TƆMSYAADƐ WOOSƐ 3 - Nouveau Testament Doyayo

TƆMSYAADƐ WOOSƐ 3

¹ Ɔ̧tza ma yɔ Bɛtzɔ̧k bɔ ɔ̧tɔ rii a naaba̧a̧n du, Piyɛr hi Yohana hi dɔ̀ɔ̀ lɛlgbun a Bɛtluk du.

² Doo za giro mɔɔy dɔɔgumtilyayɔ. Gɔ hi waa hi gig pɛɛko hi gig kaŋk ɔ̧t nuŋg sɛw a Bɛtluk ya̧a̧gbar bɔ nuŋgɔ a ꞋꞋBɛtiꞋꞋ ge an gi zɔ̧̀k tus a wɔ hi gulik a Bɛtluk du hi.

³ Yɔ wal dɔɔgumtilya bɔ gbɛn Piyɛr hi Yohana hi gulko, zɔ̧hi tusɛ.

⁴ Wɔrɔ hi seesig gbig, Piyɛr wɛɛ raage a seeziwi be.

⁵ Dɔɔgumtilya bɔ seehi, gi ook ma an wɔrɔ hi gaag hinza.

⁶ Hɔnɛ Piyɛr wɛɛ raage a be taan tusɛ, be taan hɛɛlmɔt an be gààmɔ. Yɛrɛ hinyɔ be gin be gàam giya, be raam a Yeesu Kristu Nazarɛdya bɔ gi nuŋg du: ɗukumha mɔ wɛɛ mɔ ɛmbɔ.

⁷ Wa̧a̧g a naanrɔbo ɗunsige. Ɓɔrbɔ dɔɔɔ wɔ hi dɔɔ-hiŋsɔ wɔ hi ɓaaɓa.

⁸ Yɔ rɔnd anyɔ er ha yɛɛl ɛmbikyɔ. Wɛɛ gul a Bɛtluk bɔ gedu lɛlgbun hi hiya. Gi ɛmbiko, gi gi̧i̧liko, wɛɛ gi baanik Bɛto.

⁹ Dood sɛw hi gbɛnig gi ɛmbiko, wɛɛ gi Bɛt baanuko.

¹⁰ Hi mɛksigmɛks a gii tuszɔ̧kigya bɔ ɗɔɔt nɛ a gbɔnɔya̧ bɔ nuŋgɔ a ꞋꞋBɛtiꞋꞋ ge an gi zɔ̧k hinɛ. Anyɔ hi gbɛn wal dɔɔgumtilya bɔ gi za̧a̧ anbɔ hoobha̧a̧hiha̧, hin wɛɛ kɔmsihi gɛrs gbɔɔltɔnɔ, wɛɛ yɔɔhi be.

¹¹ Anyɔ wal dɔɔgumtilya bɔ ɔ̄ɔ̄ Piyɛr hi Yohana dɔŋya̧ gɛ, dood sɛw kɔmsihi gɛrsɛ; hi nɔ̀ɔz hi zaa a hii, a gbag yɔ gɔ hi el a Sulemaanu zekslɛl gedu.

¹² Yɔ Piyɛr gbɛn dood wɔ anbɔ, raahi a walɛ Israhilaya wɛ, hin yɛrɛ wɛɛsin nɔ gɛrsɛ? Lɔl nɛ gi inik nɔ wi muulɛ? Nɛ mɔkig a wi woos wal yɛrɛ hinɔ an gi ɛmb hi tɛŋk wiin ger ya? Zaabe hi fɔk yɔ wi fɔk Bɛt hi gbɔnɔ giya? Lab gɛ!

¹³ Baa wɛ Abraham hi Isaaku hi Yakuba Bɛt ya̧a̧n gaa woosɔya Yeesu gbɔlumsɛ. Nɛ loo nɛ za̧a̧nɔ gii nɛ gaag dood gbɔlɛ naan du, nɛ wɛɛ nɛ faage a taa waar nɛnɛ a Pilatu muutdu be. Pilatu ɔnɛ ha̧a̧g nɛ an gi bisige, wɛɛ nɛɛ be ha̧a̧n gɛ.

¹⁴ Nɛ faa doo gaat bɔ gi doo riiti. Nɛ zɔ̧b Pilatu bitsin doogbɔŋkya bɔ gii wɛ food a Yeesu kalɛ, nɛ ɔɔ nɛ doo gaat riit bɔ bisugo,

¹⁵ nɛ wɛɛ nɛ gbɔm za̧a̧nyɔ su̧u̧ za̧a̧tig gbɔnɔ. Bɛt wɛɛ rɛmsig a wɔrkɛ teesdu, wii wi gi segyaadɛyɔ wí ɗɛɛk dɔglɔ dɔko.

¹⁶ Wal yɛrɛ nɛ gig gbɛnik nɛ mɛɛg yɔ, ɗɔbs Yeesu , Yeesu nuŋg ɔ̧ɔ̧n gaag tɛŋko. Ɗɔbsig bɔ a Yeesu nuŋg du gaag ma za̧a̧tig gɛrɛ a nɛ lɔlgbar sɛw.

¹⁷ Yɛrɛ saam be wɛ, be mɛɛ a yɔ nɛ gbɔm Yeesu anbɔ, nɛ woo hinyɔ nɛ́ mɛ̄ɛ̄ gɛ gii hi waar ɛ nɛ wɔ sɛw.

¹⁸ Yɛrɛ Bɛt woo hinyɔ dɔg nɛ amntɔnɔ a Bɛtya̧a̧kɛŋkya wɔ sɛw hi ya̧a̧ du a Masihu gi ha̧a̧ya̧a̧rɛ.

¹⁹ Yɔ anbɔ, dɛnnaanɛ, zɛmr kpoos nɛ an Waar Bɛt gi pugd hinha̧a̧l nɛ sɛw,

²⁰ an Waar Bɛt gi gaazin holum-ɔ̧ti, gi wɛɛ gi yaasin Yeesu , za̧a̧nyɔ hesinge gaati an gi wɛɛ Masihu nɛnɛ.

²¹ Gi an Yeesu gi kɔm bɛtha hɔ kete ɓɔr ɔ̧tyɔ Bɛt gɔ gi gɛms hin du sɛw gi rii, gi ɔɔ zaako. Bɛt dɔg nɛ ɔ̧t bɔrɔ dɔglɔ da amntɔnɔ a Bɛtya̧a̧kɛŋkya gaatɛ wɔ hi ya̧a̧ du.

²² Ya̧a̧nɛ Muusa gi raa nɛ a Waar nɛ Bɛt gi her za̧a̧n za a dood nɛ hi teesdu gi yaasinge an Bɛtya̧a̧kɛŋkya an beya. Nɛ́ kɛmsig hinyɔ gɔ gi dɔgsin sɛw.

²³ Za̧a̧nyɔ gɔ gi kɛ̄ms Bɛtya̧a̧kɛŋkya bɔrɔ lab tɔn gɛ Bɛt gi ha̧sig tɔlɛ a doodɔ tees du.

²⁴ Bɛtya̧a̧kɛŋkya wɔ sɛw hi dɔg ɔ̧t bɔrɔ dɔglɔ dɔgɔ . Samyɛl yɛɛl dɔgɔ, wɔ́ hi zaa a gi kuudu hi dɔg dɔglɔ sɛw.

²⁵ Nɛɛ nɛ yɛr hinyɔ Bɛtya̧a̧kɛŋkya wɔ hi raa a Bɛt gi gaazɔ, wɛɛ ya̧a̧wɔk yɔ Bɛt wɔb nɛ hi baa nɛ hii be nɛ gidu, anyɔ Bɛt raa Abraham a bé rɔbs dood dɔ̧ɔ̧t wɔ a waal du sɛw, a dɔ̧ɔ̧t mɔ bɔ gi dɔŋgo.

²⁶ Yɔ anbɔ Bɛt hes nɛɛ waaɔ Yeesu gɔ biitiri wɛɛ yaazig an gi rɔbsinɛ, gi zɛmr kpoos nɛ sɛw gbunu gbunu an nɛ ɔɔ hinha̧a̧l nɛ.