2 KƆRƐŊGTU 2 - Nouveau Testament Doyayo

2 KƆRƐŊGTU 2

¹ Ya̧a̧nɛ mi mɔkhin mi kpoos du hā̧ā̧mi an mi wɛɛ a nɛɛge an mi wɛɛ mi gaanɛ mimt gɛ.

² An mi gaanɛ mimto, bɔ gi gɔ an kpoos mi gi kpɛ̧ɛ̧ ma? Ger gɛ za̧a̧nyɔ mi gaag mimt gɛ!

³ Mi da mi bi̧i̧sin ɗɛɛrwol za bɔrɔ an bɔ dood wɔ gi an hi gɔ kpoos mi gi kpɛ̧ɛ̧ hi gaam mimto. Ya̧a̧nɛ mɔkil mi ta̧a̧sim hin bɛttɔnɔ a nɛ zul ha sɛw a an mi dag hato, nɛɛ sɛw be, yɔ nɛ dag hat hi mii be.

⁴ Mi bi̧i̧sin ɗɛɛrwol bɔrɔ hi kpooszɛksigi hi kpoosɗɔ́ki hi mɛɛk gbɔɔltɔnɔ, mi bi̧i̧sin an mi gaan mimt gɛ, mi bi̧i̧sin an nɛ mɛɛ ha̧a̧kyɔ ha̧a̧m gi daarlɛl a nɛ muulɛ.

⁵ Doo za gi gɔ an mimt gi giro, gɔs mii gɛ, gɔs nɛɛ sɛw, ɔnɛ gi gi an mi raa a gɔs dood zaadɛ a nɛ teesdu an bɔmi hɛɛ mi ɔɔ rɔbo.

⁶ Za̧a̧nɔ ya̧a̧rhantɔ bɔ dag a dood kit wɔ nɛ teesdu hi naan du riigri ma.

⁷ Yɔ anbɔ gi an nɛ wɛɛ nɛ bitsig a̧a̧bɔ bɔ woo dɔglɔ, nɛ rɔɔge an bɔ kpoosɔ gi zɛksig ha̧a̧ltɔnɔ gi daarige gi ha̧s mɔkilɔ gii nɛ zaŋ.

⁸ Ya̧a̧nɛ mi gin zɔ̧ko an nɛ wɛɛ nɛ zunsig hat nɛ.

⁹ Yɔ anbɔ ro mi da mi bi̧i̧sinɛ an mi mɛɛ rɔb nɛ an mi goonɛ gid nɛ gi fɔk hinyɔ mi da mi dɔgsin sɛw.

¹⁰ Za̧a̧nyɔ nɛ gisig hin-a̧a̧b dɔglɔ bisig sɛw, mii mi gis za̧a̧nɔ bisig be. Ya̧a̧nɛ, mii hin-a̧a̧b dɔglyɔ mi bisɔ, gid mi bis hinɔ, mi bis a nɛ dɔŋgo a Kristu lɔlgbarɔ,

¹¹ an bɔmi ɔɔ Saydanu gi ɗɛɛwɛ anyɔ kɛ̧ɛ̧tigɔ wagɛ gɛ.

¹² Yɔ mi tuur a Torawas an mi dɔks dood Kristu Dɔglɔ Rɔbo, Waar Yeesu gborsim gbɔnɔ mi.

¹³ Hɔnɛyɔ mi zɛm yɛ̧ɛ̧ mi Bɛtwoosya bɔ Titus gɛ, mi waar ihi ma ɔnɛ mi rek a Makeduniya.

¹⁴ Yɛrɛ bant gi a Bɛt ge anyɔ giwɛ tɛŋk gaako a Kristu tɛŋk du wɛ ɗɛɛkɗɛɛti, gi wɛɛ gi gi woonik hi wɛya an hinmɛɛkɔ gi guy a lɛl sɛw an kurum ki̧i̧lhɛmntya.

¹⁵ Wɛ gi an kurum ki̧i̧lhɛmntya yɔ Kristu gaa Bɛt giya. Wɛ gis dood wɔ hi za̧a̧ko hi wɔ hi wako.

¹⁶ Wɛ gis wɔ hi wak Bɛt gbɔnɔ an wɔrk-ki̧i̧l yɔ gi gaak wɔrko. Wɛ wɛɛ wɛ gis wɔ hi gi za̧a̧tig gbɔnɔ du za̧a̧tig ki̧i̧lhɛmntya yɔ gi gaak za̧a̧tig gii be. A hin wɔrɔ gedu sɛw, bɔ rii an gi woos Bɛt hinɛ?

¹⁷ Nɛ winɛ wi taa an dood hingokya a̧a̧bɛ kit wɔ hi woosig zulya̧ woos hi Bɛt dɔglɔ a rɔɔs dɔŋgo. Bɛt gii gaaw woos naan du wi wooko hi kpoos wi rɔbo, wi wɛɛ wi book hin a Bɛt muutdu anyɔ rii a ɔksig wi bɔ gedu hi Kristu.