LUKA 9 - Nouveau Testament Doyayo

LUKA 9

¹ Yɔ Yeesu mɔks walɛsɛrɛ ɔ̧ɔ̧ koobl daa eer wɔ, gaahi tɛŋko hi ɗɛɛn a loorɛha̧a̧l wɔ gaŋsya̧ sɛw hi zulha, hi wɛɛ hi za̧a̧sil gumtil wɔ be.

² Wɛɛ yaahi an hi dɔg Bɛt wáátɔ dɔglɛ, dood wɔ hi gin gumsɛ hi za̧a̧sihi be.

³ Raahi: a anyɔ nɛ rek rɔbsi, bɔnɛ loo hinza an sɔɔlɛ, saa, koko, tusɛ; bɔnɛ heg gbandil eerɛ.

⁴ Gɔ nɛ gul a raa zaa du, kɔn duge, gi tuur an nɛ ɗund nɛ rekɔ.

⁵ Gid dood hi inin dak hi waal du, tuun nɛ ɔɔ waal bɔ nɛ pub luus wɔ nɛ dɔɔ kuuha an gi wɛɛsihi hinmɛɛnikya.

⁶ Walɛsɛrɛ wɔ hi rek gɔ raato hi raato hi dɔk Dɔgl Rɔb bɔ, hi za̧a̧silgo dood lɛl sɛw.

^7-8 Anyɔ waar gbɔɔl bɔ Hirudus lag hinyɔ gi daak sɛwi, dood zaadɛ hi raako a Yohana gii rɛmlɔ, zaadɛ be a Eliya Bɛtya̧a̧kɛŋkya bɔ gii wɛɛ gi midza, wɛɛ zaadɛ be a Bɛtya̧a̧-kɛŋkya wɔ zaaya̧ gbuni rɛmlɔ, yɔ anbɔ hinɔ yɔɔgyɔ.

⁹ Wɛɛ raa: a à Yohana giya, be wa̧a̧ge be dɛ̧ɛ̧r zulɔ be! Nɛ bɔ za̧a̧nɔ ɔnɛ be kɛm hi gig hin raanik anbɔ? Wɛɛ ɓɛɛge an gi gbɛn za̧a̧nɔ.

¹⁰ Walɛsɛrɛ wɔ hi wɛɛzɔ hi fɔks Yeesu hinyɔ hi woo. Yeesu loohi mukya̧ rek hi hii a waal za gbɔɔl du nuŋgɔ a Baytizaada.

¹¹ Yɔ dood saal hi mɛɛ a Yeesu gi rek hɔ, hi fɔge, gii be dagihi dɔgsihi Bɛt wáátɔ dɔglɛ. Wɛɛ za̧a̧s dood wɔ ha̧a̧hi za̧a̧k hɛw.

¹² Yɔ ɔ̧t gi leko, walɛsɛrɛ koobl daa eer wɔ hi sɔɔ hi raage: a anyɔ wɛ gi a hɛtdɔŋ du hɛdi, yaam dood saal wɛrɛ hi rek a raat dɛɛt wɔ du hi raat wɔ hi sɛ̧ɛ̧b a hɛt duge an hi rek hi yo hi dag leesɛ.

¹³ Yeesu raahi: a nɛɛ hi zul nɛ gaanɛhi hinyɔ gɔ hi le. Walɛsɛrɛ ɔ̧ɔ̧ wɔ hi goo: a gɛ wi gin kok kiml nɔɔnɛ hi dut eerɛ, gi an wi re wi zebz lees za an wi gaa dood wɛrɛ sɛw ya?

¹⁴ Walɛ wɔ sɛw kitigya̧ rek an duk nɔɔnɛ. Yeesu raahi: a raan dood saal wɔ hi ɗɔɔt mɔksil lɛl gbunu gbunu dood du dumbili nɔɔnɛ nɔɔnɛ.

¹⁵ Wɔrɔ hi gɔ anbɔ, hi raa dood saal wɔ hi ɗɔɔt sɛw.

¹⁶ Yeesu loo kok kiml nɔɔn wɔ hi dut eerɛ wɔ, pɛɛ lɔlɔ wɛɛha baan Bɛto. Ɓɛɛl kok wɔ gaa walɛsɛrɛ ɔ̧ɔ̧ wɔ hi gɛ̧ɛ̧s dood saal wɔ.

¹⁷ Dood sɛw hi le kok bɔ hi hi̧i̧. Hi wɛɛ hi mɔgl kok ɓɛɛkil wɔ hi zɛ̧ɛ̧rɔ hi̧i̧s dɛl koobl daa eerɛ.

¹⁸ Ɔ̧tza yɔ Yeesu gi zɔ̧k Bɛt a lɛl-aakil du, ɛr walɛsɛrɛ ɔ̧ɔ̧ wɔ hi gi el an yɛrɛ lɛ: a dood hi raak a be gi bɔ?

¹⁹ Hi ta̧a̧: a dood hi raak a mɔ gi Yohana Bɛtmɛm Hotingoya bɔ giya; zaadɛ be a mɔɔ gi Eliya; zaadɛ hi raak ɓɛ: a mɔɔ gi Bɛtya̧a̧kɛŋkya wɔ amntɔnɔ zaaɔ yɔ rɛmlzɔ.

²⁰ Wɛɛ warihi: a yɛrɛ nɛya, nɛ raak a bee gi bɔ? Piyɛr ta̧a̧: a mɔɔ gi Masihu yɔ fu̧u̧z a Bɛt ge.

²¹ Yeesu wɛɛ raahi ma gɔ hi naati: a bɔhi dɔks doo za hinɔ.

²² Yeesu wɛɛ dɔg ɓɛ: a gi an Za̧a̧n Waa bɔ gi yɔ̧ ya̧a̧r ha̧a̧ltɔnɔ. Yahuduya ɗɛntɛ wɔ hi Bɛtmaakwookya gbɔlɛ wɔ hi Bɛtmaakdɔkya wɔ hi bisige, hi gbɔŋge; gi rɛmlɔ gi ɗuk a ɔ̧t taasimɛ.

²³ Kuudu Yeesu wɛɛ raa dood sɛw: a za̧a̧ni ha̧a̧g zaak a be kuudu, gi ɔs zulɔ hinmɔkigi, gi pɛɛ dɔ̧ɔ̧rɔ ɔ̧t nuŋg sɛw gi fɔbzibe.

²⁴ Ya̧a̧nɛ, za̧a̧ni ha̧a̧g an gi za̧a̧s kolɔ, gi waksige; wɛɛ za̧a̧ni waks kolɔ be dɔŋg be, gi za̧a̧sige.

²⁵ À doo za dag waal sɛw ɔnɛ, gi waks kolɔ, zaabe gi waks zulɔ, gi dak nɔ du nɔ?

²⁶ Ya̧a̧nɛ, za̧a̧ni seem ha̧a̧g beya hi dɔgl be, Za̧a̧n Waa bɔ gɔ gi zaa a gi gbɔlums ɗu, hi Baatɔ gbɔlums du, hi Bɛt walɛsɛrɛ gaatɛ wɔ hi gbɔlums du, seem gi ha̧a̧g za̧a̧nɔ be.

²⁷ Be gisin raak rɔbo: dood zaadɛ wɔ hi erk hɛdi hi gbɛn Bɛt wáátɔ kete, ɓɔr hi ɔɔ wɔrko.

²⁸ Yɔ Yeesu dɔg hin wɔrɔ anbɔ ɔ̧t gi tal di gɛ̧ɛ̧sɛ, loo Piyɛr , Yohana hi Yakuba hi dɔɔ a ga̧a̧t ha an hi zɔ̧ Bɛto.

²⁹ Yɔ Yeesu gi Bɛt zɔ̧ko muutɔ gbar zɛmrɔ, wɛɛ gbandilɔ buu anbɔ fɛr.

³⁰ Ɓɔrbɔ Bɛtya̧a̧kɛŋkya wɔrkɛ amntɛ eerɛ hi zaa hi booya̧a̧ hi Yeesu : gɛ Muusa hi Eliya.

³¹ Hi midz a bɛtha gbɔlums du, hi boo waalɔ ɔɔk dɔgl yɔ gɔ gi woo woosɔ a Urusalima.

³² Piyɛr hi naaza zaadɛ wɔ yoom gihi daaruko. Yɔ hi za̧a̧lɔlɛ hi gbɛn Yeesu gbɔlumsɔ hi dood eerɛ wɔ hi gi hi Yeesu.

³³ Yɔ dood wɔrɔ hi hɛɛtingo hi Yeesu , Piyɛr raa Yeesu : a Hingokya , anyɔ wɛ gi hɛdi, bɛɛrɔ. Wi ɗuks duul gbanyaadɛ taarɛ: gbunu mɔɔnɛ, gbunu Muusa ɔnɛ, wɛɛ zaa gbunu Eliya ɔnɛ. Wɛɛ Piyɛr mɛ̄ɛ̄ hinyɔ gi raak gɛ be.

³⁴ Yɔ gi dɔk anbɔ, kuus za zaa yaatihi. Yɔ kuus bɔ yaatihi anbɔ, walɛsɛrɛ wɔ hoob ha̧a̧hiha̧,

³⁵ wɛɛ ya̧a̧booyz a kuus bɔ gedu: a yɛrɛ gi waa be yɔ be herig giya, kɛmsinɛge!

³⁶ Yɔ ya̧a̧ bɔ booy anbɔ gi da̧a̧, hi gbɛ̄n doo za ma gɛ, gɛ Yeesu gi gbunu. Yɔ anbɔ walɛsɛrɛ ɔ̧ɔ̧ wɔ hi kɔm be, a ɔ̧t wɔrɔ gedu hi fɔ̄ks doo za hinza gɛ.

³⁷ Yoosugɔ, yɔ Yeesu hi walɛsɛrɛ ɔ̧ɔ̧ wɔ hi siz a ga̧a̧t bɔ hage, dood saalzanɔ gbɔɔl hi zaa hi dagtin hi giya.

³⁸ Wal za kaa a saal bɔ gedu: a Hingokya! Be zɔ̧mɔ, seem lɔl a waa be wal muulɛ, gii gi waa be gbunsimi.

³⁹ Loorɛha̧a̧l za wa̧a̧ge gɔ gig kalsugo, gig beesugo hi tɛŋko, gisig set itil tuusig ya̧a̧ du, gig kosgumn gaak ha̧a̧ltɔnɔ, wɛɛ gɔ sam ɔɔg gɛ be.

⁴⁰ Be zɔ̧b walɛsɛrɛ mɔ wɔ an hi tuus loorɛha̧a̧l bɔ, wɛɛ hi ɗɛɛ gɛ.

⁴¹ Yeesu goo: a nɛɛ dood wɔ nɛ ta̧a̧ ɗɔbsig gɛ, dood ha̧a̧l wɛ, be ɗɔɔt hi nɛɛ be mɔmsin gi tuur bili? Kamzum waa mɔ wal bɔ hɛdi.

⁴² Yɔ loorɛha̧a̧lya bɔ gi sɔɔzugo, loorɛ bɔ mat walà bɔ hɛbt di beesig hi tɛŋko. Hɔnɛyɔ Yeesu ya̧a̧l loorɛha̧a̧l bɔ, tuu, wɛɛ za̧a̧s walà bɔ, gaag baatɔ naan du.

⁴³ Bɛt gbɔlumsɔ kɔms dood sɛw gɛrs gbɔɔltɔnɔ. An hinyɔ Yeesu woo sɛw gi kɔms dood sɛw gɛrsɛ hi book dɔglɔ te, Yeesu raa walɛsɛrɛ ɔ̧ɔ̧ wɔ:

⁴⁴ a nɛnɛ lagin hin yɛrɛ bɛttɔnɔ: hi gaa Za̧a̧n Waa bɔ a dood naan du ma.

⁴⁵ Hɔnɛ walɛsɛrɛ wɔ hi kɛ̄m dɔgl bɔrɔ hinɔ gɛ. Dɔgl bɔ kɔmsihi dɔgl yaatigyɔ an bɔhi kɛm hinɔ; anyɔ gɔ hi ɛrig dɔglɔ be, hoobha̧a̧hiha̧.

⁴⁶ Hɔnɛyɔ anbɔ walɛsɛrɛ wɔ hi yɛɛl watingo hi teesdu an hi mɛɛ za̧a̧nyɔ gi gbɔɔl gi daarlɛlɛ a hi tees du.

⁴⁷ Yɔ Yeesu mɛɛ mɔkil bɔrɔ hi kpoos du, loo waa za gbaag gi dɔŋg di,

⁴⁸ wɛɛ raahi: a za̧a̧nyɔ dag ya̧a̧mwaa yɛrɛ a be nuŋg du, dag bee hi zul be; wɛɛ za̧a̧nyɔ dag bee hi zul be, dag Za̧a̧nyɔ yaazib giya. Ya̧a̧nɛ, za̧a̧nyɔ gi wans a nɛ teesdu gi daarlɛl sɛwi, za̧a̧nɔ gii gi gbɔɔlɛ.

⁴⁹ Yohana raa: a Hingokya , wi gbɛn za̧a̧n za gi ninik loorɛ hi nuŋg mɔ, anyɔ taa doo wɛnɛ gɛ be, wi a̧a̧nig-a̧a̧nɔ.

⁵⁰ Hɔnɛ Yeesu ta̧a̧ge: a bɔnɛ a̧a̧nige, doo gi ha̧a̧g gabs hi nɛɛ gɛ, gi doo nɛɛnɛ.

⁵¹ Ɔ̧tyɔ Bɛt gɔ gi loo Yeesu gi dɔɔnig bɛtha sɛ̧ɛ̧bɔ, ha̧a̧g a gi kpoos du an gi rek a Urusalima.

⁵² Yaa tɔmsɔya wɔ hi dorɔ hi rek a Samariya raat za du an hi gɛmtsig kusillɛlɔ.

⁵³ Anyɔ ginɛ rek a Urusalima, dood wɔ hɔ ha̧a̧hi an hi dagig gɛ.

⁵⁴ Yɔ walɛsɛrɛ ɔ̧ɔ̧ wɔ Yakuba hi Yohana hi gbɛn anbɔ hi warɔ: a Waar i, ha̧a̧mɔ an wi raa laa gi fu̧u̧z a bɛtha gi dɔ̧ɔ̧hi ya?

⁵⁵ Yeesu lag anbɔ zɛmr hiige raahi: a nɛ mɛ̄ɛ̄ mɔkilyɔ gi nɛ kpoos du gɛ.

⁵⁶ Yɛrɛ Za̧a̧n Waa bɔ zāā an gi waks dood kol gɛ, zaa an gi za̧a̧sihiza̧a̧sɔ. Hi dɔŋg gɔ a raat za dɔɔm du.

⁵⁷ Yɔ hi gi rek a gbɔnɔ du, doo za raa Yeesu : a Waar i, bé fɔmɔ a lɛlyɔ gɔ mɔ rek ge sɛw.

⁵⁸ Gii googe: a bɛrtɔkgɛ hi gin luko, nɔɔs wɔ bɛtha hi gin zɛko. Yɛrɛ Za̧a̧n Waa bɔ taan lɛlyɔ gɔ gi gbaa zulɔ du gi holɔ.

⁵⁹ Wɛɛ raa doo za: a fɔbzibe. Za̧a̧n bɔ wɛɛ ta̧a̧: a Waar i, gaabe gbɔnɔ an be re be i̧i̧z baa be wɔrkɔ kete.

⁶⁰ Hɔnɛ Yeesu wɛɛ raage: a ɔɔm wɔrkɛ wɔ hi i̧i̧ wɔrkɛya̧. Wɛɛ mɔya rekum mɔ dɔg Bɛt wáátɔ dɔglɛ.

⁶¹ Doo za dɔɔm wɛɛ raage: a Waar i, bé fɔmɔ. Yɛrɛ gaabe gbɔnɔ an be rek be warz dood wɔ hi gi be raa du.

⁶² Yeesu wɛɛ raage a za̧a̧nyɔ gbaa naan a naafur ha gi wɛɛ gi see lɔl kuudu, gāā a Bɛt wáát du gɛ.