MATA 4 - Nouveau Testament Doyayo

MATA 4

¹ Yɔ anbɔ Bɛt Mɔkilɔ kam Yeesu a hɛtdɔŋ du an loorɛha̧a̧l gi maatige.

² Yɔ lilhin ɔ̧t dumbili nasɔ hi yɛms dumbili nasɔ gi lehin gɛ, kuudu a̧a̧kil ha̧a̧ge.

³ Loorɛha̧a̧l bɔ zaa maatig raage: a mɔd gi Bɛt waayɔ, raam bet wɛrɛ hi wɛɛ koko.

⁴ Yeesu ta̧a̧ a Bɛt ɗɛɛrwolɔ raa a doo gɔ za̧a̧n kok kpɔd gɛ, gi an gi za̧a̧n dɔgl yɔ Bɛt gɔ dɔg sɛw.

⁵ Loorɛha̧a̧l bɔ wɛɛ kaŋg a Bɛt waal gbɔɔl bɔ Urusalima gedu da kasig a Bɛtluk hɔɔt zulha,

⁶ raage a gid mɔ gi Bɛt waayɔ, gi̧i̧m hɛbt di. Ya̧a̧nɛ Bɛt ɗɛɛrwolɔ raa a Bɛt gi raas walɛsɛrɛ ɔ̧ɔ̧ wɔ dɔgl mɔ, hí ka̍m a naan du, an bɔmɔ kubr dɔɔ mɔ a bet muulɛ.

⁷ Yeesu ta̧a̧ raage a Bɛt ɗɛɛrwolɔ raa hɛw a bɔmɔ maat Waar mɔ Bɛto.

⁸ Loorɛha̧a̧l bɔ wɛɛ kaŋge a ga̧a̧t za hɔɔt ha̧a̧l zulha zunsig wáát yɔ waal du sɛw hi gbɔlumsya̧ sɛw

⁹ wɛɛ raage a an mɔ zagl di mɔ ɗɔbsibe, be gaamɔ hin wɛrɛ sɛw.

¹⁰ Yeesu wɛɛ ninige raage a Saydanu, da mɔ rek hɔ! Bɛt ɗɛɛrwolɔ raa a mɔ ɗɔbs Waar mɔ Bɛto, mɔ wɛɛ mɔ woos gii hin kpɔd.

¹¹ Yɔ anbɔ loorɛha̧a̧l bɔ ɔɔge, Bɛt walɛsɛrɛ ɔ̧ɔ̧ hi zaa hi woosig hinɛ.

¹² Yɔ Yeesu lag a hi yaa Yohana a luknɔ du, gii wɛɛ ɗund rek a Galile.

¹³ Ɗɔ̄ɔ̄t a Nazarɛd gɛ, dɔŋg da ɗɔɔt a waal gbɔɔl bɔ Kapɛrnayum yɔ sɛ̧ɛ̧b hi Galile mɛmbal bɔ gedu a Zaabulɔŋ hɛbt du hi Nɛbtali hɛbt du,

¹⁴ an hinyɔ Bɛtya̧a̧-kɛŋkya bɔ Esaya dɔg nɛ gi da̧a̧

¹⁵ a Zaabulɔŋ hɛbtɔ, Nɛbtali hɛbtɔ yɔ tuur a mɛmbal bɔ ge hi Urdum kasiŋ zaabɔ ge, a Galile, a dood wɔ hi taa Yahuduyaadɛ gɛ hi waalɛ:

¹⁶ Dood nɛ wɔ hi ɗɔɔtig nɛ a lɛlwil du hi gbɛn lɛlgaal gbɔɔlɛ, wɔ hi ɗɔɔtig nɛ a wɔrk hɛbt du, a zeksɔ gedu, lɛlgaal gaaga hi zulha.

¹⁷ Bɛɛ anbɔ Yeesu yɛɛl Bɛt dɔglɔ dɔkyɔ, raa a zɛmrin kpoos nɛ, Bɛt wáátɔ sɛ̧ɛ̧bɔ.

¹⁸ Anyɔ Yeesu gi fɔk a Galile mɛmbalya̧ gbɛn dutwa̧a̧k-yaadɛ eerɛ, Simɔŋ yɔ nuŋgɔ zaa a Piyɛr hi yɛ̧ɛ̧tɔ Andrɛ hi gbalik zagr mɛmbal du hi dut wa̧a̧nuko.

¹⁹ Raahi a fɔbzinbe an be wɛɛnin dood kamzigyaadɛ a Bɛt wáát du an dut yɔ nɛ wa̧a̧zig be.

²⁰ Ɓɔrbɔ hi ɔɔ zagrya̧ wɔ hi fɔge.

²¹ Yɔ Yeesu rek doosɛ wɛɛ da gbɛn walɛ eerɛ: Zebede waawal Yakuba hi yɛ̧ɛ̧tɔ Yohana a lɛmb du hi baaya̧ Zebede hi gɛmsig zagrya̧, elihi

²² hi ɔɔ lɛmb bɔ hi baaya̧ Zebede ɓɔrbɔ hi fɔge.

²³ Yeesu gbɛ̧ɛ̧k a Galile hɛbt du sɛw gis dood hingok a hi mɔksilluk wɔ du, gi dɔk Bɛt wáátɔ dɔglɛ, gi za̧a̧sig gumtil wɔ hi gin gums gaŋsɛ gaŋsɛ sɛw.

²⁴ Nuŋgɔ ɗuk gɔ a Siriya waal du sɛw. Yɔ dood hi lag anbɔ hi kamsig gumtil wɛ hi gin gums zaadɛ wɛ sɔmsɔm, hi dood wɔ hi kɛŋk kosgumnɛ an loorɛha̧a̧lya wɔ hi gin muul du, hi zulnɔɔya wɛ be, hi zaŋdɛ wɛ, gihi za̧a̧sugo.

²⁵ Dood saal gbɔlɛ hi fu̧u̧zig a Galile, a Waal Gbɔlɛ Kooblɛ, a Urusalima, a Yahuduya hi a da Urdum zɛɛ kasiŋ zaa bɔ ge hi gig fɔko.