YOHANA 10 - Nouveau Testament Doyayo

YOHANA 10

¹ Yeesu wɛɛ raa a be raasin rɔbo, za̧a̧ni guz a wagl bɔ gedu gɛ gi kar wɔmnt ha gi gul a tamluk du, gi luuri, luur wɔdwɔɔlikya.

² Yɛrɛ za̧a̧ni tal a wagl bɔ gedu, gi tamnɛɛrayɔ.

³ Gbɔnɔ-ookya bɔ gi kpɛrsige, tam wɔ hi lag kɔlkɔ; gi el tamɔ wɔ hi gi zulumsɔ nuŋgo hi nuŋgo gi dosihi gbɔnɔ a lakdi.

⁴ Gɔ gi tuus tamɔ wɔ sɛwi gi gisihi gbɔnɔ dorko, tam wɔ hi mɛɛ kɔlkɔ hi fɔge.

⁵ Tam wɔ hi taa fɔk rɔ̀bi, hi nɔɔk dɔŋgɔ anyɔ hí mɛ̄ɛ̄ rɔ̀b bɔ kɔlkɔ gɛ.

⁶ Yeesu dɔgsihi ya̧a̧daanik bɔrɔ, wɛɛ hii be hi kɛm hinyɔ gisihi dɔk gɛ.

⁷ Yeesu wɛɛ raahi ɓɛ a be raasin rɔbo, bee gi tam waglɛ.

⁸ Wɔ hi dosib nɛ zaakɔ sɛw hi gi luurɛyɔ, luurɛ wɔd wɔɔlikyaadɛ, wɛɛ tam wɔ hi kɛmsihi kɔlkya̧ gɛ be.

⁹ Bee gi tamlukgbɔnɔ. Za̧a̧ni guz a beege gi za̧a̧; gi gulɔ gi wɛɛ gi tuu gi rek a leeslɛlɛ.

¹⁰ Luur gɔ zaa an gi loo hinluur kpɔd, gi gbɔmɔ, gi wɛɛ gi ha̧tiro. Beya be zaa an tam wɔ hi dag za̧a̧tig gi daarlɛlɛ.

¹¹ Bee gi tamnɛɛra rɔbo, nɛɛra rɔb bɔ gi gaak kolɔ a tam wɔ hi dɔŋgo.

¹² Tuswoosya yɔ taa tamnɛɛra gɛ gi gbɛn lergum gi zaako, anyɔ tam wɔ hi taa ɔnɛ gɛ be, nɔɔ ɔɔhi dihɔ lergum zaa wa̧a̧lihi, hɛksihi.

¹³ Za̧a̧n bɔ gi wook tuswoosɛ, dɔglɔ taa du ro gi nɔɔ gi ɔɔhi.

¹⁴ Bee gi tamnɛɛra rɔbo. Be mɛɛ tam be wɔ, tam be wɔ be hi mɛɛbe,

¹⁵ anyɔ Baa be mɛɛbe, bee be mɛɛ Baa be be, be wɛɛ be gaak kol be a tam wɔ hi dɔŋgo.

¹⁶ Be gin tam zaadɛ wɔ hi taa a luk yɛrɛ gedu. Tamya̧ gi an be kamzihi, hi kɛm kɔlk be hi ɔks maasya̧ gbunu, hi nɛɛra gbunu.

¹⁷ Be gaak kol be an kuudu be wɛɛ be looge. Ya̧a̧nɛ Baa be gi ha̧a̧g a be muulɛ.

¹⁸ Doo za taa look kol be, yɛrɛ be gig gaak hi zul be; be gin tɛŋko an be gaa kol be, be wɛɛ be gin tɛŋko an be wɛɛ be looge. Hinɔ Baa be gaabe gbɔnɔ an be woo giibɔ.

¹⁹ Hinfaltingo wɛɛ mɛɛ gɔ a Yahuduya wɔ hi teesdu a dɔgl bɔrɔ geha.

²⁰ Dood kittɔnɔ hi teesdu hi raa a wal bɔ yooyɔ, gin loorɛha̧a̧lɛ, nɛ gisig lak nɔ?

²¹ Zaadɛ hi raa be a loorɛha̧a̧lya gɔ bōōya̧a̧ anbɔ gɛ. Loorɛha̧a̧l yɔ ɗɛɛ an gi kpɛrs yɔ̧ɔ̧r lɔl ya?

²² Hi nak ma Bɛtluk naab yɔ gɔ hi el a Hanuka a Urusalima a zɛrk tee du.

²³ Yeesu gul gi ɛmbik Bɛtluk du a Sulemaanu gbag dɔŋdu.

²⁴ Yahuduya wɔ hi zaa hi rɔge hi raage a gi tuur nɛ bil an mɔ ɔsiw rɔb dɔk gaattɔnɔ be? Gid mɔ gi Masihu bɔ giya, raasiwi rɔbtɔnɔ.

²⁵ Yeesu raahi a nɛ be raasin nɛ ta̧a̧ gɛ ma mi! Woos wɔ be wook a Baa be nuŋg du hi zuunik dɔgl beenɛ.

²⁶ Nɛ yɔ nɛ taa tam benɛ gɛ gii nɛ ɗɔbs gɛ.

²⁷ Tam be wɔ hi gi kɛŋk kɔlk be, be mɛɛhi, hi gib fɔko.

²⁸ Be gihi gaak za̧a̧tig faa. Hi taa nɛ wak zaŋ, wɛɛ doo za taa an gi wɔɔdihi be naan du be.

²⁹ Baa be yɔ gaahi be naan du tɔɔ daar hin sɛw; doo za ɗɛɛ an gi wɔɔdihi a Baa be naan du gɛ be.

³⁰ Baa be hi beya wi gi gbunu.

³¹ Yɔ Yahuduya wɔ hi lag anbɔ hi wɛɛ hi loo bet an hi duutinge gi wɔrɔ.

³² Yeesu raahi a be zunsin woos rɔbɛ wɔ Baa be gaaz kittɔnɔ, nɛ gib duuk a woosɔ nɔni dɔŋg nɔ?

³³ Yahuduya wɔ hi googe a wi taam duuk a woos rɔb dɔŋgo. Yɔ mɔ book ya̧a̧ha̧a̧l a Bɛt zulha gii wi gim bet duutingo an mɔ wɔrɔ. Yɔ mɔ gi doo tɔs, mɔ wɛɛnik zul mɔ ri an Bɛt nɔ?

³⁴ Yeesu raa a nɛ hi bi̧i̧ a nɛ maakɗɛɛrwol du a Bɛt raa a be raa a nɛɛ gi bɛt a waal du da ma mi?

³⁵ Wɛ mɛɛ a hinza ɗɛɛ an gi kɔm tɔs a Bɛt ɗɛɛrwol du gɛ. Yɔ anbɔ, maak bɔ gi el dood wɔ Bɛt dɔgl zaa a hiige a nɛɛ gi bɛto.

³⁶ Yɛrɛ beya, Bɛt heribe yaazib waal du, ri nɛ ɗɛɛ raak a be book ya̧a̧ha̧a̧l a Bɛt zulha nɔ? Nɛ yɔ be raa a be gi Bɛt waa gii ma mi?

³⁷ Woos yɔ be wook gi taa a Baa be tɛŋk du gɛ, bɔnɛ ɗɔbsibe.

³⁸ Yɛrɛ yɔ be wook woos a gi tɛŋk du, gid nɛ ta̧a̧b nɛ gɛ si̧, ɗɔbsin woos wɔ ɔnɛ an nɛ mɛɛ, nɛ kɛm bɛttɔnɔ a Baa be ɔks gbun hi beya, bee be, be ɔks gbun hi Baa be.

³⁹ Hi tɛb an hi wa̧a̧ge, wɛɛ hi wa̧a̧g gɛ be. Wir hi naan du reekɔ.

⁴⁰ Yeesu wɛɛ rek a Urdum zɛ̧ɛ̧rnɔ kasiŋ zaa bɔ ge a lɛlyɔ Yohana da gi nɛ hotingo dood Bɛtmɛm a biitirnaan duge, ɗɔɔt waa hɔ.

⁴¹ Dood kittɔnɔ hi rek a ge hi raako a Yohana wōō gɛrs gbun mɔɔt gɛ, yɛrɛ hinyɔ dɔg a wal yɛrɛ gi zulha sɛw gi rɔbo.

⁴² Dood kittɔnɔ hi ɗɔbsig a lɛlɔ ge.