1 PIYƐR 5 - Nouveau Testament Doyayo

1 PIYƐR 5

¹ Mi ɓaasig ɗɛntɛ Bɛtwooskaŋkigya wɔ a nɛ teesdu muulɛ. Mii yɔ mi gi ɗɛnt Bɛtwooszulya an nɛɛ be, mi gbɛn Kristu ya̧a̧rhantɔ bɔ yɔ̧, mí wɛɛ mí dag gbɔlums yɔ gɔ gi mida minɛ be.

² Oon tam wɔ Bɛt gaan naan du an nɛ kaŋkihi; oonɛhi hi kpoos nɛ sɛw an hinyɔ Bɛt ha̧a̧ge, hi taan fɛ̧ɛ̧ko. Oonɛhi hi hato, taa hi rɔɔsɗɔkum ha̧a̧l a kpoos du.

³ Bɔnɛ wɛɛ waar ɛ a dood wɔ Bɛt gaanɛ hi zulha. Lab gɛ, yɛrɛ wɛɛsin tam wɔ gbɔnɔdorkya rɔbɛ.

⁴ Gɔ gi anbɔ, Nɛɛra Gbɔɔl bɔ gɔ gi midza, nɛ dag waar umskal gbɔɔl yɔ gɔ haŋs gɛ an dɔɔrɔɔs nɛ.

⁵ Gbunɔ, nɛɛ walɛsɛrɛ wɛ, tiisin zul nɛ a ɗɛntɛ wɔ hi dɔŋdi. Nɛɛ sɛw wɛɛtinnɛ zulhɔnikyaadɛ. Hi bi̧i̧ a Bɛt ɗɛɛrwol du a Bɛt gɔ kpɛ̧ɛ̧ zulpɛɛkya wɔ gbɔnɔya̧, Bɛt gɔ ɓaas zulɔ a zulpɛɛkya wɔ hi gbaŋgi, wɛɛ gi zultiisigya wɔ rɔbtig gaako.

⁶ Yɔ anbɔ, tiisin zul nɛ a Bɛt Tɛŋkya bɔ gi dɔŋdi, an ɔ̧tyɔ Bɛt gɔ gi ha̧a̧ge gi wɛɛnin gbɔlɛ.

⁷ Bɔnɛ mɔk hinza, gaan mɔkil nɛ sɛw a Bɛt ge, anyɔ gin ooko, gi gin kaŋkugo.

⁸ Kɔmbin lɔlɛ, oonɛ. Loorɛha̧a̧lɛ, lɔlhɛ̧ɛ̧niknɛya bɔ gi gbɛ̧ɛ̧kig lɛl sɛw gi tɛk dood an naamnɔɔ yɔ gi tɛk nambo an gi tɔbrige gi hirk nɔɔha.

⁹ Yansinɛg gbɔnɔ hi ɗɔbsil nɛ yɔ er bɛttɔnɔ a nɛ kpoos du hi tɛŋko. Nɛ mɛɛ a yɛ̧ɛ̧dɛ Yeesu fɔkya wɔ waal du sɛw hi yɔ̧k ya̧a̧rhant gbun bɔ gii an nɛya.

¹⁰ Yɛrɛ gɔ nɛ yɔ̧ya̧a̧r gi am kaasi, Bɛt hi zulɔ, gi gɛmsinɛ, gi esinɛ, gi gaan tɛŋko, an nɛ er bɛttɔnɔ an hɛɛlkpari a zɛɛ du. Bɛt yɔ gi waasig dood sɛw rɔbtig gɔk hi gbɔnɔ sɔmsɔm, elin an nɛ ɔks hi gii a gbɔlumsɔ yɔ gi faa gedu a Kristu naan du.

¹¹ Tɛŋk gi ge faa. Aanbɔ!

¹² Mii Piyɛr , Silas yɔ mi ta̧a̧ge an yɛ̧ɛ̧ mi rɔb Yeesu fɔkya gii ɗaasum ɗɛɛrwolwaa yɛrɛ bi̧i̧ko. Ha̧a̧m an mi ɓatsin muulɛ mi dɔgsin hin bɛttɔnɔ: a hinyɔ nɛ zaŋgik yɔ gi Bɛt gɛmsilɔ rɔb dɔglɛ. Waan hi kpoos nɛ sɛw a Bɛt gɛmsilɔ bɔ gedu.

¹³ Yeesu fɔkya wɔ hi gi a Baabila, dood wɔ Bɛt sɛ̧ɛ̧hi an nɛya hi boon du hi waa mi Markus hɛw.

¹⁴ Bootinnɛ hi yɛ̧ɛ̧dums hato. Wɔ nɛ gi Kristu doodɔ, an boolum gigi hi nɛɛ sɛw. Aanbɔ!