YAKUBA 4 - Nouveau Testament Doyayo

YAKUBA 4

¹ Gbaato hi gabsɛ hi fu̧u̧ hi nɛ teesdu nɔ? Nɛ hi fu̧u̧ a ɗɔkum nɛ wɔ hi wook gabs nɛ kpoos du hi ma mi?

² Gin ha̧a̧k hin zaadɛ, nɛ dagihi gɛ, nɛ gbork zulgbɔŋki; nɛ ɗɔkingo hin zaadɛ wɛ nɛ ɗɛ̄ɛ̄hi dak gɛ, nɛ gbaatingo nɛ gɔk gabsɛ. Yɔ nɛ ɛr hin a Bɛt ge gɛ gii nɛ taanɔ.

³ Gɔ nɛ ɛr be, nɛ ɛrk hi ɗɔkum ha̧a̧lɛ, an gɔ nɛ dagɔ nɛ woos zul nɛɛn kpɔd. Ya̧a̧ gi nɛ dag gɛ.

⁴ Nɛɛ dood mansnaakya wɛ a Bɛt muutdu, nɛ mɛ̄ɛ̄ a waal sa̧a̧m wɛɛkɔ, mɔ wɛɛ Bɛt lɔlhɛ̧ɛ̧nikya gɛ ya? Yɔ anbɔ, za̧a̧nyɔ ha̧a̧g an gi wɛɛ waal sa̧a̧mi wɛɛn zulɔ Bɛt lɔlɔhɛ̧ɛ̧nikyayɔ.

⁵ Bɔnɛ mɔk a hinyɔ Bɛt ɗɛɛrwolɔ raa: a Bɛt gin kubl a Mɔkil bɔ yaaz wɛ kpoos du gi zulɛ, gi hin tɔsyɔ.

⁶ Yɔ anbɔ, Bɛt wɛɛ giwɛ gaak gɛmsil gi daariklɛlɛ. Ya̧a̧nɛ hi bi̧i̧: a Bɛt gi inik zultɔɔsigya wɔ, wɛɛ gi zultiisigya wɔ gɛmsil gaako.

⁷ Yɔ anbɔ, tiisin zul nɛ a Bɛt dɔŋdi nɛ lagsig tɔnɛ, inin loorɛha̧a̧lɛ, gi nɔ̀ɔ̀ gi ɔɔnɛ.

⁸ Sɛ̧ɛ̧bin Bɛto; gii be gi sɛ̧ɛ̧b nɛɛ be. Hinha̧a̧lya wɛ, gaasin naan nɛ hi kpoos nɛ, nɛɛ dood mɔkil eerya wɛ.

⁹ Mı̄nɛ, lilinhinɛ, kaanɛ, zɛmrin kpɛ̧ɛ̧t nɛ gi wɛɛ kaalɛ, wɛɛ hat nɛ gi zɛmr mimto.

¹⁰ Tiisin zul nɛ a Waar Bɛt dɔŋdi gi pɛɛnɛ.

¹¹ Yɛ̧ɛ̧dɛ mi wɛ, bɔnɛ raatin ya̧a̧ha̧a̧lɛ. Za̧a̧nyɔ boo ya̧a̧ha̧a̧l a naaza zulha, zaa lab gɛ gi gbaas naaza dɔglɛ, boo ya̧a̧ha̧a̧l a Bɛtmaakdɔgl zulha, gbaas Bɛtmaakɔ dɔglɛ. Yɔ anbɔ gid mɔ gbaas Bɛtmaak dɔglɛ, mɔ wɛ̄ɛ̄ Bɛtmaakfɔkya gɛ, mɔ gi dɔgl gbaakya ɔ̧ɔ̧nɛ.

¹² Bɛt gi gbunu gi maakdɔgl gaakya hi dɔgl gbaakya, gii gin tɛŋk an gi za̧a̧s doo, zaabe an gi ha̧tirge. Mɔɔ yɔ mɔ gbaasig namɔza dɔglɛ, mɔ seek zul mɔ an mɔɔ bɔ?

¹³ Yɛrɛ lagsinmi, dood wɔ nɛ raak: a nɛɛko, zaabe yoosugo wɛ́ rek a waal gbɔɔl bɔrɔ lab gedu wɛ́ waa hɔ wɛl gbunu, wɛ gɔ hinriŋsi wɛ dag tusɛ.

¹⁴ Nɛ mɛɛ hinyɔ kol nɛ gɔ gi wɛɛ yoosig ya? Yɔ anbɔ nɛ gi an kuzɛɛ yɔ gɔ midza ɓɔryɔ wɛɛ kuudu kaasi gbaarɔ.

¹⁵ Hinyɔ bɛr an gɔ nɛ dɔg nɛ gɛrɛ: a Bɛt gi ha̧a̧ge, Bɛt gi kaŋkig kol be, be woo hin yɛrɛ hi yɛrɛ.

¹⁶ Yɛrɛ nɛ gi tɔɔsig zul nɛ, nɛ book hin gbɔlɛ. Zultɔɔsig wɔ an bɔrɔ sɛw bɛr gɛ.

¹⁷ Yɔ anbɔ, za̧a̧ni mɛɛ hinrɔb gɔk gi gɔ gɛ, gɔ hinha̧a̧lɛ.