Lúkas 17 - Esaa-líat ɛ́ péná

Yésus ag tíi ɓayége biyíhɛ́nɛ́

¹ Yésus a byɛ́la ɓayége ɓɛ́ɛ́ nɛ́: «Tɔ yá ɓɛ́ láá, mam má mí lɛ, mí ŋga óm ɓot á lí ɓɔŋ lí áɓē. Ndí eɓéé-nyúū la nyɔ́ a ŋga kɛ́ li ɓɛ́ lí njɔm míɓē mí ɓáŋá.

² Ɛ́ lɛ nsɛ́ŋ nɛ nyíŋ nyaa mut bí tiŋ yɔ lisúŋ lí ŋgɔg á cíŋ, bí léé nyɛ á túwɛ, li loo nɛ́ ag ɓɛ́ njɔm miɓé nyí nyɔ́ a lóohan ntɔ́ga átē a ɓá ɓɔɔ́n.

³ Nyɔŋán hɔ́ lítāt! Kíyáɓɛ́nɛ mɔɔ́nyɔ̄ŋ a ályɛ́ wa, yáŋá nyɛ́ ɔ yíhɛ́ nyɛ́ náŋ; kíyáɓɛ́nɛ a lém ɔ́vuha vɛ́ɛ́, laakɛ́ nyɛ́.

⁴ Kíyáɓɛ́ ki nɛ́ a ályɛ́ wa ŋgele nzambúwá ányúū ɔlɔ́ ndí eceg sig ag sɔ́ wa lí laga nɛ́: ‹Ma lēm ɔ́vuha váma,› ɔ laakɛgɛ nyɛ́.»

Ŋguu nyí ŋyéɓé

⁵ Ɓaómɓɛ bú lága Nyɔ́ŋ-Ɛsáŋɛ́ nɛ: «Kondyé ɓɛ́hɛ ŋyéɓé.»

⁶ Nyɔ́ŋ-Ɛsáŋɛ́ ɔ tímānɛ̄ nɛ́: «La mbálɛ kíyáɓɛ́nɛ miní byɛ́ɛ́ ŋyéɓé ákaa diíh lí siŋgí, miníg la li laga lí nyí tín búmɛ nɛ́: ‹Uulán vá, kɛɛ́n ɓɛlɓán á túwɛ›; ɛg ógle ɓɛ́nɛ.»

M̀ɓɔŋle nyɔ́ a ɓɔ̄ŋ ja nsɔ́n wɛ́ɛ́

⁷ «Nzáá á póla yaná, kíyáɓɛ́nɛ a byɛ́ɛ́ m̀ɓɔŋle a ŋga sál nyɛ́ míndīī tɔ nɛ́ a ŋga tát nyɛ́ bílēm á pɛ́ɛ́, á mísɔ̄ mɛ́ɛ́ mí ǹdíí a ŋga kɛ́ nyɛ́ li laga nɛ: ‹Kwááɓɛ́ɛ! Kɛɛ́n tɔɔ́ á téɓeli é?›

⁸ Ɓaá, a ŋgá kɛ ɓé ja nyɛ́ li yó nɛ́: ‹Ɓoŋhán ma jam mi ŋga dí, jál mbɔ́tí nsɔ́n ɔ ɛ́ɛ́lé ma, mi dúgú mi díi, mi nyū; sɔ́kágánɛ́ wág ɔg yíg dí la li nyú é?›

⁹ Ɓaá, ag kɛ li tíi lí nyɔ́ŋ m̀ɓɔŋle mitamlan ányúū nɛ a ɓɔŋ yé ɛ́sɛ a lágá nyɛ é?

¹⁰ Náŋ a lɛ nlemlem la ɓɛ́nɛ, eceg maná ɓɔŋ yé ɛ́sɛ ɓá lagá ɓɛ́nɛ, laglán nɛ́: ‹Bi lɛ byɛmɛ́ bí ɓáɓɔŋle. Ɓaá ɓɔŋ ja yé bií ŋga nyɛ́ɛ li ɓɔŋ.›»

Yésus ag manɛ jóom lí ɓot bí mívɛlɛ

¹¹ Eceg Yésus a ŋgí kɛ á Yélūsalɛm, ɔ loolé á Samália la á Galiléa.

¹² Á míníŋgi mɛ́ɛ́ á ŋkɔŋ wá, jóom lí ɓot bí mívɛlɛ bú sɔ́ li ɓoman la nyɛ́, la ɓɔ́ bú tɛ́lɛ́ nyɛ enɛŋɛ́.

¹³ Bú lónlé nyɛ nɛ́: «Á Yésus, etāa, kɔn ɓɛ́hɛ ŋgɔ́ɔ́.»

¹⁴ Ɛnɛ́ Yésus a ɛ́n ɓɔ́, ɔ lágá ɓɔ nɛ́: «Kɛnán, ɓatíi-nsúlé bí ɛ́n ɓɛ́nɛ.» Eceg bí ŋgí kɛ, mivɛlɛ máɓá mú man.

¹⁵ Ɛnɛ́ wa á elɔŋ yáɓá a ɛ́nɛ́ɛ́ nɛ́ a tɔɔ́ mbólí, ɔ tímān la mbúh ag ɓégɛ Ɔlolómɛ̄ á lóō lóō.

¹⁶ Ɔ ɓɛ́hán á sí míkoo mí Yésus, asú á sí á lí tíi lí nyɛ mitamlan. Nyɔ́ŋ mut a ɓɛ́ɛ́ mɔɔ́n Samália.

¹⁷ Váŋ nɛ́ Yésus a ɓāt nɛ: «Ɓaá, jéŋ jóom lí ɓot lísɛ láh tɔɔ ɓé mbólí é? Ndí, ɓáŋá ɛ́buu bí lɛ véé é?

¹⁸ Mut tɔ wa á póla yaɓá áh timan ɓé li tíi lí Ɔlolómɛ̄ mítamlan, amáh sig nyɔ́ ǹcɛn á mut é?»

¹⁹ La Yésus ɔ lágá nyɛ nɛ́: «Tɛ́lɛ́, kɛnɛ́g, ŋyéɓé wɔɔ wá tɔ́hɔ́ wa.»

Misɔ́ mí Likanʼyɛ lí Ɔlolómɛ̄

²⁰ Elōg-Falísái yú bíhī Yésus nɛ́: «Yɔɔ́yɔ́ɔ eceg Likanʼyɛ lí Ɔlolómɛ̄ lí ŋga kɛ́ li sɔ́ é?» La nyɛ́ ɔ pélē ɓɔ nɛ́: «Likanʼyɛ lí Ɔlolómɛ̄ lí ŋgá sɔ́ ɓé ákaa jam lí ŋga ɛ́ni.

²¹ Bí ŋgá kɛ ɓé li laga nɛ́: Jɔ́ jé vá tɔ nɛ́ Jɔ́ jéŋé wóŋóó. Kɔɔ la mbálɛ, Likanʼyɛ lí Ɔlolómɛ̄ li lɛ́ á póla yaná.»

Ɔlɔ́ ví mísɔ̄ mí Mɔɔ́n Mut

²² Ámbúh náŋ, Yésus a byɛ́la ɓayége ɓɛ́ɛ́ nɛ: «Alɔ́ ág kɛ li sɔ́, nyú miní ŋga kɛ́ li ɓɛ́la lí kóó li ɛ́n lí Mɔɔ́n Mut, tɔ yá ɓɛ́ ja ɔlɔ́ váhvá, ndí miní ŋga kɛ ɓé nyɛ li ɛ́n.

²³ Bíg kɛ ɓɛ́nɛ li yó nɛ́: ‹Nyɛ́ nyɔ́ŋɔ́! Tɔ nɛ́ nyɛ́ nyɔ́!› Miníh kɛnɛ́g ɓé, miníh digɓágán ɓé tɔ li kɛ.

²⁴ La mbálɛ, ákaa eceg lóō li ŋga mwɛ́ɛg ndí la tí mípūū jé lisúg lí ŋkɔŋ-á-sí la jéŋé, náŋ nɛ́ ɛ́ ŋga kɛ́ li ɓɛ́ á ɔlɔ́ ví mísɔ̄ mí Mɔɔ́n Mut.

²⁵ Ndí sɔ́kágánɛ́ náŋ ag ɓɔŋɓɛ, ɛ́g kɛ li ɓat nɛ́ a táká yágá ŋgandag, la ki nɛ́ nyí nyɔŋɔn ɛ ɓén nyɛ́.

²⁶ Ákaa ɛ́ loolóó á eceg yé Nóa, náŋ ki nɛ́ ɛ́ ŋga kɛ́ li ɓɛ́ á ɔlɔ́ Mɔɔ́n Mut a ŋga kɛ́ li sɔ́:

²⁷ ɓot bí ŋgí dí, bíg nyú, bíg nyɔŋ ɓondígá, bíg kɛ á míūg, tɛɛla á ɔ́lɔ̄ Nóa a níŋgléé á ŋkúú. Váŋ nɛ́ épupɛ ecɛ́ŋɛ́ ɛ́ sɔ́ɔ́la libúmbé jé li manhɛ́ɛ mbɔŋgɔ limut ɛsɛ̄.

²⁸ Tɔ nɛ́ ákaa á eceg yé Lōt: ɓot bí ŋgí dí, bíg nyú, bíg sóm, bíg nuŋu, bíg ɓɛl, bíg óŋ.

²⁹ Ndí, ɔlɔ́ Lot a ɓógyéé á Sódom, Ɔlolómɛ̄ ɔ nɔ́hɛ́ mitám mí nzáan la nzuhú ɛ́ ŋga lóŋɛ nzáan ákaa mbeŋ nyí ɛ ólóó ɓot bísɛ.

³⁰ Nlemlem á jam nɛ́ á ŋga kɛ́ li loo á ɔ́lɔ̄ Mɔɔ́n Mut a ŋga kɛ́ li ɛ́ni.

³¹ Múŋ á víŋ ɔlɔ́, mut a ŋga kɛ́ li ɓɛ́ á lóō lí ndáá ndí á ɓɛ́la lisaŋgó á até á nlɛ́ɛ́, a suhúg ɓé jɔ li nyɔŋ. Nlemlem la nyɔ́ a ŋga ɓɛ́ á ǹdíí, nyɛ́g ah timkágán ɓé la mbúh.

³² Ɔ́ŋlán yé yá looléné ŋ̀gáá Lot.

³³ Tɔ nzáá a ŋga kɛ́ li somo lí lí kómbɛ lí éniŋ yɛ́ɛ́ ag kɛ yɔ́ lí jáŋɛ, ndí tɔ nzáá a ŋga kɛ́ yɔ́ lí jáŋɛ, ag kɛ yɔ́ lí tombanɛ.

³⁴ Mag laga ɓɛ́nɛ nɛ́: múŋ á jéŋ díɓe, ɓot bíɓáa bíg ɓɛ́ bí náŋɛ á énɔŋ yá, wa ag kɛ li nyɔŋɓɛ, nyɔ́ŋɔ́ a yéglé.

³⁵ Ɓondígá bíɓáa bíg ɓɛ́ bí kɔg mbahɛ elɔŋ; wa ag kɛ li nyɔŋɓɛ, nyɔ́ŋɔ́ a yéglé.» [

³⁶ ]

³⁷ La ɓayége bú bíhī nyɛ nɛ́: «Ɛtáŋɛ, náŋ ag kɛ li loolene véé é?» Ɔ pélē ɓɔ nɛ́: «Ápah m̀bim a lɛ, váŋ nɛ́ byúŋgú bí ŋga kóman.»