TƆMSYAADƐ WOOSƐ 4 - Nouveau Testament Doyayo

TƆMSYAADƐ WOOSƐ 4

^1-2 Yɔ Piyɛr hi Yohana hi dɔksig dood hin anbɔ, yaala Bɛtmaakwookya wɔ hi Bɛtluk-ookya gbɔɔl bɔ hi Sadu-kiya wɔ hi zaa a hi hi nɔɔtig a hinyɔ hi goksig dood wɔ hi wɛɛ hi dɔgnik Yeesu rɛmtigɔ dɔgl a wɔrkɛ wɔ hi rɛml gi dɔŋgo.

³ Yɔ anbɔ hi wà̧à̧hi hi ka̧hi a luknɔ du, hi yaahi hi yo duhɔ tuur yoosugɔ, lɛl da gi nɛ bulkbul be ya̧a̧nɛ.

⁴ Hɔnɛ dood wɔ hí lāg nɛ dɔgl bɔrɔ anbɔ zaadɛya̧ kittɔnɔ hi ɗɔbs Yeesu be. Walɛ wɔ kitigya̧ tuur an duk nɔɔnɛ.

⁵ Yoosugɔ, Yahuduya waar ɛ wɔ hi Ɗɛntɛ wɔ hi Bɛt-maakdɔkya wɔ hi mɔks a Urusalima.

⁶ Bɛtmaakwookya gbɔɔl mɔɔt bɔ Hanas hi Kayafas, Yohana hi Iskandarus hi Bɛtmaakwookya gbɔɔl mɔɔt bɔ nɛsɛ ɔ̧ɔ̧ zaadɛ wɔ hi zaa hi mɔks lɛlɔdi sɛw.

⁷ Hi loo Piyɛr hi Yohana hi gbaahi teesdu hi warihi hinɛ: a nɛ za̧a̧s wal bɔrɔ hi nɔ tɛŋkɔ, hi a bɔ nuŋg du ɔnɛ?

⁸ Hɔnɛyɔ Bɛt Mɔkilɔ wɛɛ gi hi̧i̧s a Piyɛr kpoos du raahi: a nɛɛ Israhilaya waar ɛ wɛ hi ɗɛntɛ wɛ,

⁹ anyɔ nɛ giw hin warik a woos rɔ́b yɔ wi woos wal bɔ hage nɛɛko, an wi raa za̧a̧k yɔ za̧a̧ ya!

¹⁰ Mɛɛn nɛ sɛw, wɛɛ, an dood Israhilaya wɛrɛ sɛw ya̧nɛ hí mɛɛ a Yeesu Kristu Nazarɛdya bɔ nɛ doog a dɔ̧ɔ̧r ha, hí wɛɛ hí i̧i̧g a loor du, Bɛt wɛɛ rɛmsigrɛms a wɔrkɛ teesdu, a gi tɛŋk du ro wal yɛrɛ gi erk a nɛ muutdu sɛw hi muulɔ rɔbtɔnɔ yɔ.

¹¹ Yeesu gi bet gbɔɔl yɔ nɛɛ lukwɔŋkya wɔ nɛ bisig giya. Gii wɛɛ ma bet gbɔɔl tɛŋkya.

¹² Doo za dɔɔm ɗɛ̄ɛ̄ an gi za̧a̧sɛ gɛ nɛ zaŋ; ya̧a̧nɛ Bɛt gāāzɛ nuŋg za dɔɔm a dood teesdu a waal du an gi za̧a̧sɛ gɛ, gɛ nuŋg bɔ Yeesu kpɔd.

¹³ Yɔ dɔgl-gbɛɛrikya gbɔlɛ wɔ hi gbɛn Piyɛr hi Yohana walumsya̧ anbɔ, hi mɛɛhimɛ a hi gi doo tɔsyɔ, hí zaŋg gɛ be, walumsya̧ kɔmsihi gɛrs ha̧a̧ltɔnɔ. Hi wɛɛ hi mɛɛhimɛɛki, a hi da hi gi nɛ hi Yeesu ɔnɛ.

¹⁴ Hɔnɛyɔ hi gbɛnik wal bɔ hi za̧a̧sig gi erk hi dɔŋdi rɔbtɔnɔ be, hí mɛ̄ɛ̄ hinyɔ gɔ hi goo ma gɛ.

¹⁵ Yɔ anbɔ, hi wɛɛ hi raa Piyɛr hi Yohana a hi tuu a dɔglyɛ̧ɛ̧k luk bɔ gedu an hii be hi watin dɔglɔ hi kuudu be.

¹⁶ Yɔ wɔrɔ hi tuu lakdi, hi watin gɔ a wɛ́ wòòs nɔ dood wɛrɛ nɔ? Urusalimaya wɔ sɛw hi gbɛn gɛrs gbɔɔl yɔ gi wooyyik a hi naan du bɛttɔnɔ be. Wɛɛ wɛ́ ɗɛ̄ɛ̄ an wɛ faa gɛ be. Yɛrɛ wɛ woo ri?

¹⁷ Yɛrɛ an bɔ̄ dɔgl bɔrɔ gi hɛks gi re doos a dood tees du, ɗɛwɛ biglihi an bɔ̄ hi wɛɛ hi boos doo za hinza hi Yeesu nuŋgɔ bɔrɔ nɛ zaŋ.

¹⁸ Kuudu anbɔ hi wɛɛ hi elihi, hi naahi a bɔhi rek hi boos nɛ doo za hinza hi Yeesu nuŋgɔ nɛ zaŋ!

¹⁹ Piyɛr hi Yohana hi goohi a nɛɛ dɛ̧ɛ̧tin nɛ kpoos du be, hinɔ gi rii a Bɛt muutdu an hi kɛms nɛya hi ɔs Bɛt kɛŋko!

²⁰ Winɛ wí ɗɛ̄ɛ̄ an wi ɔɔ hinyɔ wi gbɛnɔ hi hinyɔ wi lag bookɔ gɛ ɔnɛ.

²¹ Yɔ dood sɛw hi baanik Bɛt a hinyɔ turs wal bɔ geha, dɔgl-gbɛɛrikya wɔ hí mɛ̄ɛ̄ hinyɔ gɔ hi gaa tɔmsya wɔ ya̧a̧rhant dɔŋgɔ ma gɛ; hi wɛɛ hi naahi hi tɛŋko a bɔnɛ wɛɛ nɛ boo Yeesu dɔglɔ zaa. Hi wɛɛ hi bisihi hi rekɔ.

²² Wal bɔ za̧a̧tig gɛrsya wooy gi muul wɛlɔ daar dumbili nas daarɔ.

²³ Yɔ hi bis Piyɛr hi Yohana anbɔ, hi rek a doodya̧ Yeesu ɗɔbsigya wɔ hi, hi fɔksihi hinyɔ Bɛtmaakwookya gbɔlɛ wɔ hi ɗɛntɛya̧ wɔ hi raahi .

²⁴ Yɔ Yeesu ɗɔbsigya wɔ hi lag fɔkil bɔrɔ anbɔ, hi zɔ̧b Bɛt hi kpoosya̧ gbunu, hi sɛw hi raa a Waar Bɛto, mɔɔ yɔ mɔ kim bɛtha hi hɛbtdi, hi mɛmbalɛ hi hin wɔ hi gi du sɛw.

²⁵ Mɔɔ yɔ mɔ raa hi Mɔkil mɔ bɔ a woosya mɔ baa wi Dawda ya̧a̧ du: a dood dɔ̧ɔ̧t dɔɔmɛ wɔ hi pɛ̀ɛ̀ zulya̧ nɔ wɛɛha? Nɔ dood wɛrɛ hi book hintɔs nɔ?

²⁶ Waar ɛ gbɔlɛ wɔ hɛbtdi hi ɗund an hi gɔ nɔko. Waar ɛ dɛɛt wɔ hi ɔks hi hiya an hi gɔ nɔk hi Waar Bɛto, hi Masihu Za̧a̧nyɔ Bɛt sɔɔsig kurum an gi wɛɛ Waar i.

²⁷ Hɔɔ, hi rɔbo, Hirudus hi Pɔntiyu Pilatu hi mɔks lɛlgbun a waal yɛrɛ gedu hi dood rɔ̀bɛ wɔ hi, hi Israhila dɔ̧ɔ̧tɔ an hi boo gabs hi woosya mɔ gaat bɔ Yeesu , yɔ mɔ sɔɔsig kurum mɔ herige.

²⁸ Hi wòò hinyɔ mɔ mɔk nɛ hi tɛŋk mɔ hi ha̧a̧tig mɔ doos sɛw.

²⁹ Ɓɔryɔ, Waar Bɛto, seem biglik yɔ hi giw bigliko. Wɛɛm mɔ gaa gbaarɛ mɔ wɔ wii tɛŋko an wi boon dɔgl mɔ hi kpoos ɓaasigi.

³⁰ Zuunum gbɔlums mɔ an dood hi za̧a̧, hi gɛrs hinmɛksingoya wɔ hi gɛrs zaadɛ wɔ gɔ hi wooy a woosya mɔ gaat bɔ Yeesu nuŋg du. Aanbɔ.

³¹ Yɔ hi da̧a̧s Bɛt bɔ zɔ̧kɔ, lɛl bɔ hi mɔks ge namɔ, Bɛt Mɔkilɔ hi̧i̧s hi kpoos du hi sɛw, hi wɛɛ hi dɔg Bɛt dɔglɔ hi kpoosya̧ ɓaasigi, hoobha̧a̧hi hinza gɛ.

³² Ɗɔbsigya wɔ hi gin mɔkilya̧ gbunu hi kpoosya̧ gbunu. Doo za rāā a hinyɔ be ginɔ gi been be gbun gɛ. Hin sɛw gi walko a hi tees du.

³³ Tɔmsya wɔ hi boo Waar Yeesu rɛmtigɔ dɔgl hi tɛŋk gbɔɔltɔnɔ. Wɛɛ Bɛt rɔbsɔ gbɔɔl ɗɔɔt hi zulha sɛw.

³⁴ Doo za lɔ̄ɔ̄ hinza hi teesdu ma gɛ. Wɔ hi gin bako hi wɔ hi gin raat sɛw hi zebtirgo hi wɛɛ hi kamzig hinyɔ hi zebtir tusɔ

³⁵ hi zaa hi gaak tɔmsya wɔ naan du. Tɔmsya wɔ hii wɛ̄ɛ̄ hi gaak tus bɔ a za̧a̧nɔ ge anyɔ ha̧a̧ge.

³⁶ Doo za giro, nuŋgɔ a Yusufu, hi dɔ̧ɔ̧sig nuŋgɔ za a Barnabas: hinɔ raakɔ a wal doo muulɓaasig-yayɔ, doo Lewiya yɔ hi mɔɔg a Kiprus,

³⁷ zebr bakɔ, kamz tusɔ gaa tɔmsya wɔ naan du.