TƆMSYAADƐ WOOSƐ 10 - Nouveau Testament Doyayo

TƆMSYAADƐ WOOSƐ 10

¹ Walza laaya gbɔɔl giro, nuŋgɔ a Kɔrnɛliyus gi waak a Kaysariya, gin laaya dɛɛt yɔ̧ɔ̧lɔ nɔɔnɛ. Gɔ hi elik a Itali layaadɛyɔ.

² Walɔ gi fɔk Bɛt rɔbtɔnɔ hi hoobo hi raatɔ sɛw, gɔ gi gaak Yahuduya ya̧a̧rya wɔ gaas gbɔɔltɔnɔ, wɛɛ gi waak Bɛt zɔ̧ki.

³ Ɔ̧tyɔ gi a naaba̧a̧n du gbɛn Bɛtwalsɛr za raasig hinza a gɛrs du bɛttɔnɔ gul gi lɛl du, elige a Kɔrnɛliyus!

⁴ Yɔ lag anbɔ wɛɛ see Bɛtwalsɛr bɔ hi hooblɔlɛ warige a Ɗɛntyɔ, kɔm ri? Bɛtwalsɛr bɔ wɛɛ raage a zɔ̧k mɔ hi gaas mɔ sɛw tuur a Bɛt muutdu, Bɛt ta̧a̧ta̧.

⁵ Yɛrɛ yaam dood a Zope hi elz Simɔŋ yɔ nuŋgɔ zaa a Piyɛr gi zaa a mɔɔge.

⁶ Gi waak a Simɔŋ za zoolnukya bɔ gi raa du, raaɔ sɛ̧ɛ̧b gi a mɛmbal gbɔɔl ya̧di.

⁷ Yɔ Bɛtwalsɛr bɔ bɛɛsig raak anbɔ rekɔ, gii wɛɛ elz woosyaadɛ ɔ̧ɔ̧ eerɛ hi laaya za gbun yɔ gi fɔk Bɛt hi gbɔnɔ yɔ gi woos wootingo elo, fɔksihi hin sɛw.

⁸ Yɔ fɔksihi hinyɔ daa sɛw gi da̧a̧, yaahi hi rek gɔ a Zope.

⁹ Yoosugɔ yɔ hi gi gbɔnɔ di hi sɛ̧ɛ̧bik tuurik a Zope waal gbɔɔl bɔ dɔŋgɔdi, Piyɛr kar lukzul ha a lurk teesdu gi zɔ̧k Bɛto.

¹⁰ Yɔ a̧a̧kil gig ha̧a̧k an gi le leesɛ, hi gisig hindɔɔko an gi le be, Bɛt zunsig hinza gbɛn a gɛrs du.

¹¹ Gbɛn bɛtha kpɛ̧ɛ̧rɔ, gbɛn hinza an gban gbɔɔl fɛɛti ha̧y lɛl nasɔ gi sizig an gi tuur hɛbtdi.

¹² Namb wɔ hi naŋkar wɔ hi gi a hɛbtdi dɔ̧ɔ̧tya̧ sɔmsɔm hi nɔɔs bɛtha sɛw dɔ̧ɔ̧tya̧ hi gi a gban fɛɛt gbɔɔl bɔ muulɔge.

¹³ Wɛɛ ya̧a̧ za raazig bɛtha a Piyɛr , ɗukum mɔ wa̧a̧ mɔ gbɛɛrihi mɔ tɔbɔ.

¹⁴ Piyɛr wɛɛ raage a ewwee! Waar Bɛto, be tɔbdir hin libtya, zaabe hin ɓi̧i̧limya ket gɛ nɛ zaŋ.

¹⁵ Wɛɛ kɛm Bɛt ya̧a̧ɔ dɔɔ eesimɛ, gig raak a hinyɔ be gaasige bɔmɔ see hinɔ an hin ɓi̧i̧limyayɔ.

¹⁶ Hinɔ tuur anbɔ dɔɔ taarɛ, yaala hinɔ wɛɛ kɔl dɔɔ a bɛtha.

¹⁷ Piyɛr war zulɔ a hinyɔ be gbɛnz gɛrs du hinɔ raakɔ a nɔ? Hɔnɛyɔ gi zulɔ hin wark anbɔ te dood wɔ Kɔrnɛliyus yaazihi hi ɛrkig Simɔŋ raaɔ bɔ lɛlɔ be. Yaala hi tuur gɔ, hi er gi tutin gbɔnɔya̧, hi mɛɛ gɛ be.

¹⁸ Hi el dood zaadɛ hi warihi a Simɔŋ yɔ nuŋgɔ zaa a Piyɛr gi waak dihɛ ya?

¹⁹ Yɔ Piyɛr gi mɔkig hin a hinyɔ Bɛt zunsig a gɛrs du geha te be, Bɛt Mɔkilɔ raage a kɛmɔ, dood taarɛ hi gim tɛk gɛrɛ.

²⁰ Ɗukum mɔ silɔ mɔ retin hi hii a Kaysariya, bɔ hoob gi ha̧a̧mɔ, bee yaazihi a mɔɔge an hi elumɔ.

²¹ Yɔ anbɔ Piyɛr silɔ, raa dood wɔ a be gi gɛrɛ, za̧a̧nyɔ nɛ gig tɛk gii beeya. Nɛ zaa nɔ?

²² Wɔrɔ hi ta̧a̧ a laaya gbɔɔl zulya bɔ Kɔrnɛliyus gii yaaziwi. Gi doo riit yɔ hoob gig ha̧a̧k Bɛto, Yahuduya wɔ sɛw hi mɛɛ dɔglɔ hi gig sɔ̧ɔ̧k an doo rɔbo. Bɛtwalsɛr za zaa raage a gi elumɔ mɔ rek a ge a gi lɛl du an gi lag hinyɔ gɔ mɔ dɔgsige.

²³ Piyɛr dɛ̧ɛ̧hi hi yo; yoosugɔ ɗuk retin gɔ hi hii a Kaysariya. Yɛ̧ɛ̧dɛ Yeesu fɔkya zaadɛ hi fu̧u̧ a Zope hi sɔkig be.

²⁴ Yoosugɔ anyɔ gɔ hi tuur a Kaysariya anbɔ, Kɔrnɛliyus mɔks nɛsɛ ɔ̧ɔ̧ hi saamɔ rɔ́bɛ wɔ hi oohi.

²⁵ Yɔ Piyɛr sɛ̧ɛ̧b gulk Kɔrnɛliyus raa du, Kɔrnɛliyus tuu dagige zagl gi dɔɔ dɔŋdi ɗɔbsige.

²⁶ Hɔnɛ Piyɛr wɛɛ ɗunsig raage a ɗundum ha, bee be gi doo an mɔɔ hɛw.

²⁷ Yɔ Piyɛr gul raa du gi bookya̧a̧ hi Kɔrnɛliyus zɛm dood hi mɔks kittɔnɔ.

²⁸ Piyɛr raahi a nɛ mɛɛ bɛttɔnɔ a maak wi gāā gbɔnɔ an Yahuduya gi ɔks hi rɔ̀bi, zaabe an gi tal gi lɛl du gɛ. Yɛrɛ Bɛt gogsib a bɔbe see doo za gbun mɔɔt an gi hin libtyayɔ, zaabe an hin ɓi̧i̧limyayɔ.

²⁹ Ànyɔ nɛ elzib an be zaa hɛdi, bé ı̄n zaakɔ gɛ be. Yɛrɛ ha̧a̧b an be mɛɛ hinyɔ nɛ elinbe.

³⁰ Kɔrnɛliyus gòò raage a tuur ɔ̧t nas nɛɛko, ɔ̧t gi a naaba̧a̧n du an yɛrɛ lɛ an be zɔ̧b Bɛto. Yɔ be zɔ̧k Bɛt a be lɛl du doo za zaa be muutdu gin gban gaat buu fɛr a gi muulɛ,

³¹ raabe a Kɔrnɛliyus, Bɛt kɛmsum zɔ̧k mɔ kɛmsɔ, wɛɛ mɛɛ gaas yɔ mɔ ɗansig ya̧a̧rya wɔ.

³² Yaam doo za a Zope gi elz Simɔŋ yɔ nuŋgɔ zaa a Piyɛr gi zaa. Gi waak a Simɔŋ zoolnukya bɔ gi raa du a mɛmbal gbɔɔl ya̧gbarɔ.

³³ Be wɛɛ be yaa doo gɛrɛ nɔɔktɔnɔ a mɔɔge an gi elzumɔ. Mɔɔ be bɛsum mɔ zaa gɔ be. Yɛrɛ wɛ gi ma Bɛt muutdu sɛw an wɛ lag ma hinyɔ Bɛt raasum sɛw an mɔ dɔgsɛ.

³⁴ Piyɛr yɛɛl ya̧a̧book dɔgɔ a yɛrɛ be mɛɛ gɔ bɛttɔnɔ a Bɛt gɛ̧̄ks dood gɛ.

³⁵ Dood hɛbtdi sɛw, za̧a̧nyɔ hoob gig ha̧a̧k Bɛto gi wɛɛ gi wook hinrɔb a gi muutdu, bɛs Bɛt bɛsɔ.

³⁶ Nɛ mɛɛ dɔgl yɔ Bɛt yaas dood Israhilaya wɔ. Dɔgl bɔ kamz saŋtum dɔglɛ a Yeesu Kristu yɔ gi dood sɛw waar ya̧ nuŋg du.

³⁷ Nɛ mɛɛ hingbɔɔlyɔ tuur a Yahuduya waal du sɛw. Hinɔ yɛɛl a Galile hi Yohana Bɛtmɛmɔ bɔ gi Bɛt dɔgl dɔgnik sɛw.

³⁸ Nɛ mɛɛ Yeesu Nazarɛdya bɔ dɔglɔ yɔ Bɛt yaaz Mɔkilɔ gi zulha gi gaag tɛŋko. Yeesu ɛmb waal du sɛw woo hinrɔbo, za̧a̧s dood wɔ hi gi a loorɛha̧a̧l tɛŋk du sɛw anyɔ Bɛt gi hi giya.

³⁹ Wii wi gi segyaadɛ ɔɔnɛ; wi gbɛn hinyɔ woo sɛw a Yahuduya hɛbt du hi a Urusalima, hi wa̧a̧ge hi doog a dɔ̧ɔ̧r ha wɔrɔ.

⁴⁰ Bɛt wɛɛ rɛmsig wɔrk du ɗunsige a ɔ̧t taasimɛ, wɛɛ midige.

⁴¹ Yɔ mida, Israhilaya dood sɛw hí gbɛnig gɛ, gɛ mits wii segyaadɛ ɔ̧ɔ̧ wɔ Bɛt heriw biitiri. Yɔ Bɛt rɛmsig a wɔrk du gi wɛnzig a za̧a̧tig du, wi lehin hi giya, wi yɔ̧ hi giya.

⁴² Raawi a wi dɔgs dood Bɛtdɔglɛ, a wi wɛɛ wi dɔg a Bɛt gbaa gii dɔgl-gbaakya a wɔrkɛ wɔ hi dood za̧a̧til wɔ hi zulha.

⁴³ Bɛtya̧a̧kɛŋkya wɔ sɛw hi raa dɔglɔ a za̧a̧nyɔ ɗɔbsige Bɛt gi bitsig hinha̧a̧lɔ a Yeesu nuŋgɔ tɛŋk du.

⁴⁴ Anyɔ Piyɛr gi dɔgl wɔrɔ dɔk te, Bɛt Mɔkilɔ siz a dood wɔ hi lak nɛ Piyɛr dɔglɔ sɛw hi zulha.

⁴⁵ Yɔ Yahuduya Yeesu ɗɔbsigya wɔ hi fu̧u̧z a Zope hi Piyɛr hi gi di hi gbɛn Bɛt yaas dɔ̧ɔ̧t dɔɔmɛ wɔ Mɔkilɔ hi zulha hɛw, kɔmsihi gɛrsɛ.

⁴⁶ Ànyɔ hi lag hi book ya̧a̧boon segdɛ be hi ɗɔbsig Bɛto, Piyɛr warɔ

⁴⁷ a dood wɛrɛ hi dag Bɛt Mɔkilɔ an wɛɛ her be, bɔ ɗɛɛ an gi ansihi Bɛtmɛm bɔ dakɔ nɔ?

⁴⁸ Yɔ anbɔ Piyɛr wɛɛ raa dood a hi hotinihi Bɛtmɛm a Yeesu Kristu nuŋg du. Dood wɔ hi wɛɛ hi zɔ̧ge an gi kɔm hi hii ɔ̧t kaasi.