2 KƆRƐŊGTU 5 - Nouveau Testament Doyayo

2 KƆRƐŊGTU 5

¹ Wɛ mɛɛ ɔnɛ a gid lukgbandilya bɔ yɔ muul wɛ gi waak gedu a hɛbtdi gi ha̧tiro, wɛ gin luk zayɔ Bɛt wɔm hi zulɔ, waaklɛl yɔ doo naan wɔŋg gɛ gi waak faa a bɛtha.

² Wɛ gi hekig a luk gbandilya bɔ gi muul wɛ gedu hɛw, giwɛ ha̧a̧k an wɛ heg raawɛ yɔ gi a bɛtha an gbandili,

³ an wɛ mid a Bɛt muutdu hi gbandil wɛ muulɛ, bɔwɛ kɔm ɔ̧lɛ.

⁴ Ya̧a̧nɛ anyɔ wɛ gi a luk gbandil yɛrɛ gi muul wɛ gedu, wɛ gi hekugo, wɛ dak zɛksil gbɔɔltɔnɔ anyɔ hā̧ā̧wɛ an wɛ kɔm ɔ̧l gɛ, ha̧a̧wɛ an wɛ heg gbandili an kuudu hinyɔ gi wɔrkili za̧a̧tig gi i̧i̧ge.

⁵ Bɛt gii gɛmsɛ a gbɔlums bɔrɔ lab gi zulɛ, wɛɛ gaawɛ Mɔkilɔ an wɛ mɛɛn bɛttɔnɔ a wɛ dak gbɔlumsɔ dagɔ.

⁶ Yɔ anbɔ, muul wi gi waak ɓaaki anyɔ wi mɛɛ a waak yɔ wɛ waak a muul yɛrɛ gedu, wɛ waak hɛmlɛ hi Waar Yeesu.

⁷ Ya̧a̧nɛ wɛ gi ɛmbik hi ɗɔbsigyɔ, wɛ ɛ̄mb hi lɔlgbɛnik gɛ.

⁸ Wi gbàà kpoos wi, ha̧a̧wi daar an wi dɔŋg muul yɛrɛ, wi rek wi waa a Waar Yeesu dɔŋgdi.

⁹ Hinɔ gii anyɔ wi waak nɛ a muul yɛrɛ gedu, zaabe an wi ɔɔg nɛ ɔɔ hɛw, wi i̧i̧k tɛŋk wi an wi bɛs Waar Yeesu.

¹⁰ Ya̧a̧nɛ gi an wɛ mid a Kristu dɔgl-gbaaklɛl bɔ gi dɔŋdi sɛw an bɔbe gi dag hinyɔ woo gi gikɔ yɔ gi a muul du dɔɔrɔɔsɔ, gi gi rɔbo, zaabe ha̧a̧lɛ.

¹¹ Anyɔ wi mɛɛ Waar Bɛt hoobha̧a̧k yɔ gɔ ha̧a̧, wi tɛk an wi ɗɛɛn dood dɔglɛ. Bɛt mɛɛ gikyɔ wi gi an woosɔyaadɛ, mi mɔk a nɛ kpoos du be, nɛ ta̧a̧ a wi gi Bɛt woosɔyaadɛ hi rɔb be.

¹² Wi taa yɛɛlik zul wi ɗɔbsig a nɛ muutdu. Wi gin gbɔnɔ gaak ɔnɛ an nɛ gɔs zul nɛ gbɔlums a wi dɔŋgo an nɛ kpɛ̧ɛ̧ dood wɔ hi gɔsig zulya̧ gbɔlums a hinyɔ gi lakha dɔŋgɔ ge ya̧a̧ya̧, dood wɔ hi mɔ̄k hinyɔ gi kpoos du dɔglɔ gii gɛ.

¹³ Ya̧a̧nɛ, an wi yooyɔ, wi gis Bɛt giya; an wi gi zul wi wa̧a̧k be, wi wa̧a̧ko a nɛ zulɛ.

¹⁴ Ya̧a̧nɛ Kristu ha̧a̧tigɔ gi giw ɓɔ̧ɔ̧k anyɔ wi mɛɛ bɛttɔnɔ a doo gbun gi wɔrɔ a dood sɛw dɔŋgo, dood sɛw hi wɔɔr ma.

¹⁵ Wi wɛɛ wi mɛɛ a Yeesu yɔ wɔr a dood sɛw dɔŋgo, wɔr an bɔ dood wɔ hi waak ɓɔryɔ hi waas zulya̧ zaa, wɔr an hi waas gii za̧a̧nyɔ wɔrɔ gi wɛɛ gi rɛml a wɔrk du a hi dɔŋgo.

¹⁶ Nɛ yɔ anbɔ, yɛrɛ wi sēē doo za anyɔ doo gɔ gi seek naaza zaa gɛ, wɛɛ gid wi see Kristu an doo yɔ gɔ hi seeko, yɛrɛ wi taag seek anbɔ lab ma.

¹⁷ Yɔ anbɔ, doo gi ɔks gbun hi Kristu, Bɛt kiŋg zaa sego. Hin amntɛ wɔ hi daa da̧a̧da̧, yɛrɛ hin sɛw hi wɛɛ sego.

¹⁸ Wɛɛ hin wɔrɔ sɛw hi fu̧u̧zig a Bɛt ge, Bɛt gii gɔ an wɛ boolɔ hi giya a Kristu ge, wɛɛ gaawɛ boolum woosɔ an wɛ dɔks doodɛ.

¹⁹ Hi Kristu giya Bɛt gi gɔ an dood hɛbtdi sɛw hi dag boolum hi giya, ɓɛ̄r hinha̧a̧lya̧ gɛ, wɛɛ gbaawi an woosɔ-yaadɛ an wi woosig dɔgl boolumya woosɛ.

²⁰ Wi gis ma Kristu tɔmsya ɔ̧ɔ̧nɛ a lɛlza, Bɛt gin elik hi ya̧a̧ winɛ, wi gin zɔ̧k a Kristu nuŋgdu: ta̧a̧n saams yɔ Bɛt gi gɔk hi nɛya!

²¹ Za̧a̧nyɔ mɛ̄ɛ̄ hinha̧a̧l gɛ, Bɛt wɛɛnig hinha̧a̧l a wɛ zulɛ an wɛ wɛɛs Bɛt dooɔ hinrɔb wookyaadɛ a ɔksig wɛ bɔ gedu hi Kristu.