MATA 11 - Nouveau Testament Doyayo

MATA 11

¹ Yɔ Yeesu da̧ts walɛsɛrɛ ɔ̧ɔ̧ koobl daa eer wɔ hingoko, ɗund hɔdi re hingoko hi Bɛt dɔglɔ dɔki a waal gbɔlɛ wɔ hi gi a hi hɛbt du gedu.

² Yɔ Yohana gi luknɔ du gi kɛm Kristu woosɔ dɔglɛ, yaa walɛsɛrɛ ɔ̧ɔ̧ zaadɛ an hi warig hinɛ. Yɔ walɛsɛrɛ ɔ̧ɔ̧ wɔ hi rekɔ hi warige

³ a mɔɔ gi za̧a̧nyɔ wi mɛɛ a gi zaak ya? Gi an wi oo zaa dɔɔmi ya?

⁴ Yeesu ta̧a̧hi a rekin nɛ fɔks Yohana hinyɔ nɛ lako hi hinyɔ nɛ gbɛnko:

⁵ Yɔ̧ɔ̧rɛ wɔ hi gbɛnik lɔlɛ, dɔɔ gumtilya wɔ dɔɔya̧ ɓaa hi wɛɛ hi ɛmbuko, ɗobtilya wɔ ɗobtilya̧ da̧a̧ hi muul be, lagɛ wɔ hi tɔnkɛŋk be, wɔrkɛ wɔ hi rɛmlik be, wɛɛ hi dɔgsig ya̧a̧rya wɔ Dɔgl Rɔb bɔ be.

⁶ Wɛɛ hat gi a za̧a̧nyɔ simdɔɔ a be dɔŋg gɛ ge.

⁷ Yɔ Yohana walɛsɛrɛ ɔ̧ɔ̧ wɔ hi wɛɛko, Yeesu wɛɛ yɛls dood saal wɔ kuudu Yohana dɔglɔ bookɔ, raa a nɛ da nɛ re nɔ seezig a hɛtdɔŋ du nɔ? Nɛ re an nɛ seez bɔ̧ɔ̧k zayɔ zɛk gig namsig gii ya?

⁸ Nɛ re nɔ seezig nɔ? Wal za yɔ heg gbandil bɛt muul gii ya? Dood wɔ hi heg gbandil bɛtɛ hi waak ya̧nɛ a waar raa du.

⁹ Nɛ nɛ rek nɔ wɛ? An nɛ seez Bɛtya̧a̧kɛŋkya za ya? Hɔɔ! Ɔbe raasinɛ, wal bɔrɔ daar Bɛtya̧a̧kɛŋkya hɛw.

¹⁰ Bɛt ɗɛɛrwolɔ raa Yohana dɔgl ɔ̧ɔ̧nɛ a be yaak tɔmsbeya gɛrɛ a mɔ muutdu an gi gɛmtsim gbɔnɔ.

¹¹ Be gin raak rɔbo: dood wɔ nɛɛd hi mɔɔhi sɛw, za̧a̧nza tɔ̄ɔ̄ daar Yohana Bɛtmɛm Hotingoya bɔ hi gbɔlumsɔ gɛ. Yɛrɛ za̧a̧nyɔ gi wans a Bɛt wáát du tɔɔ daarigdaarɔ.

¹² A ɔ̧tyɔ Yohana yɛɛl Bɛt wáátɔ dɔglɔ dɔk gedu gi tuur ɓɔryɔ lɔlhɛ̧ɛ̧nikya wɔ hi wa̧a̧ dɔgl bɔ hi tɛŋko, dood ha̧a̧l wɔ hi tɛk an hi wɔɔ dɔgl bɔ hi tɛŋk be.

¹³ Bɛtya̧a̧kɛŋkya wɔ sɛw hi Muusa maakdɔglɔ hi boo Bɛt waar umsɔ dɔglɔ tuur a Yohana wɛlɛ.

¹⁴ Gi ha̧a̧nɛ an nɛ ta̧a̧ hinɔ, Yohana gii gi Eliya yɔ gɔ gi zaa.

¹⁵ An za̧a̧nyɔ gin tɔn an gi kɛmɔ gi kɛmɔ!

¹⁶ Be gòksin dood dɔ̧ɔ̧t wɛrɛ hi gi ɔ̧ti gi zul hi nɔ? Hi riitin an ya̧a̧mwaat wɔ gɔ hi ɗɔɔtig a luum ha hi ya̧a̧ɓoltingo hi nayza hii hi dɔko

¹⁷ a wi usin fɛ̧ɛ̧brɛ̧ɛ̧yɔ, nɛ nahin gɛ. Wi ɛɛsin ya̧a̧rnaabo, nɛ kāā gɛ be!

¹⁸ Yɔ anbɔ, Yohana zaa lehin rɔb gɛ, yɔ̧ bumhob gɛ; dood hi gig raako a gin loorɛha̧a̧l gi muul du!

¹⁹ Wɛɛ Za̧a̧n Waa bɔ zaa gi hin sɛw leko, gi bumhob yɔ̧ko. Hi wɛɛ hi raak ɓɛ a gi hinlekya ha̧a̧lɛ, wɛɛ gi bumyɔ̧kya ha̧a̧l be. Gi tooszekya wɔ hi hinha̧a̧l wookya wɔ sa̧a̧mya̧ be. Yɛrɛ Bɛt hinmɛɛkɔ rɔb bɔ zuun woosɔ wɔ a gi rɔbo.

²⁰ Yɔ anbɔ Yeesu wɛɛ yɛɛl waal gbɔlɛ wɔ woo nɛ gɛrs gbɔlɛ kit gedu a Galile hɛbt du niiki anyɔ dood wɔ hi tā̧ā̧ kpoosya̧ zɛmrik gɛ. Yeesu raahi

²¹ a mɔɔ Koraziŋ waal gbɔɔlɔ, mɔ gin ya̧a̧rhanto; mɔɔ Baytizaada, mɔ gin ya̧a̧r-hanto. An woos gɛrsya wɔ hi wooy a nɛ teesdu da wooy nɛ a Tirus waal gbɔɔl du hi Sidɔŋg waal gbɔɔl du, yɔ hi zɛmr nɛ kpoosya̧ amntɔnɔ hi heg ya̧a̧rnaab saa haŋsili hi wɛɛ hi kpuu tam hi muulɛ an hi zuun a be zɛmr kpoos be.

²² Hinɔ gii be gisin raako a ya̧a̧rhant nɛnɛ bɔ gi ɓaa gi daar Tirus ɔnɛ hi Sidɔŋg ɔnɛ a dɔgl-gbaak ɔ̧ti.

²³ Mɔɔ Kapɛrnayum, mɔ mɔkig a Bɛt dɔɔsumdɔɔs a bɛtha ya ri? Hí tidsum mɔ tuur a wɔrkɛ ɗɔɔtil lɛlɛ. An woos gɛrsya wɔ hi wooy a mɔɔ ge hi da hi wooy nɛ a Sodɔma, waal bɔrɔ yɔ kɔm yɔ tuur nɛ a ɔ̧ti gi zulɛ.

²⁴ Hinɔ gii be gisin raako a ya̧a̧rhant nɛ gi ɓaa gi daar Sodɔma waal ɔnɛ a dɔgl-gbaak ɔ̧ti.

²⁵ A ɔ̧tɔ ge Yeesu zɔ̧ Bɛt raa a Baa, Waar a bɛtha hi hɛbtdi, be baanumɔ anyɔ mɔ zuns waat wɔ hinyɔ mɔ yats nɛ dood hinmɛɛkya dubtɛ wɔ hi wɔ hi zaŋgɔ.

²⁶ Hɔɔ, Baa, hinɔ riisum anbɔ anyɔ ha̧a̧mɔ.

²⁷ Baa be Bɛt gaabe hin naan du sɛw. Doo za mɛɛ Bɛt waa bɔ gɛ, gɛ Baa Bɛt mɛɛge. Doo za mɛɛ Baa Bɛt gɛ, gɛ Bɛt Waa bɔ mɛɛge hi dood wɔ Bɛt Waa bɔ ha̧a̧ge an gi zunsihige.

²⁸ Nɛɛ yɔ nɛ pɛɛk hinɗɔmn nɛ mɔɔ sɛw, zaan a beege, be sitsin hinɗɔmn nɛ, nɛ́ dag holumi.

²⁹ Ha̧n gbɔŋgil be a nɛ durk du, fɔn hinyɔ be gisin goko. Yɔ anbɔ, be gi doo kpoos saŋktya hi zultiisigya, zaanɛ nɛ zɛms kol nɛ holumlɛlɛ.

³⁰ Gbɔŋgil yɔ gɔ be heksinɛ pɛɛkɔ ɗɔb gɛ, wɛɛ hinɗɔmn yɔ gɔ be gbaasinɛ gi ɗagtilyɔ.