2 KƆRƐŊGTU 9 - Nouveau Testament Doyayo

2 KƆRƐŊGTU 9

¹ An Bɛtdoodɔ wɔ hi gi a Yahuduya gaasya̧ bɔ giya, rı̄ı̄ an mi bi̧i̧sin dɔglɔ gɛ ɔnɛ.

² Mi mɛɛ ɔnɛ ha̧a̧tig nɛ rɔb bɔ, mi wɛɛ mi baanik dɔglɔ a Makeduniyaya wɔ hi dɔŋdi, mi raak a Akayayaadɛ hi mɔks gaasya̧ da̧a̧da̧ yɛɛl leza; tɛŋk nɛ bɔ nɛ gaak woos du ɗaas dood kit wɔ hi teesdu gbɔɔltɔnɔ.

³ Yɛrɛ mi yaak yɛ̧ɛ̧dɛ mi a nɛɛge an bɔ baanik yɔ wi gin baanik gi wɛɛ hintɔs a dɔgl yɛrɛ geha, wɛɛ an nɛ gi dibed anyɔ mi raasihi.

⁴ Ya̧a̧nɛ à Makeduniyaya zaadɛ hi ka̧m nɛ hi da hi zɛ̧n nɛ taa ook gɛ rɛ, seem yɔ ha̧a̧w a ta̧a̧kyɔ wi ta̧a̧ dɔgl nɛ gi dɔŋgo, gi dagi gis nɛɛ giiya.

⁵ Yɔ anbɔ, mi see gi an mi yaa yɛ̧ɛ̧ɗɛ wɔ hi dork a nɛ lɛlɛ hi gɛms gaas bɔ nɛ raa nɛ a nɛ gaa mɔksigɔ dɔglɔ gaati, nɛ gidi bed an nɛ gaa hinɔ an hingɛmsilya, bɔ hinɔ gi gi an hinfɛ̧ɛ̧kya.

⁶ Mɛɛn a za̧a̧nyɔ lug kaasi gi ɓɛr kaasi be, wɛɛ za̧a̧nyɔ lug gbɔɔltɔnɔ gi ɓɛr gbɔɔltɔnɔ be.

⁷ Doo yɔ gi sɛw yɛgi gaa gaas anyɔ wɔb gi kpoos du, bɔgi gi hi mimto, bɔgi gi an hi fɛ̧ɛ̧gfɛ̧, ya̧a̧nɛ Bɛt ha̧a̧g za̧a̧nyɔ gi gaak gaasɔ hi hat giya.

⁸ Wɛɛ Bɛt ɗɛɛ an gi rɔbsin hi gɛmsil yɔ gi sɛw an nɛ dag hinyɔ riin sɛw faa, nɛ wɛɛ nɛ woonik woos rɔb yɔ gi sɛw gi daarlɛlɛ,

⁹ anyɔ Bɛt ɗɛɛrwolɔ raa a gi gɛ̧ɛ̧sig ya̧a̧rya wɔ gaas ya̧a̧rtɔs. Hinrɔbwookɔ gi waak faa.

¹⁰ Bɛto, Za̧a̧nyɔ gi gaak bakbalkya dɔ̧ɔ̧t hi koko an leesɔ, gi gaan dɔ̧ɔ̧t bɔ gɔ nɛ dɔ̧ɔ̧ gi pisɔ, gi wɛɛ gi gaan rɔbnɛgɔk bɔ humlɔ gi tɔɔ gi daarlɛlɛ.

¹¹ Nɛ dag rɔɔs nɛ a hinyɔ gi gedu sɛw an nɛ gaa gaas gbɔɔltɔnɔ, hi baan Bɛto a wi dɔŋgo.

¹² Ya̧a̧nɛ woos bɔrɔ wookɔ ɗāās Bɛt doodɔ wɔ hi gi ya̧a̧rums du kpɔd gɛ, hinyɔ daarɔ, gi gɔk an hi baan Bɛt gbɔɔltɔnɔ.

¹³ À woos yɛrɛ gi zuunik gik yɔ nɛ gi hi rɔb gedu, Bɛt doodɔ wɔ a Yahuduya hi tɔɔs Bɛt nuŋgɔ anyɔ nɛ fɔb Kristu Dɔgl Rɔb bɔ nɛ ta̧a̧ge, nɛ wɛɛ nɛ gɛ̧ɛ̧ rɔbs nɛnɛ hi hiya hi dood zaadɛ sɛw hi hat gbɔɔltɔnɔ.

¹⁴ Wɛɛ gɔ hi gisin Bɛt zɔ̧ko, kol gi gihi kaŋk a nɛɛge a gɛmsil yɔ Bɛt gaanɛ gi daarlɛl gi dɔŋgo.

¹⁵ Bant gi a Bɛt ge a gaas yɔ doo ɗɛ̄ɛ̄ an gi raa hinɔ gɛ gi dɔŋgo!