MATA 2 - Nouveau Testament Doyayo

MATA 2

¹ Yɔ Yeesu mɔɔy a Baytilaama a Yahuduya hɛbt du a wɛl yɔ Hirudus gi waar gedu, hinmɛɛkya dubtɛ hi fu̧u̧z a ɔ̧tkazigi hi zaa a Urusalima hi warɔ

² a Yahuduya waar bɔ mɔɔy ay nɔ? Wi gbɛn sɛwalɔ mid a ɔ̧tkazigi, hinɔ giya wi zaa an wi ɗɔbsige.

³ Yɔ waar gbɔɔl bɔ Hirudus lag anbɔ kpoosɔ naamɔ hi dood Urusalimaya wɔ sɛw.

⁴ Hirudus mɔks Bɛtmaak-wookya gbɔlɛ wɔ hi Bɛtmaakdɔkya wɔ sɛw warihi lɛlyɔ Masihu bɔ gɔ gi mɔɔy du.

⁵ Hi raasige a gi an gi mɔɔy a Baytilaama a Yahuduya hɛbt du. Yɔ anbɔ hinyɔ Bɛtya̧a̧-kɛŋkya bɔ bi̧i̧ amntɔnɔ gɛrɛ:

⁶ a Bɛt raa a yɛrɛ mɔɔ Baytilaama a Yahuduya hɛbt du, mɔ kōd mɔ dāār Yahuduya waal gbɔlɛ wɔ sɛw gɛ, anyɔ waar gbɔɔl gɔ gi fu̧u̧ a mɔɔge, an gi oo dood be Israhilaya wɔ.

⁷ Yɔ anbɔ Hirudus el hinmɛɛkya dubtɛ wɔ luurlɛlɛ warihi ɔ̧tyɔ sɛwal bɔrɔ mid du rɔbtɔnɔ. Yɔ hi raasig ɔ̧tɔ,

⁸ wɛɛ yaahi a Baytilaama raahi a rekin a Baytilaama nɛ ɓɛɛ waayɛ̧s bɔ rɔbtɔnɔ, gɔ nɛ zɛŋge nɛ kamsib ramsɔ an bee hɛw be rek be ɗɔbsige.

^9-10 Yɔ hi kɛms waar bɔ dɔglɔ gi da̧a̧ anbɔ hi ɗund hi rekɔ. Yaala sɛwal bɔ hi gbɛnig nɛ a hi hɛbtdu a ɔ̧tkazigi wɛɛ mida. Yɔ hi gbɛn anbɔ hi dag hat gbɔɔltɔnɔ daarlɛlɛ. Sɛwal bɔ dosihi muut du, tuur a lɛlyɔ waayɛ̧s bɔ gi ge erɔ.

¹¹ Hi gul luk bɔ gedu hi zɛm waayɛ̧s bɔ hi nɔɔtɔ Mariyama, hi zagl di hi ɗɔbsige; hi wɛɛ hi kpɛ̧ɛ̧r wɔdya̧ hi ha̧s hɛɛlmɔto hi tɛ̧ɛ̧mɛk okt ki̧i̧lhɛmntya, hi tɛ̧ɛ̧mɔt za ki̧i̧lhɛmntya nuŋgɔ a ɗaasɛ-rɛyɔ, hi gaa waayɛ̧s bɔ.

¹² Kuudu yɔ Bɛt wɛɛ gi raahi yorum du a bɔhi wɛɛ a Hirudus ge, wɔrɔ hi wɛɛ hi tɛ gbɔnɔ za dɔɔmi hi wɛɛ hi lɛlɛ.

¹³ Yɔ hinmɛɛkya dubtɛ wɔ hi rekɔ, Waar Bɛtwalsɛrɔ za zaa Yusufu ge a yorum du raage a wag kaasi, Hirudus gi ɓɛɛk waa bɔ an gi gbɔŋge. Ɗukum mɔ loo waa bɔ hi nɔɔtɔ mɔ nɔɔnihi mɔ renihi a Misra hɛbt du, mɔ kɔm hɔ gi tuur an gɔ be raamɔ mɔ wɛɛza.

¹⁴ Yusufu ɗundɔ loo waa bɔ hi nɔɔtɔ Mariyama a yɛms du hi retin a Misra.

¹⁵ Hi kɔm hɔ tuur a ɔ̧tyɔ Hirudus wɔr gedu. Hin bɔ lab tuur an hinyɔ Waar Bɛt dɔg a ya̧a̧kɛŋkɔya bɔ gi ya̧a̧ du a be elz waa be tuuz a Misra gi wooyyɔ .

¹⁶ Yɔ Hirudus gbɛn an hinmɛɛkya wɔ hi maagma, kpoosɔ nɔɔsig ha̧a̧ltɔnɔ, yaa layaadɛ hi rek hi gbɔm walɛwaat wɔ hi gin wɛl eerɛ hi wɔ hi tuur wɛl eer gɛ sɛw a Baytilaama hɛbt du sɛw anyɔ lag ɔ̧t yɔ sɛwal bɔ mid du a hinmɛɛkya dubtɛ wɔ hi ya̧a̧ du.

¹⁷ Yɔ anbɔ hinyɔ Bɛtya̧a̧kɛŋkya bɔ Zeremi da dɔg amntɔnɔ wooyyɔ

¹⁸ a hi lag sɛbt boo a Rama hi kaalɛ, hi hekil ha̧a̧ltɔnɔ, Rahila gii gi kaak waatɔ wɔrko. Yɔ waatɔ wɔ hi wɔr be, ta̧a̧ an hi rɔɔg ma gɛ.

¹⁹ Yɔ Hirudus bɛɛ wɔrko, Waar Bɛt walsɛr bɔ zaa Yusufu ge a yorum du a Misra, raage

²⁰ a ɗundum mɔ loo waa bɔ hi nɔɔtɔ nɛ wɛɛtin a Israhila hɛbt du. Dood wɔ hi ɓɛɛk nɛ waa bɔ an hi gbɔŋge hi wɔɔr ma.

²¹ Yusufu ɗundɔ loo waa bɔ hi nɔɔtɔ Mariyama hi wɛɛ a Israhila hɛbt du.

²² Hɔnɛyɔ Yusufu lag a waar Hirudus waawal Arkelawus gii wɛɛ gi yɛr baatɔ waar umsɔ a Yahuduya, hoobha̧a̧gha̧ rekɔ a Yahuduya hɛbto. Yɔ Bɛtwalsɛr bɔ wɛɛ raasig a yorum du a bɔgi ɗɔɔt hɔ, dɔŋgɔ, da rek a Galile hɛbt du.

²³ Da ɗɔɔt a waal gbɔɔl za bɔ nuŋgɔ a Nazarɛd gedu. Wɛɛ hinyɔ Bɛtya̧a̧-kɛŋkya bɔ dɔg nɛ wooyyɔ a Bɛt raa a hi elig a gi Nazarɛdyayɔ.