LUKA 4 - Nouveau Testament Doyayo

LUKA 4

¹ Yɔ Bɛt Mɔkilɔ hi̧i̧s a Yeesu kpoos du tuu a Urdum du, Bɛt Mɔkilɔ kaŋge a hɛtdɔŋ du,

² a lɛlyɔ da loorɛha̧a̧l maatig ge, gi waa ɔ̧tɔ dumbili nas ge. A ɔ̧t wɔrɔ gedu sɛw lehin gɛ. Wɛɛ yɔ ɔ̧t wɔrɔ hi tal di sɛwi a̧a̧kil ha̧a̧ge.

³ Loorɛha̧a̧l bɔ zaa raage: a mɔd gi Bɛt Waayɔ, raam bet yɛrɛ gi wɛɛ koko.

⁴ Yeesu ta̧a̧ raage: a Bɛt dɔgl raa: a doo gɔ za̧a̧n kok kpɔd gɛ.

⁵ Loorɛha̧a̧l bɔ dɔɔnig wɛɛha zunsig hɛbt bɔ wáátɔ sɛw ɓɔrbɔ,

⁶ wɛɛ raage: a be gaam hɛbt bɔ sɛw waar umsɔ hi gbɔlumsɔ; hi gaa nɛ bee gaa be, be gaak za̧a̧nyɔ ha̧a̧b sɛw.

⁷ Yɔ anbɔ gid mɔ zagl di mɔ ɗɔbsibe, hɛbt bɔ sɛw gigi mɔɔnɛ.

⁸ Yeesu ta̧a̧ge: a Bɛt dɔgl raa: a mɔ ɗɔbs Waar mɔ Bɛt gii gi gbunu, mɔ wɛɛ mɔ woos gii hin kpɔd.

⁹ Loorɛha̧a̧l bɔ wɛɛ kaŋge a Urusalima, da gbaage a Bɛtluk hɔɔt zulha der, raage: a gid mɔ gi Bɛt Waayɔ, gi̧i̧m hɛbt di.

¹⁰ Ya̧a̧nɛ, Bɛt dɔgl raa a Bɛt gi raa walɛsɛrɛ ɔ̧ɔ̧ wɔ a mɔ zulɛ hi oomɔ,

¹¹ hi wɛɛ hi kàm naan du an bɔmɔ kubr dɔɔ a bet muulɛ.

¹² Yeesu ta̧a̧ge: a hi dɔgɔ a bɔmɔ maat Waar mɔ Bɛto.

¹³ Kuudu yɔ loorɛha̧a̧l bɔ maatige hi hin wɔrɔ sɛwi, rek ɔɔge. Gi ook ma ɔ̧tza.

¹⁴ Yɔ anbɔ, Bɛt Mɔkilɔ tɔɔ Yeesu kpoos du hi tɛŋko. Yeesu wɛɛ a Galile hɛbt du, hi wɛɛ hi yɛɛl nuŋgɔ booki a waal wɔ hi sɛ̧ɛ̧b di gedu sɛw.

¹⁵ Gis dood hingoko a mɔksilluk wɔ hi du, hi wɛɛ hi gig baanik lɛl sɛw.

¹⁶ Yeesu rek a Nazarɛd a lɛlyɔ hi kaŋkig nɛ ge. A holum-ɔ̧ti, gul a Yahuduyaadɛ mɔksilluk du anyɔ rɔ̧ɔ̧s nɛ gɔko. Ɗunda an gi zaŋga ɗɛɛrwoli,

¹⁷ hi gaag Bɛtya̧a̧kɛŋkya bɔ Esaya ɗɛɛrwolɔ. Yɔ pidɔ, zɛm lɛlza yɔ hi bi̧i̧ anyɔ lɛ

¹⁸ a Waar Bɛt Mɔkilɔ gi be zulha, anyɔ gɛbsibe an be dɔks ya̧a̧rya wɔ Bɛt dɔglɔ rɔbo. Yaazibe an be dɔks luknɔyaadɛ a hi bisihibisɔ an hi tuu luknɔ du, be dɔks yɔ̧ɔ̧rɛ a lɔlya̧ gi kpɛ̧ɛ̧rɔ, be gbaa dood wɔ hi gihi gɔluko, wɔ hi taan tɛŋk an hi ɓats dood wɔ hi gihi gɔlik zulɛ, a aakil du.

¹⁹ An be dɔks hinha̧a̧lya wɔ a wɛl yɔ Bɛt ya̧a̧rmɛɛkɔ gɔ gi mid gedu tuurɔ.

²⁰ Wɛɛ ka̧a̧ ɗɛɛrwol bɔ gaa lɛl-ookya bɔ, gii wɛɛ ɗɔɔtɔ. Dood wɔ hi gi nɛ a mɔksilluk bɔ gedu sɛw hi doo lɔlya̧ a gi muulɛ.

²¹ Hɔnɛ wɛɛ yɛlsihi raaki: a nɛɛko, bi̧i̧s yɔ nɛ lagɔ, hinɔ wooy da̧a̧da̧ ma.

²² Yɔ hi lag dɔgl hɛmnt bɔ tuu gi ya̧a̧ du anbɔ hinɔ kɔmsihi gɛrsɛ. Hi sɛw hi boo dɔglɔ, bɛsihibɛsɔ, hi wɛɛ hi warɔ: a nɛ wal yɛrɛ Yusufu waawal gii ma mi?

²³ Yeesu raahi: a gi fɔnɛ ri ɓɛ; nɛ dɔgsib ya̧a̧daanik yɛrɛ dɔksɔ: a gɛrɔ, za̧a̧sum zul mɔ ma mi! Nɛ wɛɛ nɛ raa be: a wi lag hinyɔ mɔ woo a Kapɛrnayum, wɛɛm mɔ woo a mɔ waal du ma be mi!

²⁴ Wɛɛ dɔgɔ: a be dɔksin rɔbo: ɗɛ̄ɛ̄ an hi ta̧a̧ Bɛtya̧a̧kɛŋkya za an doo rɔb a gi waal du gɛ.

²⁵ Be gisin dɔk hi rɔbo: yɔ Bɛtya̧a̧kɛŋkya bɔ Eliya giro, yɔ bɛtha kpɛ̧ɛ̧y wɛl taarɛ hi sɛɛ nɔɔn-gbunu, a̧a̧kil ha̧a̧l gi tuur hɛbt di sɛw, kuurɛ hi gi nɛ gi kittɔnɔ a Israhila.

²⁶ Yɔ anbɔ Bɛt yāāz Eliya a kuur nɛɛ za Israhilaya ge gbun gɛ; gɛ yaazig a Saarɛbta a Sidɔŋg hɛbt du, a nis za kuur yɔ gi rɔ̀b ge.

²⁷ Wɛɛ, yɔ Elisuya giro, ɗobtilya hi kit a Israhila hɛbt du hɛw, wɛɛ yɔ anbɔ, hi zā̧ā̧s zaaya̧ gbun gɛ; gɛ Naaman, Siriyaya bɔ.

²⁸ Dood wɔ hi gi a mɔksilluk bɔ ge du, hi lag hin wɔrɔ, hi sɛw, kpoosya̧ nɔɔhinɔ.

²⁹ Wɛɛ hi ɗukɔ hi wa̧a̧ Yeesu hi tuunig waal gbɔɔl bɔ lakɔ ge, hi kaŋge a gol za zulha a lɛlyɔ hi gbaa nɛ waalya̧ gbɔɔl ge an hi yaarig hage gi mat hɛbt di.

³⁰ Yeesu wɛɛ daa hi teesdu rekɔ.

³¹ Wɛɛ, Yeesu rek a Kapɛrnayum waal gbɔɔl du a Galile hɛbt du, gi goksig dood hin a holum-ɔ̧ti.

³² Ànyɔ gi ya̧a̧book an za̧a̧nyɔ gin tɛŋk an gi gog hinɛ, hingokɔ bɔ kɔms dood gɛrsɛ.

³³ Doo za gi a mɔksilluk bɔ gedu gin loorɛha̧a̧l muul du, ɓooya̧a̧ raa:

³⁴ a hey, Yeesu Nazarɛdya, dɔgl mɔ nɔ hi wiya? Mɔ zaa an mɔ ha̧tirwiha̧tir ya? Be mɛɛ a mɔɔ bɔ! Mɔɔ Doo Gaat yɔ Bɛt yaazige.

³⁵ Yeesu ya̧a̧lig raage: a loorɛha̧a̧lɛ, waksumɔ, tuum a za̧a̧n yɛrɛ gi muul du. Loorɛha̧a̧l bɔ zikt wal bɔ gbalig hɛbt di a saal bɔ gedu, wɛɛ tuu gi muul du ɔɔge, gāag kosgumn gɛ.

³⁶ Yɔ dood sɛw hoobha̧a̧hi, hi ɛtinu: a nɔ dɔglɔ lɛ be? Gɔ raa loorɛ wɔ hi gbɔlumsɛ hi tɛŋko, loorɛ wɔ hi tuutu!

³⁷ Nuŋgɔ ɗuk raat wɔ a waal bɔ sɛ̧ɛ̧b di gedu sɛw.

³⁸ Yeesu tuu ɔɔ mɔksilluk bɔ rek gul a Simɔŋ raa du. Zul gi laak Simɔŋ gɔnsiŋ ha̧a̧ltɔnɔ. Hi zɔ̧bs nis bɔ Yeesu.

³⁹ Yeesu rekɔ er a nis bɔ zulɔ lɛl bɔ gi kusig ge. Ya̧a̧l zullaan bɔ hi tɛŋko, zullaan bɔ da̧a̧ gɔ. Ɓɔrbɔ nis bɔ ɗukɔ gaahi leesɛ.

⁴⁰ Yɔ ɔ̧t legɔ, hi kams Yeesu dood wɔ hi gin nɛ gums gaŋsɛ gaŋsɛ. Yeesu gbaa naan hi muul gbunu gbunu za̧a̧sihi.

⁴¹ Loorɛha̧a̧l wɔ hi tuu a dood muul kittɔnɔ, hi kaak nɔɔha hi raako: a mɔɔ gi Bɛt waaɔ, mɔɔ gi Bɛt waaɔ. Yɔ anbɔ Yeesu gihi ya̧a̧lik be, ɔ̄sihi gbɔnɔ an hi booya̧a̧ gɛ. Hii be hi mɛɛmɛ a gii gi Masihu bɔ.

⁴² Yɔ lɛl bɛɛ gaako, Yeesu tuu rek a hɛtdɔŋ du, dood saal kittɔnɔ hi mɛɛg tɛkyɔ, yɔ hi tuurɔ hi midige, ha̧a̧hi an hi a̧a̧n Yeesu a bɔgi re gi ɔɔhi.

⁴³ Hɔnɛ wɛɛ raahi: a gi an be dɔks waal zaadɛ gbɔlɛ wɔ Bɛt wáátɔ dɔgl bɔ hɛw. Hi yaazib nɛ woosɔ giya.

⁴⁴ Wɛɛ rek dɔg Bɛt dɔglɔ a mɔksilluk wɔ hi du a Yahuduya be.