YOHANA 14 - Nouveau Testament Doyayo

YOHANA 14

¹ Bɔ kol nɛ gi namɔ, ɗɔbsin Bɛto, ɗɔbsin bee be.

² Ɗɔɔtillɛl kittɔnɔ hi gi a Baa be raa du. À ɗɔɔtillɛl taa nɛ gɛ, yɔ be raa nɛ a bé rek bé gɛmnsin lɛl gɛ.

³ Gɔ be rekɔ be gɛmnsin lɛlɛ be wɛɛzɔ be loonɛ wɛ retinu. Yɔ anbɔ lɛlyɔ be giza ge, nɛɛ nɛ gi a lɛlɔ ge be.

⁴ Nɛ mɛɛ lɛlyɔ be reko nɛ wɛɛ nɛ mɛɛ gbɔnɔ bɔ be.

⁵ Tumas raage a Waar i wí mɛ̄ɛ̄ lɛlyɔ mɔ rek du gɛ, wí mɛɛ ma gbɔnɔ bɔ hinɔ ri?

⁶ Yeesu raage a bee gi gbɔnɔ, bee gi rɔbo hi za̧a̧tigi. Doo za gi daa a bee ket gɛ, ɗɛɛ an gi tuur a Baa be ge gɛ.

⁷ À nɛ mɛɛ nɛ beya, yɔ nɛ mɛɛ nɛ Baa be hɛw. Yɛɛl ɓɔryɔ nɛ mɛɛge, nɛ wɛɛ nɛ gbɛnig hɛw.

⁸ Filib raage a Waar i, zunsiwi Baa bɔ za̧a̧nɔ, gi riiwi.

⁹ Yeesu raage a Filibi, be waa hi nɛɛ a̧a̧mɔ, mɔ mɛɛb gɛ ya? Za̧a̧nyɔ gbɛnibe gbɛn Baa bɔ giya; ri mɔ wɛɛ mɔ raak a zunsibe Baa bɔ gii nɔ?

¹⁰ Mɔ́ ɗɔbs a be waak ɔksi hi Baa bɔ, Baa bɔ be gi waak ɔksi hi bee gɛ ya? Dɔgl wɔ gɔ be gisin dɔko be taasin dɔk hi zul benɛ. Wɛɛ Baa yɔ gi waak hi beya gii gi wook woosɔ wɔrɔ.

¹¹ Ɗɔbsinbe, be waak ɔksi hi Baa bɔ, Baa bɔ be gi waak ɔksi hi beya, zaa gi lab gɛ, ɗɔbsin a woos wɔ hi dɔŋg kpɔd.

¹² Be raasin rɔbo za̧a̧nyɔ ɗɔbsibe gi woo woos yɔ be wook hɛw, gi woo gi daarin benɛ bɔ lɛl hɛw. Yɔ be gi rek a Baa bɔ ge giya.

¹³ Wɛɛ hinyɔ gɔ nɛ ɛr hi nuŋg be, be woo hinɔ an hi wɛɛn Baa bɔ doo gbɔɔlɛ a waaɔ bɔ gi dɔŋgo.

¹⁴ Gid nɛ ɛr hinza hi nuŋg be be woo hinɔ.

¹⁵ Gi ha̧a̧nɛ beya, nɛ fɔ dɔgl be wɔ be gaako.

¹⁶ Wɛɛ beya be zɔ̧b Baa be gi gaan ɗaakya za an gi waatin hi nɛɛ faa:

¹⁷ gɛ Mɔkilɔ rɔb yɔ fu̧u̧z a ge. Waal ɗɛɛ an gi ta̧a̧g gɛ; hi gbɛnig gɛ be, wɛɛ hi mɛɛg gɛ be. Yɛrɛ nɛya, nɛ mɛɛge, gi waak hi nɛya, wɛɛ gí ɗɔɔt a nɛ kpoos du be.

¹⁸ Be taan ɔɔk wɔrawaato, be wɛɛzugo a nɛɛge.

¹⁹ Gɔ gi am kaasi waal taab zaa gbɛnko. Yɛrɛ nɛɛ nɛ gib gbɛnko. Yɔ bee be za̧a̧ko, nɛɛ hɛw nɛ za̧a̧kza̧.

²⁰ A ɔ̧tɔ ge nɛ mɛɛ a be waak ɔksi hi Baa be, nɛɛ be nɛ waak ɔksi hi beya, beya be waak ɔksi hi nɛya.

²¹ Za̧a̧nyɔ gin dɔgl be gi wa̧a̧k gi kpoos du, ha̧a̧g hi beya; za̧a̧nyɔ ha̧a̧g a be muulɛ, Baa be gi ha̧a̧g gi muul be, gi wɛɛ gi ha̧a̧be a gi muul be, be zuun zul be a ge.

²² Yahuda warige (Yahuda Iskaryudi gii gɛ) warige a Waar i, ri gi ha̧a̧mɔ an mɔ zunsiw zul mɔ, mɔ́ zūns waal du zul mɔ ɔnɛ gɛ nɔ?

²³ Yeesu googe a za̧a̧n za gi ha̧a̧ge a be muulɛ, gi fɔ̀b dɔgl be, wɛɛ Baa be gi ha̧a̧g a za̧a̧nɔ muulɛ. Wi zaa wi waa hi giya.

²⁴ Za̧a̧nyɔ hā̧a̧g bee gɛ taa wa̧a̧k dɔgl be wɔ a gi kpoos du, wɛɛ dɔgl yɔ nɛ lako taa benɛ, gi Baa be yɔ yaazib ɔ̧ɔ̧nɛ.

²⁵ Anyɔ be gi hi nɛɛ ɓɔryɔ kete, be dɔgsin hin wɛrɛ.

²⁶ Yɛrɛ ɗaakya bɔ, Mɔkil yɔ Baa bɔ gɔ gi yaazig a be nuŋg du, gi goksin hin sɛw, gi wɛɛ gi mɛnsin hinyɔ be dɔksin sɛw.

²⁷ Be gisin ɔɔk ɗɔɔtil saŋtumi, be wɛɛ be gaan ɗɔɔtil be saŋtum bɔ. Be taan hinɔ gaak anyɔ waal gɔ gi gaako. Bɔ mɔkil nɛ gi namɔ, bɔ kol gi tuu̧nɛ.

²⁸ Nɛ lag be raa a be rekrekɔ, bé wɛɛ be wɛɛz a nɛɛge. À ha̧a̧n nɛ a be muulɛ, yɔ nɛ dag nɛ hato. Be rék a Baa be ge be. Yɛrɛ Baa be gbɔlumsɔ daaribdaarɔ, ya̧a̧nɛ.

²⁹ Yɛrɛ be raasin hin wɛrɛ gi dorɔ an kuudu hi ɔɔ tuuruko. Gid hi tuurɔ nɛ ɗɔbsibɗɔbsɔ.

³⁰ Be taa ya̧a̧bootingo zaa hi nɛɛ yɛ̧ltɔnɔ. Waal yɛrɛ waar ɔ gi zaako. Za̧a̧nɔ taan tɛŋk a bee zulha.

³¹ Yɛrɛ an waal gi mɛɛ a ha̧a̧b Baa bɔ, ya̧a̧nɛ be wook woosɔ anyɔ yanzibe. Ɗundinɛ wɛ rekɔ.