YOHANA 1 - Nouveau Testament Doyayo

YOHANA Dɔgl Rɔb yɔ Yohana bi̧i̧ YOHANA 1

¹ Anyɔ Bɛt gɔ gi kim nɛ waalɛ, Dɔgl bɔ ginɛ gi ma doosɛ. Dɔgl bɔ gi hi Bɛto, Dɔglɔ gii Bɛto.

² Dɔgl bɔ gi nɛ gi ma hi Bɛto a waalyɛɛliki.

³ Bɛt gɔn hin sɛw hi Dɔgl bɔ giya; hinza taa gi wooy hi Dɔgl bɔ gɛ gɛ.

⁴ Za̧a̧tig bɔ fu̧u̧ nɛ a Dɔgl bɔ gedu, Za̧a̧tigɔ gii gaa dood lɛlgaalɛ.

⁵ Lɛlgaal bɔ gi gaak a lɛlwil du, wɛɛ lɛlwil bɔ nimsig gɛ be.

⁶ Doo za giro, nuŋgɔ a Yohana, Bɛt yaazig

⁷ an segya an gi boo lɛlgaal bɔ dɔglɔ. Zaa an dood sɛw hi ɗɔbs Dɔgl bɔ a gi dɔŋgo.

⁸ Gii hi zulɔ taa lɛlgaal bɔ, gi segya yɔ zaa an gi boo lɛlgaal bɔ dɔglɔ giya.

⁹ Lɛlgaal rɔb mɔɔt yɔ gi gaasig dood sɛw gii gi zaak nɛ a waal du.

¹⁰ Dɔgl bɔ da gi nɛ gi ma a waal du. Bɛt kimn waal bɔ hi Dɔgl bɔ giya; yɔ anbɔ dood waal du hi mɛɛg gɛ hɛw.

¹¹ Dɔgl bɔ zaa a gi waal du a doodɔ hi, wɛɛ doodɔ wɔ hi ta̧a̧g gɛ.

¹² Yɛrɛ, dood zaadɛ wɔ hi dagig sɛw, wɔ hi ɗɔbsige, gaahi tɛŋko an hi wɛɛ Bɛt waato.

¹³ Hí wɛ̄ɛ̄ Bɛt waatɔ an doo yɔ hɛbtdi ha̧a̧g gɛ, zaabe, anyɔ gɔ hi wɛɛsig baa waal du waaɔ gɛ. Bɛt gii mɔɔhi hi zulɔ, gii wɛɛ baaya̧.

¹⁴ Dɔgl bɔ wɛɛ doo, waa wɛ teesdu, rɔbo hi rɔbgɔki tɔɔ gi kpoos du. Wɛ gbɛn gbɔlumsɔ, gbɔlums yɔ Bɛt waaɔ gbunsum yɔ dag a Baatɔ ge giya.

¹⁵ Yohana boo dɔglɔ gii gi ɓooya̧a̧ gi raa: a nɛ be boo nɛ za̧a̧nɔ dɔglɔ gii, be raa nɛ a Za̧a̧nyɔ gi zaak be kuudu daarinbe gbɔlums daarinu; yɔ be taa nɛ gɛ, ɔnɛ da gi nɛ gi ma.

¹⁶ Wɛɛ sɛw wɛ dag gɛmsilɔ bɔ rɔɔsɔ wɛnɛ daarlɛl gbɔɔltɔnɔ.

¹⁷ Bɛt gaazɛ maakdɔgl a Muusa ge; rɔbtig hi rɔbo hi fu̧u̧z a Yeesu Kristu ge be.

¹⁸ Doo za gbɛndir Bɛt gɛ nɛ zaŋ. Waa gbunsum bɔ gi Bɛto, gi waak a Baa dɔŋdi zaa raasɛ Bɛt bɔ za̧a̧nɔ dɔglɔ an wɛ mɛɛge.

¹⁹ Yohana dɔglɔ bɔ boo gɛrɛ. Yɔ Yahuduya wɔ hi yàà Bɛtmaakwookya wɔ hi Lewiya wɔ hi fu̧u̧z a Urusalima hi zaa hi war Yohana a mɔɔ bɔ?

²⁰ Gii be fāā gɛ, ta̧a̧ hi muut du: a be taa Masihu bɔ.

²¹ Hi wɛɛ hi warige a nɛ mɔɔ bɔ? Mɔɔ gi Eliya ya? Yohana goo a ɛ̧-ɛ̧! Gii gɛ. A mɔɔ gi Bɛtya̧a̧kɛŋkya bɔ wɛ oog ya? Yohana wɛɛ goo a ɛ̧-ɛ̧! Gii gɛ.

²² Hi wɛɛ hi warige a nɛ mɔɔ bɔ ɔnɛ ma nɔ? An wi mɛɛ hinyɔ gɔ wi re wi raas dood wɔ hi yaaziwi, mɔ raa zul mɔ a mɔɔ bɔ?

²³ Dɔg ma gɔ a beya, anyɔ Bɛtya̧a̧kɛŋkya bɔ Esaya dɔgɔ, bee gi za̧a̧nza yɔ gi ya̧a̧ɓoolik a hɛtdɔŋdu: a gɛbtsin Waar Bɛt gbɔnɔ gi er bɛttɔnɔ.

²⁴ Dood wɔ hi yaazihi nɛko hi fu̧u̧z a Farisaya wɔ hi teesdu

²⁵ hi warige hi raage a nɛ à mɔ taa Masihu bɔ gii gɛ, mɔ taa Eliya gii gɛ, mɔ taa Bɛtya̧a̧kɛŋkya bɔ gii gɛ be, mɔ hotingo dood hi Bɛtmɛm bɔ ɔnɛ nɔ?

²⁶ Yohana goohi a beya, be hotingo dood hi Bɛtmɛm hi mɛm tɔs. Yɛrɛ doo za giro a nɛ teesɗu, nɛ mɛɛg gɛ, gi zaak be kuudu;

²⁷ bé tūūr doo rɔb a gi muutdu an be hu̧u̧r be pid taal ba̧a̧nɔ gɛ.

²⁸ Dɔgl yɛrɛ daa a Betani, a Urdum zɛ̧ɛ̧rnɔ kasiŋ za, a lɛlyɔ Yohana gi hotingo dood hi Bɛtmɛm ge.

²⁹ Yoosugɔ Yohana gbɛn Yeesu gi zaak a ge, raa a Bɛt Tamwaa bɔ gi ha̧sig hinha̧a̧l a waal du gɛrɛ!

³⁰ Be boo dɔglɔ gii be raa a doo za gi zaak be kuudu, gbɔlumsɔ daaribdaarɔ. Yɔ be taa nɛ gɛ, ɔnɛ da gi nɛ gi ma.

³¹ Bee bé mɛ̄ɛ̄ nɛ za̧a̧nɔ gɛ, yɛrɛ be zaa dood hotingo hi Bɛtmɛmɛ an be zuns Israhilaya wɔ hi mɛɛge.

³² Yohana wɛɛ boo dɔglɔ raa a be gbɛn Bɛt Mɔkilɔ siz bɛtha an gutu buu, ɗɔɔt a zaan bɔ gi muulɛ.

³³ Bee be mɛɛg nɛ gɛ, gɛ Bɛt yɔ yaazib an be hotin dood hi Bɛtmɛm hi mɛmɛ raasibe a Za̧a̧nyɔ gɔ mɔ gbɛn Mɔkil be gi siz gi ɗɔɔt gi muulɛ, Za̧a̧nɔ gii gi hotin dood Bɛtmɛmɛ hi Mɔkil be.

³⁴ Be gbɛn hinɔ giya be dɔgɔ a Bɛt waa bɔ giya.

³⁵ Hɔnɛ yoosugɔ ma Yohana gi erk gɔ a lɛl bɔ ge hi walɛsɛrɛ ɔ̧ɔ̧ eerɛ.

³⁶ Yɔ Yohana gbɛn Yeesu gi daako, raa a Bɛt Tamwaa bɔ gɛrɛ.

³⁷ Walɛsɛrɛ wɔ eer hi bɛɛ lako hi fɔ Yeesu.

³⁸ Yɔ Yeesu zɛmr gi gbɛnihi hi gig fɔko warihi a nɛ ɓɛɛk nɔ? Hi warige: a Rabi, raakɔ a Hingokya , mɔ gi waak ay?

³⁹ Gii wɛɛ raahi a zaan nɛ see lɛlyɔ be waako. Hi rekɔ hi see lɛlyɔ gi waako; hi ɗɔɔt hi naa hi gii nɛɛk bɔ. Yɔ anbɔ ɔ̧t gi isba̧a̧n du.

⁴⁰ Zaaɔ gbun yɔ kɛm Yohana ya̧a̧boonɔ bɔ gi fɔ Yeesu , nuŋgɔ a Andrɛ, Simɔŋ Piyɛr hindaɔ giya.

⁴¹ Gii yɛɛl gi zɛm yɛ̧ɛ̧tɔ Simɔŋ; yɔ zɛŋg raage: a wi zɛm Masihu bɔ zɛmɔ, raakɔ a Kristu.

⁴² Kamzig Yeesu ge; yɔ Yeesu gbɛnig raage: a mɔɔ gi Simɔŋ, Yohana waawalɔ, yɛrɛ hi elimɔ a Kefas, elkɔ a Piyɛr.

⁴³ Yoosugɔ yɔ Yeesu ha̧a̧g rek a Galile, zɛm Filib raage a fɔbzibe.

⁴⁴ Filib fu̧u̧z a waal gbɔɔl bɔ Baytizaada gedu a Andrɛ hi Piyɛr lɛldu.

⁴⁵ Dagtin hi Nataniyɛl raage: a wi zɛm Yusufu waawal Yeesu Nazarɛdya bɔ, Za̧a̧nyɔ Muusa bi̧i̧ dɔglɔ a Bɛtmaak ɗɛɛrwol du; Bɛtya̧a̧kɛŋkya wɔ hi boo nɛ dɔglɔ hɛw.

⁴⁶ Nataniyɛl warige: a hinza rɔb ɗɛɛ an gi fu̧u̧z a Nazarɛd ya? Filib googe a nɛ zaam mɔ see.

⁴⁷ Yɔ Yeesu gbɛn Nataniyɛl gi zaak ge, raa: a hɔnɛ Israhilaya rɔb gɛrɛ, taan mɛlɛ.

⁴⁸ Nataniyɛl warige a mɔ mɛɛb ay? Gii googe a yɔ mɔ gi a yɔmntnɔ bɔ dɔŋgɔ du, yɔ Filib gɔ gi elumɔ, be gbɛnumɔ.

⁴⁹ Nataniyɛl ta̧a̧ raage a Hingokya , mɔɔ gi Bɛt waa, mɔɔ gi Israhilaya Waar i.

⁵⁰ Yeesu ta̧a̧ raage: a yɔ be raa a be gbɛnum a yɔmnt dɔŋdu gii mɔ ɗɔbs ya? Mɔ́ gbɛn hin zaadɛ gɛrsya gbɔlɛ hi daar yɛrɛ hɛw.

⁵¹ Be raasin hi rɔbo, nɛ gbɛn bɛtha gi kpɛ̧ɛ̧rɔ, Bɛt walɛsɛrɛ ɔ̧ɔ̧ hi karko hi wɛɛ hi sizig a Za̧a̧n Waa bɔ gi muulɛ a hɛbtdi.