YAKUBA 5 - Nouveau Testament Doyayo

YAKUBA 5

¹ Nɛɛ dood rɔɔsya wɛ, zaan nɛ kaa, nɛ ɓoolya̧a̧ a ya̧a̧rhant nɛ bɔ gi zaak nɛ zulha gi dɔŋgo.

² Rɔɔs nɛ wɔ hi dogɔ, sol hi muu gbandil nɛ wɔ.

³ Hɛɛlmɔt nɛ wɔ hi tus nɛ wɔ hi kɔɔ. Gɔ hi kɔɔ anbɔ, hí mɛɛn gii hinha̧a̧l nɛ, wɛɛ hinɔ gi dɔ̧ɔ̧ muul nɛ an laa. Nɛ mɔkts zul nɛ rɔɔs a ɔ̧t yɔ̧ɔ̧sum wɛrɛ gedu!

⁴ Dood woosya wɔ hi woo totɓɛs nɛ bak du nɛ maahi nɛ́ gāāhi dɔɔrɔɔsya̧ gɛ. Lagin kaalya̧ ta̧! Kaalya̧ zaa tuur a Waar Bɛt Tɛŋkya Sɛw tɔn du.

⁵ Nɛ waa a waal du a lɛl bɛt du hi a hɛmntig du. Nɛ len zul nɛ daarlɛlɛ nɛ tɔɔ an naabaa dool a ɔ̧tyɔ gɔ hi gbɛɛr duge gi dɔŋgo.

⁶ Nɛ gbaas dood wɔ hi taan a̧a̧b gɛ dɔglɛ, nɛ gbɔ̧hi, hii be hi in gɛ.

⁷ Yɔ anbɔ, yɛ̧ɛ̧dɛ mi wɛ, mɔnɛ gi tuur a Waar Yeesu Kristu zaakɔ bɔ gedu. Seen hinbalikya wɔ hinmɔŋkya̧ hi oo sɛɛ nɔɔn-gbunu an lees wɔ bak du hi ram rɔbtɔnɔ. Hi mɔmɔ an hi dag bɛl yɔ yɛɛl naŋko gi tuur a bɛlreki.

⁸ Nɛɛ hɛw, mɔnɛ, ɓaasin kpoos nɛ anyɔ Waar Yeesu zaakɔ sɛ̧ɛ̧bɔ.

⁹ Yɛ̧ɛ̧dɛ mi wɛ, bɔ̄ hin gi nɔɔtinnɛ nɛ niitin an bɔ̄ Bɛt gi gbaasin dɔglɛ. Za̧a̧nyɔ gɔ gi gbaas dood dɔgl sɛ̧ɛ̧bɔ, gi erk a luk gbɔnɔya̧, ha̧a̧g an gi guuzɔ.

¹⁰ Yɛ̧ɛ̧dɛ mi wɛ, mɔkin Bɛtya̧a̧kɛŋkya wɔ hi boohin hi Waar Bɛt nuŋgɔ. Hi dag ya̧a̧rhant gbɔɔltɔnɔ hi mɔmhin an hi wɛɛsɛ gbɔnɔdorkyaadɛ.

¹¹ Nɛ mɛɛ a za̧a̧nyɔ er bɛttɔnɔ gi mɔm ya̧a̧rhanto, wɛ raak gii a gin hat ma mi? Nɛ lag Ayoba hinmɔŋkɔ bɔ dɔglɔ. Nɛ mɛɛ hinyɔ Waar Bɛt gaag kuudu. Ya̧a̧nɛ ya̧a̧rmɛɛk tɔɔtɔ a Waar Bɛt kpoos du hi hinrɔbgɔki.

¹² Yɛ̧ɛ̧dɛ mi wɛ, hinyɔ daarlɛl sɛw, bɔnɛ dɛŋglhinɛ hi bɛtha nuŋgɔ, hi hɛbt nuŋgɔ, an hi nɔ nɛ hɛw bɔnɛ dɛŋglinu. Raakɔ: a hɔɔ, zaabe a ɛ̧-ɛ̧, rii anbɔ; bɔgi daar bɔrɔ an bɔ̄ Bɛt gi gbaasin dɔglɛ.

¹³ Doo za nɛ teesdu gi ya̧a̧ryɔ̧kyɔ̧ ya? Zɔ̧g Bɛto. Doo za gi hat dak ya? Ɛɛg hin-ɛɛn Bɛt-baanikya.

¹⁴ Doo za gumtil gigi nɛ teesdu ya? Gi el ɗɛntɛ Bɛtwoos-kaŋkigya wɔ hi zaa hi zɔ̧bsig Bɛto, hi wɛɛ hi gɛbsig hi kurumi a Waar Yeesu nuŋg du.

¹⁵ Zɔ̧k bɔ gi ɔks hi ɗɔbsigi gi za̧a̧s gumtil bɔ. Waar Yeesu gi za̧a̧sige gi ɗunsig ha, gi wɛɛ gi bitsig hinha̧a̧l wɔ da woo nɛ sɛw.

¹⁶ Yɔ anbɔ, walkin hinha̧a̧l nɛ a nɛ teesdu, zɔ̧btinnɛ Bɛto an nɛ za̧a̧. Doo hinrɔbwookya Bɛtzɔ̧kɔ gin tɛŋk gbɔɔltɔnɔ.

¹⁷ Eliya gi doo an wɛya. Zɔ̧b Bɛt hi kpoosɔ sɛw an bɔ bɛl gi naŋgɔ. Loo wɛl taarɛ hi sɛɛ nɔɔn-gbunu bɛl naŋg gɛ.

¹⁸ Wɛɛ zɔ̧g ɓɛ, bɛl naŋgɔ, hɛbt wɛɛ yɛɛl lees gaaki.

¹⁹ Yɛ̧ɛ̧dɛ mi wɛ, doo za gbun a nɛ teesdu gi hɛɛ gbɔnɔ rɔb bɔ, doo za gi wɛnzig a gedu,

²⁰ mɛɛnɛ a za̧a̧nyɔ zɛmz doo hinha̧a̧lya bɔ gi fɔk gbɔnɔ a̧a̧bi gi wɛnzig a gbɔnɔ rɔb bɔ gedu, za̧a̧s za̧a̧n bɔ kol ɔ̧ɔ̧nɛ, wɛɛ yaat hinha̧a̧l kittɔnɔ. Anbɔ.