1 YOHANA 2 - Nouveau Testament Doyayo

1 YOHANA 2

¹ Waat mi hatil wɛ, mi gisin hin yɛrɛ bi̧i̧k an bɔnɛ woo hinha̧a̧lɛ. Yɛrɛ za̧a̧n za gi woo hinha̧a̧l be, wɛ gin zeesya wɛ Yeesu Kristu doo riit bɔ a Baa wɛ Bɛt dɔŋdi.

² Gii hi zulɔ wɔrɔ an gi wɛɛ hinha̧a̧l wɛ naandɛmsɛ a Bɛt ge, taa naandɛms wɛnɛ kpɔdi, yɛrɛ gi dood wɔ waal du sɛw hinha̧a̧lya̧ naandɛmsɛ.

³ Gid wɛ wa̧a̧k Bɛt dɔglɔ wɛ kpoos du, anbɔ, wɛ mɛɛ a wɛ mɛɛ Bɛto.

⁴ Za̧a̧nyɔ raa a be mɛɛ Bɛto gi wɛɛ gi wā̧ā̧ dɔglɔ wɔ raa gɛ, gi ya̧a̧gɔ̧ɔ̧nyayɔ, rɔb taa gi kpoos du.

⁵ Yɛrɛ za̧a̧nyɔ wa̧a̧ ɗɔglɔ, ɛmbilɔ zuun a Bɛt hatɔ tɔɔ da̧a̧da̧ hi giya. Hinyɔ gɔ wɛ mɛɛn a wɛ ɔɔksɔ hi Bɛt gɛrɛ:

⁶ za̧a̧nyɔ raa a be waak ɔksig gbun hi Bɛto, gi an gi waa an Yeesu yɔ waa be.

⁷ Saam mi rɔbɛ wɛ, dɔgl yɔ mi gisin bi̧i̧kyɔ taa dɔgl sego, gi dɔgl lɔ̀ɔyɔ, hi raasin hinɔ a biitirnaandu hɛw. Dɔgl lɔ̀ɔ̀ bɔrɔ gi dɔgl yɔ nɛ kɛm nɛ giya.

⁸ Yɛrɛ dɔgl yɔ mi gisin bi̧i̧kyɔ gi dɔgl seg hɛw. Yeesu ɛmbilɔ zuun a dɔgl bɔ gi rɔbo, wɛɛ ɛmbil nɛ gig zuunik hɛw. Yɔ anbɔ, lɛlwil gi wako, wɛɛ lɛlgaal rɔb bɔ yɛɛl gaakɔ da̧a̧da̧ ma.

⁹ Za̧a̧nyɔ raa a be waak lɛlgaal du, gi wɛɛ gi hɛ̧ɛ̧nik yɛ̧ɛ̧za Yeesu fɔkya lɔlɛ, gis a lɛlwil du tɛ̧.

¹⁰ Za̧a̧nyɔ ha̧a̧ge a yɛ̧ɛ̧za muulɛ, gi waak a lɛlgaal du. Hinza yɔ gɔ mat doo a hinha̧a̧l du taa a ge.

¹¹ Za̧a̧nyɔ gi hɛ̧ɛ̧nik yɛ̧ɛ̧za lɔlɛ gis a lɛlwil du. Gi ɛmbik a lɛlwil du hɛw. Yɔ lɛlwil bɔ wɛɛnig yɔ̧ɔ̧r be, mɛ̄ɛ̄ lɛlyɔ gi rek du gɛ.

¹² Waat mi hatil wɛ, mi gisin hin wɛrɛ bi̧i̧k anyɔ Bɛt bis hinha̧a̧l nɛ a Yeesu dɔŋgo.

¹³ Baa mi wɛ, mi gisin hin wɛrɛ bi̧i̧k anyɔ nɛ mɛɛ Bɛt yɔ gi nɛ doosɛ, yɛɛl a biitirnaandu. Walɛsɛrɛ dɛ, mi gisin bi̧i̧k hin wɛrɛ, anyɔ nɛ ɗɛɛ Saydanu yɔ gi doo bɔbtini.

¹⁴ Ya̧a̧mwaat wɛ, mi bi̧i̧sin hin wɛrɛ anyɔ nɛ mɛɛ Baa wɛ Bɛto. Baa mi wɛ, mi bi̧i̧sin hin wɛrɛ anyɔ nɛ mɛɛ Za̧a̧nyɔ gi nɛ doosɛ, yɛɛl a biitir-naandu. Walɛsɛrɛ dɛ, mi bi̧i̧sin hin wɛrɛ anyɔ nɛ gi tɛŋk-yaadɛ, Bɛt dɔglɔ gi waak a nɛ kpoos du, nɛ wɛɛ nɛ ɗɛɛ Saydanu yɔ gi doo bɔbtini.

¹⁵ Bɔnɛ gbaa kpoos nɛ a waal du, bɔgi ha̧a̧nɛ hinwɔ hi gi a waal du. Za̧a̧nyɔ ha̧a̧g waalɛ, hā̧a̧g Baa wɛ Bɛt gɛ.

¹⁶ Yɔ anbɔ, hinwɔ hi gi waal du sɛw, hinyɔ kpoos gi ɗɔkingo, hinyɔ lɔl gi ɗɔkingo, hi rɔɔs yɔ gi wɛɛnik dood an hi pɛɛ zulɛ, hin wɔrɔ sɛw hi fu̧u̧ a Baa wɛ Bɛt ge gɛ, hi fu̧u̧ a waal du.

¹⁷ Waal gi da̧a̧ko hi ɗɔkumɔ sɛw. Yɛrɛ za̧a̧nyɔ woo hinyɔ Bɛt ha̧a̧ge gi waak faa.

¹⁸ Ya̧a̧mwaat wɛ, wag kaasi waal gi da̧a̧! Nɛ kɛm a waal gɔ gi da̧a̧ko, Yeesu Kristu lɔlhɛ̧ɛ̧nikya bɔ gi zaako. Yɛrɛ ɓɔryɔ, dood wɔ hi hɛ̧ɛ̧nik Kristu lɔl hi tuur ma, hi gis kittɔnɔ. Yɔ anbɔ wɛ mɛɛmɛ a waal sɛ̧ɛ̧b da̧a̧kyɔ.

¹⁹ Dood wɔrɔ hi tuu a wɛ tees du; yɔ hi taa wɛnɛ gɛ gii hi tùùwɛ. À hi ginɛ wɛnɛ, yɔ hi kɔmb nɛ hi wɛya. Yɛrɛ tuukya̧ bɔ zunsɛ a hi taa dood wɛnɛ hi sɛw.

²⁰ Nɛnɛ nɛ dag Bɛt Mɔkil dagɔ a Doo Gaat bɔ gi naan du, nɛ sɛw nɛ mɛks hin mɛks ma.

²¹ Anyɔ nɛ mɛɛ rɔb gii mi bi̧i̧sin hin wɛrɛ, taa anyɔ nɛ mɛɛ gɛ, lab gɛ. Nɛ wɛɛ nɛ mɛ̄ɛ̄ a ya̧a̧gɔ̧ɔ̧n gɔ tuu a rɔb du gɛ.

²² Nɛ bɔ gi ya̧a̧gɔ̧ɔ̧nya? Gɛ za̧a̧nyɔ faa a Yeesu taa Kristu. Za̧a̧nyɔ gi hɛ̧ɛ̧nik Kristu lɔl gii faa Baa wɛ Bɛt hi waaɔ.

²³ Za̧a̧nyɔ faa waa bɔ, taan Baa wɛ Bɛto; za̧a̧nyɔ raahi n gaattɔnɔ a dood muutdu a be ɗɔbsig waawal bɔ be, gin Baa wɛ Bɛt hɛw.

²⁴ Nɛnɛ ɔnɛ, ɔɔn hinyɔ nɛ kɛm a biitirnaandu gi waa nɛ kpoos du. Gid hinyɔ nɛ kɛm a biitirnaandu gi waak nɛ kpoos du, nɛɛ hɛw nɛ́ waa ɔksig gbun hi waawal bɔ hi Baa wɛ Bɛt du.

²⁵ Wɛɛ gaas yɔ raa a bé gaawɛ: gɛ za̧a̧tig faa bɔ.

²⁶ Mi bi̧i̧sin hin wɛrɛ a dood wɔ ha̧a̧hi an hi wagsin gbɔnɔ hi zulɛ.

²⁷ Yɛrɛ nɛya, Kristu gaan Mɔkilɔ gi waak nɛ kpoos du. Anyɔ Mɔkilɔ gi waak nɛ kpoos du hā̧ā̧n an doo za gi goksin hin ma gɛ. Mɔkilɔ gisin hingok a nɔ hinɔ ha sɛw, wɛɛ hinyɔ gi goko gi rɔbo, ya̧a̧gɔ̧ɔ̧n taa du. Waan ɔksig gbun hi Yeesu Kristu, anyɔ gogsinɛ.

²⁸ Hɔɔ! Waat mi hatil wɛ, waan ɔksig gbun hi Yeesu Kristu, an ɔ̧tyɔ gɔ gi midza gedu wɛ dag kpoos saŋtimi, an bɔ seem gi wa̧a̧wɛ wɛ yaat a zaakɔ bɔ ɔ̧tɔge.

²⁹ Nɛ mɛɛ a Kristu gi doo riityɔ, gi an nɛ mɛɛ hɛw a za̧a̧nyɔ woo hinyɔ rii mɔɔy a Bɛt ge gi Bɛt waayɔ.