ทเนโพลทาง 14 - Northern Pwo Karen Thai Bibleโพล้ง พี่ อ แบ ท แม้ พ้อง พลิ้-อ้ะ นอ อ แท๊ ซ้ะอวีง 1 ฌ้อง จ แคว่ เท่อ, จ แด แกะ พู ชี๊เทิง ลู่ง ท ลู่ง ซีโยง คู, โพล้ง อ แฌ้ ล ล้าง ลี่ง ไซ ลี่ง ม๊า, พี่ อ โอ ดี๊ แกะ พู อ เม้ง ดี๊ อ แพ่ แยว้ อ เม้ง, กวิ้ไน เว๊ ลู่ง อ เมะเทิ่งคู นอ ชี๊เทิง ฆึ ปะ 2 จ แน่ฌ๊า ท อ ลู่ง โอ ลู่ง มุ้คู เฌ๊ เซ๊, เซ๊ ล้างว้าง ล้างซวาง แบ ด้อง ที๊ง ล้างชู๊ง ดี๊ แบ ด้อง ล๊าง เซ๊, ท อ ลู่ง พี่ จ แน่ฌ๊า นอ แบ ด้อง โพล้ง เด้ง ทแน่ 3 โพล้ง ล แพ นอ ชี๊เทิง ลู่ง ท ล่าง ชี๊น้าง ยู่แคว่ เท่อ ดี๊ เครุ้ ลี่ง ดื้ง ดี๊ โพล้ง เม้ง โพล้ง แซย่ ล แพ นอ อ เมะแซ พ้า, อซื๊งเว๊ ซ้ะอวีง ทาง แท๊ อ ซ๊าง พี่ โพล้ง อ แฌ้แพ ซ้ะอวีง เว๊ ล ซี น่าง แฌ้ แบ, โพล้ง ล ล้าง ลี่ง ไซ ลี่ง ม๊า แฌ้ พี่ อ แบ ท ฆวี้ นี่ ไท้-อ้ะ ลู่ง ฌางคู โคล๊ง คู เย้า ล แพ นอ ล้อ ซ้ะอวีง เว๊ ซี 4 โพล้ง ล แพ อี้ง แฌแซ ล้าง อ ซ้ะ ลู่ง อ ฌี้, ล แม้ เบ้า แม้ เท่ง กมืง แบ, แกะ พู ลี้ จอง ฌี้ จอง ฌี้ นอ อซื๊งเว๊ ลี้ โพะ เว๊ อ ไค๊, อซื๊งเว๊ แบ ท ฆวี้ นี่ ไท้-อ้ะ ลู่ง กโพล้ง อ แกล้, บี่ ซุ้ เก ท อ ต้องคู ล มู๊ง พี่ แบ ท เทว๊ เอะ กแช่ แยว้ ดี๊ เทว๊ เอะ แกะ พู 5 โพล้ง ล แพ อี้ง ล ไคล้ คีงอูง เท่อ แบ, อซื๊งเว๊ อ ท ไพ้ะ ท แม ล โอ น่าง เม้ง แบ เฆาะ ท มุ้คู พู ซ๊า แฌ้ โล้ ล้าง เท่อ 6 ฌ้อง จ แด แบ ท มุ้คู พู ล แฌ้ เด้าะ ยู้ง ทาง ลู่ง ท พุ้พ๊าง, โชะ ดี๊ ไละ พี่ อ เก ท ฌี้ อ ไฌ่ ล้างชู้ ล้างแกย นอ, บี่ ซุ้ ม โล้ ล้าง เอะ โพล้ง ฌางคู คู กุ้ ชื้อ กุ้ ชะ กุ้ ที๊ง กุ้ ค่าง 7 อ เว๊ โล้ ล้าง เท่อ อ ลู่ง เซ๊ พ้ะดู ไจ้ะ เว๊, “ดู้ง แบ ยาง แบ กแช่ แยว้ ดี๊ อางปฆ้า ทาง กแช่ แยว้, อ ไฌ่ บี่ อี้ง ท้อง อ มื่ง อ แค๊ พี่ กแช่ แยว้ ม ต้ะเซ๊ง โพล้ง ฌางคู โคล๊ง คู เย้า, โบง ทาง แบ้ ทาง กแช่ แยว้ พี่ อ ไต้ ล้าง มุ้คู, ฌางคู, ปางเล ดี๊ ไต้ ล้าง ที๊ง ทางชุ้ ซีง ล แพ นอ ไช้ะ” 8 ฌ้อง ท มุ้คู พู คี๊ง แฌ้ ล แฌ้ นอ ไจ้ะ เว๊, “เว่ง พ้ะดู บาบีโลง ล้างฆ่อง เย้า, ล้างฆ่อง เย้า, เว่ง อ อี้ง เกม๊า โพล้ง กุ้ อ แฌ้ โอ้ ซไบ้ะ แซ ที๊ง, ซไบ้ะ แซ ที๊ง ลู่ง อ ชอง นอ เมะ เว๊ ท ซ้ะกวี้ง ล๊องก้อง ลู่ง ท แม้ กแม มืง กแม แคว๊” 9 ฌ้อง ท มุ้คู พู ล แฌ้ แด เด้าะ นอ ไจ้ะ เว๊, “กเย่ โพล้ง พี่ อ โบง ทาง แบ้ ทาง ท พูแฆ่ อ้า อ วี่งคู ล ดื้ง, ดี๊ โบง ทาง แบ้ ทาง เว๊ อ เค่ง อ ฌ้าง, ดี๊ นี่ แบ ท แม้ไน ลู่ง อ เมะเทิ่งคู ฌี้, ลู่ง อ จูง ล้อง ฌี้ 10 โพล้ง ล แพ นอ แบ โอ้ กแช่ แยว้ อ ซไบ้ะ แซ ที๊ง, เมะ เว๊ กแช่ แยว้ อ ท ซ้ะทาง พี่ อ ลู๊ง ล้าง เว๊ ลู่ง โล๊ง ท ซ้ะทาง อ พ้า, ล แกย้ ฆึ เว๊ ดี๊ ท น่าง เม้ง แบ, โพล้ง กุ้ อ แฌ้ พี่ อ โอ้ เว๊ นอ ม แบ ท แม้ เทะทอง ปได้-อ้ะ ดี๊ มี ดี๊ ท ซ อวี้ง น๊า ม๊าง ลู่ง กแช่ แยว้ อ ท มุ้คู พู ดี๊ แกะ พู อ เมะแซ พ้า 11 มี พี่ อ แม้ เทะทอง ปได้-อ้ะ นอ คูง ทาง ล้างชู้ ล้างแกย, โพล้ง กุ้ อ แฌ้ พี่ อ โบง ทาง แบ้ ทาง ท พูแฆ่ อ้า, ดี๊ โบง ทาง แบ้ ทาง เว๊ อ เค่ง อ ฌ้าง, ดี๊ นี่ แบ ท แม้ไน เก ท พูแฆ่ อ้า อ เม้ง, โพล้ง ล แพ นอ ม แบ น้ะ แบ โน๊ง เลา มแน้ เลา มแช๊ 12 ท บี่ นอ กแช่ แยว้ อ พู อ ลี้ง แบ โอ โก้ง เท่อ เก, กแช่ แยว้ อ พู อ ลี้ง ล แพ นอ เมะ เว๊ โพล้ง พี่ อ แม้ โพะ กแช่ แยว้ อ ทอางแม้เลา อ ไค๊ ดี๊ แม้ อ ซ้ะ โต้ๆ, ล้องๆ, ดี๊ กแช่ เยซู นอ ล้อ” 13 ฌ้อง จ แน่ฌ๊า ท อ ลู่ง โอ ลู่ง มุ้คู โซ๊ง ล้าง ไจ้ะ เว๊ บี่ อี้ง, “กวิ้ ล้าง ท ไคล้ ล แพ อี้ง, ท้อง อี้ง ชู่ง แย๊ โพล้ง พี่ อ ซี๊ง ไฆวะ ลู่ง อ ทื๊ง กแช่ เยซู อ กย้อง นอ โอ ดี๊ ท มึ ท พ้า ล้อ” วีง ฌี้ แล้ แอว้ ไจ้ะ เว๊, “เมะ เต้ๆ, เย้า, อซื๊งเว๊ ม โอ ไปว้ะ แด ไฆวะ อ ท ไพ้ะ ท แม้ ลู่ง อ ฆ๊า อ น้ะ ล้อ, อ ไฌ่ บี่ อี้ง อซื๊งเว๊ ม นี่ แบ ท อ ซูง อ แซ ลู่ง อ ท ไพ้ะ ท แม้ อ กย้อง” ท ฆี๊ นี่ เก้า นี่ ลู่ง ฌางคู โคล๊ง คู 14 ฌ้อง จ แด แบ ท เอิง แอว้ ล ลอง, โพล้ง โอ ล แฌ้ แบ ด้อง กแคว๊ ชี๊น้าง ลู่ง ท เอิง คู นอ, อ เว๊ นอ คลึ คูคล้าง ท๊อง, อ จูง พ้า นอ โชะ ดี๊ ท้ะเฌะ ไอ บึ้ชึ ล เบง 15 ท มุ้คู พู ล แฌ้ เด้าะ โอ ลู่ง เว่งฮ๊าง พ้า ลู่ง ท มุ้คู ไจ ทาง, โล้ เอะ โพล้ง พี่ อ โอ ท เอิง คู ล แฌ้ นอ อ ลู่ง เซ๊ พ้ะดู ไจ้ะ เว๊ แด, “เจ่ น ท้ะเฌะ นอ เก้า นี่ เท่อ ลู่ง ฌางคู โคล๊ง คู เซ้อ, อ ไฌ่ บี่ อี้ง อ มื่ง อ แค๊ แบ เย้า, ท้อง อ ช๊า อ โท่ พี่ แบ เก้า นี่ เท่อ ฌางคู โคล๊ง คู เย้า” 16 ท่อง อ ช๊าง โพล้ง พี่ อ ชี๊น้าง ท เอิง คู ล แฌ้ นอ เยา ล้าง อ ท้ะเฌะ ลู่ง ฌางคู โคล๊ง คู, ฌ้อง ฌางคู โคล๊ง คู แบ ท เก้า ไฆวะ-อ้ะ นอ ล้อ 17 ฌ้อง จ แด แบ ท มุ้คู พู ล แฌ้ เด้าะ, โอ ลู่ง เว่งฮ๊าง พ้า ลู่ง ท มุ้คู ไจ ทาง, เฌ๊ โชะ ดี๊ ท้ะเฌะ ไอ บึ้ชึ ล เบง ปะ 18 ฌ้อง ท มุ้คู พู ล แฌ้ เด้าะ, พี่ อ โอ คุ้แคว่ มี นอ โอ ลู่ง ท แบ้ ทาง อ ล่าง ไจ ทาง, อ เว๊ กุ้ ซย้ะ ทาง เท่อ โล้ แบ ท มุ้คู พู พี่ อ โชะ ท้ะเฌะ นอ ไจ้ะ เว๊, “เจ่ น ท้ะเฌะ นอ เก้า ไฆวะ ซไบ้ะ อ เชา พี่ อ โอ ฌางคู โคล๊ง คู นอ เซ้อ, อ ไฌ่ บี่ อี้ง ซไบ้ะ แซ นอ เม๊ง ฌี้ เย้า” 19 ท มุ้คู พู นอ เยา ล้าง อ ท้ะเฌะ ลู่ง ฌางคู โคล๊ง คู เก้า นี่ ซไบ้ะ แซ นอ ลู่ง อ มื่ง ล้อง, ฌ้อง ไควะ ล้าง เว๊ ลู่ง ท ล่าง ไย่ นี่ ซไบ้ะ แซ นอ อ พ้า, อ นอ เมะ เว๊ ท ล่าง พี่ กแช่ แยว้ ปล้ะ ล้าง อ ท ซ้ะทาง 20 ซไบ้ะ แซ นอ แบ ท ไย่ นี่-อ้ะ ลู่ง เว่ง โคล๊ง, ฌ้อง ท ซวีง ลู่ง ท ไย่ นี่ อ ล่าง นอ แยว้ ล้าง ไย้ โยะ เมาะ อ กีโล ซ๊า แย้, เมะ อ โยะ ล โค๊ นอ เมาะ ลี่ง แพล่ |
Pwo Karen Bible (Thailand) © Thailand Bible Society, 2016.
Thailand Bible Society