YOHANA 16 - Nouveau Testament Doyayo

YOHANA 16

¹ Be dɔksin hin wɛrɛ sɛw an bɔnɛ ɔɔ ɗɔbsugɔ.

² Hí tuusin a mɔksilluk wɔ hi du hi seen an dood ɓi̧i̧lim-yaadɛ; ɔ̧tɔ gi zaako, an bɔ ɓɛ gi gbɔ̧nɛ a ɔ̧tɔ ge, gi mɔk a be woosig Bɛt woosɛ.

³ Anyɔ hi mɛɛ Baa bɔ hi mɛɛ bee gɛ hɛw hi woo anbɔ.

⁴ Be dɔksin hin wɛrɛ an ɔ̧tɔ gɔ gi tuurɔ nɛ mɛksin a be da be dɔksin hin wɔrɔ dɔks anbɔ. Anyɔ be waatingo nɛ hi nɛya, bé da bé rāāsin hin bɔrɔ a biitirnaan du gɛ.

⁵ Yɛrɛ be rekrekɔ a Za̧a̧nyɔ yaazib ge; wɛɛ an doo nɛ za gbun gɔ gi warib a mɔ rek ay? Warib gɛ.

⁶ Yɛrɛ anyɔ be dɔksin hin wɔrɔ, kpoos nɛ ɗɔɔbɔ.

⁷ Yɛrɛ be gisin rɔb raako: an be reekɔ yɔ bɛsinɛ. À be rek gɛ be, ɗaakya bɔ yɔ zaa a nɛɛge gɛ. Yɛrɛ bé rēkɔ̄ be yaasinge.

⁸ Gɔ gi zaa, gi zuns dood waal du a̧a̧bya̧ gaattɔnɔ a hinha̧a̧l ha, hi hinriit ha, hi dɔgl-gbaak ha.

⁹ Gi zunsihi a yɔ hi ɗɔbsib gɛ, hi gi hinha̧a̧l-yaadɛyɔ.

¹⁰ Gi zunsihi a yɔ be gi rek a Baa be ge, gid nɛ taab zaa gbɛŋko, be gi doo riityɔ.

¹¹ Gi wɛɛ gi zunsihi a yɔ Bɛt gbaas waal yɛrɛ waar ɔ dɔgl gi da̧a̧ be, dɔgl-gbaak giro.

¹² Be gin dɔgl zaadɛ kittɔnɔ an be dɔksinɛ wɛɛ yɔ daarin daar kete.

¹³ Bɛt Mɔkil rɔb bɔ gɔ gi zaa, gi kan a gbɔnɔ rɔb du sɛw; yɔ anbɔ taa an gi dɔg hin hi zulɔ, gi boo hinyɔ kɛm giya, wɛɛ gi goksin hinyɔ gɔ gi tuur sɛw giya.

¹⁴ Bɛt Mɔkilɔ gi loo hinyɔ gi benɛ, gi dɔksinɛ. Gi ɗɔbsib anbɔ.

¹⁵ Hinyɔ Baa be gin sɛw gi beenɛ. Be raasin hinɔ giya a gi loo hinyɔ gi benɛ gii gi dɔksinɛ.

¹⁶ Yɛrɛ wag kaasi nɛ taab gbɛnko, wɛɛ gɔ gi kuudu kaasi ɓɛ nɛ wɛɛ nɛ gbɛnibe.

¹⁷ Walɛsɛrɛ wɔ zaadɛya̧ hi watin gɔ a nɔ gi gisɛ raak a wag kaasi nɛ taab gbɛnko, wɛɛ gɔ gi kuudu kaasi ɓɛ nɛ gbɛnib nɔ? Nɔ hinɔ raakɔ ɓɛ a yɔ be rék a Baa be ge gii nɔ?

¹⁸ Hi ɛtin a gisɛ nɔ raak a kuudu kaasi ɔnɛ? Wɛ́ mɛ̄ɛ̄ hinyɔ gi raanik gɛ.

¹⁹ Yɔ Yeesu mɛɛ a ha̧a̧hi an hi warig hinɔ, gii warihi: a nɛ watingo hinyɔ be raa a wag kaasi nɛ taab gbɛnko wɛɛ gɔ gi kuudu kaasi ɓɛ nɛ wɛɛ nɛ gbɛnib gii ya?

²⁰ Be raasin rɔbo: nɛ́ mimɔ, nɛ́ kaa, wɛɛ waal gi dag hat be; nɛ́ gi a mimnt du, mimnt nɛ bɔ gi wɛɛ hato.

²¹ Nis gɔ gi waa gulko gi miŋko anyɔ kosgumn bɔ ɔ̧tɔ tursige. Gɔ bɛɛ waa bɔ gulko wɛɛ mɔ̄k kosgumnɔ bɔ ma gɛ. Anyɔ mɔɔ doo a waal du, kpoosɔ kpɛ̧ɛ̧kpɛ̧ ma.

²² Gbunɔ, nɛya, nɛ miŋk ɓɔryɔ, yɛrɛ gɔ be wɛɛ be gbɛnin ɓɛ, kpoos nɛ gi kpɛ̧ɛ̧, wɛɛ doo za taa an gi ha̧s hat nɛ bɔ be.

²³ A ɔ̧tɔ ge nɛ taab dɔgl za warko, be raasin rɔbo, an nɛ ɛr nɛ nɔ Baa be hi nuŋg benɛ, gi gaan hinɔ.

²⁴ Àgiyɔ te, nɛ́ zɔ̧̄ hinza a be nuŋg du gɛ. Ɛrinɛ nɛ dagɔ an kpoos nɛ gi kpɛ̧ɛ̧ gi daarlɛlɛ.

²⁵ Be dɔksin hin bɔrɔ hi ya̧a̧daanikyɔ; ɔ̧tɔ gɔ gi tuurɔ, a gedu, be taasin hinza book hi ya̧a̧daaniki. A ɔ̧tɔ ge be dɔksin Baa be dɔglɔ gaattɔnɔ.

²⁶ A ɔ̧tɔ ge nɛ zɔ̧b Bɛt be nuŋg du, be taan raak a be zɔ̧bsin Baa be.

²⁷ Anyɔ ha̧a̧n be muulɛ nɛ wɛɛ nɛ ɗɔbsig a be fu̧u̧z a Baa be ge, Baa be hi zulɔ ha̧a̧g a nɛ muulɛ, ya̧a̧nɛ.

²⁸ Be fu̧u̧z a Baa be ge ro be zaa a waal du, yɛrɛ be ɔɔk waalɛ be wɛɛ be wɛɛk a Baa be ge.

²⁹ Walɛsɛrɛ ɔ̧ɔ̧ wɔ hi raage a eh! yɛrɛ mɔ book dɔgl rɔbo, mɔ taa boonik hi ya̧a̧daanik ma.

³⁰ Yɛrɛ ɓɔri wi mɛɛ a mɔ mɛɛ hin sɛw. Wɛɛ yɔ mɔ mɛɛ hinyɔ gi doo kpoos du gaati hā̧a̧m an doo gi warum dɔgl za ma gɛ. Hinɔ gii wi ɗɔbs a mɔ fu̧u̧z a Bɛt ge.

³¹ Yeesu warihi a nɛ ɗɔbsigɗɔbs ɓɔri ma ya?

³² Yɛrɛ ɔ̧tɔ gi riiko, riiri ma hɛw, a ɔ̧tɔ gedu nɛ hɛksɔ bɔbe gi rek a gi lɛlɛ, nɛ ɔɔb be gbunu. Yɛrɛ be taa be gbunu, Baa be gi hi beya.

³³ Be dɔksin hin wɛrɛ sɛw an nɛ dag ɗɔɔtil saŋtumi a ɔksig wɛ bɔ gedu. A waal du nɛ dag zɛksili. Yɛrɛ ɓaasin kpoos nɛ, bee be ɗɛɛ waal ɗɛɛ.