TƆMSYAADƐ WOOSƐ 23 - Nouveau Testament Doyayo

TƆMSYAADƐ WOOSƐ 23

¹ Pol see dɔglyɛ̧ɛ̧kya wɔ lɔl du gbig, raahi a hinda be wɛ, waak yɔ be waa a Bɛt muutdu, yɛɛl amntɔnɔ tuur nɛɛko, be wāā hi kpoos-zɛksig gɛ.

² Bɛtmaakwookya gbɔɔl mɔɔt bɔ raa dood wɔ hi erik Pol dɔŋdi a hi dɛm Pol ya̧a̧gbarɔ.

³ Pol yɔ lag anbɔ wɛɛ niige a wɔmnt buu an Bɛt gi dɛm mɔɔ be! Mɔ ɗɔɔt hɔ an mɔ gbaasib dɔgl anyɔ maakdɔgl gi dɔko. Yɛrɛ yɔ mɔ raa a hi dɛ̧be, nɛ mɔ hatirgo maakdɔgl ma mi!

⁴ Wɔ hi er gi dɔŋdi hi raage a e-e! Mɔ niik Bɛtmaakwookya gbɔɔl mɔɔt bɔ Bɛt esig giya?

⁵ Pol wɛɛ goo a hinda be wɛ, be mɛɛ a gi Bɛtmaakwookya gbɔɔl mɔɔti gɛ. Bɛt ɗɛɛrwol raa nɛ bē a bɔmɔ boo ya̧a̧ha̧a̧l a dood mɔ waar ya̧ zulha.

⁶ Hɔnɛyɔ Pol gbɛn dɔglyɛ̧ɛ̧kya wɔ zaadɛya̧ hi gi Saduki-yaadɛ be, zaadɛ be hi gi Farisayaadɛ be, ɓooya̧a̧ raa a hinda be wɛ, bee be Farisayayɔ, bee be Farisaya waayɔ; be gbaak mɔkil be a Bɛt gi rɛms wɔrkɛ wɔ hi kol ro, ya̧a̧nɛ hi gisib dɔgl-gbaako.

^7-8 Yɔ dɔg anbɔ, hinfaltingo ɗuk a Farisaya wɔ hi Sadukiya wɔ hi tees du. Sadukiya wɔ gɔ hi raak be a wɔrkɛ rɛmtig taaro, Bɛtwalsɛr taaro, loorɛ taaro. Wɛɛ Farisaya wɔ gɔ hi raak a hin wɔrɔ sɛw giiro. Saal wɔ hi gɛ̧ɛ̧y gɔ du eerɛ.

⁹ Dood hi yɛɛl ya̧a̧ɓoolik gɔ sɔmsɔm. Bɛtmaak­dɔkya zaadɛ a Farisaya wɔ hi gbaŋgi hi ɗuk hi gab hi dɔgɔ: a wi zɛ̄m hin-a̧a̧b a wal yɛrɛ ge nɛ gɛ zaŋ! Kinsa Bɛtwalsɛr boozigya̧a̧, zaabe mɔkili boozigya̧a̧ be?

¹⁰ Hinfaltingo wɛɛ ɗuk gɔ ha̧a̧ltɔnɔ hi tɛŋko, yɔ anbɔ laya gbɔɔl mɔɔt bɔ kol tuugtu an bɔhi hɛbl Pol gi wɔrɔ. Wɛɛ raa laaya dɛɛt wɔ hi rek hi ha̧dz Pol a saal tees bɔ gedu hi tɛŋko hi dɔɔnig a hi woosluk du.

¹¹ A yɛmsɔ gedu Waar Yeesu mits Pol raage a ɓaasum kpoos mɔ, bɔ hoob gi ha̧a̧mɔ. Ya̧a̧nɛ, anyɔ mɔ boos dood dɔgl be a Urusalima, gi an mɔ rek a Roma mɔ boo dɔgl be be.

¹² Yoosugɔ yɔ lɛl gaa, Yahuduya wɔ hi mɔksɔ hi wɔ ya̧a̧ gbunu, hi dɛŋgl hinɛ a hi taa hin leko, hi taa yɔ̧ko, hi gbɔm Pol ketgba̧.

¹³ Dood wɔ hi mɔ́ks hi wɔ ya̧a̧ anbɔ hi daar dumbili nas hɛw.

¹⁴ Hi rek a Bɛtmaakwookya gbɔlɛ wɔ hii hi Yahuduya ɗɛntɛ wɔ hi fɔkɔ a wi dɛŋgl hin ha̧a̧ltɔnɔ wi raa a wi taa hinza leko, wi gbɔm Pol ketgba̧.

¹⁵ Yɛrɛ nɛya hi dɔglyɛ̧ɛ̧kya wɔ sɛw nɛ yaa doo a laaya gbɔɔl mɔɔt Romaya bɔ ge gi kamz Pol a nɛɛge an ha̧a̧ nɛɛ dɔglɔ gaasig rɔbtɔnɔ, wii be gɔ gi anbɔ wi sɛ̧bz di bed an wi wa̧a̧ wi gbɔŋge.

¹⁶ Hɔnɛyɔ Pol fabtɔ lag hi wɔ ya̧a̧ anbɔ a luurlɛl an hi gbɔŋge, wa̧a̧ gbɔnɔ rek a laaya wooslukya̧ da gul a Pol ge dɔgsige.

¹⁷ Pol wɛɛ elz laaya za gbɔɔl raage a kam wala yɛrɛ a gbɔɔl nɛ mɔɔt bɔ ge, gin dɔgl za an gi fɔksige.

¹⁸ Laaya gbɔɔl bɔ loo wala bɔ kaŋg a gbɔɔlya̧ mɔɔt bɔ ge raage a Pol luknɔya bɔ gii elibe gi zɔ̧be a be kamsum wala yɛrɛ gin hinza an gi dɔgsumɔ.

¹⁹ Laaya gbɔɔl mɔɔt bɔ loo wala bɔ naanmuulɛ hi sɔɔ aakil du. Yɔ hi gi ɔ̧ɔ̧kya̧ warige a ha̧a̧m an mɔ raasib nɔ?

²⁰ A be zaasum raak a Yahuduya wɔ hi wɔ ya̧a̧ an hi raam mɔ kamz Pol a dɔglyɛ̧ɛ̧kya wɔ hi yoosugo, an ha̧a̧hi dɔgl ɔ̧ɔ̧n gaasig rɔbtɔnɔ ɓɛ.

²¹ Bɔmɔ kɛmsihi. Dood wɔrɔ zaadɛya̧ hi gig kɛtig an hi gbɔŋge hi daar dumbili nas hɛw. Hi dɛŋgl hinɛ a hi taa leko hi taa yɔ̧ko, hi gbɔm Pol ketgba̧. Hi gɛbs hin sɛw da̧a̧da̧, yɛrɛ hi ook hinyɔ gɔ mɔ ta̧a̧hi gii ma.

²² Laaya gbɔɔl mɔɔt bɔ raa wala bɔ: a bɔmɔ rek mɔ dɔks doo za a mɔ walksib hin anbɔ. Yaage rekɔ.

²³ Kuudu wɛɛ el laaya za gbɔlɛ eerɛ raahi a yɛms gɔ gi bulɔ, lɛl a bisza̧k du gɔ gi talɔ, loon layaadɛ tɛmɛrɛ eerɛ hi dɔyyaadɛ dumbili nɔɔn-erɛ, hi gooyaadɛ tɛmɛrɛ eer be, nɛ rek nɛ tuur a Kaysariya.

²⁴ Nɛ tɛbs Pol dɔy ɔnɛ an gi kar ha nɛ kaŋg rɔbtɔnɔ a za̧a̧n hɛbtzulya bɔ Felikus ge.

²⁵ Wɛɛ bi̧i̧ ɗɛɛrwol anyɔ lɛ:

²⁶ a bee Kalawdiya Liiziyas, be boo mɔɔ Za̧a̧n Gbɔɔl Hɛbtzulya bɔ Felikus.

²⁷ Baa, wal yɛrɛ be yaazige, Yahuduya wɔ hii wa̧a̧ge ha̧a̧hi nɛ an hi gbɔŋg-gbɔmɔ. Anyɔ gɔ hi gbɔŋge, yɔ be lag a gi Romaya be, be rek hi layaadɛ, be zeezige, be loozig gɔ.

²⁸ Yɔ ha̧a̧b an be mɛɛ hinyɔ Yahuduya wɔ hi gig gɛ̧ɛ̧nuko, be kamzig a dɔglyɛ̧ɛ̧kyaya̧ wɔ hi.

²⁹ Be zɛm hi gig gɛ̧ɛ̧nik hinza yɔ see maakya̧ dɔgl giya. Wal yɛrɛ wōō hinza ha̧a̧l gbunu an gi rii gbɔŋki, zaabe an hi yaag luknɔ du dɔŋgɔ gɛ.

³⁰ Yɔ hi bɛɛsib raak a Yahuduya wɔ hi wɔb ya̧a̧ an hi gbɔŋgbɔm kpɔdi, be loog be yaazig gɛrɛ a mɔɔge. Be raa dɔglɔgɛ̧ɛ̧nikya wɔ a hi kam dɔglɔ a mɔɔge. Anbɔ.

³¹ Hɔnɛyɔ laaya wɔ hi loo Pol anyɔ gbɔɔlya̧ mɔɔt bɔ raahi, hi kaŋg gɔ a Aŋtipateris a yɛms bɔ gedu.

³² Yoosugɔ laaya wɔ hi ren nɛ dɔɔ hi wɛɛz gɔ a birgal be. Wɔ hi ren nɛ dɔy hi kam Pol be.

³³ Yɔ hi tuuringe a waal gbɔɔl bɔ nuŋgɔ a Kaysariya, hi gaa hɛbtzulya bɔ ɗɛɛrwol bɔ hi bi̧i̧, hi wɛɛ hi kam Pol hi esig gi muutdu.

³⁴ Hɛbtzulya bɔ zaŋga ɗɛɛrwol bɔ. Wɛɛ war Pol a mɔ fu̧u̧ a hɛbtɔ ay? Yɔ hi raasig a gi Silikiyayɔ,

³⁵ wɛɛ dɔgɔ a bé oo dɔglɔgɛ̧ɛ̧nikya wɔ gɔ hi zaa ro be ɔɔ dɔgl mɔ lako. Wɛɛ raa laaya wɔ hi kam Pol a waar raa yɔ Hirudus wɔm nɛ gedu hi ooge.