LUKA 20 - Nouveau Testament Doyayo

LUKA 20

¹ Ɔ̧tza ma Yeesu gis dood hingok a Bɛtluk du, gi Dɔgl Rɔb bɔ dɔglɔ dɔko. Bɛtmaakwookya gbɔlɛ wɔ hi Bɛtmaakdɔkya wɔ hi Yahuduya ɗɛntɛ wɔ hi zaa, hi warige:

² a raasiwi tɛŋk yɔ mɔ woonik hin wɛrɛ, hi za̧a̧nyɔ gaam gbɔnɔ!

³ Yeesu ta̧a̧hi: a bee hɛw, ɔbe warin hin gbunu.

⁴ Raasinbe za̧a̧nyɔ yaaz Yohana an gi hotin dood Bɛtmɛmɛ. Bɛt gii yaazig ya, dood yaazig ya ri?

⁵ Hi watin hi teesdu anyɔ lɛ: a à wɛ raa a Bɛt giya, yɔ raa a nɛ ɔɔg nɔ ɗɔbsugo?

⁶ Wɛɛ à wɛ raa a dood yaazig be, anyɔ dood sɛw hi ɗɔbsig Yohana a gi Bɛtya̧a̧kɛŋkyayɔ, gɔ hi lag a wɛ ta̧a̧ anbɔ, hi duunɛ beto an wɛ wɔrɔ.

⁷ Hi wɛɛ hi ta̧a̧ gɔ ma: a wi mɛ̄ɛ̄ za̧a̧nyɔ yaazig an gi hotin dood Bɛtmɛm gɛ.

⁸ Yeesu wɛɛ raahi: a nɛ gi labɔ, bee be taasin dɔk tɛŋk yɔ be woonik hin wɔrɔ be!

⁹ Yeesu yɛls dood wɔ ya̧a̧daanik yɛrɛ dɔki: a doo za gbaa tɛ̧ɛ̧ humlya bako, waar in tɛ̧ɛ̧-ookya wɔ naan du, rek am a hɛbt za.

¹⁰ Yɔ tɛ̧ɛ̧ huml wɔ hi ɔ̧ɔ̧ ha̧kɔ gi rı̄ı̄, yaaz gbaarɔ zaa a tɛ̧ɛ̧-ookya wɔ hi an hi ha̧bsig huml ɔ̧ɔ̧tɛ wɔ hi kamsige. Tɛ̧ɛ̧-ookya wɔ hi wa̧a̧ gbaar bɔ hi lɛge, hi yaag naan ɗɛndilɛ.

¹¹ Wɛɛ yaa gbaar za dɔɔmi; wɔrɔ hi wa̧a̧ge hi lɛge, hi niige, hi yaag naan ɗɛndil ɓɛ.

¹² Wɛɛ yaa gbaar za taasim ɓɛ. Wɔrɔ hi gaag nɔko, hi wɛɛ hi bisig lakɛ.

¹³ Tɛ̧ɛ̧bak zulya bɔ raa: a be gɔ nɔ yɔ? Ɔbe yaa waa be yɔ ha̧a̧b gi muulɛ, kinsa hi ɗɔbsig ɔnɛ be!

¹⁴ Hɔnɛyɔ tɛ̧ɛ̧-ookya wɔ hi gbɛn waaɔ bɔ zaako, hi watin hi tees du: a za̧a̧n bɔ gɔ gi yɛr bak bɔ kuudu gii yɔ, ɗɛn wɛ rek wɛ wa̧a̧ge wɛ gbɔŋge, an tɛ̧ɛ̧ wɔ hi wɛɛ wɛnɛ.

¹⁵ Hi wa̧a̧ge hi tuunig a bak tɔlya̧ hi gbɔŋge. Yɔ anbɔ tɛ̧ɛ̧bak zulya bɔ yɔ gɔsihi nɔ?

¹⁶ Yɔ zaa an gi gbɔm tɛ̧ɛ̧huml-ookya wɔrɔ, an gi wɛɛ gi yɛn tɛ̧ɛ̧-ookya zaadɛ. Yɔ dood wɔ hi kɛm anbɔ hi raa: a an Bɛt gi a̧a̧nɔ.

¹⁷ Yeesu wɛɛ sɔ̧ɔ̧hi, raa: a hin yɛrɛ hi bi̧i̧ a Bɛt ɗɛɛrwol du rɛ, wadigɔ gi ri: a bet yɔ wɔŋkya wɔ hi bisige, gii wɛɛ bet gbɔɔl tɛŋkya a lɛl yoogil bɔ hi gbaag gedu.

¹⁸ Za̧a̧nyɔ mat a bet bɔ hage muulɔ gi belkɔ. Wɛɛ za̧a̧nyɔ bet bɔrɔ mɛɛ gi muulɛ, muulɔ gi hɔnɔ.

¹⁹ Bɛtmaakwookya gbɔlɛ wɔ hi Bɛtmaakdɔkya wɔ hi kɛm a Yeesu dɔg ya̧a̧daanik bɔrɔ hi zulha, hi tɛb an hi wa̧a̧g ɓɔrbɔ, wɛɛ hoobha̧a̧hi dood be.

²⁰ Hi yɛɛl Yeesu ooki; hi yaa dood gɛdyaadɛ an hi kuutige, zɛnɛya̧ hi wɛɛn muutya̧ an hi gi dood hinrɔb wookyaadɛ an hi ton Yeesu dɔglɛ hi wa̧a̧ge hi gaa hɛbtzulya bɔ naan du hi a gi tɛŋk du.

²¹ Dood wɔ hi zaa hi warige: a Hingokya , wi mɛɛ a mɔ dɔk hinɛ, mɔ wɛɛ mɔ hingok hi gbɔnɔ, wɛɛ mɔ taa dood seek a muut du; mɔ wɛɛ mɔ gok Bɛt gbɔnɔ ɔnɛ anyɔ fɔbɔ.

²² Gbɔnɔ gi an wɛ too toos a Waar Romaya bɔ Kaysara ge ya, taa ya ri?

²³ Yɔ Yeesu mɛɛ kɛ̧ɛ̧tigya̧, ta̧a̧hi:

²⁴ a zunsibe tus gaat gbunu. Yɔ hi zunsige, warɔ: a bɔ muut yɛrɛ hi hinyɔ hi bi̧i̧ du nɔ? Hi ta̧a̧: a Kaysara ɔ̧ɔ̧nɛ.

²⁵ Yeesu wɛɛ raahi ma gɔ: a toosin Kaysara hinyɔ ginɔ; toosin Bɛt hinyɔ gin be.

²⁶ Yɔ anbɔ hi ɗɛ̄ɛ̄ an hi raa a dɔg hinza a̧a̧bi a dood lɔlgbar ma gɛ. Hinɔ gook bɔ kɔmsihi gɛrsɛ, hi wɛɛ hi kɔm ma sob.

²⁷ Sadukiya wɔ gɔ hi raak a wɔrkɛ hi taa zaa rɛmluko, hi sɔɔ hi war Yeesu :

²⁸ a Hingokya , hinyɔ Muusa bi̧i̧siw gɛrɛ: a doo za gi wɔrɔ gi ɔɔ nisɔ gi taan waa gɛ, yɛ̧ɛ̧tɔ yɛgi lootin hi nis bɔ an gi daks hindaɔ wɔrk bɔ waato.

²⁹ Walɛ zaadɛ hi mɔɔhi buu gbun du hi nɔɔn-erɛ. Gbɔɔl bɔ loo nisɛ, wɔrɔ, ɔ̄ɔ̄ waat gɛ,

³⁰ eesim bɔ yɛr nis bɔ.

³¹ Kuudu taasum bɔ yɛr nis bɔ. Hinɔ tuur anbɔ hi nɔɔn-er sɛw, hi wɔrɔ, hi ɔ̄ɔ̄ waat gɛ.

³² Gɔ ma nis bɔ wɔr gɔ be.

³³ Anyɔ nis gbun bɔ lootin hi walɛ nɔɔn-er wɔ sɛw, gɔ gi rɛmtig ɔ̧ti, a teesya̧ bɔ gedu rɛ, nis bɔ gi gi bɔ ɔnɛ nɔ?

³⁴ Yeesu ta̧a̧hi: a walɛ wɔ hi nɛɛd wɔ ɓɔryɔ hi lootingo.

³⁵ Yɛrɛ wɔ gɔ hi zɛ̧hi hi rii an hi dag wɔrkɛ rɛmtig a ɔ̧tɔ ge hi wɛɛ hi za̧a̧ a waal bɔ gɔ gi zaa kuudu gedu, hi taa nis looko, hi taa wal looko.

³⁶ Yɔ anbɔ taa an hi wɔr zaa ma ya̧nɛ. Hi riitin an Bɛt walɛsɛrɛ , hi gi Bɛt waatɔ, anyɔ hi ɗund a wɔrk du.

³⁷ Muusa raa hinɔ gii gaattɔnɔ a wɔrkɛ hi rɛml hi kolɛ hi ɗundɔ. Dɔgl yɔ Muusa bi̧i̧ a kuusa laazebtya bɔ dɔglɔ gedu gi raa: a Waar Bɛt gi Abraham Bɛto, Isaaku Bɛto hi Yakuba Bɛto.

³⁸ Bɛt ɔnɛ taa wɔrkɛ Bɛto, gi dood za̧a̧til wɔ Bɛt ya̧a̧nɛ. Yɔ anbɔ dood sɛw hi gisig za̧a̧ko.

³⁹ Bɛtmaakdɔkya zaadɛ hi ta̧a̧: a Hingokya , mɔ dɔg hin bɔrɔ rɔbo.

⁴⁰ Yɔ anbɔ an gɔ hi wɛɛ hi warig hinza ɓɛ, hi warig ma gɛ, hoobha̧a̧hiha̧.

⁴¹ Hɔnɛ Yeesu warihi: a ri dood hi dɔk a Masihu bɔ gi Dawda waawal gii nɔ?

⁴² Dawda hi zulɔ dɔg a ɗɛɛrwol Zaabura du: a Waar Bɛt raa Waar be: a ɗɔɔtum be naanrɔbo,

⁴³ gi tuur an be gbàà yɔ̧lhɛ̧ɛ̧nikya mɔ wɔ hi wɛɛ dɔɔ mɔ ɗa̧a̧klɛlɛ.

⁴⁴ An Dawda el Masihu bɔ a Waar be, Waar ɔ yɔ wɛɛsig waaɔ ri ma nɔ?

⁴⁵ Yɔ dood wɔ hi gis Yeesu dɔglɔ kɛnk sɛwi, Yeesu raa walɛsɛrɛ ɔ̧ɔ̧ wɔ:

⁴⁶ a oon zul nɛ hi Bɛtmaakdɔkya wɔ ha̧a̧hi gbandil gbɔɔl hek an hi ɛmbinu, wɔ ha̧a̧hi an dood hi zagl di hi boohi a luumha, gi wɛɛ gi ha̧a̧hi ɗɔɔtillɛl rɔbɛ biitir wɔ a mɔksilluk du, hi ɗɔɔtillɛl rɔbɛ wɔ a leeslɛl du.

⁴⁷ Hi lek kuurɛ nɛɛd wɔ raatya̧, hi zɔ̧k Bɛt zi̧i̧tɔnɔ an dood hi gbɛnihi du be. Hí gbaas dood wɔrɔ dɔgl gi daarlɛlɛ.