2 KƆRƐŊGTU 11 - Nouveau Testament Doyayo

2 KƆRƐŊGTU 11

¹ Eh! nɛ a mi gbaŋgi, gid nɛ ɗɛɛ an nɛ mɔm yooya̧a̧ mi kaasi, nɛ mɔmɔ!

² Ya̧a̧nɛ mi gin kublingo hi Bɛt kublɔ anyɔ mi ɔksin gbaagi hi wal gbunu, raakɔ a Kristu, an mi tuurinnɛ a gi muutdu nɛ gi an waasiŋg yɔ gi doo gaati yɔ mɛ̄ɛ̄ walya̧a̧ gɛ.

³ Ya̧a̧nɛ anyɔ beks bɔ maat Hawwa hi kɛ̧ɛ̧tigɔ, hoobha̧a̧m an bɔ hi wagsin gbɔnɔ mɔkil nɛ gi zɛmrɔ nɛ ɔɔ Kristu fɔkɔ hi kpoos rɔb gaati.

⁴ Ya̧a̧nɛ doo za gi zaa gi dɔgsin Yeesu za dɔɔm dɔglɔ gi taa za̧a̧nyɔ wi dɔgsin nɛ dɔglɔ gii gɛ, zaabe gid nɛ dag mɔkil za dɔ̧ɔ̧mi gi taa yɔ nɛ yɛɛl nɛ nɛ dagig gii gɛ, zaabe nɛ dag dɔgl za dɔɔm yɔ riitin hi Dɔgl Rɔb bɔ wi dɔgsin nɛ ta̧a̧ nɛ gii gɛ, nɛ nɛ mɔŋk hin wɔrɔ sɛw mɔm ma bɛttɔnɔ mi?

⁵ Mii mi mɔ̄kɔ̄ a mi wɛ̄ɛ̄ wans mi dāār dood gbɔlɛ tɔmsya wɔrɔ a hinza yɔ gi gedu gɛ.

⁶ An mi ɗɛ̄ɛ̄ ya̧a̧book bɛttɔnɔ gɛ si̧, mi gin hinmɛɛk ɔnɛ, mi zunsinge hi gbɔnɔ sɛw a hinyɔ gi gedu sɛw.

⁷ Nɛ rɛ, mi gɔ hinha̧a̧lɛ anyɔ mii hi zul mi mi tiis zul mi an hi pɛɛ nɛɛ a wɛɛha ya? Mi dɔgsin Dɔglɔ Rɔb bɔ yɔ fu̧u̧z a Bɛt ge ya̧a̧rtɔs be.

⁸ Yɔ anbɔ, mi zeb tus yɔ Yeesu fɔkya wɔ a lɛl zaadɛ hi gaami, mi wɔɔl tus ya̧nɛ an mi da mi woos nɛɛ woosɛ.

⁹ Wɛɛ yɔ mi da mi gi nɛ lɛlɛ, hinza gɔ ha̧a̧mi, mi rēk mi zɛks doo za a nɛ teesdu gɛ. Ya̧a̧nɛ yɛ̧ɛ̧dɛ Yeesu fɔkya wɔ hi fu̧u̧z a Makeduniya hii gɔ zaa hi kamsim hinyɔ gim nɛ lɔɔko. Mi ka̧a̧ naan mi hɔ̧d an bɔmi zɔ̧n hinyɔ gi sɛw mi ɗɔnɛ an hinɗɔmnɛ, mí wɛɛ mí waa naan mi ka̧a̧ko.

¹⁰ Hi Kristu rɔbɔ yɔ gi mi kpoos du giya, mi dɔk a doo za taa an gi ha̧s gbɔlums mi yɛrɛ a Akaya hɛbtdu.

¹¹ A nɔ dɔŋgo? - Yɔ ha̧a̧m nɛ muul gɛ gii ya? - Bɛt ɔnɛ mɛɛ a ha̧a̧mha̧ a nɛ muulɛ!

¹² Hinyɔ mi wooko, mí waa hinɔ gii wook an mi dɛ̧ɛ̧r dɔglkitya wɔ hi book hin gbɔlɛ, wɛɛ gi ha̧a̧hi an hi zuunin dɔglya̧ kit bɔ a woos yɔ hi wook geha, hi tuur dood gbɔlɛ hi riitin an wii her.

¹³ Dood wɔrɔ lab hi gi tɔmsya ya̧a̧gɔ̧ɔ̧nyaa-dɛyɔ, hi gi Bɛtwoosya doo maatigyaadɛ, hi wɛɛnik muulya̧ an Kristu tɔmsyaadɛyɔ.

¹⁴ Hin bɔ lab taa hin gɛrsya anyɔ Saydanu hi zulɔ gɔ wɛɛn muulɔ an Bɛtwalsɛr lɛlgaalya.

¹⁵ Nɛ yɔ anbɔ, woosɔya wɔ hi wɛɛnik muulya̧ an hi gi rɔbgɔk woosyaadɛ, gi an hinɔ gi kɔmsin gɛrs ri ma nɔ? Ɔ̧tya̧ gɔ gi da̧a̧ko hi gbaasihi dɔgl an woosya̧ bɔ be.

¹⁶ Mi wɛɛ mi dɔgɔ a bɔ doo gi seemi an mi yooyɔ, wɛɛ, nɛ́ gim seek an mi yoo si̧, zenmi an yoo, an mii hɛw mi ɗɔbs muul mi kaasi.

¹⁷ Hinyɔ mi raako, mi raa hi gbɔnɔ yɔ gɔ mi ɓaas muul mi an mi ɗɔbsin zul mi kaasi, mi rāā anyɔ ha̧a̧ Waar Yeesu gii gɛ, mi raak hinɔ an yoo dɔglɛ.

¹⁸ Yɔ dood kittɔnɔ hi ɗɔbsig zulya̧ an doo waaldu, mi ɗɔbs zul mi ɗɔbs anbɔ hɛw.

¹⁹ Ya̧a̧nɛ, nɛɛ wɔ nɛ mɛɛhin kpoos du, nɛ gis yoo wɔ mɔŋk bɛttɔnɔ.

²⁰ Doo za gi wɛɛnin gbaari, zaabe gi lenɛ, zaabe gi wɔɔl wɔd nɛ, zaabe gi pɛɛ zulɔ, zaabe gi dɛnɛ a muutdu, nɛ gisig mɔŋko.

²¹ Minɛ seemha̧a̧mha̧ dɔko a: an gɔ wi woosin anbɔ be, muul wi hɔniwhɔnɔ! Yɛrɛ ma yà, hinyɔ doo za gi mɔkig an gi ɗɔbsin zulɔ sɛw, mi book minɛ an yoo, mii hɛw mi mɔɔkɔ.

²² Hi gi Ibraniŋko-yaadɛ ya? Mii hɛw mi gi Ibraniŋkoyayɔ! Hi gi Israhilayaadɛ ya? Mii hɛw mi gi Israhilayayɔ! Hi gi Abraham waatya̧? Mii hɛw mi gi Abraham waayɔ!

²³ Hi gi Kristu woosyaadɛ ɔ̧ɔ̧n ya? - Mi gi bookya̧a̧ an yoo ha̧a̧lɛ, - mii gi Kristu woosɔya gi daarlɛl ɓɛ: an woosɛ, mii daarlɛlɛ; an luknɔ gulkyɔ, mii daarlɛlɛ; an lɛkyɔ, ɓɛrkya gɛ; an wɔrkyɔ, mi sɛ̧ɛ̧b wɔrk dɔɔ kittɔnɔ.

²⁴ Gbaŋ nɔɔnɛ Yahuduya wɔ hi lɛmi, kpoot dumbili nasɔ, gbun taaro.

²⁵ Romaya wɔ hi lɛmi hi sɔɔl gbaŋ taarɛ, Yahuduya wɔ hi dutinmi beto an hi gbɔ̧mi gbaŋ gbunu. Gbaŋ taarɛ lɛmbnɔɔ bɔ gi ha̧tiro mi mat a mɛmbal gbɔɔl du; ɔ̧t mi gbunu hi yɛ̧ms mi gbunu mi kɔm a mɛm du.

²⁶ A rɔ̀bs mi wɔ gɔ mi waak rek gedu, mi gi hi wɔrko a zɛɛ wɔ hi du, mi gi hi wɔrko a luurɛ ha̧a̧l naan du, mi gi hi wɔrko a dood mi Yahuduya wɔ hi naan du, mi gi hi wɔrko a dood wɔ hi taa Yahuduya gɛ hi naan du, mi gi hi wɔrko a waal gbɔɔl du, mi gi hi wɔrko a hɛtdɔŋ du, mi gi hi wɔrko a mɛmbal gbɔlɛ wɔ hi du, mi gi hi wɔrko a yɛ̧ɛ̧dɛ ya̧a̧gɔ̧ɔ̧nya wɔ hi teesdu.

²⁷ Mi da mi gi a woos mɔɔtya du hi a ya̧a̧rhant du. Lɛlgaamlɔl dɔɔ kittɔnɔ, a̧a̧kilha̧a̧mi, mɛm kpɔgrimi, dɔɔ kittɔnɔ mí lehin gɛ, mi ha̧a̧ya̧a̧r a saŋks du, mi taan gbandili.

²⁸ Wɛɛ, a hin zaadɛ wɔrɔ gedu be, woos yɔ mi gin an mi oo Yeesu fɔkya wɔ a lɛlyɔ hi gi ge sɛw gim ɓɔ̧ɔ̧k ɔ̧t nuŋgo.

²⁹ Doo za muulɔ gi hɔnɔ, mii hɛw, muul mi hɔɔnɔ. Hi mat doo za mat a hinha̧a̧l du ya? Mii hɛw kpoos mi dɔ̧ɔ̧dɔ̧ an laa!

³⁰ Gid gi an mi ɗɔbs zul mi, mí ɗɔ̀bs a hinwɔ hi zuunik hɔntil mi hi dɔŋgo!

³¹ Bɛt yɔ gi Waar wɛ Yeesu Baatɔ yɔ gin rɔbs faa, mɛɛ a mi taa ya̧a̧gɔ̧ɔ̧ko!

³² A Dimaska du, doo gbɔɔl hɛbt-ookya bɔ gis Waar gbɔɔl bɔ Aretas wooswooko, gbaa dood Dimaskayaadɛ an hi oo waal gbɔɔl bɔhi wa̧a̧mi.

³³ Yɔ anbɔ yɛ̧ɛ̧ wɛ Yeesu fɔkya wɔ hi tuusim a luktuutir du a dɛl gbɔɔl du a waalgbɔɔl wɔmnt kuu gid mi wir a gi naan du.