IBRANIŊKO 1 - Nouveau Testament Doyayo

IBRANIŊKO Ɗɛɛrwol yɔ hi bi̧i̧s Yeesufɔkya Yahuduya wɔ IBRANIŊKO 1

¹ Yɔ amntɔnɔ Bɛt boo baa wɛ hii dɔɔ kittɔnɔ hi gbɔnɔ sɔmsɔm hi ya̧a̧kɛŋkya wɔ ya̧a̧ya̧.

² A ɔ̧t yɔ̧ɔ̧sum wɛrɛ gedu be, boowɛ ya̧a̧ hi waawal yɔ gbaage, gaag hin naan du sɛw, kim waal sɛw hi waawal ya̧a̧ɔ.

³ Bɛt waaɔ gi zuunik Bɛt gbɔlumsɔ lɛlgaalɛ, gi Bɛt riitinsɔ, gi wa̧a̧k hin sɛw gi naan du hi dɔglɔ tɛŋkya bɔ. Yɔ woo hinha̧a̧l gaasig woos gi da̧a̧, ɗɔɔt a Za̧a̧nyɔ gin tɛŋk sɛw gi naanrɔbo a wɛɛha hɛmltɔnɔ.

⁴ Waawal bɔ daarin Bɛt walɛsɛrɛ wɔ gbɔlums gbɔɔltɔnɔ anyɔ dag nuŋg yɔ gi ɗɔb gi daar ya̧nɛ bɔ lɛlɛ.

⁵ Yɔ anbɔ Bɛt rāā walɛsɛrɛ ɔ̧ɔ̧ wɔ zaaya̧ gbunu a mɔ gi waa beenɛ, nɛɛk be mɔɔmmɔ gɛ. Wɛɛ dɔ̄gɔ̄ a be gisig baatɔ gii be, gii gisib waa be wal gii gɛ.

⁶ Hɔnɛyɔ an Bɛt gɔ gi yaaz nɛ waa fu̧u̧s bɔ waal du, dɔgɔ a an walɛsɛrɛ be wɔ sɛw hi ɗɔbsige!

⁷ Wɛɛ raa a walɛsɛrɛ ɔ̧ɔ̧ wɔ hi zulha a bee gi za̧a̧nyɔ gɔ gɔs walɛsɛrɛ be zɛko, hi woosya be laa mɛlɛ.

⁸ Yɛrɛ Bɛt raa a waawal bɔ gi zulha be a mɔɔ Bɛto, waar ums ɗɔɔtillɛl mɔ gi faa, waar ums sɔɔl mɔ gi rɔ́b wook sɔɔlɛ.

⁹ Ha̧a̧mɔ hinyɔ rii giya, wɛɛ mɔ in ha̧a̧lɛ. Hinɔ giya, mɔɔ Bɛto, Bɛt mɔ bɔ sɔɔsum hat kurumya daar namɔza hiya.

¹⁰ Wɛɛ raa hin a waawal bɔ gi zulha ɓɛ a mɔya, Waar Bɛto, a waalyɛɛliki mɔ kim hɛbto, wɛɛ bɛtha sɛw gi naan mɔ woosɛ,

¹¹ Hiya hí wagɔ, wɛɛ mɔya mɔ gi waak za̧a̧tili. Bɛtha hi hɛbtdi hi ha̧ŋgs an gbandili,

¹² Mɔ ka̧a̧hi an dimnaanɛ, hi wɛɛ hi zɛmr sɔm, wɛɛ mɔya, mɔ waa an gbuna bɔ, wɛl mɔ hi taa hinɔ da̧a̧ko.

¹³ Bɛt dɔ̄ks walɛsɛrɛ ɔ̧ɔ̧ wɔ zaaya̧ gbun hinza a ɗɔɔtum a be naanrɔbo, gi tuur an be wɛɛn lɔlhɛ̧ɛ̧nikya mɔ wɔ dɔɔ mɔ ɗa̧a̧klɛl gɛ. Dɔg nɛ gɛ zaŋ.

¹⁴ Nɛ Bɛt walɛsɛrɛ wɔ sɛw hi gi mɔkil wɔ Bɛt yaazihi an hi woosigwoos a dood wɔ gɔ hi dag za̧a̧tig hi zul hii ma mi?