LUKA 2 - Nouveau Testament Doyayo

LUKA 2

¹ A ɔ̧tɔge dɔgl ɗuk gɔ a Waar Gbɔɔl Romaya bɔ Agustus ge, raa an hi gɔ nuŋg-bi̧i̧s a waal bɔ gedu sɛw.

² Nuŋgbi̧i̧s biitir bɔrɔ mida a wɛl yɔ Kirinus gi doo nabl a Siriya gedu.

³ Dood sɛw hi re nuŋg-bi̧i̧s bɔ, bɔbe a gi mɔɔklɛlɛ.

^4-5 Yusufu ɗuk a waal gbɔɔl bɔ Nazarɛd a Galile hɛbt du rek a Baytilaama a Yahuduya hɛbt du, a lɛlyɔ hi mɔɔ nɛ Waar Dawda gedu anyɔ fu̧u̧ a gi dɔ̧ɔ̧t du, an gi bi̧i̧ nuŋgɔ hi gbaagɔ Mariyama yɔ gi buudu.

⁶ Yɔ hi gi hɔ, ɔ̧tyɔ Mariyama gɔ gi gul du tuurɔ.

⁷ Gul waaɔ biitir bɔ, bibtige hi gbandili, hogige a tamlees dɛl du, anyɔ hi dag lɛl ya̧nɛ a rɔ̀bɛ luk du gɛ.

⁸ A hɛbt bɔ gedu tamnɛɛrɛwaat hi waako a hɛt du hi ook tamya̧ a yɛ̧ms du.

⁹ Waar Bɛt walsɛrɔ tursihi, wɛɛ Waar Bɛt gbɔlumsɔ lɛlgaal gaa hi dɔŋdi, hoobha̧a̧hi ha̧a̧ltɔnɔ.

¹⁰ Bɛt-walsɛr bɔ raahi: a bɔ hoob gi ha̧a̧nɛ, yɛrɛ be gisin kamzig Dɔgl Rɔb yɔ gɔ gi gaa dood sɛw hat gbɔɔl giya.

¹¹ Nɛɛko a yɛms yɛrɛ gedu, Za̧a̧sigya mɔɔysin a Dawda waal gbɔɔl du, gii gi Waar Kristu.

¹² Wɛɛ hinyɔ gɔ nɛ mɛksinge gɛrɛ: nɛ zɛm hi bibt waayɛ̧s za a gbandil du, hi wɛɛ hi hogig a tamlees dɛl du.

¹³ Ɓɔrbɔ Bɛt walɛsɛrɛ saalzanɔ gbɔɔl kittɔnɔ hi fu̧u̧z a bɛtha hi zaa hi ɔks hi Bɛtwalsɛr za bɔ hi baan Bɛt gbɔɔltɔnɔ hi wɛɛ hi raa:

¹⁴ a gbɔlums gi a Bɛt Yɔ Gi Gbɔɔl Gi Daarlɛl ge, bolt gi a hɛbtdi a dood wɔ ha̧a̧g hi hi kpoosɔ sɛw.

¹⁵ Yɔ Bɛt walɛsɛrɛ wɔ hi ɔɔhi an hi wɛɛ a bɛtha, tamnɛɛrɛ-waat wɔ hi raatinu: a yɛwɛ rek wɛ tuur a Baytilaama, wɛ see hinyɔ tuurɔ, hinyɔ Waar Bɛt wɛ yaazɔ an hi raasɛ wɛ mɛɛnɔ.

¹⁶ Hi rek hi dikto hi zɛm Mariyama hi Yusufu hi waayɛ̧s bɔ gi kusig a tamlees dɛl du.

¹⁷ Yɔ hi gbɛnige hi fɔk hinyɔ hi raasihi nɛ a waa bɔ gi zulha.

¹⁸ Wɔ hi kɛŋk hinyɔ tam nɛɛrɛwaat wɔ hi gisihi fɔkig sɛw, kɔmsihi gɛrsɛ.

¹⁹ Mariyama ɔnɛ wa̧a̧ hin wɔrɔ sɛw gi kpoos du gi mɔkig hage.

²⁰ Tamnɛɛrɛwaat wɔ hi wɛɛ hi wɛɛ hi lɛlɛ, hi ɗɔbsig Bɛto hi wɛɛ hi gig baanik gbɔɔltɔnɔ. Ya̧a̧nɛ, hinyɔ hi gbɛnɔ hi hinyɔ hi lagɔ hi zɛm anyɔ hi dɔksihi nɛko.

²¹ Yɔ ɔ̧t gɛ̧ɛ̧s talɔ hi nab waa bɔ hi dɔ̧ɔ̧sig nuŋgɔ a Yeesu , an nuŋg bɔ Bɛtwalsɛr bɔ raahi nɛ yɔ hi budir waa bɔ kɛn gɛ.

²² Wɛɛ yɔ ɓi̧i̧limya̧ hotig bɔ ɔ̧tɔ tuurɔ anyɔ Muusa maakdɔglɔ bɔ raa, Yusufu hi Mariyama hi kam waa bɔ a Urusalima a Waar Bɛt muutdu,

²³ ya̧a̧nɛ Waar Bɛt maak-dɔglɔ raa a waatwalɛ wɔ hi mɔɔhi biitiri hi elihi a Waar Bɛt ɔ̧ɔ̧nɛ.

²⁴ Wɛɛ an hi gɔ maako, hi gbɛɛr gutu tuul eerɛ, zaabe gutu waat eerɛ anyɔ Waar Bɛt maakdɔglɔ raa.

²⁵ Wal za gi nɛ a Urusalima nuŋgɔ a Simɛyɔŋ, gi doo rɔbo, gis Bɛt tɔnkɛŋko gi ook nɛ za̧a̧nyɔ gɔ gi zaa gi za̧a̧s Israhilaya wɔ. Bɛt Mɔkilɔ gi hi giya,

²⁶ raage a taa wɔrko gi gbɛn Masihu bɔ, za̧a̧nyɔ Waar Bɛt gɔ gi yaazig kete.

²⁷ Bɛt Mɔkilɔ elige kaŋge a Bɛtluk du. Yɔ Yeesu nɔɔtɔ hi baatɔ hi kamz waa bɔ Yeesu an hi da̧a̧s hinyɔ Bɛtmaakɔ raa a gi zulɛ,

²⁸ Simɛyɔŋ loo waa bɔ gi naan du wɛɛn rɔbs a Bɛt ge, raa:

²⁹ a yɛrɛ Waar Bɛto, hinyɔ mɔ da mɔ raa ma tuurɔ, an mɔ ɔɔ woosya mɔ beya, be wɔr ma hi hato, kpoos be kuus ma.

³⁰ Anyɔ be gbɛn za̧a̧tig mɔ hi lɔl benɛ,

³¹ Za̧a̧tig yɔ mɔ gɛms a dood lɔlgbar sɛw.

³² Lɛlgaalɔ gi gɔ an dood wɔ hi taa Yahuduyaadɛ gɛ hi mɛɛmɔ, an dood mɔ Israhilaya wɔ hi dag gbɔlumsɛ.

³³ Hinyɔ Simɛyɔŋ gi raak a waa bɔ gi zulɛ wɛɛs baatɔ hi nɔɔtɔ gɛrsɛ.

³⁴ Simɛyɔŋ rɔbsihi wɛɛ raa Yeesu nɔɔtɔ Mariyama: a Bɛt her waa yɛrɛ an gi wɛɛ dood kitɛ matiglɛlɛ gi wɛɛ gi wɛɛ dood kitɛ Za̧a̧sigyaya̧ a Israhila. Gi wɛɛ Bɛt hinɔmɛɛnikya yɔ gɔ dood hi booya̧a̧ ha̧a̧l hage.

³⁵ Bɛt gí woo anbɔ an dood kit mɔkilya̧ hi walkɔ. Mɔɔ nisyɔ, waa yɛrɛ kosgumnɔ gí bàà kpoos mɔ an goo.

³⁶ Naadnɔɔ za Bɛtya̧a̧kɛŋkya giro, nuŋgɔ Ana, Fanuwɛl waasiŋgo, fu̧u̧ a Aazɛr dɔ̧ɔ̧t du. Naad bɔ wɔm da̧a̧da̧. Hi waatin wɛl nɔɔn-erɛ hi waltɔ bɔ hi lootin a sɛrums du, waltɔ bɔ wɔr ɔɔg-ɔ.

³⁷ Kɔm kuuri, wɛlɔ tuur dumbili gɛ̧ɛ̧sɛ daatɔ nasɔ, ɔ̄ɔ̄ rek Bɛtluk gɛ, gis Bɛt wooswook yɛms du hi lurk du sɛw, gi hinlilko, gi Bɛt zɔ̧ko.

³⁸ Naad bɔ zaa ɓɔrbɔ a lɛl bɔ ge, baan Bɛto, wɛɛ dɔks dood wɔ hi ook sɛw an Bɛt gi za̧a̧s Urusalima waa bɔ Yeesu dɔglɔ.

³⁹ Yɔ Yusufu hi Mariyama hi da̧a̧s hinyɔ Waar Bɛt maakdɔglɔ raa sɛwi, hi wɛɛ gɔ a waalya̧ gbɔɔl bɔ Nazarɛd gedu a Galile hɛbt du.

⁴⁰ Waa bɔ Yeesu gi tɔɔko gi dak tɛŋko, gi dak hinmɛɛk gbɔɔltɔnɔ, wɛɛ Bɛt gɛmsige hi rɔbsɔ.

⁴¹ Hɔnɛ a wɛl nuŋgo, Yeesu nɔɔtɔ hi baatɔ gɔ hi rek Paska naab nak a Urusalima.

⁴² Yɔ waa bɔ Yeesu gin wɛl koobl daa eerɛ hi dɔ̀ɔ̀ naab bɔ hi nɔɔtɔ Mariyama hi Yusufu be a Urusalima anyɔ hi rɔ̧ɔ̧sɔ.

⁴³ Yɔ Paska naab bɔ talɔ, hi wɛɛk gɔ hi lɛlɛ, Yeesu kɔm ɔ̧nɛ kuudu a Urusalima. Nɔɔtɔ Mariyama hi Yusufu hi mɛɛ gɛ be;

⁴⁴ yɔ hi gbɛnig gɛ, hi mɔk a gi saal dɔɔ du, hi ɛmb ɔ̧tya̧ gbunu hi tɛge a nɛsɛ ɔ̧ɔ̧ hi teesdu hi a naaza hi tees du.

⁴⁵ Yɔ hi midig gɛ, hi wɛɛ hi wɛɛ a Urusalima an hi tɛge.

⁴⁶ Hi da hi midig a da ɔ̧t taasim bɔ ge a Bɛtluk du gi ɗɔɔtig a Yahuduyaadɛ hin-mɛɛkya dubtɛ wɔ hi teesdu, gisihi kɛŋk hinyɔ hi dɔko, wɛɛ gihi hin-ɛrko.

⁴⁷ Hinmɛɛkɔ bɔ hi hinyɔ gi gook sɛw kɔms dood wɔ hi gisig kɛŋk sɛw gɛrsɛ.

⁴⁸ Yɔ nɔɔtɔ hi baatɔ hi gbɛnige, yɔɔhiyɔ. Nɔɔtɔ wɛɛ ɛrige: a waa be, mɔ woosuw nɔ yɔ? Yɛrɛ bee hi baa mɔ sɛw wi tɛmɔ hi koltuunɛ.

⁴⁹ Yeesu ta̧a̧ raahi: a nɛ gib nɔ tɛko, nɛ́ mɛ̄ɛ̄ a gi an be mɔk Baa be dɔgl gɛ ya?

⁵⁰ Wɛɛ wɔrɔ hi kɛm dɔgl yɔ gisihi raak gɛ.

⁵¹ Wɛɛ ɗundɔ tiitin gɔ hi hii a Nazarɛd, waasihi tɔn laki. Nɔɔtɔ gbaa hin wɔrɔ sɛw gi kpoos du.

⁵² Yeesu gi tɔɔko, hinmɛɛkɔ tɔɔ gi rek doosɛ doosɛ; gi bɛsig Bɛto, wɛɛ gi bɛsig dood be.