TƆMSYAADƐ WOOSƐ 7 - Nouveau Testament Doyayo

TƆMSYAADƐ WOOSƐ 7

¹ Bɛtmaakwookya gbɔɔl mɔɔt bɔ war Estafanus a hin gi anbɔ ya?

² Estafanus goo a yɛ̧ɛ̧dɛ Israhilaya wɛ hi baa be wɛ, laginɛ! Bɛt yɔ gin gbɔlums gbɔɔltɔnɔ míts baa wɛ Abraham yɔ gi nɛ a Mɛzo-potami anyɔ gɔ gi re gi ɗɔɔt a Haran,

³ Bɛt raage a ɗundum mɔ ɔɔ hɛbt mɔ hi dood mɔ, rekum a waal yɔ gɔ be zunsum gedu.

⁴ Abraham ɗund ɔɔ Kalde waalɔ rek da ɗɔɔt a Haran. Yɔ baatɔ wɔr a hɔ Bɛt wɛɛ kamzig a waal yɛrɛ nɛɛ nɛ waak gedu yɔ.

⁵ Wɛɛ gāag hɛbt lɛl za zulumsɔ a waal yɛrɛ gedu gɛ, lɛlza fɛŋ nɛ an gi gbaa dɔɔtansɔ gedu gɛ; yɛrɛ Bɛt wɛɛ raage a bé gaag waal bɔ ɔ̧ɔ̧nɛ. Wɛɛ waal bɔ gi er waatɔ zul ya̧a̧n kuudu gɔ gi wɔrɔ. Hɔnɛ a wɛlɔ gedu Abraham taan waa be.

⁶ Bɛt dɔgsig anyɔ lɛ a waat mɔ hi waa a waal za rɔ̀bi, dood hi wɛɛnihi gbaarɛ hi wɛɛ hi ha̧a̧nihiya̧a̧r lɛlɔge wɛl tɛmɛrɛ nasɔ.

⁷ Wɛɛ raa a bé gbaas dood Misraya wɔ gɔ hi gbaa nɛ Israhilaya wɔ a gbaarums du dɔglɛ. Hin wɔrɔ gɔ hi talɔ hi tuu hi gɔsib maak a lɛl yɛrɛ ge.

⁸ Bɛt wɛɛ wɔbya̧a̧ hi Abraham a dɔms dɔgl ha. Yɔ Abraham bɛɛ Isaaku mɔɔko, nage a ɔ̧t gɛ̧ɛ̧sims bɔ ge. Isaaku wɛɛ mɔɔ Yakuba nage. Yakuba wɛɛ mɔɔ yaawɛsɛɛ hii koobl daa eerɛ, wɛɛ nàhi be.

⁹ Yaawɛsɛɛ wɔ hi hɛ̧ɛ̧n yɛ̧ɛ̧ya̧ Yusufu lɔlɛ hi zebrig a Misra. Hɔnɛyɔ Bɛt gi hi Yusufu be,

¹⁰ gig ook a ya̧a̧rhant du sɛw, gaag hinmɛɛk dubt hi gɛmsil bɛr a Waar Misraya bɔ Firawna muutdu be; Firawna wɛɛ wɛɛnig doo nabl gɔ an Misra hɛbtzulya hi raatɔ zulya sɛw.

¹¹ A wɛlɔ gedu tɔs tuu a Misra hɛbt du hi Kanaana hɛbt du sɛw, ya̧a̧rhant gi gbɔɔltɔnɔ be. Baa wɛ hí dāg hinyɔ gɔ hi le gɛ.

¹² Hɔnɛyɔ Yakuba lag a tot gi Misra, yaa yaawɛsɛɛ hii biitiri an hi rek hi zebzɔ.

¹³ Yɔ hi wɛɛ hi wɛɛ eesimɛ, Yusufu mid zulɔ a hindaɔ hi muut du hi mɛɛge. Wɛɛ Waar Firawna mɛɛhi a hi gi Yusufu nɛsɛ ɔ̧ɔ̧nɛ.

¹⁴ Kuudu Yusufu yaa dood hi ɓɛɛz baatɔ Yakuba hi kamzig hi nɛsɛ ɔ̧ɔ̧ dumbili nɔɔn-erɛ daa nɔɔn wɔ sɛw.

¹⁵ Yakuba tii waa gɔ a Misra; wɔr lɛlɔge hi baa wɛ zaadɛ wɔ sɛw.

¹⁶ Hi pɛɛ wɔrkya̧ hi kam hi i̧i̧ a Sikɛm, a loor lɛlyɔ da Abraham ze nɛ hi tus a Hemɔr waatɔ naan duge.

¹⁷ Ɔ̧t yɔ Bɛt gɔ gi da̧a̧s hinyɔ raas nɛ Abraham gaati a be woo gi sɛ̧ɛ̧buko, dood Israhilaya wɔ hi kitig a Misra hɛbt du hi daarik zul be.

¹⁸ Kuudu waar za yɛr ɗɔɔt a Misra hɛbt bɔ gedu, mɛ̄ɛ̄ Yusufu yɔ ɗɔɔt nɛ waar a hɛbt bɔ gedu gɛ be.

¹⁹ Waar bɔrɔ maat dood wɛ hiya, ha̧a̧n ɗɛntɛ wɛ wɔ ya̧a̧rɛ, wɛɛ fɛ̧ɛ̧hi hi bis waatya̧ hi wɔrɔ, an bɔhi za̧a̧ hi hɔŋg a Misra hɛbt du.

²⁰ A ɔ̧tɔ ge hi mɔɔ Muusa, bɛr waa a Bɛt muutdu be. Hi kaŋkig sɛɛ taarɛ a baatɔ raa du.

²¹ Hi tuusig gɔ. Yɔ hi tuusige, Waar Misraya bɔ Firawna waasiŋ rek zolige loog kaŋkig an waaɔ buudumi.

²² Yɔ anbɔ hi gogs Muusa hinyɔ Misraya wɔ hi mɛɛ sɛw, wɛɛ dag tɛŋk daarlɛl hi dɔgldɔki hi wooswooki.

²³ Yɔ gin wɛl dumbili nasɔ mɔkil zāa gi kpoos du an gi re gi zɛ̧btir doodɔ Israhilaya wɔ.

²⁴ Yɔ rek an gi zɛ̧brihi, zɛm doo za Misraya gi lɛk Israhilaya za gbunu. Gul nɔkɔ ɗaas wal bɔ hi gig gɔluko, tuus nɔɔtigɔ lɛb wal Misraya bɔ wɔrɔ.

²⁵ Ɔnɛ rum a dood be Israhilaya wɔ hi mɔk hi kpoos du a Bɛt gi za̧a̧sihi be naan du. Hii be, hí mɔ̄k anbɔ gɛ.

²⁶ Yoosugɔ rek zɛm Israhilaya eerɛ hi gbaatingo, tal hi tees du an gi zeehi; wɛɛ raahi a walɛ wɛ, gbun nɛɛn be nɛ gɔltingo nɔ?

²⁷ Hɔnɛ za̧a̧n bɔ gi nɛ naaza lɛk yaar Muusa ɛrige a bɔ wɛɛnum waar hi dɔglyɛ̧ɛ̧kya wi teesdu nɔ?

²⁸ Ha̧a̧m an mɔ gbɔ̧be anyɔ mɔ gbɔm nɛ Misraya zaabɔ lel ɓɛ ya?

²⁹ Yɔ Muusa lag dɔgl bɔrɔ anbɔ hoob gi ha̧a̧ge nɔɔ ɔɔ Misra hɛbtɔ rek waa an rɔ̀bi a Madiyaŋ, da mɔɔ waatwalɛ hɔ eerɛ.

³⁰ Yɔ wɛl dumbili nas daa, Bɛtwalsɛr za mits Muusa a kuusa laazebtya du a hɛtdɔŋ du a Sinay ga̧a̧t dɔŋdi.

³¹ Yɔ Muusa gbɛn anbɔ hin wɛɛsig gɛrsɛ, sɔɔ a tɛ̧ɛ̧kuusà laazebtya bɔ dɔŋgɔdi an gi see hinɔ, kɛm Waar Bɛt raazig laazebt bɔ gedu:

³² a bee gi baa mɔ Abraham hi Isaaku hi Yakuba Bɛtya̧. Yɔ hoobha̧a̧ Muusa gi beeko hā̧a̧g an gi sɔ̧ɔ̧ hinɔ ma gɛ.

³³ Waar Bɛt raage a hodum taal mɔ wɔ dɔɔ du, lɛlyɔ mɔ erk ge gi hɛbt gaatyɔ, ya̧a̧nɛ.

³⁴ Be sɔ̧ɔ̧ be gbɛn dood be Israhilaya wɔ hi gi a Misra hi gihi ya̧a̧rha̧a̧nik gbɔɔltɔnɔ, be lag hekilya̧. Be siz an be za̧a̧sihi. Zaamɔ be yaam a Misra an mɔ rek mɔ tuusihi hi ɔɔ hɛbt bɔ.

³⁵ Muusa bɔ za̧a̧nɔ baa wɛ Israhilaya wɔ hi da hi tā̧a̧g nɛ gɛ. Hi warig nɛ a bɔ wɛɛnum waar hi dɔglyɛ̧ɛ̧kya a wi tees du nɔ? Bɛt yaazig an gi wɛɛ waar i, hi za̧a̧sigya. Bɛt gɔ anbɔ hi walsɛrɔ yɔ midsig a tɛ̧ɛ̧kuusà laazebtya bɔ gedu gi wɛɛ gi boogya̧a̧.

³⁶ Muusa bɔ gii tuus dood Israhilaya wɔ a Misra gi gɔ gɛrs hinzuunikyaadɛ hi gɛrs zaadɛ a Misra, a Maaliya mɛmbal gbɔɔl du, hi a hɛtdɔŋ du wɛl dumbili nasɔ.

³⁷ Muusa bɔ za̧a̧nɔ gii raa Israhilaya wɔ a Bɛt gi her ya̧a̧kɛŋkɔya za a dood nɛ teesdu an beya, gi yaasinge.

³⁸ Yɔ baa wɛ hi mɔ́ks a hɛtdɔŋ du, Muusa gii er hi tees du hi Bɛtwalsɛr bɔ gig ya̧a̧book a Sinay ga̧a̧t ha. Bɛtwalsɛr bɔ gaag dɔgl za̧a̧tigya an gi wɛɛ gi goksɛ.

³⁹ Yɔ baa wɛ hā̧ā̧hi an hi wɛɛn kpoosya̧ a Misra, hi kɛ̄msig tɔn gɛ be hi inige.

⁴⁰ Yɔ anbɔ hi raa Haruna a wɛ mɛɛ hinyɔ zɛm Muusa bɔ tudzɛ a Misra ma gɛ. Yɛrɛ gɔsɛ bɛt zaadɛ wɔ gɔ wɛ gbɛn hi lɔl wɛ an hi dosɛ a gbɔnɔ du.

⁴¹ A ɔ̧tɔge ro hi wɔm nawaa an bɛtya̧ hi gɔsig maako. Hi ɛ̧bs naab gbɔɔlɛ an hi dag hat a hinyɔ hi woon naanya̧ gedu.

⁴² Hɔnɛ Bɛt wɛɛ zɛmrsihi kuu, ɔɔhi hi gɔs sɛwaat wɔ bɛtha maako anyɔ hi bi̧i̧ a Bɛtya̧a̧kɛŋkya wɔ hi ɗɛɛrwol du a dood Israhilaya wɛ, nɛ mɔk a nɛ gaa bee namb wɔ hi gbɛɛtiro hi gaas zaadɛ wɔ a hɛtdɔŋ du a wɛl dumbili nas wɔ gedu ya?

⁴³ Nɛ́ nɛ pɛɛ Mɔlokos maakluk bɔ hi gɔn gbandili hi maak nɛ Ramfa bɔ sɛwaatya̧, hi maak nɛ zaadɛ wɔ nɛ gɔ an nɛ zagl di nɛ ɗɔbsihi hii ma mi?! Ya̧a̧nɛ bé pɛɛ bé ka̧n a Baabila doos hɛmltɔnɔ.

⁴⁴ Yɔ baa wɛ hi gi nɛ a hɛtdɔŋ du hi gin ya̧a̧wɔk bɔ lukgbandilɔ an hi dagtin gedu hi Bɛto hi booya̧a̧, hi gbaa bethɛɛk wɔ hi bi̧i̧ Bɛt maakɔ ha gedu; Bɛt gii raa Muusa a gi gɔ luk gbanya gi riitin anyɔ gbɛnɔ a ga̧a̧t ha.

⁴⁵ Kuudu yɔ baa wɛ hi yɛr luk gbandil bɔ a yaa wɛ hi naan du hi kam ɔksi yɔ hi rek hi Yosuwa an hi wɔɔz hɛbt hi gabsɛ a dood hɛbtya zaadɛ naan du. Bɛt ninsihi dood wɔ hi muutdu hi ɗɔɔt hi waa lɛlɔge tuur a Dawda waabilɔ bɔ gedu.

⁴⁶ Anyɔ Dawda dag gɛmsil a Yakuba Bɛtɔ muutdu, re zɔ̧ge an gi gaag gbɔnɔ gi tɛbsig lɛlza yɔ gɔ gi waa du.

⁴⁷ Yɛrɛ Sulemaanu gii wɔmsig luko.

⁴⁸ Hɔnɛ taa an Bɛt Yɔ Gi Gbɔɔl Gi Daarlɛl gi waa a luk yɔ dood hi wɔmn naan gedu anyɔ Bɛtya̧a̧kɛŋkya dɔgɔ

⁴⁹ a Bɛt raa a waar ums be ɗɔɔtillɛl gi a bɛtha, hɛbt gi dɔɔ be ɗa̧a̧tillɛlɛ. Nɛ ɗɛɛ an nɛ wɔmsib nɔ lukɔ? Holum be lɛl gedo?

⁵⁰ Nɛ naan been woo ma hin wɔrɔ sɛw mi!

⁵¹ Zulɓaatilya wɛ! Nɛ gi an kpaaryɔ, kpoos nɛ hi tɔn nɛ hi ɓaaɓa, nɛɛ hā̧a̧n Bɛt dɔgl lak gɛ! Nɛ gi waak zul nɛ ɓaasig a Bɛt Mɔkil gbaŋgi. Hinyɔ baa nɛ hi gi wooko, nɛ wook hinɔ gii be!

⁵² Bɛtya̧a̧kɛŋkya nɔni gid baa nɛ hi kɛtinge ya̧a̧ gɛ? Hi wɛɛ hi gbɔm dood wɔ Bɛt yaazihi biitir hi dɔg nɛ Za̧a̧n riit bɔ Yeesu Kristu bɛtha zaakɔ, Za̧a̧nyɔ nɛ rɛ̧ɛ̧sig ya̧a̧ nɛ wɛɛ nɛ gbɔŋge.

⁵³ Nɛ dag Bɛtmaakdɔgl a Bɛt walɛsɛrɛ ɔ̧ɔ̧ wɔ hi naan du, nɛ́ wɛ̄ɛ̄ nɛ́ wā̧ā̧ dɔglɔ a nɛ kpoos du gɛ be!

⁵⁴ Yɔ Yahuduya dɔglyɛ̧ɛ̧kya wɔ hi kɛm hinyɔ Estafanus dɔg anbɔ hinɔ nɔɔhi ha̧a̧ltɔnɔ lɔlya̧ hob nɔɔtigi.

⁵⁵ Hɔnɛyɔ Bɛt Mɔkilɔ hi̧i̧s Estafanus kpoos du be, see yɔ̧l bɛtha gbɛn Bɛt gbɔlumsɔ, wɛɛ gbɛn Yeesu be gi erk a Bɛt naanrɔbo.

⁵⁶ Wɛɛ dɔgɔ a yɛrɛ be gbɛnik bɛtha gi aasilyɔ, be gbɛnik Za̧a̧n Waa bɔ gi erk a Bɛt naanrɔbo.

⁵⁷ Wɔrɔ be, hi ɓooya̧a̧ ha̧a̧ltɔnɔ hi zukt tɔnya̧ hi ɔks gi muulɛ hi wa̧a̧ge.

⁵⁸ Hi dirige hi tuunig a waal gbɔɔl bɔ saŋgbatɔ gedu hi duutinge beto. (Segya wɔ be, hi hodil gbandilya̧ hi mɔksil a walza sɛr nuŋgɔ a Sawulu dɔŋdi. )

⁵⁹ Hi rek hi duutin Estafanus beto. Estafanus be gi zɔ̧k Bɛt anyɔ lɛ a Waar Yeesu , zem kol be.

⁶⁰ Wɛɛ zagldi ɓooya̧a̧ raa a Waar Bɛto, bitsumɔhi hinha̧a̧l yɛrɛ hi woosibe. Yɔ dɔg anbɔ wɔr gɔ.