̧ mɛɛ lɛl bɔ be.

³ Yɔ anbɔ, Yahuda dag layaadɛ maas gbunu hi lɛl-ookya zaadɛ wɔ Bɛtmaakwookya gbɔlɛ wɔ hi Farisaya wɔ hi yaazihi, hi zaatin gɔ a lɛl bɔ ge. Hi kamz laakpooki a pitila wɔ hi du hi a hɛtwɔbtig wɔ hi muul be, hi daŋbɛsim wɔ hi sɔɔl wɔ an hi wa̧a̧ Yeesu .

⁴ Yɔ Yeesu mɛɛ hinyɔ gɔ gi tursig sɛwi, sɔɔ warihi a nɛ tɛk bɔ?

⁵ Hi ta̧a̧ a wi tɛk Yeesu Nazarɛdya bɔ giya. Yeesu wɛɛ ta̧a̧hi a bee Za̧a̧nɔ. Yahuda, ya̧a̧rɛ̧ɛ̧kya bɔ gi erko hi wɔrɔ.

⁶ Yɔ bɛɛhi raak a bee za̧a̧nɔ, hi wɛɛ kuudu hi matil hɛbtdi.

⁷ Wɛɛ warihi ɓɛ a nɛ tɛk bɔ? A wi tɛk Yeesu Nazarɛdya bɔ giya.

⁸ Yeesu wɛɛ ta̧a̧ a be raasin a bee Za̧a̧nɔ. Gid nɛ tɛk beya, ɔɔn wɛrɛ hi rekɔ.

⁹ Dɔg hin bɔrɔ an gi da̧a̧s dɔglɔ yɔ dɔg nɛko a bé wāks hinyɔ mɔ gaab zaaɔ gbun gɛ.

¹⁰ Simɔŋ Piyɛr gin nɛ daŋbɛsim gi naan du, hɔ̧bɔ gbob Bɛtmaakwookya gbɔɔl mɔɔt bɔ gbaarɔ tɔnɔ bɔ naanrɔbo. Gbaar bɔ nuŋgɔ a Malikus.

¹¹ Yɔ Yeesu gbɛn anbɔ raa Piyɛı a wɛɛnum daŋbɛsim mɔ bɔ saŋk du. Gi an be da̧a̧s hinyɔ gi a ya̧a̧rhant dakwaa yɔ Baa be gaab gedu an be yɔ̧ ro!

¹² Laaya maas bɔ hi laaya wɔ gbɔɔlya̧ bɔ hi Yahuduya lɛl-ookya wɔ hi wa̧a̧ Yeesu hi wɔge,

¹³ hi kaŋg a Hanas ge kete; gii gi nɛ Bɛtmaakwookya gbɔɔl mɔɔt a wɛlɔ gedu, wɛɛ gi Kayafas gbarɔ be.

¹⁴ Kayafas bɔ gii dɔks nɛ dood hinɛ a rii an doo gbun gi wɔr a dood sɛw dɔŋgo.

¹⁵ Simɔŋ Piyɛr hi walsɛr za gbunu hi fɔ́k Yeesu. Yɔ Bɛtmaakwookya gbɔɔl mɔɔt bɔ mɛɛ walsɛr bɔ, walsɛr bɔ gul lɛlgbun hi Yeesu a Bɛtmaakwookya gbɔɔl mɔɔt bɔ gi raa du.

¹⁶ Piyɛr be kɔm a luk gbɔnɔya̧ a lakɗi. Walsɛr bɔ Bɛtmaak-wookya gbɔɔl mɔɔt bɔ mɛɛge tuuz raa nis gbɔnɔ-ookya bɔ hinɛ wɛɛ gus Piyɛr a raa bɔ gedu.

¹⁷ Hɔnɛ nissɛr gbɔnɔ-ookya bɔ raa Piyɛr a mɔɔ be, nɛ mɔ gi wal yɛrɛ walɛsɛrɛ ɔ̧ɔ̧ zaa gbuni ma mi? Gii faafa a bee gɛ.

¹⁸ Yɔ saŋks gi saŋko, gbaarɛ wɔ hi lɛl-ookya wɔ hi gi nɛ hɔdi hi sɔn laasɛml hi tɛɛko. Piyɛr er hi hii gi laa bɔ tɛɛk be.

¹⁹ Bɛtmaakwookya gbɔɔl mɔɔt bɔ war Yeesu walɛsɛrɛ ɔ̧ɔ̧ wɔ dɔglya̧ hi hingokɔ bɔ dɔglɔ hɛw.

²⁰ Yeesu ta̧a̧ raage a be dɔg hin a dood muutdu a waal du, be waak hingok a mɔksillɛl du hi a Bɛtluk du a lɛlyɔ Yahuduya wɔ sɛw gɔ hi waak mɔksig gedu, bé bōō hinza a yaatillɛl gɛ.

²¹ Mɔ gib nɔ warko? Warum dood wɔ hi kɛm dɔgl yɔ be dɔg hiya. Yɛrɛ hii hi mɛɛ hinyɔ be dɔgɔ .

²² Yɔ dɔg anbɔ lɛl-ookya wɔ zaaya̧ gbun dɛm Yeesu wɛɛ warige a gɔ hi ta̧a̧ Bɛtmaakwookya gbɔɔl mɔɔt bɔ anbɔ ya?!

²³ Yeesu ta̧a̧ge a gid be booya̧a̧ ha̧a̧l duge, raasibe ha̧a̧lɔ be boo ma! Nɛ an be dɔg rɔbo, mɔ dɛ̧b a nɔ dɔŋgo?

²⁴ Hanas wɛɛ yaag a naaza Kayafas ge, yɔ gi Bɛtmaakwookya gbɔɔl mɔɔt hɛw a wɛlɔ gedu.

²⁵ Yɔ Simɔŋ Piyɛr er gi laa bɔ tɛɛko, hi warige a mɔɔ be nɛ mɔ walɛsɛrɛ wɔ zaaya̧ gbuni ma mi? Piyɛr faa dɔgɔ a ɛ̧-ɛ̧ bee gɛ.

²⁶ Bɛtmaakwookya gbɔɔl mɔɔt bɔ gbaarɛ ɔ̧ɔ̧ wɔ zaaɔ, za̧a̧nyɔ Piyɛr dɛ̧ɛ̧r nɛsɔ za tɔnɔ warige a bé gbɛ̄num nɛ a bak du hi wal bɔ lɛlgbun gɛ ya?

²⁷ Piyɛr wɛɛ faa ɓɛ. Ɓɔrbɔ kɔba kek gɔ.

²⁸ Hi fu̧u̧n Yeesu a Kayafas lɛlɛ hi renig a Pilatu dɔgl-gbaak luk du bi̧i̧l du. Hí gul hi zulya̧ a dɔgl-gbaak luk bɔ gedu gɛ an bɔhi ɓi̧i̧l muulya̧, an hi le Paska naab lees bɔ rɔbtɔnɔ.

²⁹ Kuudu Pilatu tuu rek a hiige warihi a nɔ hingɛ̧ɛ̧-nikɔ nɛ gɛ̧ɛ̧n wal yɛrɛ gii nɔ?

³⁰ Hi ta̧a̧ hi raage a à taa nɛ hinbɔbtin wookya gɛ yɔ hi kamzig nɛ a mɔɔ ge gɛ.

³¹ Pilatu raahi a loonɛg hi zul nɛ nɛ da nɛ gbaasig dɔgl anyɔ maak nɛ dɔgɔ . Yahuduya wɔ hi wɛɛ hi raage a nɛ hi gāaw gbɔnɔ an wi gbaas doo dɔgl wi gbɔŋg gɛ be.

³² Hin bɔ lab da̧a̧s dɔgl yɔ Yeesu dɔg gi raan wɔrk yɔ gɔ gi wɔrɔ.

³³ Pilatu wɛɛ gul a dɔgl-gbaak luk bɔ gedu elz Yeesu warige a mɔɔ gi Yahuduya Waar ya?

³⁴ Yeesu wɛɛ warig be a mɔ dɔg hin bɔrɔ lab hi zul mɔɔn ya, dood dɔgsum hinɔ be zulha ya?

³⁵ Pilatu wɛɛ warige a bee be Yahuduya ya? Dood mɔɔnɛ hi Bɛtmaakwookya gbɔlɛ wɔ hii gɛ̧ɛ̧num dɔglɛ hi kamzum a bee. Mɔ gɔ nɔ hinɔ?

³⁶ Yeesu goo a waar ums be taa waal du waar umsɛ. À waar ums be gi nɛ waal du, ookya be wɔ hi woosib nɛ gabs woosɔ an bɔ Yahuduya wɔ hi wa̧a̧be. Yɛrɛ waar ums be taa waaldu.

³⁷ Pilatu warige a nɛ mɔ gi waar i ma ya? Yeesu goo a anyɔ mɔ raa, be gi waar yɔ. Be mɔɔyyɔ be zaa a waal du hɛdi an be dɔg rɔbo. Za̧a̧nyɔ ha̧a̧g rɔbo gi kɛmsib kɔlk be.

³⁸ Pilatu ɛrige a nɔ hinɔ a rɔb nɔ? Yɔ Pilatu ɛr anbɔ wɛɛ tuu a Yahuduya wɔ hi, raahi a bé zɛ̄m dɔgl za a̧a̧b an gi mat wal yɛrɛ gɛ.

³⁹ Yɛrɛ ha̧a̧n an be woosin hinyɔ be rɔ̧ɔ̧s wook a nɛ tees du, anyɔ gɔ be gisin bisig doo luknɔya za gbun a Paska naab-ɔ̧t ya? Ha̧a̧n rɛ an be bitsin Yahuduya Waar bɔ ya?

⁴⁰ Hɔnɛyɔ dood hi kɛm anbɔ hi wɛɛ hi ɓooya̧a̧ sɛw hi raa a gii gɛ! Bisum Barabas giya! (Barabas ɔnɛ gi luur wɔdwɔɔlikyayɔ. )