2 KƆRƐŊGTU 13 - Nouveau Testament Doyayo

2 KƆRƐŊGTU 13

¹ Mi zaak dɔɔ taasim gɛrɛ a nɛ lɛlɛ. Anyɔ Bɛt ɗɛɛrwolɔ raa: a segyaadɛ eerɛ zaabe taarɛ ya̧a̧ya̧ gi ɔks ket a dɔgl yɔ gi hage sɛw, ɓɔr hi ɔɔ dɔglɔ ta̧a̧ko.

² Yɔ mi da mi gihɔ dɔɔ eesimɛ mi da mi raasinraasɔ, wɛɛ anyɔ mi taa hɔ nɛɛk gɛ, mi wɛɛ mi raasig dood wɔ hi gɔ nɛ hinha̧a̧l amntɔnɔ hi dood zaadɛ wɔ hi dork nɛ gɛrɛ a gid mi wɛɛ a nɛɛge, mi taasihi ya̧a̧rmɛɛko,

³ anyɔ ha̧a̧nɛ an mi zunsin nɛ mɛɛ a Kristu gi bookya̧a̧ a mi kpoos du. Gii yɔ taa Doo hɔntil a nɛ gbaŋg gɛ, gi Doo tɛŋkya a nɛ tees du.

⁴ Yɔ hi doog a dɔ̧ɔ̧r ha gi wɔr a gi hɔntil dɔŋgo, yɛrɛ wɛɛ gi za̧a̧k hi Bɛt tɛŋk ɔ̧ɔ̧nɛ. Wii hɛw wi gi hɔntili a ɔksig wi bɔ gedu hi giya, wɛɛ, a nɛ gbaŋg be a hinyɔ gɔ wi woosin gedu, wi za̧a̧ hi giya a Bɛt tɛŋk du.

⁵ Nɛya seen zul nɛ an nɛ mɛɛ a gid nɛ waak a ɗɔbsig du. Mɔkin zul nɛ. Nɛ mɛ̄ɛ̄ a Yeesu Kristu gi waak a nɛ kpoos du gɛ ya? Gi taa a nɛ nɛ taa Yeesu fɔkya hi rɔb gɛ gii gɛ!

⁶ Yɛrɛ mi mɔk a nɛ mɛɛ a wiya, wi taa Yeesu fɔkya ya̧a̧gɔ̧ɔ̧n-yaadɛ.

⁷ Yɛrɛyɔ, wi zɔ̧k Bɛt an bɔnɛ gɔ hin-a̧a̧bi, wi rāā a an hi ta̧a̧w du. Yɔ anbɔ ha̧a̧wi an nɛ woo hinyɔ bɛr giya, wɛɛ wii be an wi kɔm nɛ an ya̧a̧gɔ̧ɔ̧nyaadɛ hɛw hinza gɛ.

⁸ Ya̧a̧nɛ wí ɗɛɛ̄ an wi woo hinza wi ɓaas zul wi a Bɛt rɔbɔ gbaŋg gɛ. Gɛ wi woosig Bɛt rɔbɔ woosɛ.

⁹ Yɔ anbɔ, hatwidak gɛ gɔ wi gi hɔntili, wɛɛ nɛɛ be nɛ gi tɛŋkyaadɛ. Hinyɔ wi ɛrk a Bɛtzɔ̧k wi bɔ gedu, wi gisin zɔ̧k an Bɛt gi gɛmsin gi da̧a̧.

¹⁰ Mi hin yɛrɛ bı̧́ı̧́k anyɔ mi taa a nɛ teesdu gɛ, an gɔ mi zaa a nɛɛge, bɔmi ha̧a̧nin ya̧a̧r hi tɛŋk yɔ Waar Yeesu gaami an mi tɔɔsinɛ a ɗɔbsig du, wɛɛ gāam an mi ha̧tirnɛha̧tir gɛ.

¹¹ Hinyɔ zɛ̧ɛ̧rɔ, yɛ̧ɛ̧dɛ wɛ, kpoos nɛ kpɛ̧ɛ̧ge, gɛmsin hinyɔ rii nɛ teesdu gɛ, gaatinnɛ tɛŋko, mɔkin ɔksig gbunu, boolin rɔbtɔnɔ, wɛɛ gɔ gi anbɔ, Bɛt yɔ gi gaak ha̧a̧tigi hi boolumi gigi hi nɛya.

¹² Bootinnɛ hi yɛ̧ɛ̧dums hato; Bɛt ɗoodɔ wɔ sɛw hi boon du.

¹³ An Waar Yeesu Kristu gɛmsilɔ hi Bɛt ha̧a̧tigɔ, hi Bɛt Mɔkilɔ ɔksigɔ hi gi hi nɛɛ sɛw! Aanbɔ!