LUKA 1 - Nouveau Testament Doyayo

LUKA Dɔgl Rɔb yɔ Luka bi̧i̧ LUKA 1

¹ Teyofil doo-gbɔɔlɛ, Dood kittɔnɔ hi kɛɛ hinwɔ hi daa nɛ wɛ teesdu dɔglya̧ bi̧i̧ki.

² Hi bi̧i̧ dɔgl wɔ wi lag a dood wɔ hi gbɛn hinya̧ hi lɔlya̧ a yɛɛlikɔ gedu a hi ya̧a̧ du. Bɛt gaahi dɔglɔ naan du an hi dɔks doodɛ.

³ Ya̧a̧nɛ, anyɔ mi tɛb hin wɔrɔ dɔglya̧ bɛttɔnɔ sɛw a lɛl yɔ yɛɛl dige, mi see hinɔ bɛr an mii hɛw mi bi̧i̧ dɔglɔ anyɔ fɔbɔ mi gbaasumɔ

⁴ an mɔ mɛks hingok wɔ mɔ dag rɔbɔ lɛlɛ.

⁵ A wɛl yɔ Hirudus gi waar gedu a Yahuduya, doo za Bɛtmaakwookya giro nuŋgɔ a Zakariya, yɔ gi a Abiya Bɛtmaakwookya wɔ hi ka̧a̧r du. Nistɔ nuŋgɔ a Elizabɛd, dɔ̧ɔ̧tɔ fu̧u̧ a Bɛtmaakwookya gbɔɔl mɔɔt bɔ nuŋgɔ a Haruna gi dɔ̧ɔ̧t du.

⁶ Hi gi dood rɔbɛ hi eer sɛw a Bɛt muutdu. Hi fɔk Bɛtmaakɔ wɔ bɛttɔnɔ hi dɔgl yɔ Waar Bɛt gaa sɛw, hin-a̧a̧b taadu.

⁷ Hɔnɛ Elizabɛd da kirkɔ, hi da hi taan nɛ waa. Hi sɛw wɛlya̧ kit be.

⁸ Ɔ̧tza ma Zakariya gi wook Bɛtmaakɔ a Bɛt muutdu, yɔ ka̧a̧rɔ bɔ woosɔ ɔ̧t rii,

⁹ anyɔ Bɛtmaakwookya hi rɔ̧ɔ̧s woos gɛ̧ɛ̧k a hi teesdu, hi herige anyɔ subud lege an gi gul a Waar Bɛtluk du gi woo Bɛtmaako gi dɔ̧ɔ̧s tɛ̧ɛ̧mɛk okt ki̧i̧lhɛmntya.

¹⁰ Yɔ gi tɛ̧ɛ̧mɛk okt ki̧i̧lhɛmntya bɔ dɔ̧ɔ̧sig laa du, dood saal wɔ sɛw hi gi lakdi hi zɔ̧k Bɛto.

¹¹ Waar Bɛtwalsɛr za mits Zakariya zaa er a Bɛt-maaksɛŋk yɔ hi dɔ̧ɔ̧sig tɛ̧ɛ̧mɛk okt ki̧i̧lhɛmntya hage a naanrɔbo.

¹² Yɔ Zakariya gbɛnige, zulɔ dɔɔsig saasa, hoobha̧a̧g be.

¹³ Bɛtwalsɛr bɔ raage: a bɔ hoob gi ha̧a̧mɔ, Zakariya, Waar Bɛt kɛm zɔ̧k mɔ kɛmɔ, ya̧a̧nɛ. Nis mɔ Elizabɛd gi mɔɔsum waa, mɔ dɔ̧ɔ̧sig nuŋgɔ a Yohana.

¹⁴ Mɔ dag hat gbɔɔltɔnɔ, dood kittɔnɔ hi dag hat a mɔɔkɔ bɔ dɔŋgɔ.

¹⁵ Yɔ anbɔ gi wɛɛ gbɔɔl a Waar Bɛt muutdu, taa an gi yɔ̧ bumhobo, zaabe bum za dɔɔmi. Kpoosɔ gi hi̧i̧s hi Bɛt Mɔkilɔ gi yɛɛl a nɔɔtɔ buu du.

¹⁶ Gi wɛnz Israhilaya kit wɔ kpoosya̧ a Waar Bɛt ge.

¹⁷ Yohana gi ɛmb a Waar Bɛt muutdu an tɔmsɔya hi ya̧a̧kɛŋkɔya bɔ Eliya mɔkilɔ hi tɛŋkɔ an gi wɛnz baa wɔ kpoosya̧ a waatya̧ hi hi boolɔ, gi wɛɛ gi kamz tɔnzuksya wɔ be a dood hinrɔbwookya wɔ hi hinmɛɛk du, an gi gɛms dood sɛw hi oo Waar bɔ zaakɔ.

¹⁸ Zakariya war Bɛtwalsɛr bɔ: a nɛ yɛrɛ bee be wɔm da̧a̧, nis be wɔm da̧a̧, be mɛɛ hin bɔrɔ ri a gi rɔb nɔ?

¹⁹ Bɛtwalsɛr bɔ goo: a bee Gabriyɛl, bee gi erk a Bɛt muut du an be woosigwoosɛ, gii yaazibe an be dɔgsum hinɔ, be kamsum dɔgl hɛmnti.

²⁰ Yɛrɛ anyɔ mɔ tā̧ā̧ dɔgl be yɔ gɔ gi tuur a ɔ̧tɔ gɔ gi rii gedu gɛ, mɔ wɛɛ su̧u̧ki, gi tuur a ɔ̧tyɔ hin wɔrɔ gɔ hi tuur gedu kɛnɛ, ɓɔr mɔ ɔɔ ya̧a̧booko.

²¹ Yɔ anbɔ dood hi ook Zakariya a Bɛtluk bɔ ge, yɔ Zakariya gi amzig ha̧a̧ltɔnɔ be hinɔ kɔmsihi gɛrsɛ.

²² Yɔ tuuza ɗɛɛ ya̧a̧book hi hii ma gɛ, yɔ anbɔ, dood hi mɛɛmɛ a Bɛt zunsig hin a gɛrs du a Bɛtluk bɔ gedu. Goksihi hin hi naanɛ wɛɛ kɔm su̧u̧ki.

²³ Yɔ Zakariya da̧a̧s woosɔ ɔ̧t wɔ a Bɛtluk du wɛɛ gi raa du;

²⁴ kuudu ɔ̧t kaasi nistɔ Elizabɛd budɔ, yaata sɛɛ nɔɔnɛ, wɛɛ dɔgɔ: a

²⁵ yɛrɛ hinyɔ Waar Bɛt gɔsibe a ɔ̧tyɔ seesib ya̧a̧r be gedu, ha̧tsib hinyɔ gib nɛ seem gaak a dood muutdu giya.

²⁶ Yɔ Elizabɛd bud gi tuur sɛɛ nɔɔngbunu, Bɛt yaaz walsɛrɔ Gabriyɛl a waal gbɔɔl za du nuŋgɔ a Nazarɛd, a Galile hɛbt du

²⁷ a nis za gbaag yɔ mɛɛ walya̧a̧ gɛ, yɔ wal za a Dawda dɔ̧ɔ̧t du gig gbɛ̧ɛ̧tugo nuŋgɔ a Yusufu. Nis bɔ be nuŋgɔ a Mariyama.

²⁸ Bɛtwalsɛr bɔ tal gi lɛl du raage: a be boomɔ, mɔɔ yɔ Bɛt rɔbsumɔ, Waar Bɛt gi hi mɔya.

²⁹ Yɔ dɔgl bɔrɔ yɔɔ Mariyama ha̧a̧ltɔnɔ ɛr zulɔ, a book bɔrɔ gi raak hinɔ a nɔ?

³⁰ Bɛtwalsɛr bɔ raage: a bɔ hoob gi ha̧a̧mɔ Mariyama, anyɔ mɔ dag Bɛt gɛmsilɔ.

³¹ Yɛrɛ mɔ́ budaa mɔ mɔɔ waawalɔ, mɔ dɔ̧ɔ̧sig nuŋgɔ a Yeesu.

³² Gi wɛɛ doo gbɔɔlɛ, hi elige a Bɛt Yɔ Gi Gbɔɔl Gi Daarlɛl waawalɔ. Wɛɛ Waar Bɛt gi wɛɛnig waar i anyɔ gɔs nɛ baatɔ Dawda be.

³³ Gi wɛɛ waar a Yakuba dɔ̧ɔ̧tɔ hi zul faa. Waar umsɔ taa zaa da̧a̧ko.

³⁴ Mariyama war Bɛtwalsɛr bɔ: a hin bɔ lab gi wooy hinɔ ri? Be mɛɛ walya̧a̧ gɛ be?

³⁵ Bɛtwalsɛr bɔ ta̧a̧ raage: a Bɛt Mɔkilɔ gi zaasumɔ, wɛɛ Bɛt Yɔ Gi Gbɔɔl Gi Daarlɛl tɛŋkɔ gi yaatumɔ hi zeksɔ. Ya̧a̧nɛ, waa bɔ gɔ mɔ mɔɔge, hi elige a Doo Gaati, Bɛt Waawalɔ.

³⁶ Yɛrɛ nɛs mɔ Elizabɛd be, yɔ gɔ hi gig nɛ elik a kirkilyɔ, bud waawaltɔ, gin sɛɛ nɔɔngbunu.

³⁷ Ya̧a̧nɛ hinza ɗɛɛ Bɛt gɛ.

³⁸ Mariyama raa: a be gi Waar Bɛt nisgbaaryɔ, hinɔ gi wooysib ma anyɔ mɔ dɔgɔ ! Bɛtwalsɛr bɔ ɔɔge ɗund rekɔ.

³⁹ Mariyama ɗuk ɔ̧tɔ ge rek hi dikto a waal gbɔɔl za yɔ gol hi gi ge a Yahuduya.

⁴⁰ Yɔ tuurɔ gul a Zakariya raa du boo Elizabɛd.

⁴¹ Yɔ Elizabɛd kɛm Mariyama boog anbɔ, waa bɔ buu du namlɔ. Elizabɛd kpoosɔ hi̧i̧s hi Bɛt Mɔkilɔ,

⁴² ɓooya̧a̧ ha̧a̧ltɔnɔ, raa: a Bɛt rɔbsumɔ daar nɛɛd zaadɛ sɛw, wɛɛ rɔbs waa yɔ gɔ mɔ mɔɔge!

⁴³ Nɔ nɛko Waar be nɔɔtɔ gi zaa nɛ bee ro!

⁴⁴ Yɛrɛ seemɔ, yɔ mɔ bɛɛb booko be bɛɛ kɔlk mɔ kɛŋko, waa bɔ be buu du naml hi hato.

⁴⁵ Mɔ gin hato anyɔ mɔ ɗɔbs hinyɔ Waar Bɛt raasumɔ, hinɔ gi wooyyɔ .

⁴⁶ Wɛɛ Mariyama raa: a be baan Waar Bɛt gbɔlumsɛ,

⁴⁷ kpoos be hi̧i̧s hi hato a Za̧a̧sigya be Bɛt zulha.

⁴⁸ Ya̧a̧nɛ gi ha̧a̧ge an gi tiis lɔlɔ gi see bee nisgbaarɔ ya̧a̧rya bɔ. Hi rɔbo, yɛrɛ ɓɔryɔ dood sɛw anyɔ zaŋya̧ gɔ hi fɔbɔ hi raa a Bɛt rɔbsibrɔbsɔ.

⁴⁹ Ya̧a̧nɛ, Bɛt tɛŋkya, gɔsib hin gbɔlɛ, wɛɛ nuŋgɔ gi hin gaatyɔ.

⁵⁰ Wɛɛ ya̧a̧rmɛɛkɔ gi a dood wɔ hoob gihige ha̧a̧k hi zulha wɛlɛ hi wɛlɛ.

⁵¹ Woo woos gbɔlɛ hi naanɔ tɛŋkya bɔ, hɛks dood wɔ hi gi zul pɛɛko.

⁵² Sisil waar ɛ gbɔlɛ wɔ a hi waar ums ɗɔɔtillɛlɛ, wɛɛ gaa dood tɔs wɔ ɗɔɔtillɛl hɔɔtɛ wɔ.

⁵³ Gaa dood wɔ a̧a̧kil gihi ha̧a̧k hinrɔbɛ, wɛɛ yaa rɔɔsya wɔ hi rek naan ɗɛndilɛ.

⁵⁴ Zaa ɗaas dood Israhilaya wɔ hi gi woosɔyaadɛ, zɛ̄n hinrɔbɔ wook

⁵⁵ a Abraham gbaŋgi hi waatɔ faa anyɔ da raas nɛ baa wɛ hii a gi woo hinɔ gɛ.

⁵⁶ Mariyama waa hi Elizabɛd sɛ̧ɛ̧b sɛɛ taarɛ kuudu wɛɛ gɔ gi lɛlɛ.

⁵⁷ Ɔ̧t yɔ Elizabɛd gɔ gi gul waaɔ du tuurɔ, mɔɔ waawalɔ.

⁵⁸ Naaza wɔ hi nɛsɛ ɔ̧ɔ̧ wɔ hi lag a waar Bɛt woosig hinrɔbo hi zaa hi dagtin hat lɛlgbunu.

⁵⁹ Yɔ hi gul waa bɔ gi gɔ dimaas gbunu gid hi zaa an hi nàge, ha̧a̧hi nɛ an hi dɔ̧ɔ̧sig nuŋgɔ a Zakariya an baatɔ nuŋgɔ bɔ be.

⁶⁰ Nɔɔtɔ raa: a ɛ̧-ɛ̧, nuŋgɔ taa anbɔ, nuŋgɔ a Yohana.

⁶¹ Hi raage: a hɔɔ, nɛ doo za nuŋgɔ taa anbɔ a nɛ dɔ̧ɔ̧t du be!

⁶² Hi wɛɛ hi yaks baatɔ naanɛ an hi warig nuŋg yɔ gɔ gi dɔ̧ɔ̧s waa bɔ.

⁶³ Zakariya ɛr tɛ̧ɛ̧hɛɛk bɔ, hi gaage, bi̧i̧ muulɔge: a nuŋgɔ a Yohana. Dood wɔ hi gidi sɛw hinɔ kɔmsihi gɛrsɛ.

⁶⁴ Ɓɔrbɔ Zakariya kɔlkɔ kpɛ̧ɛ̧rɔ, mɛlɔ wɛɛ wadɔ, booya̧a̧ ma raa a rɔbs gi a Bɛt ge.

⁶⁵ Yɔ anbɔ naaza raatɛ wɔ sɛw hoobha̧a̧hiha̧, hi dood zaadɛ wɔ hi waak nɛ a Yahuduya ga̧a̧t wɔ ha sɛw hi book hin wɔrɔ sɛw dɔglɔ giya.

⁶⁶ Wɔ hi lagɔ hi wa̧a̧ dɔglɔ hi kpoos du, hi warɔ: a waa bɔrɔ gɔ gi wɛɛ nɔ? Ya̧a̧nɛ, Waar Bɛt tɛŋkɔ gi hi gii hi rɔbo.

⁶⁷ Yɔ waa bɔ baatɔ Zakariya kpoosɔ hi̧i̧s hi Bɛt Mɔkilɔ, wɛɛ dɔg hi Bɛt dɔglɔ an yɛrɛ lɛ:

⁶⁸ a bant gi a Israhilaya wɔ Waar ya̧ Bɛt ge! Ya̧a̧nɛ, zaa a doodɔ hi an gi tuus zulya̧ aakil du.

⁶⁹ Wɛɛ mɔɔsɛ Za̧a̧sigya Tɛŋkya yɔ fu̧u̧ a gbaar walɔ Dawda dɔ̧ɔ̧t du,

⁷⁰ anyɔ dɔg nɛ a Bɛtya̧a̧kɛŋkya gaatɛ wɔ hi ya̧a̧ du a lɔɔza bɔ ge:

⁷¹ a gi za̧a̧sɛ a wɔ ha̧a̧hi gabs hi wɛya hi naan du, hi dood wɔ hi giwɛ lɔlhɛ̧ɛ̧nuko.

⁷² Gis baa wɛ hii ya̧a̧rmɛɛkɔ zuunuko, wɛɛ gi mɛksig ya̧a̧wɔkɔ gaat bɔ da gɔ hi hiya.

⁷³ Ya̧a̧nɛ gi dɛŋgls nɛ baa wɛ Abraham hinɛ:

⁷⁴ a gi za̧a̧sɛ a wɔ ha̧a̧hi gabs hi wɛɛ hi naan du, an wɛ woosig hinɛ, hoob gi hā̧ā̧wɛ hinza gɛ.

⁷⁵ An wɛ wɛɛ doodɔ gaatɛ, hinrɔbwookyaadɛ a gi muutdu ɔ̧t nuŋg sɛw a wɛ waabil du.

⁷⁶ Wɛɛ mɔya, waa be, hi elumɔ a Bɛt Yɔ Gi Gbɔɔl Gi Daarlɛl ya̧a̧ɔkɛŋkyayɔ. Yɔ anbɔ mɔ ɛmb a Waar bɔ muutdu an mɔ gɛmntsig gbɔnɔɔ wɔ.

⁷⁷ An mɔ raas doodɔ dɔglɔ hi mɛɛ a gi za̧a̧sihi a hinha̧a̧lya̧ bɔ geɗu.

⁷⁸ Yɔ Bɛt wɛ ya̧a̧rmɛɛkɔ gi gbɔɔltɔnɔ hi hinrɔb-wooki gii gi woosɛ anbɔ. Gisɛ yaazig lɛlgaal a wɛɛha an ɔ̧tyɔ gi kazugo,

⁷⁹ an gi gáa a wɔ hi ɗɔɔtig lɛlwil du hi zulha, hi wɔ hi ɗɔɔtig a wɔrk zeks du hi zulha, an gi kam ɛmbil wɛ a bolt gbɔnɔ du.

⁸⁰ Waa bɔ tɔɔ gi tɛŋk dako, mɔkilɔ gi dak tɛŋk hɛw. Rek waa a hɛtdɔŋ du tuur a ɔ̧tyɔ mid a dood Israhilaya wɔ hi muutdu gedu.