2 TIMƆTE 4 - Nouveau Testament Doyayo

2 TIMƆTE 4

¹ Mi gim raak hi tɛŋko a Bɛt muutdu hi a Yeesu Kristu muutdu, Za̧a̧nyɔ gɔ gi gbaas wɔrkɛ wɔ hi dood za̧a̧til wɔ sɛw dɔglɛ. Mi raamɔ a zaakɔ bɔ gi dɔŋgo hi waar umsɔ yɔ gɔ gi esig gi dɔŋgo:

² a dɔgsum dood Bɛtdɔglɛ, dɔgsumɔhi hi ya̧a̧hɛmnti, gi riisihi, gi rı̄ı̄sihi gɛya hɛw, walksimɔhi hin-a̧a̧bya̧, za̧brumɔhi, gaamɔhi tɛŋko. Gogsumɔhi hin hi mɔmnt rɔbo.

³ Yɔ anbɔ, ɔ̧tɔza gi zaako, dood hi ta̧a̧ hinrɔb gok bɔ kɛŋk gɛ, hi fɔb hinyɔ kpoosya̧ ha̧a̧hi giya, hi wɛɛ hi mɔks hingokya adɛ, an hi dɔksihi hinyɔ kpoosya̧ ha̧a̧hi kɛŋko.

⁴ Hi ɔɔ rɔb dɔgl bɔ kɛŋkɔ, hi zɛmr an hi kɛm dɔgl fɔkil amntɛ wɔ hiya.

⁵ Yɛrɛ mɔya, oom zul mɔ rɔbtɔnɔ a hinyɔ gi duge sɛw, mɔm ya̧a̧rhant wɔ. Woom Bɛtdɔgl ɛmbingoya woos bɔ, da̧a̧sim woos bɔ Bɛt gaamɔ an mɔ woosige.

⁶ Minɛ ɔ̧tyɔ ga̧a̧m mi gɔ gi gubr an Bɛt gaasɛ sɛ̧ɛ̧b ma; ɔ̧t minɛ yɔ gɔ mi wɔr du tursimtursɔ.

⁷ Mi gɔ nɔk rɔb bɔ gɔ; mi da̧a̧s nɔɔkil mi da̧a̧sɔ, mi oo ɗɔbsig mi.

⁸ Yɛrɛ ɗɛɛt mi dɔɔrɔɔs bɔ gim ooko. Waar Yeesu , dɔglyɛ̧ɛ̧kya bɔhi gbɔnɔ gii gi gaami a woos miyɔ riisig gi dɔŋgo a dɔgl-gbaak bɔ ɔ̧tɔ ge. Taa mii gaak kpɔdi, gi gaak dood wɔ ha̧a̧hi a gi muul sɛw gid hi ook ɔ̧tyɔ gɔ gi miɗza gedu.

⁹ Timɔte, bɔmɔ amzɔ, i̧i̧yimɔ an mɔ zaa a miige nɔɔko.

¹⁰ Deemas ɔɔm-ɔ anyɔ ha̧a̧g waal yɔ gi ɓɔryɔ; rek a Tesalo-niki. Kerɛskɛs be rek a Galatiya, Titus be rek a Dalmatiya.

¹¹ Luka gii gi gi gbunu hi miya. Loom Markus nɛ zaatin elo, ɔnɛ ɗɛɛ an gi ɗaasum a Waar Bɛt woos du gbɔɔltɔnɔ.

¹² Mi yaa Tikikus a Efesu.

¹³ Gɔ mɔ gi zaako, kamsimi dimnaan mi bɔ mi ɔz a Karpus naan du a Torowas. Mɔ kamsim ɗɛɛrwol wɔ hi gi hɔ hɛw, rɔbɔ, wɔ hi gin wɛɛl hobo.

¹⁴ Nām bɔ Alegzandɛr gɔsim bɔbtin ha̧a̧ltɔnɔ, Waar Bɛt gi gbaasig dɔgl a woos yɔ woo kalɔ ge.

¹⁵ Mɔɔ oom zul mɔ hi gii hɛw, faa dɔgl wɛ hi tɛŋko.

¹⁶ Yɔ mi yɛɛl erk a dɔgl-gbaak muutdu an mi ta̧a̧s zul mi hinɛ, doo za ɗaasim gɛ, dood sɛw hi nɔɔ hi ɔɔm-ɔ. An bɔ̄ Bɛt gi see an hin-a̧a̧byɔ.

¹⁷ Yɔ anbɔ Waar Yeesu gi hi miya gaam tɛŋk an mi da̧a̧sin Bɛtdɔgl bɔ dɔkɔ, an dood wɔ hi taa Yahuduya gɛ sɛw hi kɛmɔ. Gii wɛɛ gi za̧a̧simi a naamnɔɔ ya̧a̧gbarɔ.

¹⁸ Waar Yeesu gi oomi a hinha̧a̧l du sɛw gi wɛɛ gi za̧a̧simi gi tuurinmi a gi wáát du a bɛtha. Gbɔlumsɔ gi a ge wɛlɛ hi wɛlɛ! Aanbɔ!

¹⁹ Boom nis bɔ Piriskila du hi waltɔ Akilas hɛw. Boom Onɛsifɔrus raatɔ du be.

²⁰ Erastus kɔm gi a Kɔrɛŋgtu. Torofemus be, mi ɔzig a Miletus, gi gumtili ya̧a̧nɛ.

²¹ Zaam nɔɔko an ga̧a̧k gi ɔɔ tuuruko. Esbulus hi Pudɛs, hi Linus, hi nis bɔ Kalawdiya hi yɛ̧ɛ̧dɛ zaadɛ sɛw hi boomɔ.

²² Waar Yeesu gig hi mɔkil mɔ, Bɛt gɛmsilɔ gig hi nɛɛ sɛw be. Aanbɔ!