FILIPI 3 - Nouveau Testament Doyayo

FILIPI 3

¹ Yɛ̧ɛ̧dɛ mi wɛ, dɔgl mi yɔ̧ɔ̧sum gɛrɛ: a dagin hat a ɔksig nɛ bɔ gedu hi Waar Yeesu. Hinyɔ mi bi̧i̧sin nɛko, hin gbuna bɔ bi̧i̧kɔ ɓaasim gɛ minɛ. Anyɔ mi mɛɛ a dɔgl mi ɗɛɛ an gi gɔsin rɔbsɛ, gi oonɛ. Mi wɛɛ mi bi̧i̧sin dɔgl wɛrɛ an nɛ mɛɛhi bɛttɔnɔ.

² Oon zul nɛ hi kaa wɔ, raakɔ a oon zul nɛ hi dood woosya ha̧a̧l wɔ, oon zul nɛ hi dɔms gaakya ha̧a̧l wɔ kpoos ha.

³ Dood wɔ Bɛt nahi hi rɔbo, gɛ wɛya. Wɛ gi Bɛt dood ɔ̧ɔ̧nɛ. A nɔ dɔŋgo? Anyɔ wɛ woosig Bɛt woosɛ hi Mɔkilɔ tɛŋko, anyɔ wɛ ɗɔbsig Yeesu Kristu a hinyɔ woosɛ gi dɔŋgo, anyɔ wɛ taa kol wɛ gbaak a hinyɔ wɛ ɗɛɛ wook hi tɛŋk wɛ gedu gɛ.

⁴ Mii hi zul mi, hin mi yɔ gɔ mi daarin doo giro. Doo za gi seek zulɔ a gi daarik doo, wɛɛ dag gbɔnɔ an gi gbaa mɔkilɔ a zulɔ hage. Mii be mi dag gbɔnɔ mi daarigdaar be.

⁵ Hi nàmi yɔ mi gin ɔ̧t gɛ̧ɛ̧sɛ anyɔ Bɛtmaakdɔgl raa, mi gi Israhila waa, mi fu̧u̧ a Bɛnzamɛ dɔ̧ɔ̧t du, mi gi doo Ibraniŋkoya zaŋ. Àn hinyɔ gi seek Bɛtmaak-ookyɔ, mi gi Farisayayɔ.

⁶ An hinyɔ gi seek woos mi yɔ mi woos Bɛt hi tɛŋk mi, mi gi nɛ Yeesu fɔkyaadɛ zɛksigyayɔ, wɛɛ ɓɛ, an hinyɔ gi seek Muusa maakdɔgl fɔki an hi riis Bɛto, minɛ mi fɔ̀ hi kpoos mi sɛw, mi taan a̧a̧bi.

⁷ Yɛrɛ hinwɔ mi seek an mi daaringo doo, mi seek hinya̧ an wakyɔ a Kristu dɔŋgo.

⁸ Hin wɔrɔ hii kpɔd gɛ, mi seek hin sɛw an wakyɔ. Ya̧a̧nɛ gi ha̧a̧m hinza eer gɛ, ha̧a̧m an mi mɛɛ Yeesu Kristu Waar mi gii kpɔd. Bɔ lab bɛsim daar hinyɔ gi sɛw. A gi dɔŋg ro mi waks hinyɔ mi gin nɛ sɛw, mi wɛɛ mi seek hinɔ an kpoosumyɔ, mi ɔɔ-ɔ an mi dag Kristu yɔ gi rɔɔs mi,

⁹ mi ɔks rɔbtɔnɔ gbun hi giya. Yɔ mi ɗɔbs Kristu gii Bɛt gi seem an doo rɔbo. Gɔ gi anbɔ mi taan hin mi za riit yɔ fu̧u̧z a Bɛt maakdɔgl fɔk du, mí dag hinriit yɔ Bɛt gɔ gaa za̧a̧nyɔ ɗɔbs Kristu. Ànyɔ mi ɗɔbs Kristu, Bɛt ta̧a̧m an dooɔ, taa a woos mi rɔbɛ wɔ hi dɔŋgo, taa a Yahuduya maakdɔglɔ fɔk dɔŋgo, Bɛt gii woos dood wɔ hi ɗɔbs Yeesu rɔbo. Hinza dɔɔm taaro.

¹⁰ Ha̧a̧m an mi mɛɛ Kristu, mi wɛɛ mi mɛɛ Bɛt tɛŋkɔ bɔ rɛmsinge a wɔrkɛ teesdu, mi wɛɛ mi ɔks hi doodɔ mi gɛ̧ɛ̧ ya̧a̧rɔ wɔ yɔ̧ an mi riitin hi gii a wɔrkɔ bɔ gedu.

¹¹ Gɔ gi anbɔ, gid hinɔ ɗɛɛ, mi tuur gɔ ma a wɔrkɛ rɛmtig bɔ gedu.

¹² Mí dɔ̄g a mi da̍g hinyɔ Bɛt gɔ gi gaami door gɛ, zaabe a mi wɛɛ doo gaat da̧a̧da̧ gɛ. Yɛrɛ mi gbork reki an mi i̧i̧ tɛŋk mi mi dag ɗɛɛt mi dɔɔrɔɔsɛ, anyɔ Yeesu Kristu yɛɛl gi wa̧a̧m be.

¹³ Yɛ̧ɛ̧dɛ mi wɛ, mi sēē zul mi an mi dag ɗɛɛt mi dag ket gɛ, yɛrɛ mi wook hin gbunu, mi gi zɛnik hinyɔ gi mi kuudu, mi wɛɛ mi i̧i̧k tɛŋk mi an mi nɔɔ mi zɛm hinyɔ gi mi muutdu.

¹⁴ Mi nɔɔko an mi tuur a nɔɔkil da̧a̧klɛlɛ mi dag ɗɛɛt mi dɔɔrɔɔsyɔ Bɛt elinmi wɛɛha a ɔksig mi bɔ gedu hi Yeesu Kristu.

¹⁵ Wɛ́ɛ́ yɔ wɛ ram a Kristu dɔgl du sɛw, yɛwɛ dag mɔkil wɛ gbun anbɔ. Yɛrɛ nɛ gin mɔkil za dɔɔm a hinza ha, Bɛt gi zunsin hinɔ gii hɛw.

¹⁶ An ginɛ ri, yɛwɛ fɔ gbɔnɔ yɔ wɛ fɔk nɛ gi tuur nɛɛk lɛlgbunu.

¹⁷ Gokin woos mi, yɛ̧ɛ̧dɛ mi wɛ, wɛɛ sɔ̧ɔ̧n dood wɔ hi waak an mii yɔ mi waak mi gisin gbɔnɔ dorko.

¹⁸ Dood kittɔnɔ hi ɛmbik an Kristu dɔ̧ɔ̧rɔ lɔlhɛ̧ɛ̧nikyaadɛyɔ. Mi raasin dɔglya̧ dɔɔ kittɔnɔ, yɛrɛ ɓɔryɔ mi gisin dɔglya̧ gii raak ɓɛ hi mɛɛk lɔl du: oon zul nɛ hi hiya.

¹⁹ Lɔɔsumya̧ lɛl gɛ laa bɔ. Buuya̧ gii gi bɛtya̧. Seemya̧ giigi gbɔlumsya̧, hi mɔkig hinwɔ waal du gii kpɔd.

²⁰ Yɛrɛ wɛɛ be, waal wɛ gbɔɔl gi a bɛtha. Wɛ ook Waar wɛ Yeesu Kristu Za̧a̧sigya wɛ bɔ gɔ gi fu̧u̧z a hɔ.

²¹ Gii gi zɛmr muul wɛ hɔntil bɔ gi wɛɛ an muulɔ gbɔ-lumsya bɔ anyɔ gin tɛŋk yɔ ɗɛɛ an gi fɛ̧ɛ̧n hin sɛw hi tiis zulya̧ hi kɛmsig tɔnɛ.