Elōg-Kɔlínto 1 1 - Esaa-líat ɛ́ péná

Mitamlan

¹ Ma Póol, ma yáŋlɛ́ á lí ɓɛ́ lí ŋ̀ómɓɛ a Yésus Kilístus li oŋle la nsom á Ɔ́lolómɛ̄. Mi lɛ élɔŋ la Sóstɛn mɔɔ́lyāŋ wahá.

² Mag ciile Eɓasɛ Ɔ́lolómɛ̄ yé ɛ́ lɛ́ á tísɔn Kɔlínto, yé ɛ́ byɛ́ɛ̄ ndog-Ɔlolómɛ̄ nyí ya yáŋlɛ á lí ɓɛ́ lí ɓápūán li loole la Yésus Kilístus, nlemlem ki la ɓot bísɛ bí ŋga lónle Ɛtáŋɛ wahá Yésus Kilístus voóm sig, nyɔ́ a lɛ Ɛtáŋɛ waɓá ndí la ɛwahá ki.

³ Ɔlolómɛ̄ Etāa wahá elɔŋ la Nyɔ́ŋ-Ɛsáŋɛ́ Yésus Kilístus bí lómbó ɓɛ́nɛ bí tí ki ɓɛ́nɛ nsaŋ.

⁴ Ányúū yāná, mag tíi Ɔlolómɛ̄ mítamlan ɛ́h ɓɛ́ ɓé lí tɔmb, ányúū likaale a tíéé ɓɛ́nɛ yɛmɛ́ li kele la Yésus Kilístus.

⁵ La mbálɛ, á ŋ̀atanɛ́ la Yésus Kilístus, nɛ́ miní kūhúú ábyaŋ á nyaa yɔ́ ɛ́sɛ, likaale lí eyí-ŋkwɛl la jé lí lí yí lí mam mísɛ.

⁶ Mbóŋ nyí Nyɔ́-a-pɔ́hlɛ ya tíéɓɛ ɓɛ́nɛ ya óló á átē wāná,

⁷ nyaa nyí ɛ lɛ nɛ́ likaale lí Ɔ́lolómɛ̄ tɔ já lí ŋgá yɛ́ɛ́le ɓɛ́nɛ lí se ɓé, ɓɛ́nɛ ɓá miní ŋga láaŋke nɛ́ Ɛtáŋɛ wahá Yésus Kilístus a ɛ́ni.

⁸ Nyɛ́ ki nɛ́ a ŋga kɛ́ ɓɛ́nɛ li letɛ lí nyúū li pám á lísūg, nɛ́ ndí miní ɓɛ́ ŋgíla ɔnɛ́g á ɔ́lɔ̄ ví mísɔ̄ mɛ́ɛ́.

⁹ Ɔlolómɛ̄ ag yáhɛ biɓaŋgá byɛ́ɛ́, nyɛ́ nɛ́ a yáŋá ɓɛ́nɛ á lí niŋ á ŋ̀atanɛ́ la Mɔ́ɔ̄n wɛ́ɛ̄ Yésus Kilístus, Ɛtáŋɛ wahá.

Mbáglán á Éɓasɛ yé Kɔlínto

¹⁰ Á élōgyāŋ, á jóō lí Ɛtáŋɛ wahá Yésus Kilístus, mag sɔ́hye ɓɛ́nɛ bísɛ nɛ́ miní ámblán, la ki nɛ́, mbáglán ɛh ɓɛ́ɛ́g ɓé á póla yaná. Miní ɓɛ́ mut wa, miní ɓɛ́la nlemlem á peg la nlemlem á éɔ̄ŋɔ.

¹¹ Ákaa ɛ́sɛ, á élōgyāŋ, ɓot bí ndáá-m̀biya nyí Kolówe ɓá yíhɛ́ ma nɛ́ ŋ̀ámblānɛ́ a sē ɓé pɛ á póla yaná.

¹² Mag somo li laga nɛ́, á élɔŋ yaná, nyɔ́ wa ag laga nɛ́: «Ma, mí lɛ̄ mut a Póol», nyɔ́ŋɔ́ aá: «Ma, mi lɛ̄ mut a Apólos», nyɔ́ŋɔ́ ntám aá: «Ma, mi lɛ nyɔ́ á Pétlos», nyɔ́ŋɔ́ ntám sīg-pɛ ag laga nɛ́: «Ma, mi lɛ̄ mut a Nyɔ́-a-Pɔ́hlɛ.»

¹³ Ɓaá, Nyɔ́-a-Pɔ́hlɛ a káaɓɛ é? Ɓaá, Póol nɛ́ a tōmlɛ́ á mbásá ányúū yáná é? Ɓaá, á jóō lí Póol nɛ́ maná kūh nzóɓan é?

¹⁴ Mag tíi Ɔlolómɛ̄ mítamlan nɛ́, māh tíi ɓé ma mut waná tɔ wa nzoɓan amáh sig Kilípus la Gáyus.

¹⁵ La náŋ hɔ́, mut tɔ wa a ŋgá la ɓé lí laga nɛ́ maná kūh nzóɓan á jóō jáma.

¹⁶ Síkɔ̄ŋ, ma tí ki m̀biya á Stefánas nzoɓan. Ányúū ɓáŋá ɓátām, mi ŋgá ɔ́ŋɔ ɓé mā nɛ́ ma tí mut ntám nzóɓan.

¹⁷ Átɔm nɛ́, Nyɔ́-a-Pɔ́hlɛ āh óm ɓé ma á lí tíi lí nzóɓan. Ndí, a óm mā á lí lɛgɛ lí Pɔ́l M̀ɓɛɛŋ ɛ́h ɓɛ́ ɓé ma lí ɓɔŋle lí éyī-ŋkwɛl yé ɓot-bí-bínam, á lí ɓɔŋ nɛ́ nyɛmb nyí Nyɔ́-a-Pɔ́hlɛ a lōó lí mbásá ɛh ɓɛ́ɛ́g ɓé yɛ́mɛ̄ ɛ́ jam.

Yésus Kilístus a lɛ́ ŋguu la peg nyí Ɔlolómɛ̄

¹⁸ Ákaa ɛ́sɛ, li kwɛl ányúū nyɛmb nyí Nyɔ́-a-Pɔ́hlɛ á mbásá lí lɛ́ jam lí nzeg ányúū ɓot ɓá jáŋ. Ndí ányúū ɓɛ́hɛ ɓot bí tɛ́ɛ́ á nzen lisuŋga, lí lɛ́ ŋguu nyí Ɔlolómɛ̄.

¹⁹ Átɔm nɛ́ Licii-Lipúán líg laga nɛ́: «Mag kɛ́ li sáá lí peg nyí ɓot bí peg, mi yáánɛ́ ki éyī yé ɓáyī-jam yɛmɛ́.»

²⁰ Mut-a-peg a lɛ véé é? Ŋ̀yí-mbéndá a lɛ véé é? Ŋ̀yí-ŋkwɛl a yé eceg ɛ́ lɛn a lɛ véé é? Ɔlolómɛ̄ a étɛ́ nɛ peg ɛ ŋkɔŋ-á-sí ɛ́ lɛ̄ jām lí nzeg!

²¹ Ákaa ɛ́sɛ, kasig ŋkɔŋ-á-sí li oŋle la peg yɛ́ɛ̄ wáh la ɓé li lemlene lí Ɔ́lolómɛ̄ átē a peg yɛɛ́, ányúū náŋ nɛ́ Ɔlolómɛ̄ a súgɛ́ nɛ ag suŋ ɓá bísɛ bí ŋga yéɓé la nyíŋ pɔ́l bi ŋga lɛ́gɛ, nyí ɛ lɛ̄ káa jam lí nzeg ányúū ɓot-bí-bínam.

²² Eceg ɓɔɔ́n bí Élōg-Yúda bí ŋga ɓāt li ɛ́n lí mínɛ̄ŋ, ɓɔɔ́n bí Élōg-Gelékia ɓɔ́ bíg somo jā peg.

²³ Ndí ɓɛ́hɛ, biíg lɛgɛ pɔ́l nyí Nyɔ́-a-Pɔ́hlɛ nyɔ́ a tōmlɛ́ á mbásá. Nyíŋ pɔ́l ɛ lɛ́ ntugɛ ányúū Elōg-Yúda, nzeg ányúū ɓá bí sē ɓé ɓɔ́ɔ̄n bí Élōg-Yúda.

²⁴ Ndí, ányúū ɓá ɓá yáŋlɛ, ɛ́ ɓɛ́ ɓɔ́ɔ̄n bí Élōg-Yúda tɔ ɓá bí Gelékia, Yésus a lɛ Nyɔ́-a-Pɔ́hlɛ, ŋguu la peg nyí Ɔlolómɛ̄.

²⁵ Á mbálɛ, nzeg nyí Ɔlolómɛ̄ ɛ́g loo peg nyí ɓot-bí-bínam, áɓɔt wɛ́ɛ́ ki ág loo ŋguu nyí ɓot-bí-bínam.

Jam Ɔlolómɛ̄ a pɔ́hɔ

²⁶ Á élōgyāŋ, ɓɛ́nɛ ɓá maná kūh ŋyáŋlán á Ɔ́lolómɛ̄, ɔ́ŋlán sig yé miní lɛ̄. Ányúū ɓot-bí-bínam, ŋgandag ɓōt bí peg ɛ́ sē ɓé á póla yaná, tɔ ŋgandag ɛ́ mbii-ɓōt, ndí tɔ ŋgandag ɛ́ ɓot yí tāŋ mímbiya.

²⁷ Ndí, Ɔlolómɛ̄ a pɔ́hɔ̄ yé ɛ́ ŋga ɛ́ni nzeg á ŋkɔŋ-á-sí, ányúū li kɔnhanɛ lí ɓot bí peg mbɔɔla. Ɔlolómɛ̄ a pɔ́hɔ̄ ki yé ɛ́ ŋga ɛ́ni aɓɔt á ŋkɔŋ-á-sí, ányúū li kɔnhanɛ lí ɓot bí ŋguu mbɔɔla.

²⁸ Ɔlolómɛ̄ a pɔ́hɔ̄ yé ɛ́ lɛ́ yɛ̄mɛ́, yé ɓot bí ŋga yāŋa, yé ɛ́ lɛ́ ŋgíla eɓáha, mú á ŋkɔŋ-á-sí, á lí sáá lí yé ɛ́ ŋga ɛ́ni taŋ,

²⁹ nɛ́ ndí mut tɔ wa ah yátɓág ɓé ɔ́sū vɛ́ɛ́.

³⁰ Nyɛ́ Ɔ́lolómɛ̄ nɛ́ a āt ɓɛ́nɛ la Yésus Kilístus, Yésus Kilístus ki ɔ ɓɛ́ peg ɛ ŋga sɔ́le la Ɔlolómɛ̄ ányúū yāhá. Li loole la nyɛ́ nɛ́ Ɔ́lolómɛ̄ a yáanɛ́ ɓɛ́hɛ ɓot bí lɛ́ sim, ɔ pɔ̄hɔ́ ɓɛ́hɛ ányúū yɛ́ɛ̄, la nyɛ́ ɔ ɓógtɛ́ ɓɛ́hɛ á míɓē.

³¹ Ányúū náŋ nɛ́ Lícii-Lipúán lí ŋga lága nɛ́: «Nyɔ́ la nyɔ́ a ŋga yáta, a ɓɔ́ŋ náŋ á ŋ̀atanɛ́ la Nyɔ́ŋ-Ɛsáŋɛ́.»