2 PIYƐR 3 - Nouveau Testament Doyayo

2 PIYƐR 3

¹ Saammi wɛ, ɗɛɛrwol mi eesim bɔ mi bi̧i̧sin gɛrɛ ma. A ɗɛɛrwol yɛrɛ gedu hi zaabɔ mi da mi bi̧i̧sin nɛ gedu, mi tɛb an mi rɛms kpoos nɛ rɔb bɔ gii ha

² an nɛ mɔkɔ nɛ mɛɛ hinyɔ Bɛtya̧a̧kɛŋkya gaatɛ wɔ hi da hi dɔg nɛ doosɛ hi Waar wɛ za̧a̧sigya bɔ dɔglɔ bɔ gaa tɔmsya nɛ wɔ hi dɔks doodɛ.

³ Mɛɛn gi dorɔ a ɔ̧t yɔ̧ɔ̧sum bɔ gedu, kpɛ̧ɛ̧likya zaadɛ wɔ hi waak anyɔ muulɗɔkumya̧ ha̧a̧hi hi midza hi kpɛ̧ɛ̧l hi raa:

⁴ a nɛ Yeesu raa a be zaak be, gaay ma nɔ? Nɛ baa wɛ hi wɔr amntɔnɔ, wɛɛ hin sɛw gi kɔŋk lɛlɔge anyɔ da ginɛ a waal yɛɛliki, yɔ waal ki̧yɔ, hinza zɛmr gɛ.

⁵ Ha̧a̧hi zɛnik a Bɛt da kim bɛtha amntɔnɔ hi dɔgl ɔ̧ɔ̧nɛ, hɛbt be tuu a mɛm du, Bɛt wɔmnig mɛm bɔ gii gi erɔ.

⁶ Da ha̧tir waal amnt bɔ hi mɛm hɛw, mɛm bɔ gi tuu gi hi̧i̧s hɛbto, hɛbt gi ha̧tiro.

⁷ Yɛrɛ bɛtha hi hɛbt yɔ ɓɔryɔ, Bɛt dɔglɔ gbun bɔ gii gig gbaako an kuudu gi wɛɛ gi ha̧tir hi laa. Hi gbaahi an ɔ̧tyɔ Bɛt gɔ gi gbaas dood wɔ hi ɗɔ̄bsig gɛ dɔgl gedu gi tuurɔ gi ha̧tirihi.

⁸ Yɛrɛ saam mi rɔbɛ wɛ, hin gi gbunu bɔwɛ zɛnɔ. Waar Bɛt gi seek ɔ̧t gbunu an gi wɛl duko, gi seek wɛl duk be an gi ɔ̧t gbunu.

⁹ Dood zaadɛ hi raako: a Bɛt gi aŋk gbɔɔltɔnɔ, taa wook hinyɔ raa nɛ a gi woo. Taa anbɔ ro! Waar Bɛt gisin mɔŋko. Hā̧a̧g an doo za gi wag gɛ, ha̧a̧g an dood sɛw hi zɛmr kpoosya̧ hi zaa a ge.

¹⁰ Yɛrɛ Waar Yeesu ɔ̧tɔ be gi zaak an luuri; a ɔ̧tɔge bɛtha gi wagɔ hi nams hoobhantya gbɔlɛ wɔ. Ɔ̧ti, sɛɛ hi sɛwaato hi ya̧a̧ laa du, hɛbto hi hinwɔ hi gidu sɛw hi mug laa du.

¹¹ Nɛ yɔ gi an hin wɔrɔ sɛw hi mug laa du anbɔ, nɛɛ be, ɛmbil nɛ gi an gi gaa, nɛ Bɛt fɔk hi gbɔnɔ,

¹² nɛ oonik ɔ̧tɔ bɔ zaakɔ, nɛ i̧i̧k tɛŋk nɛ an gi zaa nɔɔko, a ɔ̧tɔge bɛtha gi kab laa gi ya̧a̧. Laazebt gi zɛm hinwɔ hi ki̧y sɛw gi muksihi!

¹³ Yɛrɛ Bɛt raa a gi gaawɛ bɛtha sego hi hɛbtdi sego, a lɛlyɔ rɔbwook gɔ gi waa gedu. Hinyɔ wɛ ook giibɔ.

¹⁴ Yɔ anbɔ saammi rɔbɛ wɛ, a hin wɔrɔ ookya̧ gedu, i̧i̧n tɛŋk nɛ an bɔ ɔ̧t bɔrɔ gi zaa gi zɛnɛ hi libt a kpoos du, an bɔnɛ gin a̧a̧bi a Bɛt muutdu, nɛ ɗɔɔtig rɔbtɔnɔ hi giya.

¹⁵ Mɛɛn a Waar wɛ hinmɔŋkɔ bɔ gis dood za̧a̧tig ya̧a̧nɛ anyɔ yɛ̧ɛ̧ wɛ rɔb bɔ Pol da bi̧i̧sin dɔglɔ an hinmɛɛk yɔ Bɛt gaag gi kpoos du.

¹⁶ Boosin hin bɔrɔ dɔglɔ anyɔ gɔ gi book a ɗɛɛrwol wɔ gi bi̧i̧k gedu sɛw. A lɛlyɔ gi book hin wɔrɔ dɔglya̧ gedu, lɛl za hi giro kɛŋkya̧ ɓaaɓa. Dood wɔ hi mɛɛhin gɛ hi wɔ kpoosya̧ hɔglɔ hi zɛmrik hin wɔrɔ gbɔnɔya̧ lɛlɛ anyɔ gɔ hi gɔk a Bɛt ɗɛɛrwol zaadɛ du. Yɔ anbɔ hi ha̧tirgo zul ya̧a̧nɛ.

¹⁷ Yɛrɛ nɛya, saammi rɔbɛ wɛ, mi dɔgsin hin wɛrɛ doorɔ, oon ma, bɔnɛ ɔɔ dood Bɛtmaakɗa̧a̧kya wɔ hi maatin hi hin-a̧a̧bya̧ an nɛ simdɔɔ nɛ mat a hinyɔ nɛ erk geha hi tɛŋko.

¹⁸ Yɛrɛ tɔɔn a Waar wɛ Za̧a̧sigya wɛ Yeesu Kristu gɛmsilɔ bɔ gedu hi hinmɛɛkɔ bɔ. Gbɔlums gi a ge ɓɔryɔ wɛlɛ hi wɛlɛ. Aanbɔ!