TƆMSYAADƐ WOOSƐ 12 - Nouveau Testament Doyayo

TƆMSYAADƐ WOOSƐ 12

¹ A ɔ̧tya̧ gedu, Waar Hirudus yɛɛl Yeesu fɔkya wɔ zaadɛya̧ ya̧a̧r ha̧a̧nuko.

² Wɛɛ raa dood hi gbɛɛr Yohana hindaɔ Yakuba hi daŋbɛsimi.

³ Yɔ gbɛn hin gi har Yahuduya wɔ anbɔ, wɛɛ wa̧a̧ Piyɛr hɛw a naab-ɔ̧t yɔ gɔ hi lil hɛ̧ɛ̧t gedu.

⁴ Yɔ bɛɛ Piyɛr wa̧a̧ko gbalig luknɔ du, gbaa layaadɛ koobl daa nɔɔn-gbunu lɛl nasɔ an hi ooge; wɛɛ mɔk a Paska naab gɔ gi daa hi kaŋg a dood muutdu an gi gbaasig dɔglɛ.

⁵ Yɔ anbɔ Piyɛr ɗɔɔt a luknɔ du, Yeesu fɔkya wɔ hi mɔks lɛlgbun be hi waa hi gisig Bɛt zɔ̧k hi tɛŋko.

⁶ Yɛms yɔ an Hirudus gɔ gi kamnig a dood muutdu yoosugɔ, Piyɛr gi yok a layaadɛ eer tees du; hi wɔg hi ba̧a̧ntus eerɛ. Laya zaadɛ hi gi luknɔ gbar bɔ ooko.

⁷ Yaala Bɛtwalsɛr za zaa, lɛl gaa a luknɔ bɔ gedu. Bɛtwalsɛr bɔ kpòò Piyɛr dɛŋge a yɛ̧brya̧ raage a ɗukum nɔɔko. Ba̧a̧ntus wɔ hi kpɔm gi naan du gbis.

⁸ Bɛtwalsɛr bɔ wɛɛ raage a wɔm hi̧i̧lwɛɛl mɔ see du, hegum taal mɔ dɔɔ du. Piyɛr wɔb hi̧i̧lwɛɛl bɔ wɛɛ heg taalɔ bɔ. Wɛɛ raage a hegum gban mɔ gbɔɔl bɔ muulɛ mɔ fɔbzibe.

⁹ Piyɛr hegɔ tuu fɔge, mɛ̄ɛ̄ a hinyɔ Bɛtwalsɛr bɔ gi gɔk gi rɔb gɛ, wɛɛ mɔk a be gi gbɛnik hinza a gɛrs du.

¹⁰ Yɔ hi tuuz hi daar laaya biitir bɔ hi eesim bɔ, hi tuur gɔ a gbɔnɔ kpɛnis tusya bɔ ge an hi ren a waal gbɔɔl du, gbɔnɔ bɔ gboor gi naanɛ, hi tuu hi rek a bɔrignɔɔ zaa du, yaala Bɛtwalsɛr bɔ rek ɔɔ Piyɛr dihɔ.

¹¹ Piyɛr wɛɛ mɔkhin gi zulha dɔgɔ a yɛrɛ be mɛɛmɛ ma a Waar Bɛt yaaz walsɛrɔ za̧a̧sib a Hirudus naan du hi hinyɔ dood Yahuduya wɔ hi ook nɛ sɛw an hi woo be zulha.

¹² Yɔ mɛks anbɔ wa̧a̧ gbɔnɔ rek a Yohana yɔ nuŋgɔ zaa a Markus nɔɔtɔ Mariyama raa du, a lɛlyɔ dood kittɔnɔ hi mɔks hi zɔ̧k Bɛt ge.

¹³ Piyɛr yɔ tuurɔ ɓaa tutin-gbɔnɔ. Yɔ nisgbaar za nuŋgɔ a Rogda kɛmz zaa an gi lag hinɔ.

¹⁴ Yɔ mɛks Piyɛr ya̧a̧ɔ, hin harige, an gɔ gi gboor gbɔnɔ bɔ, gboor gɛ, nɔɔ rek raas dood zaadɛ wɔ a Piyɛr zaa gi a tutin-gbɔnɔya̧.

¹⁵ Wɔrɔ hi raage a mɔ yooyɔ. Hɔnɛ gii wɛɛ raa a be raak rɔb ro! Hi wɛɛ hi ɗɔgɔ a Piyɛr Bɛtwalsɛr ɔ̧ɔ̧n zaa.

¹⁶ Yɔ anbɔ Piyɛr gi gbosig tutin-gbɔnɔ bɔ ɓaaki. Hi zaa hi gboor lukgbɔnɔ bɔ, yɔ hi gbɛnige, hinɔ kɔmsihi gɛrsɛ.

¹⁷ Yɔ Piyɛr pɛɛ naan wɛɛha an dood hi kɔm sob hi kɛm dɔglɔ, hi kpɛ̧ɛ̧ ya̧a̧ya̧ gɔ. Fɔksihi hinyɔ Waar Bɛt tuusinge a luknɔ bɔ gedu. Wɛɛ raa a dɔgsin Yakuba hi yɛ̧ɛ̧dɛ Yeesu -fɔkya zaaɗɛ wɔ dɔglɔ. Kuudu wɛɛ tuu rek a lɛl za dɔɔmi.

¹⁸ Yɔ lɛl gaa, laaya wɔ hi watin hi teesdu hi tɛŋko an hi mɛɛ lɛlyɔ Piyɛr wɛɛ du.

¹⁹ Yɔ Hirudus raa dood hi ɓɛɛ Piyɛr hi gbɛnig gɛ, wɛ gbaas laya wɔ dɔglɛ, an gi raa dood hi rek hi gbɔ̧hi. Ɗuk a Yahuduya rek a Kaysariya waal gbɔɔl du an gi ɗɔɔt hɔ ɔ̧t kaasi.

²⁰ Waar Hirudus kpoosɔ nɔɔg daarlɛl a Tirusya wɔ hi zulha, hi Sidɔŋgya wɔ hi zulha, yɔ anbɔ wɔrɔ hi ɔks an hi rek hi sɔ̧ɔ̧ge. Hi yɛɛl hi sɔmb waar bɔ Hirudus raaɔ-ookya bɔ nuŋgɔ a Balaste an gi ta̧a̧ dɔglya̧. Yɔ hi dak lees gi fu̧u̧z a waar bɔ gi hɛbt du, gii hi rek a Hirudus ge an hi ɛrig saŋtum a hi hɛbt bɔ gedu.

²¹ A ɔ̧tyɔ hi dɛ̧ɛ̧ gedu, Hirudus heg waar ums gbannɔ, ɗɔɔt a waar ums ɗɔɔtillɛlɛ dɔgsihi dɔglɛ.

²² Dood saal wɔ hi ɓooya̧a̧ a bɛt gii gi ya̧a̧booko, doo tɔs ya̧a̧boon gɛ!

²³ Anyɔ ɗɔbs Bɛt gɛ, ɓɔrbɔ Bɛtwalsɛr za lɛge. Ga̧a̧r hi mid gi buu du hi tɔ̀g wɔrɔ.

²⁴ Yɔ anbɔ Bɛt dɔglɔ tɔɔ re gɔ doosɛ doosɛ.

²⁵ Yɔ Barnabas hi Sawulu hi da̧a̧s woosya̧ a Urusalima hi wɛɛzugo, hi kamz Yohana yɔ nuŋgɔ zaa a Markus naanɛ.