IBRANIŊKO 11 - Nouveau Testament Doyayo

IBRANIŊKO 11

¹ Nɔ hinɔ raakɔ a ɗɔbsigi nɔ? Raakɔ a mɔ mɛɛ a hinyɔ mɔ gbaa mɔkil mɔ hage gi tuurɔ, mɔ mɛɛ bɛttɔnɔ a hinyɔ hi gbɛ̄nig kɛn gɛ gi midɔ.

² Bɛt yɛɛl ta̧a̧ dood amntɛ wɔ hi ɗɔbsigya̧ bɔ giya.

³ Hi ɗɔbsig bɔ giya wɛ mɛɛ a Bɛt kim waal hi dɔglɛ. Yɔ anbɔ, hinyɔ wɛ gbɛnko fu̧u̧ a hinyɔ wɛ gbɛn gɛ gedu.

⁴ Hi ɗɔbsig bɔ giya Abɛl gi gbɛɛr tamɔ gi gaa Bɛt gaas yɔ bɛr gi daar Kaynu ɔ̧nɛ bɔ, Bɛt wɛɛnig doo riit a ɗɔbsig bɔ gi dɔŋgo, ta̧a̧ gaasɔ bɔ gii gi zuun a riisige. Abɛl gi book ɗɔbsigɔ bɔ dɔglɔ tɛ̧, anyɔ wɔr hɛw.

⁵ Hi ɗɔbsig bɔ giya Bɛt gi loo Ɛ̧nɔg gi dɔɔnig bɛtha an bɔgi gbɛn wɔrko, dood hi ɓɛɛge hi zɛŋg gɛ anyɔ Bɛt ha̧sig gi dɔɔnig gi dɔŋdi. Yɔ dɔɔ nɛ bɛtha ket gɛ, hi dɔg nɛ gi zulha a Ɛ̧nɔg has Bɛt kpoosɔ.

⁶ Yɔ anbɔ ɗɔbsig gi taa gɛ, mɔ́ ɗɛ̄ɛ̄ an mɔ hasig kpoos nɛ gɛ zaŋ, ya̧a̧nɛ gi an za̧a̧nyɔ gi sɔɔk a Bɛt dɔŋdi gi ɗɔbs Bɛto a Bɛt gi gaak dood wɔ hi gig tɛk dɔɔrɔɔsɛ.

⁷ Hi ɗɔbsig bɔ giya Nɔwe gi kɛm tɔnɛ yɔ Bɛt raasig hin wɔ gbɛndir nɛ ket gɛ daakya̧ dɔglɛ, doot lɛmb an gi za̧a̧sin zulɔ hi raatɔ. Yɔ woo anbɔ matin waal dɔglɛ, wɛɛ dag gbɔnɔ an gi riis Bɛt hi ɗɔbsig bɔ.

⁸ Hi ɗɔbsig bɔ giya yɔ Bɛt el Abraham kɛmsige, rek waal za yɔ Bɛt gaag an gi yɛr gi waa gedu; yɔ rekɔ mɛ̄ɛ̄ lɛlyɔ gi rek du gɛ.

⁹ Hi ɗɔbsig bɔ giya gi rek gi ɗɔɔt a hɛbt za dɔɔm yɔ Bɛt raa a gi gaag gedu an rɔ̀bi. Waa a luk gbandilya du, Isaaku hi Yakuba hɛw, wɔ gɔ hi yɛr waal gbuna bɔ Bɛt raa a bé gaa nɛ baaya̧.

¹⁰ Ya̧a̧nɛ Abraham ginɛ ook waal gbɔɔl yɔ gin sɛŋk ɓaatili, waal gbɔɔl yɔ Bɛt dɛ̧ɛ̧ welɔ gi wɛɛ gi wɔmɔ.

¹¹ Hi ɗɔbsig bɔ giya Saratu hi zulɔ gi dag waamɔɔk anyɔ wɔm nɛ gii hɛw, anyɔ ɗɔbs za̧a̧nyɔ ɔɔ hinyɔ raa wook gɛ.

¹² Yɔ anbɔ yɛɛl a doo gbun bɔ Abraham yɔ muulɔ ɔ̧ɔ̧s gi da̧a̧ ge, wɛɛ dood kittɔnɔ baaya̧ an sɛwaat kit a bɛtha, an hɔ̧ɔ̧l a mɛmbal gbɔɔl du gɔ hi ɗɛ̄ɛ̄ ɓɛrk gɛ.

¹³ Dood wɛrɛ sɛw hi wɔr a ɗɔbsig du. Hí dāg hinwɔ Bɛt raa a gi gaahi gɛ. Hi gbɛn hinya̧ ɔnɛ hi boohi lakilɛ, hi zuun a hi gi hɛbtza doodɛ, hi rɔ̀bɛ a waaldu.

¹⁴ Wɔ hi book hin anbɔ hi zuunik a hi gi tɛk hɛbt ya̧a̧nɛ.

¹⁵ À hi mɔkilgo nɛ hɛbt lɛlyɔ hi fu̧u̧z nɛ duge dɔglɔ, yɔ hi dag gbɔnɔ hi wɛɛwɛ a lɛlɔge.

¹⁶ Yɛrɛ ɓɔryɔ ha̧a̧hi lɛlyɔ bɛr gi daarɔ, raakɔ a waalza yɔ gi bɛtha giya. Bɛt gɛmtsihi waal gbɔɔl rɔb a bɛtha, yɔ anbɔ, gii be seem hā̧a̧g an hi elig a Bɛt ya̧a̧n gɛ.

¹⁷ Hi ɗɔbsig bɔ giya Abraham gi gaa Isaaku an gaas a Bɛt ge yɔ Bɛt googe; Bɛt raag nɛ a gi wɛɛnig dɔ̧ɔ̧t gbɔɔl gi rɔbsin dood waal du sɛw, gaa Bɛt waaɔ gbunsum bɔ an gaasɛ.

¹⁸ Wɛɛ Bɛt da raage: a zaŋg mɔ gi tuu a Isaaku ge.

¹⁹ Abraham mɔkɔ a anyɔ Bɛt ɗɛɛ an gi rɛms dood a wɔrkɛ teesdu hɛw, ya̧a̧nɛ gi wɛɛ gi zeb Isaaku an fu̧u̧z nɛ a wɔrk du.

²⁰ Hi ɗɔbsig bɔ giya Isaaku gi rɔbs Yakuba hi Esawu a hinwɔ gɔ hi záásihi gi dɔŋgo.

²¹ Hi ɗɔbsig bɔ giya yɔ Yakuba gi wɔ́rko, gi rɔ̀bs Yusufu waatɔ wɔ gbunu gbunu, ɓa̧a̧ ya̧a̧ɔ a gi gbargas ha gi ɗɔbs Bɛto.

²² Hi ɗɔbsig bɔ giya yɔ Yusufu gi wɔrko gi dɔg Israhilaya waat wɔ tuukya̧ a Misra, gog hinyɔ gɔ hi woon hi lɛŋkɔ wɔ.

²³ Hi ɗɔbsig bɔ giya Muusa nɔɔtɔ hi baatɔ hi yaatig sɛɛ taarɛ a haŋkdɔŋdu. Hi gbɛn waa bɔ bɛɛrɔ, wɛɛ hoob-hā̧ā̧hi hinyɔ waar bɔ dɔg gɛ.

²⁴ Hi ɗɔbsig bɔ giya yɔ Muusa tɔɔ gi in an bɔhi elig a Firawna waasiŋ waa ɔ̧ɔ̧nɛ.

²⁵ Ha̧a̧g an hi ha̧a̧nigya̧a̧rɛ hi Bɛt doodɔ gii daarɔ, hi anyɔ gɔ gi dag hinha̧a̧l hɛmtigɔ, wɛɛ ɔ̧tɔ gɔ aŋ gɛ be.

²⁶ See bɛr an seemhant yɔ gɔ gi yɔ̧ an Kristu gii hinɗɔbti, daar rɔɔs yɔ gi a Misra an hi gaage, anyɔ ɔ̄ɔ̄ lɔlɔ seek a dɔɔrɔɔs yɔ gɔ gi zaa kuudu hage gɛ.

²⁷ Hi ɗɔbsig bɔ giya Muusa gi tuu a Misra hɛbt du hoobhā̧a̧g waar Firawna nɔ̧ɔ̧tigɔ gɛ anyɔ zuun kpoosɔ gbunu an gi gbɛnik za̧a̧nyɔ hi ɗɛɛg gbɛnik gɛ.

²⁸ Hi ɗɔbsig bɔ giya gi gɔ Paska, raa dood Israhilaya wɔ a hi huut tamwaa ga̧a̧m a lukgbar wɔ hi, an bɔ̄ Bɛtwalsɛr bɔ gin wɔrk naan du gi zaa gi ki̧i̧ Israhila waat fu̧u̧s wɔ.

²⁹ Hi ɗɔbsig bɔ giya Israhilaya wɔ hi tuu a Misra hɛbt du hi kar a Maaliya mɛmbal gbɔɔl bɔ gedu a mɛm tees du an ginɛ lɛl kootyɔ, wɛɛ Misraya wɔ hi goohi nɛ fɔk a mɛmbal bɔ gedu an hi wa̧a̧zihi, mɛm bɔ daksa gbɔ̧hi.

³⁰ Hi ɗɔbsig bɔ giya Israhilaya wɔ hi gbɛ̧ɛ̧ Zeeriko waalɔ bɔ ɔ̧t nɔɔn-erɛ, wɔmtɔ bɔ hi gɔ̧ɔ̧nig gi ɛ̧brɔ.

³¹ Hi ɗɔbsig bɔ giya hi gbɔ̄m nis kaat ha̧a̧l bɔ Rahab hi zulɓaatilya wɔ gɛ, anyɔ zeb nɛ Israhilaya lɛlkɛtigya wɔ gi oohi rɔbtɔnɔ.

³² Nɛ yɛrɛ gi an mi dɔg a nɔ ɓɛ? Ya̧a̧nɛ lɛl ɗɛɛ an gi fɛ̄ɛ̄mi mi boo Gedeyɔŋ, Baarak, Samsɔn, Zefte, Dawda, Samyɛl, hi Bɛtya̧a̧kɛŋkya wɔ dɔglya̧ gɛ.

³³ Hi ɗɔbsig bɔ giya hi ɗɛɛ hɛbt kittɔnɔ, hi gaa dɔgl an dood hi woohin hi gbɔnɔ a hɛbt bɔ gedu, hi dag hinyɔ Bɛt raa a gi gaahi, hi kpɛ̧ɛ̧ namnɔɔdɛ ya̧a̧gbarɔ,

³⁴ hi nims laazebt tɛŋko, hi zɔr daŋbɛsim wɔrko, muulya̧ hɔ̧nɔ hi wɛɛ hi dag tɛŋk gi daarɔ, hi wɛɛ tɛŋkyaadɛ a gabs du, hi nin laaya rɔ̀bɛ a gabs du hi nɔɔ.

³⁵ Nɛɛd hi gbɛn wɔrkɛya̧ wɔ hi rɛmlɔ hi wɛɛ hi dagihi, zaadɛ be hi wɔr a ya̧a̧rhant du, hí tā̧ā̧ an hi bisihi zaŋ gɛ an kuudu hi dag rɛmtig rɔb gi daarɔ,

³⁶ kpɛ̧lt rii zaadɛ, kar riihi, ba̧a̧ntus wɔ wɔmnukɔ hi yaak a luknɔ du hɛw riihi.

³⁷ Hi duutinihi bet hi wɔrɔ, hi dɛ̧ɛ̧linihi gaalɛ, hi ha̧a̧nihiya̧a̧r hi wɔrɔ, hi gbɔmnihi daŋbɛsimi, hi heg tamzoolɛ hi iszool wɛ, hi rek hɛ hi hɛ, hi gi ya̧a̧ryaadɛ hi zɛksihi, hi ha̧a̧nihiya̧a̧rɛ,

³⁸ hi lɛɛlik a hɛtdɔŋ wɔ du hi a ga̧a̧t wɔ hahi, a wa̧l wɔ hi du, hi a zɛŋk wɔ hi du. Waal yɛrɛ tuur rɔb an hi waa gedu gɛ.

³⁹ Yɛrɛ dood wɛrɛ sɛw, Bɛt zuun dɔglya̧ hi ɗɔbsigya̧, wɛɛ hi dāg hinyɔ Bɛt raa a gi woo gɛ be.

⁴⁰ Yɔ anbɔ, Bɛt yɛɛl gbaasɛ hinwɔ hi bɛr hi daarɔ gaati. Bɛt ha̧a̧g an bɔ̄ dood wɔrɔ hi wɛɛ wɔ hi taan a̧a̧bi, gid taa hi wɛɛ gɛ.