1 KƆRƐŊGTU 4 - Nouveau Testament Doyayo

1 KƆRƐŊGTU 4

¹ Yɔ anbɔ yɛhi seewi an Kristu woosɔyaadɛ, an Bɛt dɔgl dubtɛ wɔ dood hi mɛɛ nɛ gɛ kaŋkigɔyaadɛ.

² Yɔ gi nɛ anbɔ be, hinyɔ woosya ɗɛntɔ ha̧a̧g gi daarlɛlɛ: gɛ an woosya bɔ gi woowoosɔ bɛttɔnɔ.

³ Minɛ a mi gbaŋgi an nɛ gbaasim dɔglɛ, seem tɔɔ gɛ, hi zaabe an doo gi gbaasim dɔglɛ, kɔ̄msim hinza gɛ hɛw, mi wɛɛ mi taas zul mi dɔgl-gbaak hɛw.

⁴ Nɛ mi mɛɛ a kpoos mi mɔksim a mi woo hinza a̧a̧b gɛ. Nɛ hin bɔ anbɔ wɛɛnim rɔbwookya a hin wɔrɔ hi dɔŋg gɛ. Za̧a̧nyɔ gɔ gi gbaasim dɔglɛ: gɛ Waar Yeesu.

⁵ Yɔ gi anbɔ bɔnɛ gbaa dɔgl gi dorɔ. Oon ɔ̧tɔ bɔ gi tuurɔ an Waar Yeesu gi zaa gi gbaa hinwɔ hi da hi yaat nɛ a lɛlwil du a lɛlgaal du gi midil mɔkil wɔ dood hi gbaak kpoos du. Gɔ gi anbɔ, bɔbe gi dag bant a Bɛt ge anyɔ riisige.

⁶ Yɛ̧ɛ̧dɛ mi wɛ, a nɛ dɔŋg ro mi bi̧i̧sin dɔgl wɛrɛ sɛw a mi zulha hi a Apolos zulha an nɛ mɛɛ dɔgl yɛrɛ a wi kpoos du an bɔnɛ daar hinyɔ hi bi̧i̧ a Bɛtdɔgl du, wɛɛ an bɔ zaa gbunu a nɛ tees du gi pɛɛ zulɔ gi ta̧a̧ zaa, gi wɛɛ gi bɔ̧ɔ̧ zaabɔ.

⁷ Bɔ wɛɛnum gbɔɔlɔ dood zulha? Mɔ gin nɔ gid mɔ́ dāg hinɔ a Bɛt ge gɛ? À mɔ dag hinɔ gɔ, ri mɔ pɛɛk zul mɔ a hinyɔ mɔ dag geha an mɔ́ dāg nɛ hinɔ gɛ?

⁸ Nɛ yɛrɛ ɓɔri nɛ hi̧i̧tyaadɛ ma, nɛ wɛɛ rɔɔsyaadɛyɔ! Nɛ wɛ̄ɛ̄ hi wii gɛ. Nɛ an nɛ wɛɛ waar ɛ, an wii be wi ɗɔɔt waar ɛ hi nɛɛ be, yɔ bɛsiwi!

⁹ Ya̧a̧nɛ mi mɔkig nɛ an Bɛt gbaa wii tɔmsya wɔ an dood kuudɛyɔ; wi gi an dood wɔ dɔgl gɔ matihi an hi gbɔ̧hi a dood teesdu, wi gi an hinyɔ gɔ hi see gii a waal du sɛw an hi kpɛ̧ɛ̧lɔ, wi gis loorɛha̧a̧l walɛsɛrɛ ɔ̧ɔ̧ hii be, wi gis dood hii be.

¹⁰ Wii be, wi gi yoo a Kristu dɔŋgo, wɛɛ nɛɛ be nɛ gi hinmɛɛkyaadɛ dubtɛ anyɔ nɛ ɔks hi Kristu. Winɛ wi gi hɔntili, nɛnɛ nɛ gin tɛŋko. Nɛnɛ hi gin ɗɔbsugo, wii winɛ hi giw wɛɛnik hintɔs.

¹¹ Tuur ɓɔryɔ a̧a̧kil giw ha̧a̧ko, mɛm giw ha̧a̧ko, wi taan gbandili, hi giw lɛbtugo, wi lɛɛlik a hɛ hi hɛ.

¹² Wi wookwoos sa̧a̧tɛ wɔ hi naan wi an wi len zul wi, gɔ hi niiwi, wii be wi wɛɛ wi gihi rɔbsugo, hi giw zɛksugo, wi gi mɔŋko.

¹³ Hi ha̧tirgo nuŋg wi, wii be wi wɛɛnik hi ya̧a̧ rɔbo, hi seewi an kpoosum waal du hi an waal du hutɔ tuur ɓɔryɔ.

¹⁴ Mí bi̧i̧sm hin wɛrɛ an mi ha̧a̧nin seem gɛ, yɛrɛ mi gisin raakhin an waat mi rɔbɛ an nɛ oo zul nɛ.

¹⁵ Ya̧a̧nɛ an hingokya nɛ a ɔksig nɛ bɔ hi Kristu hi kit hi gi duk koobl si̧, yɔ anbɔ, nɛ taan baa kittɔnɔ ma, anyɔ mii mi mɔɔnɛ hi Dɔgl Rɔb yɔ mi kamsin a ɔksig bɔ gedu hi Yeesu Kristu.

¹⁶ Ya̧a̧nɛ mi ginɛ zɔ̧ko: seen waabil mi, wɛɛn an miya.

¹⁷ Hinɔ lab ro, mi yaasin Timɔte yɔ gisim waa rɔb hinwookya hi tɛŋko yɔ ha̧a̧mi gbɔɔltɔnɔ a gi muulɛ a ɔksig wi bɔ gedu hi Waar Yeesu. Gi dɔgsin gbɔnɔ wɔ mi fɔk ɔksig gbunu hi Yeesu Kristu, anyɔ mi gok a lɛlyɔ Yeesu fɔkya hi mɔksig ge sɛw.

¹⁸ Dood zaadɛ a nɛ teesdu hi pɛɛk zul be an mi taa rek a nɛɛge.

¹⁹ Yɛrɛ gɔ gi kaasi mi rekɔ a nɛɛge, gid gi anyɔ Waar Yeesu ha̧a̧ge, taa an mi mɛɛ zulpɛɛkya wɔrɔ hinyɔ hi dɔko, gi an mi mɛɛ tɛŋkya̧.

²⁰ Ya̧a̧nɛ Bɛt wáátɔ gi seek Bɛt tɛŋkɔ yɔ gi wook a dood kpoos du giya, taa dɔgl yɔ hi book tɔs.

²¹ Ha̧a̧n ri? An mi rek nɛɛge hi kpooti ya? Zaabe hi ha̧a̧tigi hi kpoos saŋkti ya?