IBRANIŊKO 10 - Nouveau Testament Doyayo

IBRANIŊKO 10

¹ Yahuduya wɔ maakya̧ hi taan hinrɔbɛ wɔ gɔ hi zaa kuudu riitinsya̧ rɔbo, hi kɔm an fɔtɔyɔ. Yɔ anbɔ, ɗɛ̄ɛ̄ an hi gaas dood wɔ ha̧a̧hi sɛ̧ɛ̧bik hi Bɛto hi maaknamb ga̧a̧m wɔ hi waa hi gi gbɛɛrik wɛl nuŋg gɛ.

² À taa anbɔ gɛ, yɔ hi ɔ̄ɔ̄ maaknamb wɔ gbɛɛ-rikɔ gɛ ya? Ya̧a̧nɛ dood wɔ hi woosig Bɛt hin wɔrɔ anbɔ, muulya̧ bɛɛ nɛ gaak dɔɔ gbunu, yɔ hi wɛɛ hi mɔ̄k nɛ hi kpoos du a hi gin hinha̧a̧l ma gɛ.

³ Yɛrɛ maaknamb wɔ hi gbɛɛtirgo hi wɛɛs dood hinmɛk-singoya an hi mɛksin hinha̧a̧lya̧ wɛl nuŋg sɛw.

⁴ Yɔ anbɔ, nawal ga̧a̧mɛ hi iskpaar ga̧a̧mɛ ɗɛ̄ɛ̄ an hi ha̧s hinha̧a̧l nɛ gɛ zaŋ.

⁵ Ya̧a̧nɛ yɔ Kristu gi guzig a waal du, raa Bɛto: a hā̧ā̧mɔ maaknamb wɔ gɔ hi gbɛrsum gɛ, ha̧a̧mɔ gaas gɛ, wɛɛ mɔ kimsib muulɛ.

⁶ Namnɔɔmik wɔ hi namb-gbɛɛrik wɔ hi gɔs hinha̧a̧lya̧ hi hāsum kpoos gɛ.

⁷ Yɔ anbɔ be wɛɛ be raa: a yɛrɛ be zaaza ma, Baaba Bɛto. (Ɗɛɛrwol bɔ a ɗɛɛrwolka̧a̧k du hinɔ gi dɔgl beenɛ. ) Bé woo hinyɔ ha̧a̧mɔ.

⁸ Yɔ rāā kete a mɔ ta̧a̧ namb-gbɛɛrik gɛ, mɔ ta̧a̧ gaas gɛ, zaabe namnɔɔmik gɛ, zaabe gaas yɔ gɔ an hinha̧a̧l gi ha̧sin gɛ, wɛɛ hinwɔ lab hi harum gɛ, hi gaak maakhin wɔrɔ anyɔ maakdɔgl raa.

⁹ Yeesu wɛɛ dɔgɔ: a yɛrɛ be zaaza ma an be woo hinyɔ ha̧a̧mɔ. Yɔ anbɔ, Bɛt ha̧s maakwoos amntɛ wɔ sɛw an gi yɛn Kristu zul ɔnɛ bɔ gaa an hinha̧a̧l gi bisɔ.

¹⁰ Hi Bɛt ha̧a̧tigɔ yɔ Yeesu Kristu woo gi gaa muulɔ gii wɛ gaa a Bɛt muutdu dɔɔ gbun gaati.

¹¹ Bɛtmaakwookya yɔ gi sɛw gi wookwoos ɔ̧t nuŋg sɛw, gɔ gi gbɛɛrik naa wɔ hi maak gbuna bɔ ɗɛɛ an gi ha̧s hinha̧a̧l nɛ gɛ zaŋ giya.

¹² Gii Kristu yɔ gaa gaas gbun gaati a hinha̧a̧l dɔŋgo, ɗundɔ dɔɔ bɛtha, ɗɔɔt gaati a Bɛt naanrɔbo,

¹³ gi ook ma an lɔlhɛ̧ɛ̧nikɔya wɔ hi wɛɛ ma dɔɔɗa̧a̧k lɛlɔ.

¹⁴ Ya̧a̧nɛ, hí gáás gbun kpɔd ro gi wɛɛn dood wɔ gaasihi a hinha̧a̧l du dood rɔbɛ mɔɔtɛ faa.

¹⁵ Hinɔ Bɛt Mɔkilɔ boosɛ dɔglɔ giibɔ hɛw. Ya̧a̧nɛ Waar Bɛt gi raa:

¹⁶ a kuudu, ɔ̧t wɔrɔ gɔ hi talɔ ya̧a̧wɔk yɔ gɔ be wɔb hi hii gɛrɛ: a bé gbaa maakdɔgl be wɔ a hi kpoos du, bé wɛɛ be bi̧i̧hi a hi mɔkil du.

¹⁷ Wɛɛ dɔgɔ: a bé wɛɛ be taa mɔkig hinha̧a̧lya̧, zaabe woos ha̧a̧lya.

¹⁸ Yɛrɛ Bɛt gi bɛɛ hinha̧a̧l bisugo, gaas za taa ma an hi ha̧sin hinha̧a̧lɛ.

¹⁹ Yɔ anbɔ, yɛ̧ɛ̧dɛ mi wɛ, wɛ dag gbɔnɔ yɔ gulkɔ ɓaa gɛ a lɛlgaat bɔ gedu a Yeesu ga̧a̧mɔ bɔ gi dɔŋgo,

²⁰ a gbɔnɔ seg bɔ su̧u̧sɛ gi giwɛ kaŋk a za̧a̧tig bɔ geɗu. Yɔ gaa muulɔ an gi wɔrɔ, muulɔgaak bɔ anbɔ riitin an gbandil fɛɛt bɔ taarukɔ yɔ gaawɛ gbɔnɔ talk a lɛlgaat bɔ lɛlɔ gedu a Bɛt ge giya.

²¹ Hɔnɛyɔ wɛ dag gbɔnɔ anbɔ wɛ wɛɛ wɛ gin Bɛtmaak-wookya gbɔɔl yɔ hi gbaag an Bɛt raatɔ zulya,

²² bɔwɛ sɛ̧ɛ̧b a Bɛt dɔŋdi hi kpoos ya̧a̧gɔ̧ɔ̧nya, yɛwɛ sɛ̧ɛ̧b hi ɗɔbsig tɛŋkya. Ya̧a̧nɛ, Yeesu ga̧a̧mɔ yɔ wāāt a wɛ kpoos du wɛ mɛɛ a kpoos wɛ gaaga, wɛɛ dokt muul wɛ bɔ hi mɛm gaat bɔ be.

²³ Anyɔ wɛ mɛɛ a Za̧a̧nyɔ raa a bé woosɛ hinza gi Doo rɔb yɔ gɔ woo hinyɔ raa sɛwi, yɛwɛ waa mɔkil wɛ gbaak a hinyɔ raasɛ hage a hinyɔ gɔ wɛ dɔk gedu sɛw, bɔwɛ faa.

²⁴ Yɛwɛ ootin rɔbtɔnɔ an kpoos wɛ gi dag tɛŋk a hat du hi a woos rɔbɛ du.

²⁵ Bɔwɛ ɔɔ mɔksig wɛ bɔ hi yɛ̧ɛ̧dɛ wɛ Yeesu fɔkya wɔ anyɔ dood zaadɛ hi rɔ̧ɔ̧s wooko, yɛwɛ gaatin tɛŋk hi hato. Wɛ gɔ anbɔ, bálà anyɔ wɛ mɛɛ Waar Yeesu ɔ̧tɔ bɔ zaakɔ sɛ̧ɛ̧bɔ.

²⁶ Ya̧a̧nɛ anyɔ wɛ mɛɛ rɔbo, gid wɛ gɔk hinha̧a̧l hi ka̧a̧s degi, namb za gbɛɛrik ga̧a̧mɔ an gi ha̧s hinha̧a̧l wɛ taaro,

²⁷ gɛ dɔgl-gbaak bɔbtin bɔ giwɛ ooko, hi laa ha̧a̧l bɔ gɔ gi tɔbr zulɓaasigya wɔ ma.

²⁸ Za̧a̧nyɔ ɗaa Muusa maakdɔglɔ, hi taasig ya̧a̧rmɛɛko hi gbɔŋge, gid segya eerɛ, zaabe taarɛ hi ta̧a̧ dɔglɔ a woo hin-a̧a̧b woo.

²⁹ Nɛ mɔk nɔ hi za̧a̧nyɔ ɗa̧a̧ Bɛt waaɔ bɔ dɔɔdu, za̧a̧nyɔ see ga̧a̧m ya̧a̧wɔkya bɔ Bɛt woo gi gaasige an hin tɔsi, hi yɔ gɔ nii Bɛt Mɔkilɔ gɛmsilya bɔ! Gi dags dɔgl-gbaak ha̧a̧lyɔ daarlɛl gbɔɔltɔnɔ.

³⁰ Ya̧a̧nɛ wɛ mɛɛ za̧a̧nyɔ dɔgɔ: a béé bé wɛɛn hin-a̧a̧b yɔ hi gɔsibe, bee be gbaasihi dɔglɛ. Wɛɛ dɔgɔ: a Waar Bɛt gi gbaas doodɔ dɔglɛ.

³¹ An mɔ mat a Bɛt za̧a̧til bɔ gi naan du hinɔ ha̧a̧hoob ha̧a̧ltɔnɔ.

³² Yɛrɛ mɔkin waak yɔ nɛ da nɛ waak amntɔnɔ. A ɔ̧tɔge yɔ nɛ dag Bɛt lɛlgaalɔ, nɛ er rɔbtɔnɔ a woosɔ bɔ gedu a ya̧a̧rhant teesdu.

³³ Gɔ hi niinɛ, hi gɔlinɛ a dood lɔlgbarɔ, zaabe nɛ ɔks hi dood wɔ hi gisihi gɔk hin gbun bɔ.

³⁴ Yɔ anbɔ nɛ mɛɛs luknɔya wɔ ya̧a̧rɛ, nɛ mɔm hi hat nɛ sɛw, hi loot rɔɔs nɛ luurɛ anyɔ nɛ mɛɛ rɔɔs rɔb zɛ̧rsin daarlɛlɛ, rɔɔs yɔ gɔ gi waa faa.

³⁵ Yɔ anbɔ bɔnɛ ɔɔ hinyɔ kpoos nɛ ɓaay hage dɔglɔ, hi gbaasin dɔɔrɔɔs gbɔɔl gi dɔŋgɔ ge.

³⁶ Ha̧a̧n hinmɔŋki an kuudu gɔ nɛ woo hinyɔ Bɛt ha̧a̧g gi da̧a̧ nɛ dag hinyɔ Bɛt raa a bé gaanɛ.

³⁷ Yɔ anbɔ Bɛt ɗɛɛrwolɔ raa: a wag kaasiwaanɔ, an za̧a̧nɔ gi zaa, gi zaakza, taa amzugo.

³⁸ Yɛrɛ doo riit yɔ ɗɔbsɔ gi za̧a̧; gi wɛɛ kuudu ɔnɛ taab hark a gi muulɛ.

³⁹ Wɛɛ wɛ taa dood wɔ gɔ hi wɛɛ kuudu an hi wagɔ. Wɛnɛ wɛ gin ɗɔbsigi an wɛ za̧a̧sin kol wɛ.