1 PIYƐR 4 - Nouveau Testament Doyayo1 PIYƐR 4 1 Anyɔ Kristu yɔ̧ ya̧a̧rhant hi muulɔ, mɔkin an nɛ woo hin gbun bɔ gii sɛw: nɛ yɔ̧ ya̧a̧rhant an giya. Mɔkil bɔ lab gi gaan tɛŋko. Za̧a̧nyɔ yɔ̧ ya̧a̧rhant a muul du, ɔɔ hinha̧a̧l da̧a̧da̧ be. 2 Yɔ yɛɛl ɓɔryɔ gi tuur a ɔ̧t nɛ wɔ hi zɛ̧rsin waal du gedu, waan gedu anyɔ Bɛt ha̧a̧ge, bɔnɛ waa anyɔ ɗɔkum nɛ ha̧a̧l wɔ ha̧a̧hi. 3 Àmntɔnɔ nɛ fɔk nɛ dood wɔ hi mɛɛ Bɛt gɛ waabil ya̧a̧nɛ nɛ wook nɛ hinha̧a̧l yɔ daarlɛl yɛltɔnɔ, nɛ gaak nɛ muul nɛ an nɛ fɔb ɗɔkum wɔ nɛ kpoos du, nɛ wɔnik nɛ bumɛ, nɛ nak nɛ hin yɛmsbed, nɛ yɔ̧tingo nɛ bum lɛl gāanɛ, nɛ wɛɛ nɛ ɗɔbsig maak ha̧a̧l wɔ hi gi hintɔs. Hin wɔrɔ lab sɛw, nɛ woo riiri ma. 4 Yɛrɛ yɔ hi gbɛn a nɛ taa ɔksig hi hii an nɛ gaa zul nɛ a hinya̧ ha̧a̧l yɔ daarlɛl yɛ̧ltɔnɔ gedu gɛ, kɔmsihi gɛrsɛ, hi wɛɛ hi gin niiko. 5 Yɛrɛ ɔ̧tyɔ Bɛt gɔ gi gbaas dood za̧a̧til wɔ hi wɔrkɛ wɔ dɔgl gedu gi riikri ma. Hii hɛw, hí wad woosya̧ yɔ hi woo a Bɛt muutdu dɔglɔ. 6 Hinɔ gii Kristu gi dɔgs wɔrkɛ wɔ Dɔgl Rɔb bɔ hɛw, an Bɛt gbaas muulya̧ dɔgl an dɔgl yɔ gɔ gi gbaas dood sɛw ɗa, mɔkilya̧ gi za̧a̧ an Bɛt Mɔkil yɔ gi za̧a̧til be. 7 Yɔ hin sɛw sɛ̧ɛ̧b da̧a̧ki, wa̧a̧n zul nɛ, kɔm lɔlɛ, an nɛ ɗɛɛ Bɛt zɔ̧ko. 8 Hin gbɔɔlyɔ daar hin zaadɛ wɔ gɛrɛ: waan gi hatinnɛ hi kpoos nɛ sɛw. Bɛt hatɔ gɔ yaat hinha̧a̧l kittɔnɔ. 9 Zebtinnɛ, a nɛ raa du hi hato; bɔnɛ mɔɔ. 10 An bɔ sɛw a nɛ teesdu kaŋkig gaas yɔ Bɛt gaage an nɛ ɗans yɛ̧ɛ̧dɛ Yeesu -fɔkya wɔ, ɗaatinnɛ an zɛnɛ wɔ hi ɗɛɛ Bɛt rɔbsɔ sɔmsɔm yɔ gɛmsinihi gbaak bɛttɔnɔ. 11 Za̧a̧nyɔ gi dɔk hinɛ, dɔgig anyɔ kɛm Bɛt ya̧a̧ɔ gi dɔko; za̧a̧nyɔ gi woosig doodɛ wooge hi tɛŋk yɔ Bɛt gaage, an dood hi baan Bɛt a hinyɔ nɛ wook hi Yeesu Kristu nuŋgɔ sɛw gi dɔŋgo. Gbɔlumsɛ hi tɛŋko hi gi ge wɛlɛ hi wɛlɛ. Àanbɔ. 12 Saam mi rɔbɛ wɛ, ya̧a̧rhant gbɔɔl yɔ tursin an gi goo ɗɔbsig nɛ an laayɔ gɔ hi goon hɛɛlmɔto, bɔgi kɔmsin gɛrsɛ; bɔ hinyɔ gisin tuurik anbɔ gi yɔɔnɛ. 13 Yɛrɛ dagin hat anyɔ nɛ dak Kristu ya̧a̧rhantɔ bɔ nɛnɛ an nɛ wɛɛ nɛ dag hat ɓɛ, wɛɛ kpoos nɛ gi kpɛ̧ɛ̧ a ɔ̧tyɔ Kristu gbɔlumsɔ gɔ gi midza gedu. 14 Hi gin niik a Kristu nuŋg dɔŋgo, Bɛt Mɔkilɔ yɔ gbɔlumsɔ daarlɛl gi hi nɛya. Yɔ anbɔ nɛ́ dag hato. 15 Bɔ za̧a̧nza a nɛ teesdu gi yɔ̧ya̧a̧r an zulgbɔŋkya, zaabe an luuri, zaabe an hinha̧a̧lwookya, zaabe an doo ya̧a̧gutigya hɛw. 16 Yɛrɛ za̧a̧nza gi gi ya̧a̧ryɔ̧k an Yeesu fɔkya be, bɔ seem gi ha̧a̧ge, baanig Bɛt a Yeesu nuŋg dɔŋgo. 17 Ya̧a̧nɛ dɔgl-gbaak ɔ̧t bɔ riiri, Bɛt gi yɛɛlik dɔglɔ gbaak bɔ a doodɔ tees du. Gi gi yɛɛlik a wɛ teesdu anbɔ, nɛ dood wɔ hi taas Bɛt Dɔgl Rɔb bɔ kɛŋk gɛ hi wɛɛ ay ma be? 18 Anyɔ hi bi̧i̧ a Bɛt ɗɛɛrwol du a an doo riit bɔ dag za̧a̧tigi hi mɔɔt gbɔɔltɔnɔ, za̧a̧nyɔ ɗɔbs Bɛt gɛ be, hi hinha̧a̧lwookya wɔ, hi kɔm ay be? 19 Yɔ anbɔ, an dood wɔ hi ya̧a̧ryɔ̧k an hinyɔ Bɛt ha̧a̧ge hi ɔɔ kolya̧ a Za̧a̧nyɔ ki̧hi, Za̧a̧nyɔ rii an hi gbaa kpoosya̧ a ge, gi naan du, hi wɛɛ hi waa hinrɔb wooki. |
Doyayo New Testament © Bible Society of Cameroon, 1991.
Bible Society of Cameroon