1 KƆRƐŊGTU 8 - Nouveau Testament Doyayo

1 KƆRƐŊGTU 8

¹ Yɛrɛ yɛwɛ see namb wɔ gɔ hi gbɛrsig maakwɔd wɔ dɔglya̧. Gi rɔb ɔnɛ a wɛ gin hinmɛɛki wɛ sɛw anyɔ gɔ nɛ raako. Hinmɛɛki gi tɔɔsig doo zulɛ, wɛɛ hat ɔnɛ giwɛ kaŋk doosɛ a ɗɔbsig du.

² Doo gi raak zulɔ a be mɛɛhinɛ, mɛ̄ɛ̄dir hin rɔbtɔnɔ anyɔ rii kɛn gɛ.

³ Yɛrɛ doo gi harig a Bɛt ge, gii be Bɛt mɛɛgmɛ be.

⁴ Ya̧a̧nɛ an hinyɔ gi seek namb yɔ gɔ hi gbɛrsig maakwɔd wɔ hi gihi ɗɔbsig tɔkɔ, wɛ mɛɛ a maakwɔd wɔ ɗɔbsugɔ hi taa hinrɔb a waal du, Bɛt gbunu gi giro.

⁵ An hinwɔ gɔ hi elik a ꞋꞋbɛtoꞋꞋ hi giro a bɛtha, zaabe a hɛbtdi si̧, - hɔɔ, hi rɔbo, dood hi ɗɔbsig hin kittɔnɔ an bɛtya̧, hi wɛɛ hi sɔ̧ɔ̧k hin kittɔnɔ an waar ɛya̧.

⁶ Wɛnɛ hin gbun ro gi gisɛ rɔbo, Bɛt gii kpɔd, Baa wɛ yɔ hin sɛw gi fu̧u̧k a ge, Za̧a̧nyɔ wɛ gi waak a gi zulɛ. Wɛɛ wɛ gin Waar gbunu, Yeesu Kristu. Bɛt kim hin sɛw hi giya, wɛɛ wɛ dag za̧a̧tig seg hi giya.

⁷ Yɛrɛ dood sɛw hí mɛ̄ɛ̄ hin bɔ lab gɛ. Anyɔ zaadɛya̧ hi rɔ̧ɔ̧n maakwɔd loorɛ wɔ hi gihi ɗɔbsig dɔglɔ, hi tɔk namb wɔ an hi ginɛ maakwɔd loorɛ wɔ ya̧a̧nɛ hi rɔbo, wɛɛ kpoosya̧ yɔ taan tɛŋk gɛ be, ɓi̧i̧l gɔ.

⁸ Hɔɔ, lees gii taawɛ sɔɔsig a Bɛt ge. Wɛ lē lees gɛ, wɛ́ lɔ̄ɔ̄ hinza a Bɛt muutdu gɛ; wɛ le be, wɛ taa hinrɔb dak gi daar zaa be.

⁹ Yɛrɛ oon bɛttɔnɔ, an bɔ zul nɛ bɔ tuu aakil du gi wɛɛs wɔ kpoosya̧ hɔn a ɗɔbsig du dɔɔya̧ siŋklɛlɛ.

¹⁰ Yɔ anbɔ, mɔɔ yɔ mɔ mɛɛhinɛ, za̧a̧nyɔ kpoosɔ hɔnɔ a ɗɔbsig du anyɔ kpoosɔ gi faak namb bɔ dɔglɔ, gi gbɛnum mɔ ɗɔɔt a maakwɔd wɔ lukɔ gedu mɔ hinleko, yɔ dāg tɛŋk an gi tɔb maakwɔd wɔ nambɔ hi gbɛɛr gɛ ya?

¹¹ Yɔ labɔ za̧a̧n kpoos hɔntilya bɔ Kristu wɔr gi zulɛ, gi wag gbɔnɔ a hinmɛɛk mɔ bɔ gi dɔŋgo.

¹² Yɔ nɛ gɔk anbɔ nɛ wook hinha̧a̧l a yɛ̧ɛ̧dɛ nɛ wɔ hi muulɛ, nɛ wɛɛ nɛ gi mɔkilya̧ wɔ kpoos du nɔk gaako, nɛ gɔk hinha̧a̧lɛ a Kristu zulha.

¹³ Ya̧a̧nɛ an mi gbɛn a hinyɔ mi leko gi matig yɛ̧ɛ̧miza a hinha̧a̧l du, nɛ mi taa nam za gii tɔk nɛ zaŋ an bɔmi matin yɛ̧ɛ̧miza a hinha̧a̧l du.