1 TIMƆTE 4 - Nouveau Testament Doyayo

1 TIMƆTE 4

¹ Bɛt Mɔkilɔ dɔg gaattɔnɔ a ɔ̧t yɔ̧ɔ̧sum bɔ gedu dood zaadɛ hi ɔɔ Bɛt ɗɔbsigɔ, hi fɔb mɔkil ya̧a̧gɔ̧ɔ̧nya wɔ hi loorɛha̧a̧l wɔ hingokya̧ wɔ.

² Dood ya̧a̧gɔ̧ɔ̧nya wɔ kpoosya̧ wɔr an tuswaa sa̧a̧ti gbaay nɛ hage gi dɔ̧ɔ̧sige, hí wɛɛn zulya̧ an Yeesu fɔkyaadɛ rɔbɛ, hí maatig doodɛ.

³ Hi a̧a̧nik a bɔ dood hi loo nisɛ, wɛɛ bɔhi lehin zaadɛ sɔmsɔm. Nɛ Bɛt kim lees wɔrɔ sɛw an ɗɔbsigɔya wɔ hi mɛks rɔbo hi loo hi gig baanik nɔɔha ma mi!

⁴ Hinyɔ Bɛt kim sɛw gi rɔbo, gid hi dag hi Bɛt baaniki; hinza ha̧a̧l taa an hi bisige.

⁵ Bɛt dɔglɔ hi Bɛt zɔ̧ki hi gi gaasig hin sɛw a Bɛt muutdu.

⁶ Mɔ gis yɛ̧ɛ̧dɛ Yeesu fɔkya wɔ hin wɔrɔ goko, mɔ wɛɛ Yeesu Kristu woosɔya rɔbo, mɔ wɛɛ mɔ za̧a̧n Bɛtɗɔbsigdɔgl wɔ hi hingok rɔb dɔgl wɔ mɔ fɔb rɔbtɔnɔ.

⁷ Yɛrɛ inim bid tɔs wɔ hi hin dɔɔm wɔ hi rı̄ı̄tin hi Bɛt gbɔnɔ gɛ. Gokinmɔ zul mɔ hin an mɔ ɗɛɛ Bɛt fɔk rɔbtɔnɔ hi gbɔnɔ.

⁸ Muuldaŋnik gɔ gi ɗaak kaasi, Bɛtfɔk hi gbɔnɔ be, gɔ gi ɗaak hin sɛw; yɔ anbɔ, gisɛ hin rɔbɛ wɔ Bɛt raa a be gaawɛ kamzig a za̧a̧tig yɔ gi ɓɔri gedu hi a za̧a̧tig yɔ gi zaak kuudu gedu sɛw.

⁹ Dɔglɔ gii gi dɔ́gl rɔb yɔ rii an doo yɔ gi sɛw gi ta̧a̧.

¹⁰ Ya̧a̧nɛ wɛ waak wooko, wɛ kɛɛk hi mɔɔt gbɔɔltɔnɔ, anyɔ wɛ gbaa kpoos wɛ a wɛ́ dag za̧a̧tig a Bɛt za̧a̧til bɔ ge. Gii gi dood za̧a̧sig sɛw, rɔbɔ dood wɔ hi ɗɔbsig Kristu.

¹¹ Raasum ɗɔbsigya wɔ hin wɛrɛ, goksimɔhi.

¹² Bɔ doo za gi ɗa̧a̧m dɔɔ du a mɔ gi walsɛrɔ. Wɛɛsum Bɛtɗɔbsigya wɔ sɛw gbɔnɔdorkya a ya̧a̧boon du hi ɛmbil du, hi hat du, a ɗɔbsig du hi kpoos gaat du.

¹³ Woom woos mɔ, zaŋgum Bɛt ɗɛɛrwol a dood teesdu, dɔgum Bɛtdɔglɔ, gogum hinɛ, gi tuur an mi zaa.

¹⁴ Yɔ ɗɛntɛ Bɛtwoos kaŋkigya wɔ hi gbaa naan mɔ zulha, Bɛtya̧a̧kɛŋkya hi boo dɔgl mɔ zulha Bɛt gaanum gaasɛ. Gaas bɔ mɔ ginɔ, woonim hinɛ, bɔmɔ ɔɔ ditɔs.

¹⁵ Woom woos wɛrɛ rɔbtɔnɔ, gaam zul mɔ gedu sɛw an dood sɛw hi gbɛn rek mɔ doosɛ doosɛ.

¹⁶ Oom zul mɔ rɔbtɔnɔ hi ɛmbil mɔ hi a hinyɔ mɔ goksig dood gedu. Gbaam kpoos mɔ gbunu a hin wɔrɔ gedu sɛw. Ya̧a̧nɛ, mɔ wook anbɔ, mɔ za̧a̧s zul mɔ hi dood wɔ hi gisum dɔgl mɔ kɛŋk sɛw.