MATA 5 - Nouveau Testament Doyayo

MATA 5

¹ Yɔ Yeesu gbɛn saal wɔ anbɔ kar ga̧a̧t ha, ɗɔɔtɔ, wɛɛ fɔkɔya wɔ hi zaa a ge.

² Yeesu barsihi hingok anyɔ lɛ

³ a hat gi a dood wɔ hi mɛɛ a be gi doo ya̧a̧rya a Bɛt muut du hi. Yɔ anbɔ, Bɛt wáátɔ gi ya̧a̧nɛ.

⁴ Hat gi a dood wɔ hi gi kaal du hi, yɔ anbɔ Bɛt gi rɔɔhi.

⁵ Hat gi a dood zulhɔnikya wɔ hi, yɔ anbɔ hi dag hɛbt bɔ Bɛt raa a gi gaahi.

⁶ Hat gi a dood wɔ hi kɛŋk waabil riit a̧a̧kil hi, gi wɛɛ gi gihi ha̧a̧sig an mɛmɛ, yɔ anbɔ Bɛt gi gaahi hinɔ buuya̧ gi hi̧i̧.

⁷ Hat gi a dood wɔ hi gis dood zaadɛ ya̧a̧rmɛɛk hi, yɔ anbɔ Bɛt gi mɛɛsihi ya̧a̧r be.

⁸ Hat gi a dood kpoosgaatya wɔ hi, yɔ anbɔ hi gbɛn Bɛto.

⁹ Hat gi a dood wɔ hi gaak dood boolum hi, yɔ anbɔ Bɛt gi elihi a waat beenɛ.

¹⁰ Hat gi a dood wɔ gɔ hi zɛksihi hi, a hinriit yɔ hi wook gi dɔŋgo. Yɔ anbɔ, Bɛt wáátɔ gi ya̧a̧nɛ.

¹¹ Dood hi niinɛ hi zɛksinɛ, hi wɛɛ hi ralsin ya̧a̧ha̧a̧l yɔ gi sɛw a be dɔŋgo, yɔ anbɔ hat gi a nɛɛge.

¹² Dagin hato, kpoos nɛ kpɛ̧ɛ̧ge, yɔ anbɔ dɔɔrɔɔs za gbɔɔl gin ook a bɛtha. Hi da hi gɔs nɛ Bɛtya̧a̧kɛŋkya wɔ hi dosin anbɔ be.

¹³ Nɛɛ fɔkbeya wɛ, nɛɛ gi manda a waal du. Yɛrɛ à manda gbɛɛr gɛ, yɔ hi wɛɛnig gbɛrtilɔ ri nɔ? Wōō hinza ma gɛ, gi an hi bisig lakdi dood hi ɗa̧a̧kig dɔɔ du, daarɔ.

¹⁴ Nɛɛ gi lɛlgaal a waal du. Waal gbɔɔl yɔ gi a ga̧a̧t ha ɗɛɛ an gi yaat gɛ.

¹⁵ Gbunɔ, gɔ hí kpōō pitila hi mibt a dɔn du gɛ, gɔ hi wiig a wiikɔ bɔ gedu an gi gaas dood wɔ hi gi luk bɔ gedu sɛw.

¹⁶ Lɛlgaal nɛ gaag a dood muutdu sɛw anbɔ an hi gbɛn hinrɔb yɔ nɛ wooko hi ɗɔbs Baa nɛ yɔ gi a bɛtha.

¹⁷ Bɔnɛ mɔk a be zaa hɛbtdi an be pid Muusa maakdɔgl ɔ̧ɔ̧nɛ, zaabe Bɛtya̧a̧kɛŋkya wɔ hingokya̧ wɔ. Bé zāā an be pidihi gɛ. Be zaa an be woo dɔglya̧ be da̧a̧sɔ.

¹⁸ Be gisin raak rɔbo, hi taa ha̧sig Bɛt maakdɔgl bɔ dɔglɔ za bi̧i̧sɔ za fɛŋ, zaabe, hinɔ fɛŋwaat wɔ zulha zaa gbunu, gi tuur a ɔ̧tyɔ hinwɔ sɛw gɔ hi wooy hi da̧a̧ gedu, wɛɛ bɛtha hi hɛbtdi hi da̧a̧ gedu sɛw.

¹⁹ Yɔ anbɔ za̧a̧nyɔ ɓɛd maakdɔgl wɔ wansɔ zaa gbun hɛw gi wɛɛ gi goks dood an hi woo anbɔ be, hi elig a gi wans mɔɔti a Bɛt wáát du. Wɛɛ za̧a̧nyɔ fɔ maakdɔgl wɔ gi wɛɛ gi goks dood zaadɛ an hi woo anbɔ be, hi elig a gi gbɔɔl mɔɔti a Bɛt wáát du.

²⁰ Be gisin raako, gid nɛ́ wōō hinriit nɛ daar Bɛtmaakdɔkya wɔ hi Farisaya wɔ gɛ, nɛ taa gulk a Bɛt wáát du nɛ zaŋ.

²¹ Nɛ da nɛ lag a hi dɔks ɗɛntɛ nɛ wɔ doosɛ a bɔmɔ gbɔm zulɛ, za̧a̧nyɔ gbɔm zulɛ hi gbaasig dɔglɛ.

²² Yɛrɛ bee be gisin raako a za̧a̧nyɔ gin nɔɔtig a naaza zulha, woo hinha̧a̧l yɔ rii dɔgl-gbaaki. Za̧a̧nyɔ nii naaza a zul mɔ taaro! Woo hinha̧a̧l za yɔ rii an hi wa̧a̧ge hi kaŋg a dɔglyɛ̧ɛ̧kya wɔ hi muutdu hi gbaasig dɔglɛ; za̧a̧nyɔ nii naaza a yoo ha̧a̧lɛ! Woo hinha̧a̧l za gbɔɔl yɔ rii an hi wa̧a̧g hi yaag a laazɛŋk du.

²³ Yɔ anbɔ, mɔ́ zaa mɔ́ gaak Bɛt gaas a Bɛtmaaksɛŋko, mɔ́ mɔk mɔ́ mɛɛ a namɔza gig nɔɔk mɔ zulha,

²⁴ ɔɔm gaas mɔ bɔ a Bɛtmaak sɛŋk bɔ dɔŋgɔdi, mɔ rek mɔ bool hi gii kete, ɓɔr mɔ ɔɔ zaak Bɛtgaas bɔ gaako.

²⁵ Za̧a̧n za gi gɛ̧ɛ̧num hinɛ nɛ gi rek lɛlgbun a dɔgl-gbaak luk du, boolum nɔɔktɔnɔ hi giya a gbɔnɔdi an bɔgi gaamɔ a dɔgl-gbaakya bɔ gi naan du gi wa̧a̧mɔ gi wɛɛ gi gaamɔ laaya naan du gi re gi yaam a luknɔ du.

²⁶ Be gisum raak rɔbo, yɔ anbɔ mɔ́ tòò tus yɔ gim fɔk sɛw kete, ɓɔr mɔ ɔɔ tuuk a luknɔ bɔ gedu.

²⁷ Nɛ da nɛ lag a hi dɔgɔ a bɔmɔ naamansi.

²⁸ Yɛrɛ bee be gin raako a za̧a̧nyɔ see naaza nis gi wɛɛ gi ɗɔkinge, gɔ mans hi gii a gi kpoos du da̧a̧da̧ ma bɔ.

²⁹ Yɛrɛ yɔ̧l mɔ bɔ naanrɔb gi matum a hinha̧a̧l du, wigumɔge mɔ bisige, daar an mɔ waks hinza a mɔ muul gbunu yɔ riisumɔ, hi anyɔ gɔ mɔ ɔɔ muul mɔ sɛw gi yaay a laazɛŋk du.

³⁰ Naanrɔb mɔ gi yaam a hinha̧a̧l du, dɛ̧ɛ̧mɔge mɔ bisige, daar an mɔ waks hinza a mɔ muul gbunu, yɔ riisumɔ, hi anyɔ gɔ mɔ ɔɔ muul mɔ hi bisum a laazɛŋk du sɛw.

³¹ Hi dɔg nɛ hɛw a za̧a̧nyɔ gi hɛɛtingo hi nistɔ gi gaag ɗɛɛrwol hɛɛtinsya gaatyɔ.

³² Yɛrɛ bee be gisin raako a za̧a̧nyɔ nin nistɔ hinɔ gi taa an doo za kɛsig gɛ, wɛɛnig mansyayɔ. Za̧a̧nyɔ loo nis yɔ hi bisig be, gɔ mansyɔ.

³³ Nɛ da nɛ lag nɛ a hi dɔks nɛ ɗɛntɛ wɛ hii doosɛ a bɔmɔ dɛŋglhin hi ya̧a̧faanɛ, mɔ woo hinyɔ mɔ dɛŋgl rɔb a Waar Bɛt muut du gaattɔnɔ giya.

³⁴ Yɛrɛ bee be gin raako a bɔnɛ dɛŋgl nɛ hin zaŋ. Bɔnɛ dɛŋglhin hi fɛɛtiha nuŋgɔ, yɔ anbɔ gi Bɛt waar umsɔ ɗɔɔtillɛlɛ.

³⁵ Bɔnɛ dɛŋglhin hi hɛbt nuŋgɔ, anyɔ gi Bɛt dɔɔɔ ɗa̧a̧tillɛlɛ; bɔnɛ dɛŋglhin hi Urusalima nuŋgɔ, anyɔ gi Waar gbɔɔl bɔ waal gbɔɔl ɔ̧nɛ;

³⁶ bɔmɔ dɛŋglin zul mɔ hin hɛw anyɔ mɔ ɗɛɛ susug mɔ zaa gbun sɔɔs wɛɛnik gɛ, zaabe an mɔ wisig gɛ.

³⁷ Ta̧a̧n kpɔd a hɔɔ, zaabe a ɛ̧-ɛ̧; hinyɔ daar hin yɛrɛ ma gi fu̧u̧zig a loorɛha̧a̧l mɔkil du.

³⁸ Nɛ lag hi dɔg nɛko a lɔlɛ hi lɔlɛ, nuŋgo hi nuŋgo.

³⁹ Yɛrɛ bee be gin raako a bɔnɛ ɓaas zul nɛ a doo ha̧a̧l gbaŋgi. Za̧a̧nyɔ dɛ̧mɔ hi naanɔ rɔb kuu a wɛkt naanrɔbo, wɛɛm mɔ zɛmrsig bɔ naanyɛ̧l hɛw.

⁴⁰ Za̧a̧nza gi tɛb an gi ka̧mɔ a dɔgl-gbaak luk du gi loo hinhek mɔ, ɔɔmɔg gi loo gban mɔ gbɔɔl bɔ hɛw.

⁴¹ Za̧a̧nyɔ fɛ̧ɛ̧mɔ an mɔ pɛɛsig wɔdɔ mɔ kamsig kilomɛɛtre gbunu, mɔɔ wɛɛm mɔ kamsig kilo-mɛɛtre eerɛ.

⁴² Za̧a̧nyɔ zɔ̧m hinɛ, gaamɔge, za̧a̧nyɔ ha̧a̧g an gi loo wɔd mɔ belko, bɔmɔ ansige.

⁴³ Nɛ lag hi raako a yɛgi ha̧a̧mɔ a namɔza muulɛ, wɛɛ hɛ̧ɛ̧num za̧a̧nyɔ gim lɔlhɛ̧ɛ̧nik be.

⁴⁴ Yɛrɛ bee be raanɛ a yɛgi ha̧a̧nɛ a zɛnɛ wɔ hi gin lɔlhɛ̧ɛ̧nik hi muulɛ, wɛɛn nɛ zɔ̧bs wɔ hi gin gɔluko hi wɛɛ hi gin ya̧a̧kɛtingo Bɛto,

⁴⁵ an nɛ wɛɛs Baa nɛ yɔ gi a bɛtha wāātɔ. Yɔ anbɔ gi haasig ɔ̧t a dood ha̧a̧l wɔ hi rɔbɛ wɔ hi zulha hɛw; gi naŋsig bɛl a dood riitɛ wɔ hi ha̧a̧lwookya wɔ hi zulha.

⁴⁶ À ha̧a̧nɛ a dood wɔ ha̧a̧hi nɛ muul hi muul be, à lab ma nɛ ook nɔ dɔɔrɔɔsɔ a Bɛt ge ɓɛ? Tooszekya wɔ hi taa wook an gbun bɔ hɛw ya?

⁴⁷ Àn nɛ book yɛ̧ɛ̧dɛ nɛ hii kpɔd, gi an nɛ wook nɔ hinɔ gɛrsyaɔ nɔ? Dood wɔ hi mɛɛ Bɛt gɛ hi taa wook an gbun bɔ hɛw ya?

⁴⁸ Wɛɛn dood rɔbɛ tib an Baa nɛ Bɛt yɔ gi a bɛtha gi doo rɔb tib be.