ท​เน​โพล​ทาง 6 - Northern Pwo Karen Thai Bible

ท อ แท๊ อ ต้องคู ฆู๊ง เบง แบ ท อุ้พ้ะ ทาง-อ้ะ

¹ ท่อง อ ช๊าง จ แด แกะ พู อุ้พ้ะ ทาง ท อ แท๊ ล เบง, ลู่ง ท เนว๊ เบง อ แกล้ นอ, ฌ้อง จ แน่ฌ๊า เครุ้ ลี่ง ดื้ง นอ, โอ ล ดื้ง กุ้ ซย้ะ ทาง เท่อ อ ลู่ง เซ๊ พ้ะดู, บี่ ซุ้ ล๊าง เซ๊ ไจ้ะ เว๊, “เฌ๊ เซ้อ”

² อ นอ จ แด แบ กซี แอว้ ล ดื้ง, โพล้ง เทา กซี ล ดื้ง นอ โชะ ดี๊ คลีง, อ เว๊ นอ นี่ แบ คูคล้าง, ฌ้อง เทา ทาง กซี ไจ ทาง บี่ ซุ้ ดี๊ โพล้ง น้า เท่อ ม แม้ น้า แม้ ฆ่าง เท่อ นอ ล้อ

³ ท่อง แกะ พู อุ้พ้ะ ทาง ก้ะ ท อ แท๊ คี๊ง เบง ล เบง นอ ฌ้อง, จ แน่ฌ๊า เครุ้ คี๊ง ดื้ง ล ดื้ง นอ อ ลู่ง กุ้ ทาง เท่อ ไจ้ะ เว๊, “เฌ๊ เซ้อ”

⁴ ท่อง อ ช๊าง กซี ล ดื้ง เด้าะ เฌ๊ ฆ้าง, เก กซี โฌ้, โพล้ง เทา กซี ล ดื้ง อี้ง นอ นี่ แบ อ ดู้ง อ ยาง เกม๊า อ โชะ ไฆวะ ท มึ ท พ้า ลู่ง ฌางคู โคล๊ง คู, บี่ ซุ้ ม เกม๊า โพล้ง กุ้ อ แฌ้ ดึ้ โละ อ ซ้ะ, อ เว๊ นอ นี่ แบ น้ะ พ้ะดู ล เบง

⁵ ท่อง แกะ พู อุ้พ้ะ ทาง ก้ะ ท อ แท๊ ซ๊า เบง ล เบง นอ ฌ้อง, จ แน่ฌ๊า เครุ้ ซ๊า ดื้ง ล ดื้ง นอ กุ้ ทาง เท่อ ไจ้ะ เว๊, “เฌ๊ เซ้อ”, ฌ้อง จ แด กซี ซ๊า ล ดื้ง, โพล้ง เทา กซี ล ดื้ง นอ โชะ ดี๊ นางเค๊ง ล ช๊อง

⁶ ฌ้อง จ แน่ฌ๊า เท่อ แบ ด้อง ท อ ลู่ง เซ๊ ทาง ลู่ง เครุ้ ลี่ง ดื้ง นอ อ แกล้ ไจ้ะ เว๊, “บืง ซาลี ล โซยะ นอ อ ฆวี้ ที๊ ซุ้ คางเล้ง ล นี้ง, บืง บาลี ซ๊า โซยะ นอ ที๊ ซุ้ คางเล้ง ล นี้ง, แบเด้าะ แม้ เฌ๊ฌ้อง ทซู ดี๊ ซไบ้ะ แซ ที๊ง นอ ล ฌี้”

⁷ ท่อง แกะ พู อุ้พ้ะ ทาง ท อ แท๊ ลี่ง เบง ล เบง นอ ฌ้อง, จ แน่ฌ๊า เครุ้ ลี่ง ดื้ง ล ดื้ง นอ กุ้ ทาง เท่อ ไจ้ะ เว๊, “เฌ๊ เซ้อ”

⁸ ฌ้อง จ แด กซี บ้างเบว้ ล ดื้ง, โพล้ง เทา กซี ล ดื้ง นอ อ เม้ง เมะ เว๊ ท ซี๊ง, พลื่ง ค่าง เฌ๊ โพะ เว๊ อ ไค๊, ท คี๊ง เม้ง อี้ง นอ นี่ แบ อ ดู้ง อ ยาง แม้ ซี๊ง โพล้ง ฌางคู โคล๊ง คู ซี, ลี่ง โป้ง นอ แม้ ซี๊ง ไฆวะ เว๊ ซี ล โป้ง, แม้ ซี๊ง เว๊ ดี๊ น้ะ, ดี๊ ท ซ้ะวี่ง ล้างดุ้, ดี๊ ท เจ้า ท แช๊, ดี๊ ท พูแฆ่ เม้ง

⁹ ท่อง แกะ พู อุ้พ้ะ ทาง ท อ แท๊ เย่ เบง ล เบง นอ ฌ้อง, จ แด แบ วีง แล้ ลู่ง ท แบ้ ทาง อ ล่าง อ พ๊างละ, เก โพล้ง อ วีง อ แล้ กุ้ อ แฌ้ พี่ อ แบ ท แม้ ซี๊ง-อ้ะ, ลู่ง กแช่ แยว้ อ ลู่ง อ แท๊ ดี๊ ลู่ง เก พีงญาง พี่ อ เฌิ่ง อ ค๊า นอ อ กย้อง

¹⁰ อซื๊งเว๊ซีง ล แพ นอ กุ้ ซย้ะ เท่อ เซ๊ พ้ะดู ไจ้ะ เว๊ บี่ อี้ง, “กแช่ ลู่ง อ ฌี้ อ แอว้ ดี๊ อ ที๊ง อ โต้-เอ้อ, ชี่ ไยะ เด้าะ เล้ น ม แม้ เตา แม้ แต๊ ดี๊ แม้ ช๊า ก้ะ โพล้ง พี่ อ โอ ฌางคู โคล๊ง คู, ลู่ง อ แม้ ซี๊ง เฆ้อ อ กย้อง”

¹¹ ฌ้อง โพล้ง ล แพ นอ นี่ แบ ไช๊แค่ แอว้ พ้ะโท๊ กุ้ อ แฌ้, ดี๊ กแช่ แยว้ โล้ เว๊ เกม๊า อ โอ คุ้ ล ปี๊ เด้าะ, โอ ท้อง อ ฌุ้พาง กุ้ อ แฌ้ พี่ อ แม้ กแช่ แยว้ อ เท่อ, เมะ เว๊ อ ด๊างพื่งวี่ นอ ม แบ ท แม้ ซี๊ง-อ้ะ บี่ ซุ้ อซื๊งเว๊ ท้อง อ ชิ้ ทาง

¹² ท่อง อ ช๊าง จ แด แกะ พู อุ้พ้ะ ทาง ท อ แท๊ ฆู๊ง เบง ล เบง นอ ฌ้อง ฌางคู ว้ะ พ้ะดู, มื่ง ไค้ะ ซ๊า ทาง บี่ ซุ้ เต่ กเซ้าะ พี่ โพล้ง ไต้ เว๊ ดี๊ ท พูแฆ่ อ ชอง, แล้ โฌ้ ทาง ด๊าง เบง บี่ ซุ้ ท ซวีง

¹³ แซย ซีง ลู่ง มุ้คู นอ ล้างเทะ ลู่ง ฌางคู คู, บี่ ซุ้ ดี๊ เซง กูงเย้ พี่ ลี้ง พ้ะดู อูง แบ-อ้ะ, ฌ้อง อ แซ พี่ ล คลึ้ เม๊ง ได้ะ แบ นอ ล้างเทะ ไฆวะ เลา ปะ

¹⁴ มุ้คู ล้างแม่ ไฆวะ บี่ ซุ้ ไละ พี่ โพล้ง ทื๊ง ทาง ไท้ เว๊ ท้อง อ เลา, ท ลู่ง กุ้ อ โพลง, ดี๊ เก้าะคู กุ้ อ จอง, แบ ท ซึ้ ไฆวะ-อ้ะ ลู่ง อ ล่าง

¹⁵ ฌ้อง กจุ้แฆว้ กุ้ อ แฌ้ ลู่ง ฌางคู โคล๊ง คู อี้ง, ดี๊ โพล้ง ดู โพล้ง แซย่, ซึ้คู ดู, ซที๊ง, โพล้ง พี่ อ โอ ดี๊ อ ดู้ง อ ยาง, ดี๊ กุ้ อ แฌ้ พี่ อ เก ท อ ฆ่อง ฌี้ ล เก ท อ ฆ่อง แบ ฌี้, โอ คิ้ซูง ลู่ง ท พ้า ท ที่ ดี๊ โล่ง เช้า ไล๊ เช้า ลู่ง ท ลู่ง คู

¹⁶ อซื๊งเว๊ กุ้ ทาง เท่อ โล้ แบ ท ลู่ง ดี๊ โล่ง ล แพ นอ ไจ้ะ เว๊, “ล้างแพล้ แบเท่ง เฆ้อ เซ้อ, อางกี ซูง ไฆวะ เฆ้อ ไช้ะ, เกม๊า ก พ้อง ไฆวะ ดี๊ โพล้ง พี่ อ ชี๊น้าง อ ล่าง ยู่แคว่ เท่อ ล แฌ้ นอ อ เมะ, ดี๊ เกม๊า ก พ้อง ไฆวะ ดี๊ แกะ พู ล แฌ้ นอ อ ท ซ้ะทาง ไช้ะ

¹⁷ อ ไฌ่ บี่ อี้ง ท้อง มื่ง นี้ง พี่ กแช่ แยว้ ดี๊ แกะ พู อ ซ้ะทาง พ้ะดู เย้า, โพล้ง เล้ ม โท่ง เว๊ เก”