FILIPI 4 - Nouveau Testament Doyayo

FILIPI 4

¹ Nɛ yɔ anbɔ, yɛ̧ɛ̧dɛ mi wɛ, nɛɛ yɔ ha̧a̧mi a nɛ muulɛ kol gi wɛɛ gi gim kaŋk a nɛɛge, nɛɛ yɔ nɛ gi hat mi hi ɗɛɛt mi gbɔlums hinɛ, waan erk anbɔ rɔbtɔnɔ a ɔksil nɛ bɔ hi Waar Yeesu gedu.

² Mi zɔ̧k Ewodiya, mi zɔ̧k Sintike, hi ɔks ya̧a̧ya̧ gbunu an Waar Yeesu ɗɔbsigyaadɛ.

³ Mɔɔ be, Sisigus, sa̧a̧m mi rɔbo, mi gim ɛrk an mɔ ɗaas nɛɛd wɔrɔ hɛw, anyɔ hi woo Dɔgl Rɔb ɗɔk woos bɔ hi mii hi tɛŋko hi Kaleman lɛlgbunu, hi wooswootingoya mi zaadɛ wɔ Bɛt bi̧i̧ nuŋgya̧ a za̧a̧tig ɗɛɛrwolɔ bɔ gedu.

⁴ Waan hat dak a ɔksil nɛ bɔ gedu hi Waar Yeesu. Mi wɛɛ mi dɔk ɓɛ, a dagin hato.

⁵ An dood sɛw hi mɛɛ a nɛ dood saŋtɛyɔ. Waar Yeesu zaakɔ sɛ̧ɛ̧bɔ.

⁶ Bɔ kol gi tuun hinza. Yɛrɛ a hin sɛw du, dɔgsin Bɛt hinyɔ ha̧a̧n sɛw hi zɔ̧ki, hi bɛɛtigi, hi baaniki.

⁷ Gɔ gi anbɔ Bɛt boolumɔyɔ daar hinmɛɛk sɛw gi oo kpoos nɛ hi mɔkil nɛ a ɔksil nɛ bɔ hi Yeesu Kristu gedu.

⁸ Yɛ̧ɛ̧dɛ mi wɛ, a hinyɔ zɛ̧ɛ̧r an mi dɔg gedu, mɔkin hinyɔ gi rɔb sɛw, hinyɔ gi an hi ɗɔbsig sɛw, hinyɔ rii sɛw, hinyɔ gaa sɛw, hinyɔ gɔ has kpoos wɛ sɛw, hinyɔ gi bantya sɛw, an nɔ hinɔ gi gi woos rɔbo, zaabe gi rii banti, mɔkin hin wɛrɛ hiya!

⁹ Woon hinyɔ mi gogsin nɛ ta̧a̧ge sɛw, fɔn ɛmbil mi hi hinyɔ nɛ kɛm a mi ya̧a̧du, wɛɛ Bɛt yɔ gi gaak boolum gi gi hi nɛya.

¹⁰ Anyɔ nɛ wɛɛ nɛ mɔkig dɔgl mi ma ɓɔrɔ, mi dag hat gbɔɔltɔnɔ a ɔksig mi bɔ hi Waar Yeesu gedu. Taa an mi raa a nɛ zɛnimzɛnɔ, lab gɛ, nɛ mɔk dɔgl mi hi rɔbo, wɛɛ nɛ dāg gbɔnɔ gii an nɛ ɗaasim gɛ be.

¹¹ Mi rāā hin bɔrɔ a hinyɔ ha̧a̧m gi dɔŋg gɛ. Mi gog an kpoos mi gi harimi a gik yɔ mi gi gedu sɛw.

¹² Mi mɛɛ waak a ya̧a̧rums du, hi a hɛmntig du. Mi mɛɛ dɔgl wɛrɛ bɛttɔnɔ. A hin zaadɛ du sɛw, hi a lɛl sɛw mi ɗɛɛ hi̧i̧k a buudu hi an a̧a̧kil gi ha̧a̧mi, a hɛmntig du hi a ya̧a̧rums du. Mi gog hin wɛrɛ sɛw da̧a̧da̧ ma.

¹³ Mi ɗɛɛ hin wɛrɛ sɛw ɗɛɛ a ɔksil mi bɔ gedu hi za̧a̧nyɔ gim tɛŋk gaako.

¹⁴ Yɛrɛ nɛ gɔ rɔbo nɛ gisim ɗaak a mi ya̧a̧rhant du.

¹⁵ Nɛ Filipiya wɛ, nɛɛ hi zul nɛ nɛ mɛɛ a mi yɛɛl mi dɔk Dɔgl Rɔb bɔ, yɔ mi ɔɔ Makeduniya, Yeesu fɔkya ɔksil zaadɛ hí ɔ̄ks hi miya an hi gaa hinza zaabe an mi loo hinza gɛ, gɛ nɛɛ kpɔd.

¹⁶ Yɔ mi ginɛ a Tesaloniki hɛw, nɛ yààsim hinyɔ gɔ gi ɗaasimi, nɛ yāāsim dɔɔ gbun kpɔd gɛ.

¹⁷ Bɔnɛ mɔkɔ a mi gaas bɔ gii tɛko. Minɛ ha̧a̧m an woos nɛ rɔb bɔ humlɔ gi tɔɔ, an dɔɔrɔɔs nɛ a Bɛt ge gi tɔɔ gi daarɔ.

¹⁸ Yɛrɛ mi dag gaas yɔ nɛ yaansim Epafortitus. Mi dag hinyɔ gi nɛ an nɛ gaam sɛw, daar hinyɔ ha̧a̧m nɛ hɛw, mi lɔ̄ɔ̄ hinza ma gɛ. Gaas wɔ nɛ gaam hi gi an kurum ki̧i̧lhɛmntya yɔ hi gbaas Bɛt gi harig gi ta̧a̧.

¹⁹ Bɛt mi gi ɗaasin hi tɛŋko gi gaan hinyɔ gin ha̧a̧k sɛw a ɔksil nɛ bɔ hi Yeesu Kristu gedu, gi woosin an rɔɔsɔ gbɔlumsya bɔ ginɔ.

²⁰ Gbɔlums gi a Baawɛ Bɛt ge wɛlɛ hi wɛlɛ. Aanbɔ!

²¹ Boon dood wɔ Yeesu Kristu sɛ̧ɛ̧hi an hi wɛɛ doodɔ sɛw. Yɛ̧ɛ̧dɛ Yeesu fɔkya wɔ hi gi hi miya hi boonɛ.

²² Bɛt doodɔ sɛw hi boonɛ. Rɔbɔ, wɔ hi gi a Waar gbɔɔl bɔ Kaysara raadu.

²³ An Waar Yeesu Kristu gɛmsilɔ gi gi hi mɔkil nɛ. Aanbɔ!