IBRANIŊKO 4 - Nouveau Testament Doyayo

IBRANIŊKO 4

¹ Yɔ anbɔ, anyɔ Bɛt raa a gulkɔ a gi holum du gi kete, yɛ hoob gi ha̧a̧wɛ an bɔ doo za gbun gi lɔɔ gulkɔ gedu.

² Ya̧a̧nɛ, hi dɔgsɛ Dɔgl Rɔb bɔrɔ, hi dɔks nɛ baa wɛ hii yɔ hi da hi gi a hɛtdɔŋdu hɛw; hɔnɛyɔ hi tā̧ā̧ dɔgl bɔrɔ hi dɔgsihi hi ɗɔbsig a hi kpoos du gɛ, woosihi hinza ma gɛ.

³ Ya̧a̧nɛ, wɛɛ ɗɔbsigya wɔ wɛ gulik a holum bɔ gedu anyɔ Bɛt dɔgɔ: a be dɛŋgl hi nɔɔ̀tig be: a hi taa gulk a be holum du zaŋ! An woosɔ da̧a̧ nɛ yɔ waal bɛɛ yɛɛlik si̧, dɔg hin bɔrɔ anbɔ.

⁴ Yɔ anbɔ, dɔg a ɗɛɛrwol lɛlza du a ɔ̧t nɔɔn-er bɔ ge Bɛt ɔɔ woosɔ wɔ sɛw, hol a ɔ̧t nɔɔn-er bɔ gedu.

⁵ Wɛɛ dɔg hɛdi ɓɛ: a hi taa gulk a be holumlɛl bɔ gedu.

⁶ Ya̧a̧nɛ, anyɔ gbaas nɛ dood zaadɛ holumlɛl bɔ an hi tal gedu hi holɔ, wɛɛ zaadɛ wɔ Bɛt raa nɛ a be gaahi Dɔgl Rɔb bɔ kete, hi tāl a holumlɛl bɔ gedu gɛ a tɔnzuksya̧ bɔ gi dɔŋgo.

⁷ Yɔ anbɔ, wɛl yɔ tal kittɔnɔ, Bɛt dɔg hin hi Dawda ya̧a̧ɔ wɛɛ dɛ̧ɛ̧sihi ɔ̧tza: raakɔ a ꞋꞋnɛɛkoꞋꞋ, anyɔ hi dɔg gi dor di: a nɛɛko nɛd lag ya̧a̧ɔ, bɔnɛ ɓaas kpoos nɛ.

⁸ Yɔ anbɔ, à Yosuwa gāāhi nɛ holumi, taa an Bɛt gi boo dɔgl kuudu a ɔ̧tza.

⁹ Yɔ anbɔ, holum-ɔ̧tyɔ Bɛt gbaas doodɔ giro.

¹⁰ Ya̧a̧nɛ za̧a̧nyɔ gul a Bɛt holumlɛl bɔ gedu gi holik woosɔ wɔ anyɔ Bɛt hol nɛ ɔ̧nɛ wɔ be.

¹¹ Yɛrɛ yɛwɛ i̧i̧y hi tɛŋko an wɛ gul a holumlɛl bɔ Bɛt gbaasɛ gedu, an bɔ doo za gi fɔb tɔnzuks gbɔnɔ gbun bɔ gi mat an dood wɔrɔ hi da hi mat nɛ be.

¹² Ya̧a̧nɛ Bɛt dɔglɔ gi an hin za̧a̧tili, tɛŋkya, ya̧a̧gbarɔ lɔm daar daŋbɛsim yɔ ya̧a̧gbarɔ lɔm lɛl eerɛ, gbɛɛ muulɛ gul gɛ̧ɛ̧ kolɛ hi mɔkili, gɛ̧ɛ̧ lɛlɗɔ̧ksil wɔ lɛŋk muulɛ, wɛɛ da tuur a wokt du, gi gɛ̧ɛ̧k kpoosɛ hi mɔkili.

¹³ Hinyɔ ki̧yɔ ɗɛ̄ɛ̄ an zaa gbun mɔɔti gi yaat a Bɛt muutdu gɛ, hin sɛw gi kɔŋk lakha, gi ki̧i̧k a za̧a̧nyɔ gɔ wɛ fɔksig hin gi muutdu.

¹⁴ Yɛrɛ anyɔ Bɛtmaakwookya wɛ gbɔɔl mɔɔt bɔ kar a bɛtha, Bɛt waaɔ Yeesu , yɛwɛ ɗɔɔt hi kpoos wɛ gbunu a ɗɔbsig yɔ wɛ dɔk dɔglɔ gedu.

¹⁵ Ya̧a̧nɛ wɛ gin Bɛtmaak-wookya gbɔɔl mɔɔt yɔ mɛɛsɛ ya̧a̧r wɛ a wɛ hɔntil du. Yɔ anbɔ gii hɛw hi maatig an wɛya a hinyɔ gi gedu sɛw, gii wōō hinha̧a̧l gɛ.

¹⁶ Yɛwɛ sɛ̧ɛ̧b hi kpoos wɛ sɛw a Bɛt waar umsɔ ɗɔɔtillɛl gɛmsilya bɔ ge an wɛ dag Bɛt gi mɛɛsɛ ya̧a̧rɛ, wɛ́ zɛm gɛmsili hi ɗaaki a hinyɔ ha̧a̧wɛ gedu.